རྒྱལ་བ་མི་འཁྲུགས་པའི་བསྟོད་པ།
སྭསྟི། སྔོན་ཚེ་འཇིག་རྟེན་རྣམ་པར་འདྲེན་པའི་མཆོག །སྤྱན་ནི་ཆེན་པོ་ཞེས་གྲགས་རྒྱལ་བ་བྱུང་། །ཐུབ་མཆོག་སྤྱན་སྔར་རབ་ འབྱམས་སྨོན་ལམ་ཚོགས། །དཔག་མེད་བཏབ་ནས་ལེགས་པར་བཟུང་བ་ཡི། །མངོན་པར་དགའ་བ་ཞེས་བྱ་དག་པའི་ཞིང་། །དེ་དབུས་བྱང་ཆུབ་ཤིང་གི་དྲུང་ཉིད་ན། །རི་དབང་ལྟ་བུར་རབ་བརྗིད་མི་འཁྲུགས་པ། །འཇིག་རྟེན་འོད་ཀྱིས་འགེངས་ལ་ཕྱག་འཚལ་ལོ། །རིན་ཅེན་སེམས་མཆོག་ཐོག་མར་བསྐྱེད་པ་ནས། །མ་ཞུམ་གོ་བགོས་ཡོན་ཏན་བརྙེས་པ་ལ། །བསྐལ་བཟང་སེམས་དཔའ་རྣམས་ཀྱི་ནང་ན་ཡང་། །ཁྱོད་འདྲའི་རྒྱལ་སྲས་གཅིག་ཀྱང་མེད་པར་གསུངས། །དེ་ཕྱིར་ཁྱོད་ནི་ལམ་ལ་སློབ་ཚེ་ཡང་། །རྒྱ་ཆེན་སྤྱོད་པའི་རྒྱན་གྱིས་རབ་མཛེས་པས། །བློ་ལྡན་ཕལ་ཆེར་ཟིལ་གྱིས་མནན་མཛད་ནས། །སྤྱོད་མཆོག་མཐར་ཕྱིན་མཛད་ལ་ཕྱག་འཚལ་ལོ།
བདེ་གཤེགས་མཚན་དཔེའི་དཔལ་གྱི་བསྟོད་པ།
སྭསྟི། གདེངས་ཅན་དབང་པོས་བཟུང་བའི་འདབ་བརྒྱ་པ། །ཡིད་འོང་གེ་སར་སྟེང་ན་གང་གི་སྐུ། །མཚན་དཔེའི་དཔལ་གྱིས་ཀུན་ནས་ལྷམ་མེ་བ། །ཐུབ་པ་གསེར་ཞུན་སྐུ་མངའ་དེ་ལ་འདུད། །ཁྱོད་སྐུ་མཐོང་བར་གྱུར་པ་ཙམ་ལ་ཡང་། །སྲིད་པའི་འཆིང་བ་བཅད་པའི་རྣམ་གྲོལ་བདེ། །བདེ་བླག་ཉིད་དུ་སྟེར་མཛད་བདེ་གཤེགས་མཆོག །མཐོང་བ་དོན་ལྡན་ཁྱོད་ལ་ཕྱག་འཚལ་ལོ། །
རྒྱལ་བ་རྡོ་རྗེ་རྣམ་གནོན་ལ་བསྟོད་པ།
སྭསྟི། ཀུན་ནས་ཡོངས་སུ་དག་པའི་འཇིག་རྟེན་དུ། །རྣམ་པར་སྦྱོང་བ་ཞེས་བྱའི་བསྐལ་པ་ལ། །སྟོབས་བཅུའི་གོ་འཕང་མཆོག་ལ་རེག་འགྱུར་བ། །རྒྱལ་བ་རྡོ་རྗེ་རྣམ་གནོན་ལ་ཕྱག་འཚལ། །ཐེག་མཆོག་གཏམ་གྱིས་འགྲོ་ལ་འདོམས་པ་ན། །ཞིང་ཀུན་འགེངས་པའི་འོད་དཔུང་ཕྱོགས་བཅུར་འགྱེད། །དེ་ཚེ་ལྷ་མི་རྣམས་ནི་རྫུ་འཕྲུལ་དང་། །བདེ་གཤེགས་མཐུ་ཡིས་རྒྱལ་བའི་དྲུང་དུ་ལྷགས། །དེ་ནས་ཏ་ལ་བདུན་གྱི་སྲིད་ཙམ་དུ། །མཁའ་ལ་འཕགས་ཤིང་གླིང་བཞི་ཆེན་པོའི་ཁྱོན། །སྐུ་ཡིས་ཁྱབ་མཛད་ཡིད་འཕྲོག་གསུང་དབྱངས་ཀྱིས། །ཀུན་གྱི་བསམ་པ་ཚིམ་མཛད་དེ་ལ་འདུད། །
བདེ་གཤེགས་སྨན་བླ་ལ་བསྟོད་པ།
སྭསྟི། རླབས་ཆེན་སྨོན་ལམ་བཅུ་གཉིས་གྲུབ་པ་ཡིས། །མཚན་ཙམ་ཐོས་པས་ཉེར་འཚེ་ཐམས་ཅད་འཇོམས། །འགྲོ་བའི་ཟུག་རྔུ་དྲུངས་འབྱིན་སྨན་པའི་མཆོག །བདེ་གཤེགས་སྨན་གྱི་བླ་ལ་ཕྱག་འཚལ་ལོ། །མི་མཇེད་ཞིང་ནས་ཤར་གྱི་ཕྱོགས་ཉིད་དུ། །གངྒཱའི་ཀླུང་བཅུའི་ཞིང་གི་བྱེ་མ་སྙེད། །འདས་པའི་ཞིང་ན་ངོ་མཚར་རྨད་ཀྱི་ཞིང་། །བེེ་ཌཱུརྱ་ལྟར་སྣང་བའི་ཞིང་མཆོག་ཡོད། །དེ་ན་སྟོབས་བཅུ་མངའ་བ་སྨན་གྱི་བླ། །རང་གི་དམ་ཆོས་མཛོད་འཛིན་ཉི་ཟླ་ལྟར། །སྣང་བྱེད་སྲས་ཀྱི་ཐུ་བོ་གཉིས་ལ་སོགས། །དཔག་མེད་འཁོར་གྱི་དབུས་ན་ཆོས་སྒྲ་སྒྲོགས། །དྲི་མེད་བེེ་ཌྰུརྱ་ཡི་རི་བོ་བཞིན། །གསལ་མཛེས་དག་པའི་སྐུ་ལས་བྱུང་བ་ཡི། །རྒྱ་ཆེན་འོད་ཀྱིས་ཞིང་ཀུན་གསལ་མཛད་པ། །འོད་ཀྱི་རྒྱལ་པོ་ཁྱོད་ལ་ཕྱག་འཚལ་ལོ། །
སྤྱན་རས་གཟིགས་ཀྱི་བསྟོད་པ།
སྭསྟི། ཐབས་ལ་མཁས་པའི་ཚད་མེད་ཐུགས་རྗེ་ཅན། །གཅིག་ཏུ་བསྡུས་པ་འཕགས་མཆོག་ཐུགས་རྗེའི་ལྷ། །འགྲོ་བའི་གཉེན་གཅིག་རྗེ་བཙུན་སྤྱན་རས་གཟིགས། །ཐུགས་རྗེ་ཆེན་པོ་ཁྱོད་ལ་ཕྱག་འཚལ་ལོ། །གངས་རིའི་དབང་པོ་ལྟར་མཛེས་སྐུ་ཡི་ཁྱོན། །ཉམ་ཐག་འགྲོ་བའི་དོན་དུ་བཞེངས་པ་ནི། །འོ་མའི་མཚོ་ཆེན་འཁྱིལ་བའི་མཐའ་ཀུན་ཏུ། །པདྨ་དམར་པོའི་ཕྲེང་བས་བསྐོར་བ་བཞིན། །དྲི་མེད་སྤྱན་གྱིས་གཟིགས་པའི་འགྲོ་བ་ཀུན། །ཐུགས་རྗེའི་ཕྱག་གིས་དྲངས་ནས་སྐྱོབ་མཛད་པ། །སྐྱོབ་པ་འོད་དཔག་མེད་པའི་སྲས་ཀྱི་མཆོག །སྤྱན་སྟོང་མངའ་བ་ཁྱོད་ལ་ཕྱག་འཚལ་ལོ། །
སྤྱན་རས་གཟིགས་ཁ་སརྤ་ཎི་ལ་བསྟོད་པ།
སྭསྟི། མཆོག་ཏུ་དུལ་བའི་རི་དྭགས་ལྤགས་པ་ཕྲག་པ་གཡོན་ནས་སེ་རལ་ཁར་འཛིན་ཅིང་། །བུང་བར་ལྟར་གནག་རལ་བའི་ཁུར་གྱིས་མཛེས་ཤིང་ཟླ་ཟེར་དུང་ལྟར་དཀར། །བུད་མེད་སྐེམ་པའི་མཛེས་པའི་སྐེད་སྐབས་གཡོན་གྱི་ཕྱོགས་སུ་ཡིད་ཙམ་འཁྱོགས། །པད་ཟླའི་སྟེང་ན་གཡས་རོལ་སྟབས་ཀྱིས་ཀུན་ནས་བརྗིད་པའི་འགྱིང་བག་ཅན། །ཕྱག་གཡས་མཆོག་སྦྱིན་སྤྲིན་གྱིས་བདུད་རྩིའི་ཆར་འབེབས་ཡི་དྭགས་རེ་བ་སྐོང་། །ཉེས་བརྒྱས་གོས་པ་མེད་མཚོན་པད་དཀར་སྡོང་བུ་གཡོན་གྱིས་ཐུགས་ཀར་འཛིན། །མཐོང་ཐོས་དྲན་པ་ཙམ་གྱིས་སྲིད་པའི་འདམ་ནས་འགྲོ་བ་འདྲེན་མཛད་པ། །ཁ་ས་རྤ་ཎི་བདག་གི་ཡིད་ལ་དེང་ནས་འབྲལ་བ་མེད་གྱུར་ཅིག །
རྩོམ་སྒྲིག་པ། ནོར་བཟང་རྒྱ་མཚོ།
གསལ་འདེབས།།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
