ན་མོ་གུ་རུ་མཉྫུ་གྷོ་ཥཱ་ཡ། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། །དམར་སེར་འོད་ཀྱི་དྲ་བ་འཁྱུག་པ་ཡིས། །སྐལ་ལྡན་རྣམས་ཀྱི་མིག་ལ་དཔལ་སྟེར་བ། །རྒྱལ་སྲས་གཞོན་ནུས་རྟག་ཏུ་སྐྱོང་གྱུར་ཅིག །ལེགས་པར་སྤྱད་ན་གཏན་གྱི་བདེ་སྟེར་བའི། །རྗེས་སུ་བསྟན་པ་མཐུན་པར་མི་འཛིན་པ། །དེ་དག་རྣམས་ལའང་ལྷག་པར་རྗེས་བརྩེ་བ། །ཁྱོད་ཀྱི་རྣམ་པར་ཐར་པ་དེ་རྨད་དོ། །མ་རུངས་འགྲོ་བ་སྒྲོལ་བའི་ཁུར་གྱིས་ནི། །གནས་སྐབས་འགར་ཡང་ངལ་བར་མི་མཛད་པ། །ཚུལ་འདི་རིག་ན་སེམས་དང་ལྡན་པ་རྣམས། །གཉེན་ཁྱོད་མགོན་དུ་མི་བསྟེན་སུ་ཞིག་ཡོད། །གང་ནས་ཞུས་ཀྱང་མི་གསན་མེད། །འགྲོ་བ་ཀུན་ལ་མཚུངས་པར་བྱམས། །མཆོད་སྦྱིན་མཛད་པའི་དབང་པོ་སྟེ། །དེ་སྒྲུབ་པའང་གཡེལ་བ་སྤངས། །དེ་ཕྱིར་ཁྱེད་ལ་སྐྱབས་བཅས་པའི། །སྐྱེ་བོ་འདི་ཡིས་ད་དུང་ཡང་། །འདོད་པའི་དོན་འགའ་གསོལ་བགྱིད་ན། །ཕོངས་པའི་རེ་བ་འབྲས་ལྡན་མཛོད། །བདེ་ལེགས་འདོད་ཀྱང་ཆེད་དུ་སྤངས་པ་བཞིན། །ཕྱི་ཕྱིར་སྡུག་བསྔལ་བརྒྱ་ཡི་རླབས་འཕྲེང་གིས། །ཀུན་ནས་གཡོ་བའི་སྲིད་པའི་རྒྱ་མཚོར་ལྷུང་། །ད་དུང་གཏིང་མཐའ་མ་མཐོང་འཁྱམས་པ་འདི། །དམ་པའི་བཤེས་ཀྱིས་རྗེས་སུ་བཟུང་བ་དང་། །དེ་ཡི་རྨད་བྱུང་གདམས་པའི་སྣོད་གྱུར་པ། །འདི་གཉིས་དང་ནི་བྲལ་བ་ཁོ་ནས་ནོངས། །དེ་ཕྱིར་མགོན་པོ་ཁྱོད་ལ་གསོལ་བ་ནི། །བདག་ཅག་སྲིད་ནས་སྲིད་དུ་རྒྱུ་བ་ན། །རིང་ནས་སྐྱབས་སུ་བཟུང་བའི་ལྷག་པའི་ལྷ། །རྗེ་བཙུན་ཁྱོད་ཀྱིས་ནམ་ཡང་མི་འབྲལ་བར། །ཐེག་པ་མཆོག་གི་བཤེས་མཉེན་མཛད་པ་དང་། །འདི་ན་བྱེད་པོ་འགའ་ཡང་མེད་པས་ན། །རང་གི་རྟོགས་པ་གཞན་ལ་སྦྱིན་དུ་མེད། །དེ་ཕྱིར་དམ་པའི་མགོན་གྱིས་བཟུང་བ་ན། །དེ་ཡི་གདམས་པའི་སྣོད་དུ་འགྱུར་བའི་ཕྱིར། །བདག་གིས་བགྱིས་དང་བགྱིད་འགྱུར་བསོད་ནམས་གང་། །མ་ལུས་བསམ་པ་དག་པས་ཡོངས་སུ་བསྔོ། །བློ་ལྡན་རྣམས་ཀྱི་སྨོན་ལམ་མཆོག་གི་གནས། །འདི་ནི་བདེ་བླག་འགྲུབ་པར་མཛད་དུ་གསོལ། །ཁྱོད་ཀྱི་སྐུ་ལ་སེམས་པའི་ཏིང་འཛིན་དང་། །ཉིད་ཀྱི་གསང་སྔགས་ཚུལ་བཞིན་བགྲང་ལ་སོགས། །ནང་གི་ཡན་ལག་གུས་པས་རབ་བསྒྲུབ་མོད། །འོན་ཀྱང་བདག་ཅག་བསམ་པའི་སྟོབས་ཞན་པས། །ཕྱི་ཡི་ཡན་ལག་གཙོ་བོ་མགོན་ཁྱོད་ཀྱིས། །བདག་ལ་མ་བསྟན་ན་ནི་ལམ་གྱི་སྲོག །དྲི་མེད་རྣམ་དཔྱོད་རྙེད་པར་མི་འགྱུར་བས། །རྒྱུན་མི་འཆད་པར་རྗེས་སུ་དགོངས་པར་རིགས། །རྗེ་བཙུན་ཁྱེད་ཀྱིས་བདག་ལ་དགོངས་པའི་མཐུས། །སྐྱེ་དགུའི་དོན་གཉིས་འགྲུབ་པའི་ལམ་གྱི་གནད། །ཇི་བཞིན་རྟོགས་པའི་ཤེས་རབ་འཕེལ་བ་དང་། །དེ་དོན་སྒྲུབ་ལ་གཡེལ་བ་མེད་པར་ཤོག །མདོར་ན་རྒྱལ་བའི་བསྟན་པའི་གནད། །གསལ་བར་མཐོང་ཞིང་དེ་ཡི་ཚེ། །སྙིང་རྗེ་ཆེན་པོས་ཡིད་དྲངས་ནས། །ཀུན་ལའང་དེ་ལྟར་འདོམས་པར་ཤོག །འཇམ་པའི་དབྱངས་ལ་བསྟོད་པའི་གཙོ་བོ་གཉིས། །ཡོངས་སུ་འགྲུབ་པར་གསོལ་བའི་ཚིགས་བཅད་འདི། །འཇམ་དཀར་ཞེས་གྲགས་འཇམ་དཔལ་ཆོས་བཟང་གིས། །གསོལ་བ་བཏབ་ཕྱིར་བློ་བཟང་གྲགས་པས་སྦྱར། །

                                                          རྩོམ་སྒྲིག་པ། ནོར་བཟང་རྒྱ་མཚོ།
      གསལ་འདེབས།། 
     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
     དྲ་བའི་སྦྲེལ་ཐགhttp://www.tb1025.cn