རྗེ་ཀརྨ་པ་མི་བསྐྱོད་རྡོ་རྗེས་རྗེ་ཙོང་ཁ་པར་བསྟོད་པ།
རྗེ་བཙུན་བྱམས་པ། འཇམ་དབྱངས། མཁན་ཆེན་ལས་ཀྱི་རྡོ་རྗེ། བླ་མ་དབུ་པ་སྟེ་འཇམ་དབྱངས་ཀྱི་བཀའ་བརྒྱུད་རྨོངས་པའི་དྲི་མ་ཐམས་ཅད་དང་བྲལ་བར་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། བྱིན་གྱིས་རླབས་ཏུ་གསོལ།
བྱང་གི་ཕྱོགས་འདིར་རྒྱལ་བའི་བསྟན་པ་ལ། །
ཕལ་ཆེར་ལོག་པ་འབའ་ཞིག་སྤྱོད་པའི་སྐབས། །
འཁྲུལ་མེད་བྱི་དོར་མཛད་པའི་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །
ས་དྭགས་བཀའ་གདམས་སྲོལ་འཛིན་གསང་ཕུ་བ། །
བོད་ཡུལ་བསྟན་པ་ནུབ་ཏུ་ཉེ་བ་ན། །
ཉིད་བསྟན་གསར་པས་ཁྱབ་མཛད་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི ། །
འཇམ་དཔལ་དབྱངས་ཀྱིས་ཁྱོད་ལ་ལྷག་པར་ཡང་། །
ཀླུ་སྒྲུབ་ལུགས་ཀྱི་ལེགས་བཤད་ཉིན་བཞིན་སྩལ། །
སྔོན་མེད་དབུ་མའི་སྲོལ་འཛིན་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
གཟུགས་སོགས་གཟུགས་ཀྱི་ངོ་བོས་མི་སྟོང་ཡང་། །
རང་བཞིན་གྱིས་གྲུབ་གཟུགས་ཀྱི་སྟོང་པ་ཡི། །
སྟོང་ཉིད་སྨྲ་བའི་ཁྱུ་མཆོག་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
ཁྱོད་ཀྱིས་ལ་ཤས་ཅུང་ཟད་ཙམ་ཞིག་ལ། །
རྒྱ་ནག་ནས་བཟུང་རྒྱ་གར་ཁ་ཆེའི་བར། །
ངུར་སྨྲིག་འཆང་བས་ཁྱབ་མཛད་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི།།
ཁྱོད་ཀྱི་སློབ་མར་གྱུར་ན་སླར་ཕྱིན་ཆད། །
ཉིད་ལ་སྟོན་དང་བསྟོན་པ་ཕྱིར་ཕྱོགས་པར། །
མི་གཏོང་གཏན་གྱི་སྐྱབས་གཅིག་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
ཁྱོད་ཀྱི་རྗེས་སུ་སློབ་པའི་སློབ་མ་ཀུན། །
ཐེག་ཆེན་ལམ་གྱིས་དབུག་དབྱུང་གཞན་དོན་དུ། །
ལུས་སྲོག་ཆེས་ནོར་གཏོང་འཇུག་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི། །
ཁྱོད་བསྟན་ཚུལ་འདིར་སྡང་བས་ཞུགས་འགའ་ལ། །
བཀའ་སྲུངས་དྲག་པོའི་ཆད་པ་བཙན་པོ་ཡིས། །
ཆོས་བཞིན་སྐྱོང་བའི་རྒྱལ་བ་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི། །
བསགས་སྦྱངས་སོང་དང་མ་སོང་སྐྱེ་བོ་འགས། །
དྲན་པ་ཙམ་གྱིས་དངོས་དང་རྨི་ལམ་དུ། །
བྱོན་ནས་ཐུགས་རྗེས་གཟིགས་པའི་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི ། །
བྱང་ནས་བྱང་ཕྱོགས་ཧོར་སོགས་མདོ་ཁམས་ཡུལ། །
མི་དང་མི་མིན་ཆོས་འདུལ་རིན་ཆེན་གྱིས། །
འདུལ་དཀའ་གདུལ་བའི་སྟོབས་ལྡན་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
བསྟན་པ་དངོས་ལ་བཀོད་པར་མ་ནུས་རྣམས། །
སྔོན་གྱི་ལས་ངན་སྡིག་སྒྲིབ་ཟད་ཕྱིར་དུ། །
བསགས་སྦྱངས་མྱུར་དུ་སྒྲུབ་འཇུག་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
ཁྱོད་ལ་སྙིང་ནས་སྐྱབས་སུ་སོང་བ་རྣམས། །
འདི་ཕྱིའི་དཔལ་འབྱོར་གཞན་དྲིན་མ་ཡིན་པར། །
ཇི་ལྟར་བསམ་བཞིན་རེ་སྐོང་ཙོང་ཁ་པ།
རི་བོ་དགའ་ལྡན་པ་ལ་བསྟོད་པར་བགྱི །།
གང་གིས་ལེགས་པར་བཤད་པའི་ཆོས་ཚུལ་ལས། །
འདའ་བ་ཞིང་འདིར་གནས་པ་བཀག་མཛད་ནས། །
འཇིག་མེད་བསྟན་པ་འཛུགས་པའི་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
ཁྱོད་ཀྱི་བརྟུལ་ཞུགས་བཟང་པོ་ཉེར་བསྟན་པ། །
མཚུངས་མེད་གཟུགས་དང་དྲི་མཆོག་ངད་ལྡན་པའི། །
མཉེས་ཤིང་དུལ་བར་མཛད་པའི་ཙོང་ཁ་པ། །
རི་བོ་དགའ་ལྡན་པ་ལ་བསྟོད་པར་བགྱི །།
དེ་ལྟར་དད་པས་མཆོད་བསྟོད་དགེས། །
ཉིད་བསྟན་སྤེལ་བར་མཛད་རྣམས་ཀྱང་། །
བུ་རམ་ཤིང་པའི་འཕྲིན་ལས་པའི། །
རིང་ལུགས་རྗེས་སུ་འཇུག་ཕྱིར་བསྔོ།
༼ཞེས་པ་འདི་ནི་ཙཱ་རི་ཊའི་རི་སུལ་ལྷའི་མཆོག་ནོར་བུའི་མེ་ཏོག་ཐལ་མོ་སྙིང་གར་སྦྱར་བའི་གནས་སུ་གཞན་དྲིང་མེད་པའི་རྗེ་དེ་ཉིད་ལ་མི་ཕྱེད་པའི་དད་པ་ལྡན་པ་ཀརྨ་པའི་མཚན་གྱིས་འཇུག་པ་མིང་གཞན་ཀརྨ་པ་མི་སྐྱོད་རྡོ་རྗེས་སྦྱར་བའོ༎
ཡང་ཁོང་གིས།
བོད་ཁ་བ་ཅན་གྱི་རྒྱལ་ཁམས་འདིར།
རྟག་ཙམ་གྱིས་འདུལ་བ་འཛིན་པའི་དུས། །
རྗེ་བློ་བཟང་གྲགས་པ་བྱ་བ་དེས། །
བཅོམ་ལྡན་ཤཱཀྱ་ཐུབ་ཀྱི་ཚུལ་བཟུང་ནས། །
ངུར་སྨྲིག་གི་རྒྱལ་མཚན་འཛིན་མཛད་པས། །
སྔོན་ཤཱ་རིའི་བུ་འདྲ་བགྲང་ཡས་ཀྱིས། །
འཛམ་གླིང་གི་རྒྱལ་ཁམས་གང་བར་མཛད། །
རྗེ་དེ་ལ་མི་དད་སུ་ལ་དད། །
སྔོན་ཕྲག་དོག་གི་དྲི་མས་སྡང་ཞན་སྐྱེས།།
དུས་དེ་རིང་འགྱོད་པས་མཐོལ་ཞིང་བཤགས། །
སྡིག་གྲོགས་ཀྱི་ཟིན་པ་མ་ཤེས་པར། །
གཏི་མུག་གིས་བགྱིད་པ་གནོང་ཞིང་འགྱོད། །
སྐྱེ་བ་ནས་ཚེ་རབས་ཏུ་རྗེས་འཛིན་མཛོད༎
ཅེས་སོ༐
