མ་ལུས་ཕྱོགས་དུས་རྒྱལ་བའི་མཁྱེན་རབ་གང་།།

གཅིག་བསྡུས་རྗེ་བཙུན་ངག་གི་དབང་ཕྱུག་ནི།།

ངུར་སྨིག་འཛིན་པའི་གཟུགས་སུ་རྣམ་རོལ་བ།།

མཚུངས་མེད་བློ་བཟང་རྒྱལ་བའི་དབང་བོ་ཁྱོད།།

 

རྙོག་བྲལ་ཡིད་ཀྱི་རྒྱ་མཚོ་དྭངས་པའི་ངོས།།

དད་པའི་འདབ་སྟོང་བཞད་པའི་གེ་སར་ལ།།

དགྱེས་པར་བཞུགས་ནས་མོས་ལྡན་བདག་ཅག་གིས།།

བསྟོད་པའི་མེ་ཏོག་འཐོར་ལ་ཡུད་ཙམ་དགོངས།།

 

སྟོན་པ་མཆོག་དེས་དཔག་མེད་དཀའ་བ་ཡིས།།

བསྒྲུབས་པའི་ཆོས་ཚུལ་ཡིད་བཞིན་རིན་པོ་ཆེ།།

བཤད་དང་སྒྲུབ་པའི་རྒྱལ་མཚན་རྩེར་འགོད་པའི།།

སྙིང་སྟོབས་རྡོ་རྗེ་དམ་བཅའ་ཁྱོད་ཀྱིས་བཞེས།།

 

རྒྱུ་སྐར་ཕྲེང་བར་རྒྱུ་སྐར་བདག་པོ་བཞིན།།

རྒྱལ་སྲས་རྒྱ་མཚོའི་དབུས་ན་ཁྱོད་ཉིད་ནི།།

རྒྱལ་བའི་རྒྱལ་ཚབ་གཅིག་བུར་བསྔགས་པ་ཡི།།

སྒྲ་དབྱངས་མཐའ་ཡས་རྒྱལ་བའི་ཞིང་ཀུན་ཁྱབ།།

 

རྨད་བྱུང་རྒྱལ་སྲས་ཐུ་བོའི་རྣམ་ཐར་མཐའ།།

རྫོགས་ཀྱང་ད་དུང་བྱིས་པའི་རོལ་རྩེད་ཀྱིས།།

བསྟན་ལ་རིམ་གྱིས་སློབ་པའི་བརྫུ་བག་འདིས།།

ཡང་དག་ལམ་ལ་སྐྱེས་པོའི་ཚོགས་ཀུན་དྲོངས།།

 

རབ་འབྱམས་མདོ་དང་རྒྱུད་སྡེའི་ཟབ་གནད་ཀུན།།

ཇི་བཞིན་མ་ནོར་འབྱེད་པའི་རྣམ་དཔྱོད་ཀྱིས།།

མང་དུ་ཐོས་པ་རྒྱ་མཚོའི་ཚུལ་འཆང་བས།།

ལེགས་བཤད་བྱེ་བའི་ཆུ་ཀླུང་གནས་སུ་གྱུར།།

 

སྣ་ཚོགས་གཞུང་ལུགས་སོ་སོའི་དགོངས་པའི་དོན།།

རང་བཟོའི་དྲི་མ་གཞར་ཡང་མ་མཆིས་བར།།

ཚུལ་བཞིན་འགྲེལ་བར་བྱེད་ལ་ཁྱོད་དང་ནི།།

མཚུངས་པ་མེད་ན་ལྷག་པ་ལྟ་ཅི་ཞིག།

 

འདི་ན་གྲུབ་མཐའི་ཚུལ་དང་ཐེག་པའི་གཞུང་།།

རང་འདོད་ཕྱོགས་སུ་ལྷུང་བས་རྣམ་པར་དཀྲུགས།།

ཁྱོད་ནི་རྒྱལ་བའི་བསྟན་པ་འབའ་ཞིག་གིས།།

དབང་བྱས་ཕྱོགས་མེད་གཟུ་བོའི་ལམ་ལ་རྒྱུ།།

 

ཐོག་མེད་སྲིད་པའི་ས་བོན་དངོས་ཞེན་དགྲའི།།

སྲོག་ལ་བདག་མེད་ལྟ་བའི་མཚོན་འདེབས་པར།།

ཁྱོད་ཉིད་ལྷག་པར་སྒྲིན་པའི་ངང་ཚུལ་གྱིས།།

བདུད་ཀྱི་སྡེ་ཆེན་ཕམ་པའི་ཆོ་ངེ་བསྒྲགས།།

 

སྲས་བཅས་རྒྱལ་བའི་དགོངས་དོན་མ་ནོར་བ།།

སྟོང་དང་རྟེན་འབྱུང་ཟབ་མོའི་དེ་ཉིད་ལ།།

ཡིད་ཆེས་གཏིང་ནས་རྙེད་པའི་སྒོ་གཅིག་བུ།།

ཁྱོད་ཀྱི་ལེགས་བཤད་རྣམས་ལས་གཞན་པ་སུ།།

 

ཐེག་མཆོག་སྔགས་ཀྱི་སྙིང་བོར་གྱུར་བ་ཡི།།

སྒྱུ་ལུས་འོད་གསལ་གྱིས་མཚོན་ཟབ་མོའི་གནད།།

ཇི་བཞིན་བཀྲོལ་བས་དཀྱིལ་འཁོར་བདག་པོས་ཀྱང་།།

ཁྱོད་ལ་ཟླ་བ་བཟང་བོ་འདྲ་བར་བསྔགས།།

 

ལྷག་བསམ་དག་པས་ཁྱོད་སྐུ་འོ་མའི་མཚོར།།

འཇམ་མགོན་ཟླ་བའི་འོད་བཟང་རྟག་འཐུང་བས།།

ཕྲིན་ལས་ཟེགས་མ་དཀར་བོ་གཅིག་གིས་ཀྱང་།།

བསིལ་ལྡན་ར་བའི་འཁོར་ཡུག་ཕྱུར་བུར་བཀང་།།

 

མཐའ་ཡས་གཞུང་ལུགས་ཀུན་གྱི་བརྗོད་བྱའི་དོན།།

འགལ་བ་མེད་པར་ལམ་གྱི་ཆ་རྐྱེན་དུ།།

ཉམས་ལེན་གནད་ཀྱི་གདམས་པར་འཆར་བ་ཡི།།

ཀུན་ཕན་བདུད་རྩིའི་མཆོད་སྦྱིན་ཁྱེད་ཀྱིས་བཀྲམ།།

 

རྒྱལ་སྲས་རྣམས་ཀྱི་ཟབ་རྒྱས་སྤྱོད་པའི་ཚུལ།།

ཉིད་ཀྱི་མཛད་བཟང་སྣང་བས་གསལ་བྱས་པ།།

དེའི་ཚེ་ཕྱོགས་རིས་ཁེངས་ལྡན་གཞན་གྱི་ལུགས།།

ཉིན་མོར་བྱེད་པས་རྒྱུ་སྐར་བཞིན་དུ་མནན།།

 

རྨད་བྱུང་ཤིང་རྟ་གཉིས་ཀྱི་གཞུང་ལུགས་ལ།།

གྲུབ་མཆོག་རྣམས་ཀྱིས་ལེགས་པར་བཀྲལ་བ་ཡི།།

ཟབ་མོ་རྡོ་རྗེ་ཐེག་པའི་ལམ་གྱི་འགྲོས།།

ཉམས་ལེན་གནད་དུ་སྒྲིལ་བ་ཁྱོད་ཀྱི་སྲོལ།།

 

དེ་ཕྱིར་མདོ་དང་སྔགས་ཀྱི་བསྟན་པ་གང་་།།

ཡོངས་རྫོགས་ཆོས་ཀྱི་རྒྱལ་བོ་ཁྱོད་ཀྱིས་ནི།།

བཤད་དང་སྒྲུབ་པའི་རྒྱལ་ཐབས་རིན་པོ་ཆེ།།

སྲིད་པ་གསུམ་གྱི་བླ་ན་མངོན་པར་འཕགས།།

 

བཤད་དང་སྒྲུབ་པ་ཕྱོགས་རེའི་བརྟུལ་ཞུགས་ཀྱིས།།

འོད་བཟང་སྤྲོ་བའི་བློ་ལྡན་རྒྱུ་སྐར་བརྒྱས།།

མཁྱེན་མཆོག་ནམ་མཁའི་ནོར་བུ་ཁྱོད་གཅིག་ལ།།

འགྲན་མི་ནུས་ན་སུ་ཞིག་དེ་ལ་བསྙོན།།

 

མཁྱེན་མཆོག་སྟོན་པ་དེ་ཡི་བསྟན་པ་གང་།།

རྣམ་པར་གྲོལ་བའི་འཇུག་ངོགས་མཚུངས་མེད་ལམ།།

ནན་ཏན་སྙིང་བོར་མཛད་པའི་བརྩོན་ཆེན་གྱིས།།

ཉིན་དང་མཚན་མོ་ཁོར་ཡུག་གཅིག་ཏུ་བཟླུམས།།

 

སྟོང་དང་སྙིང་རྗེ་ཟུང་དུ་འབྲེལ་བ་ཡི།།

ལམ་མཆོག་མཚུངས་པ་མེད་པས་རྒྱལ་སྲས་ཀྱི།།

རྣམ་ཐར་རྒྱ་མཚོ་ལྟ་བུའི་རང་བཞིན་ལ།།

ཁྱོད་ནི་ཡིད་བཞིན་འདོད་དགུར་རྣམ་པར་རོལ།།

 

ཉེ་བར་ཞི་བ་ཐུགས་ཀྱི་མཁའ་དབྱིངས་སུ།།

རླབས་ཆེན་བསོད་ནམས་གསེར་གྱི་སྙིང་བོའི་སྤྲིན།།

ཆེས་ཆེར་དཀྲིགས་པས་ཕན་བདེ་ནོར་བུའི་ཆར།།

མ་ལུས་ཞིང་ཀུན་ཏུ་ཡང་ཁྱབ་པར་བརྡལ།།

 

སྒོ་གསུམ་ལྷ་སྔགས་ཆོས་སྐུའི་རོལ་མོ་ཡིས།།

ཐ་མལ་སྣང་ཞེན་དྲི་མ་ཀུན་བཀྲུས་ཏེ།།

ཟབ་གསལ་བདེ་བ་ཆེན་པོའི་དབྱིངས་ཉིད་དུ།།

དཀྱིལ་འཁོར་ཀུན་གྱི་བདག་པོར་མངའ་དབང་འབྱོར།།

 

ཇི་ལྟ་ཇི་སྙེད་ཆོས་ཀྱི་གནས་ཚུལ་ལ།།

ཡང་དག་རིགས་པའི་དྲངས་པའི་ངེས་ཤེས་ནི།།

ཐེ་ཚོམ་སྨག་དང་བྲལ་བའི་ཉམས་མྱོང་གིས།།

ཉམས་ལེན་གནད་དུ་འཛུད་པ་ཁྱོད་ཀྱི་སྲོལ།།

 

ས་སྟེང་ཆུ་ཀུན་ཆུ་གཏེར་ཆེན་པོ་ལ།།

གཞོལ་བ་ཇི་བཞིན་ཉིད་ཀྱི་མཛད་པའི་སྒོ།།

ཀུན་ཀྱང་རྒྱལ་བའི་བསྟན་པ་རིན་པོ་ཆེ།།

ཕྱོགས་དུས་ཀུན་ཏུ་རྒྱས་པའི་ཐབས་སུ་བཤམས།།

 

དམིགས་མེད་སྙིང་རྗེའི་སྟོབས་མཆོག་མཚུངས་མེད་པས།།

རིགས་གསུམ་སེམས་དཔའ་དགྱེས་པའི་རྣམ་ཐར་མཐའ།།

གངས་ཅན་འདི་ན་ཁྱོད་ཀྱིས་ལེགས་བསྐྱངས་པས།།

ད་དུང་དུ་ཡང་བསྟན་པའི་སྣང་བ་འབར།།

 

རིང་ནས་གོམས་པའི་ཐུགས་བརྩེས་ཞིང་ཀུན་ཏུ།།

རྒྱལ་བསྟན་འཛིན་པའི་སྨོན་ལམ་མཐུ་གྲུབ་པས།།

ཕྲིན་ལས་བཟང་བོའི་ཆ་ཤས་ཙམ་གྱི་ཡང་།།

གྲགས་པས་རྒྱ་མཚོའི་གོས་ཅན་ཀུན་ནས་ཁེབས།།

 

རྒྱལ་བ་མཆོག་དང་རྒྱལ་སྲས་སེམས་དཔའ་དང་།།

མཁས་ཤིང་གྲུབ་བརྙེས་རྣམས་ཀྱི་དགྱེས་པའི་ཞལ།།

རྟག་ཏུ་ཁྱོད་ལ་ཕྱོགས་པའི་ངང་ཚུལ་གྱིས།།

ཟབ་དོན་ཐུགས་ཀྱི་གསང་བ་མངོན་སུམ་འདོམས།།

 

མཚུངས་མེད་རྒྱལ་བ་དགྱེས་པའི་ལམ་བཟང་ནས།།

གྲུབ་མཆོག་ནོར་བུའི་གླིང་དུ་གཤེགས་ཁྱོད་ཀྱི།།

ཞབས་སེན་ཨུཏྤལ་གཞོན་ནུའི་ཕྲེང་བ་གང་།།

གྲུབ་བརྙེས་བྱེ་བའི་གཙུག་ཏོར་རྩེ་ན་མཛེས།།

 

མཁྱེན་རབ་ཉི་མའི་འོད་དང་མཛད་བཟང་གི།

ཨུཏྤལ་གཞོན་ནུའི་དགའ་ཚལ་རྟག་འགྲོགས་པས།།

བརྩེ་ཆེན་སྐྱོབ་པ་དགྱེས་པའི་ལམ་མཆོག་ནི།།

ཁྱོད་ལ་ཕྱོགས་སུ་ལྷུང་བ་བཞིན་དུ་བཀུག།

 

དེ་ཕྱིར་ལྷ་རྣམས་དག་ལས་ལྷ་དབང་དང་།།

པདྨའི་ཚལ་ན་པདྨ་དཀར་བོ་བཞིན།།

ཁྱོད་ཀྱི་རིང་ལུགས་གཙང་མའི་གཟི་བྱིན་དེས།།

ཕྱོགས་གཞན་གྲུབ་མཐའ་དཔལ་དང་ལྡན་པར་་བརྒྱན།།

 

ཐུབ་བསྟན་ཡོངས་སུ་རྫོགས་པའི་སེང་གེ་སྒྲས།།

བསིལ་ལྡན་ར་བ་དཀར་བོའི་ཁོར་ཡུག་ཁྱོན།།

ཁྱབ་མཛད་མཚུངས་པ་མེད་པའི་རྣམ་ཐར་གྱིས།།

བདུད་སྡེ་བྱེ་བའི་རུ་མཚོན་གཅིག་ཅར་བསྙིལ།།

 

བློ་བཟང་མཁྱེན་པའི་ཉི་མ་གཅིག་གིས་ནི།།

ས་སྟེང་གནས་པའི་རབ་རིབ་རྣམས་བཅོམ་པས།།

ཡང་དག་རིགས་པའི་ལམ་ནས་ཟབ་རྒྱས་ཆོས།།

སྨྲ་བའི་སེངྒེ་ས་ཆེན་རྣམ་པར་བཀང་།།

 

རྨད་བྱུང་རྣམ་ཐར་གཙང་མའི་མཛད་བཟང་གིས།།

ཐུབ་བསྟན་རྙོགས་མར་གྱུར་བ་ཀུན་བགྲུངས་ནས།།

བཟང་བོའི་གསེར་དང་མཚུངས་པའི་ཁྲིམས་འཆང་བ།།

ངུར་སྨིག་འཛིན་པས་ས་འདི་དོགས་པོར་བྱས།།

 

ཡང་དག་བསླབ་པ་གསུམ་གྱི་ཉམས་ལེན་དང་།།

རྗོད་བྱེད་སྡེ་སྣོད་གསུམ་གྱི་འཆད་ཉན་གང་།།

ལྷན་ཅིག་འགྲན་པ་བཞིན་དུ་འཕེལ་བ་ཡི།།

རླབས་ཆེན་ཕྲིན་ལས་ཁྱོད་ཉིད་གཅིག་བུར་མཛད་།།

 

འཕགས་མཆོག་ཁྱོད་ཀྱི་རྣམ་ཐར་འདི་འདྲ་བ།།

ཐོས་པ་ན་ཡང་རྒྱལ་སྲས་སེམས་དཔའ་གཞན།།

དགའ་བའི་སྙིང་གི་ཆུ་གཏེར་གཡོ་ནུས་ན།།

བདུད་ཀྱི་ཡིད་ལ་ཟུག་རྔུ་ཅིས་མི་སྟེར།།

 

ཁྱོད་ཀྱི་བརྒྱུད་འཛིན་དམ་པའི་སྐྱེས་པོ་རྣམས།།

ཀུན་སྤྱོད་སྨད་དུ་མེད་པའི་ཚུལ་ཁྲིམས་དང་།།

སྐྱོན་བྲལ་རྣམ་དཔྱོད་བཟང་བོའི་ངང་ཚུལ་གྱིས།།

ཕྱོགས་ཀུན་གྱི་སྐྱེས་པོ་ཀུན་གྱི་གཙུག་ན་མཐོ།།

 

བློ་ཆུང་ཕྲག་དོགས་གཡོ་བའི་ངང་ཚུལ་གྱིས།།

ཁྱོད་ཀྱི་བསྟན་ལ་ལྷག་པར་གཤེ་ན་ཡང་།།

རང་ཚུགས་བཟང་བོའི་འོད་བཟང་མ་ཉམས་པས།།

སྨག་ལ་ཟླ་རྒྱས་བཞིན་དུ་ལྷག་པར་གསལ།།

 

དེ་ཕྱིར་ཁྱོད་ཀྱི་རིང་ལུགས་རིན་པོ་ཆེ།།

པདྨའི་དགའ་ཚལ་ལྟ་བུར་ཡིད་འོང་བ།།

ལྷར་བཅས་འགྲོ་བ་དགའ་བའི་མཆོད་སྡོང་འདི།།

སེམས་ཅན་སུ་ཡི་ཡིད་ལ་ཕོངས་མི་འགྱུར།།

 

བདག་ཅག་འདི་ནས་སྐྱེ་བ་ཀུན་ཏུ་ཡང་།།

ཀུན་སྤྱོད་གཙང་མའི་ཁྲིམས་ལྡན་པདྨའི་སྦུབས།།

བློ་མཆོག་འཆར་ཀའི་འོད་དང་ལྷན་ཅིག་པས།།

འཇམ་མགོན་དགྱེས་པའི་བརྟུལ་ཞུགས་འཛིན་གྱུར་ཅིག།

 

བློ་དང་ཚུལ་ཁྲིམས་འཆལ་བའི་ཉེས་ཚོགས་ཀྱིས།།

ཁྱོད་ཀྱིས་ལུགས་བཟང་གཙང་མ་རྙོགས་བགྱིད་ཅིང་།།

དྲི་མེད་བསྟན་ལ་རྨ་སྲོལ་འབྱིན་པ་ཀུན།།

བདག་གི་སྟོབས་ཀྱིས་རྩད་ནས་འབྱིན་གྱུར་ཅིག།

 

རྒྱལ་སྲས་རྒྱལ་བའི་ཕྲིན་ལས་ཙོང་ཁ་བའི།།

རྣམ་ཐར་མཚུངས་བ་མེད་པའི་བདག་ཉིད་དང་།།

ཀུན་ཏུ་མཚུངས་པའི་ཐབས་མཁས་སྤྱོད་པ་ཡིས།།

འཇམ་མགོན་རྒྱལ་བའི་གོ་འཕང་འགྲུབ་གྱུར་ཅིག།

 

མདོག་ཅོད་པན་འཆང་བའི་རིང་ལུགས་པ་ཆེན་པོ།བསླབ་གསུམ་ནོར་བུའི་གཏེར་མཛོད་སྤྲུལ་བའི་སྐུ་བྲག་ཡབ་གདོང་ཀོ་སྤྲུལ་སྐུ་ངག་དབང་དམ་ཆོས་ཞལ་སྔ་ནས།རྗེ་ཙོང་ཁ་བ་ལ་བསྟོད་པ་རྩོམས་ཤི་ག་ཅེས་བཀྲ་ཤིས་ལྷ་རེག་དང་།རྗེ་རྒྱལ་བ་གཉིས་པའི་ན་བཟའ་གནང་སྐྱེས་བཅས་ཏེ་ཡི་བཀའ་ཡི་སྐུལ་མ་ཡང་ཡང་བྱུང་བ་ལ་བརྟེན་ནས།མི་ཕམ་བློ་བཟང་ཉི་མ་འཇུ་མི་ཕམ་པརང་ལོ་སོ་གཉིས་པའི་དུས་སུ།མཛེས་ལྡན་འཆི་མེད་་་ལྗོན་པའི་དགའ་ཚལ།རིན་ཆེན་བྲག་རི་བརྩེགས་པའི་སྟ་ཟུར་དུ།རང་གནས་བདུད་རྩི་འི་ཤིང་གི་སྤྱིལ་བུ་ནས་བསྙེན་མཚམས་ལ་གནས་པའི་ཐུན་གསེང་དུ་སྤེལ་བ་དགེ་ལེགས་མཆོག་གྱུར་ཅིག།

གསལ་འདེབས། 
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
             དྲ་བའི་་སྦྲེལ་ཐགhttp://www.tb1025.cn