ཆེད་དུ་བརྗོད་པའི་ཚོམས་ལས་སྡིག་པའི་ཚོམས།
002L4qF0gy6MOy4RmYhc9.jpg
སྡིག་པ་ཐམས་ཅད་མི་བྱ་སྟེ། །
དགེ་བ་ཕུན་སུམ་ཚོགས་པར་བྱ། །
རང་གི་སེམས་ནི་ཡོངས་སུ་གདུལ། །
འདི་ནི་སངས་རྒྱས་བསྟན་པ་ཡིན། །
སྦྱིན་པས་བསོད་ནམས་རབ་ཏུ་འཕེལ། །
ལེགས་བསྡམས་དགྲ་གསོག་མི་འགྱུར་རོ། །
དགེ་དང་ལྡན་པས་སྡིག་པ་སྤོང་། །
ཉོན་མོངས་ཟད་པ་མྱ་ངན་འདའ། །
མཁས་དང་འདྲེ་དང་བྱིས་པའི་སྐྱེ་བོ་དང་། །
ལྷན་ཅིག་སྤྱོད་དང་གཅིག་པུ་གནས་ཀྱང་རུང་། །
ངང་པས་ཆུ་ལས་འོ་མ་འཐུང་བ་ལྟར། །
མཁས་པས་སྡིག་པ་ཅན་རྣམས་རབ་ཏུ་སྤང་།
།འཇིག་རྟེན་ཉེས་དམིགས་མཐོང་བ་དང་། །
འགོག་པར་འགྱུར་བའི་ཆོས་མཐོང་བས། །
འཕགས་པ་སྡིག་ལ་དགའ་མི་བྱེད། །
སྡིག་ཅན་དགེ་ལ་དགའ་མི་འགྱུར། །
ལེགས་པར་ཉེར་ཞིའི་རོ་དང་ནི། །
རབ་ཏུ་དབེན་པའི་རོ་ཤེས་པ། །
རིམས་ནད་མེད་ཅིང་སྡིག་མེད་ལ། །
ཆོས་ལ་དགའ་བའི་རོ་དག་འཐུང་། །
སེམས་ཀྱི་ཟག་པ་མེད་པ་དང་། །
སེམས་ནི་འཆིང་བས་མ་བཅོས་ལ། །
དགེ་དང་སྡིག་པ་རབ་སྤངས་པ། །
ངན་འགྲོ་རྣམས་ཀྱིས་འཇིགས་པ་མེད། །
གནས་མིན་ཟློག་དང་ལེགས་སྨྲ་དང་། །
ཉེས་དམིགས་སྟོན་པར་བྱེད་པ་དང་། །
མཁས་པས་ཚར་གཅོད་སྨྲ་བྱེད་པ། །
དེ་ལྟའི་སྐྱེ་དགུ་བསྟེན་པར་བྱ། །
དེ་ལྟ་བུ་དག་བསྟེན་བྱས་ན། །
སྡིག་པར་མི་འགྱུར་ལེགས་པར་འགྱུར། །
ཉེ་བར་ཞི་ཞིང་རབ་ཞི་ལ། །
དལ་བུས་སྨྲ་ཞིང་ཁེངས་མེད་པ། །
སྡིག་པའི་ཆོས་རྣམས་སྤྲུག་བྱེད་དེ། །
རླུང་གིས་ལྗོན་ཤིང་ལོ་མ་བཞིན། །
གང་ཞིག་སྐྱེས་བུ་དག་ཅིང་ཉོན་མོངས་མེད། །
རབ་ཏུ་སྡང་མེད་མི་ལ་ཁྲོ་བྱེད་པའི། །
བྱིས་པ་དེ་ལ་སྡིག་པ་ཕྱིར་འགོག་སྟེ། །
རྫི་ཕྱོགས་སུ་ནི་རྡུལ་རྣམས་གཏོར་བ་བཞིན། །
དགེ་བ་བྱེད་པས་དགེ་བ་དང་། །
སྡིག་པ་བྱེད་པས་སྡིག་པ་སྟེ། །
མི་ཡིས་གང་དང་གང་བྱས་པ། །
དེ་དེ་རང་གིས་མཐོང་བར་འགྱུར། །
བདག་གིས་སྡིག་པ་བྱས་ན་ནི། །
དེ་བདག་ཁོ་ན་ཀུན་ཉོན་མོངས། །
བདག་གིས་སྡིག་པ་མ་བྱས་ན། །
བདག་ཉིད་ཁོ་ན་རྣམ་པར་དག །
གཞན་གྱིས་གཞན་སྤྱོད་མི་བྱེད་ཀྱི། །
དག་དང་མ་དག་རང་རང་བྱེད། །
བདག་ཉིད་ཀྱིས་ནི་སྡིག་པ་དག །
བྱས་ཤིང་ཉེ་བར་བསགས་པ་ཡིས། །
བསམ་བརླག་མངོན་དུ་འཇོམས་པར་བྱེད། །
རྡོ་རྗེས་ནོར་བུ་འབིགས་པ་བཞིན། །
མིག་ལྡན་འགྲོ་བར་བྱེད་པ་ཡིས། །
ཉམ་ངའི་ལམ་དག་ཇི་ལྟ་བར། །
མཁས་པས་འཚོ་བའི་འཇིག་རྟེན་འདིར། །
སྡིག་པ་དག་ནི་ཡོངས་སུ་སྤང་། །
ནོར་ཆེན་གྱིས་ནི་གྲོགས་ཉུང་དང་། །
ཚོང་པས་འཇིགས་བཅས་ལམ་དང་ནི། །
གསོན་པར་འདོད་པས་དུག་ལྟ་བུར། །
མཁས་པས་སྡིག་ཅན་ཡོངས་སུ་སྤང་། །
གལ་ཏེ་ལག་མཐིལ་རྨ་མེད་ན། །
ལག་པས་དུག་ནི་བཟུང་བྱས་ཀྱང་། །
རྨ་མེད་དུག་ནི་མི་འཇེན་ལྟར། །
མ་བྱས་པ་ལ་སྡིག་པ་མེད། །
བདག་ལ་མི་ཕན་བྱ་བ་དང་། །
ལེགས་པར་མ་ཡིན་བྱ་བར་སླ། །
གང་དག་ཕན་ཞིང་བདེར་འགྱུར་བ། །
དེ་ནི་མཆོག་ཏུ་བྱ་བར་དཀའ། །
དམ་པས་ལེགས་པ་བྱ་སླ་ཡི། །
དམ་པས་སྡིག་པ་བྱ་བར་དཀའ། །
ངན་པས་སྡིག་པ་བྱ་སླ་ཡི། །
འཕགས་པས་སྡིག་པ་བྱ་བར་དཀའ། །
ཇི་སྲིད་སྡིག་པ་མ་སྨིན་པ། །
དེ་སྲིད་བྱིས་པ་མངར་བར་སེམས། །
གང་ཚེ་སྡིག་པ་སྨིན་གྱུར་པ། །
དེ་ཚེ་དེ་ནི་ཚ་བར་སེམས། །
ཇི་སྲིད་སྡིག་པ་མ་སྨིན་པ། །
དེ་སྲིད་སྡིག་ལ་རུང་བར་ལྟ། །
གང་ཚེ་སྡིག་པ་སྨིན་གྱུར་པ། །
དེ་ཚེ་སྡིག་པར་མཐོང་བར་འགྱུར། །
ཇི་སྲིད་བཟང་པོ་མ་སྨིན་པ། །
དེ་སྲིད་བཟང་པོ་སྡིག་པར་མཐོང་། །
གང་ཚེ་བཟང་པོ་སྨིན་གྱུར་པ། །
དེ་ཚེ་བཟང་པོར་མཐོང་བར་འགྱུར། །
སྡིག་པ་སྡུག་བསྔལ་གསོག་པས་ན། །
དེ་ལ་དགའ་བར་མི་བྱའོ། །
བརྒྱ་ལ་སྡིག་པ་བྱས་ན་ཡང་། །
ཡང་དང་ཡང་དུ་དེ་མི་བྱ། །
བསོད་ནམས་བདེ་བ་གསོག་པས་ན། །
དེ་ཉིད་ལ་ནི་དགའ་བར་བྱ། །
གལ་ཏེ་བསོད་ནམས་བྱས་ན་ཡང་། །
དེ་ནི་ཡང་དང་ཡང་དུ་བྱ། །
སྡིག་ལ་ཡིད་ནི་མངོན་དགའ་བ། །
བསོད་ནམས་དལ་བུས་བྱེད་འགྱུར་བས། །
སྡིག་པ་ལས་ནི་སེམས་ཟློག་ཅིང་། །
བསོད་ནམས་མངོན་པར་སྨྱུར་ཏེ་བྱ། །
སྡིག་པ་ཆུང་དུ་བྱས་པས་ཀྱང་། །
འཇིག་རྟེན་ཕ་རོལ་འཇིག་ཆེན་དང་། །
ཕུང་ཁྲོལ་ཆེན་པོ་བྱེད་འགྱུར་ཏེ། །
ཁོང་བར་སོང་བའི་དུག་བཞིན་ནོ། །
བསོད་ནམས་ཆུང་དུ་བྱས་པས་ཀྱང་། །
འཇིག་རྟེན་ཕ་རོལ་བདེ་བ་འདྲེན། །
དོན་ཆེན་དག་ཀྱང་བྱེད་འགྱུར་ཏེ། །
འབྲུ་རྣམས་ཕུན་སུམ་འབྱོར་བ་བཞིན། །
གང་ཞིག་ཉེས་མེད་ཆད་པས་གཅོད། །
སྡང་བ་མིན་ལ་རབ་སྡང་བ། །
གནས་གཞན་གང་ཡང་རུང་བ་བཅུ། །
མྱུར་དུ་ཐོབ་པ་ཁོ་ནར་འགྱུར། །
ཚོར་བ་མི་བཟད་པ་དག་གམ། །
ཡང་ན་ལུས་ནི་འདྲལ་བའམ། །
གནོད་པའི་ཚོར་བ་ཚ་བའང་རུང་། །
ཡང་ན་སེམས་འཁྲུགས་ཐོབ་པར་འགྱུར། །
གཉེན་འདུན་རྣམས་དང་བྲལ་བའམ། །
ལོངས་སྤྱོད་ཟད་པར་འགྱུར་བའམ། །
རྒྱལ་པོའི་གནོད་པ་འབྱུང་བའམ། །
མི་སྙན་ཤིན་ཏུ་མི་བཟད་དམ། །
ཡང་ན་ཁྱིམ་ནི་མེ་ཆེན་པོས། །
ངེས་པར་སྲེག་པར་བྱེད་པར་འགྱུར། །
ཤེས་རབ་འཆལ་བ་ལུས་ཞིག་ནས། །
བཅུ་པ་ངན་འགྲོར་འགྲོ་བར་འགྱུར། །
སྡིག་པ་བྱས་པས་བག་དབབ་མི་བྱ་སྟེ། །
རིང་བྱས་རྒྱང་མར་བྱས་ཀྱང་བག་མི་དབབ། །
དབེན་པར་བྱས་ཀྱང་བག་དབབ་མི་བྱ་སྟེ། །
དེ་ཡི་རྣམ་སྨིན་ཡོད་པས་བག་མི་དབབ། །
བསོད་ནམས་བྱས་པས་བག་ནི་དབབ་བྱ་སྟེ། །
རིང་བྱས་རྒྱང་རིང་བྱས་ཀྱང་བག་དབབ་ཅིང་། །
དབེན་པར་བྱས་ཀྱང་བག་ནི་དབབ་པར་བྱ། །
དེ་ཡི་རྣམ་སྨིན་ཡོད་པས་བག་དབབ་བོ། །
བདག་གིས་སྡིག་པ་བྱས་པས་མྱ་ངན་བྱེད། །
རིང་དང་རྒྱང་རིང་བྱས་པས་མྱ་ངན་བྱེད། །
བདག་གིས་དབེན་པར་བྱས་པས་མྱ་ངན་བྱེད། །
དེ་ཡི་རྣམ་སྨིན་ཡོད་པས་མྱ་ངན་བྱེད། །
བདག་ཉིད་ནག་པོའི་ལས་དང་ལྡན་མཐོང་ནས། །
འདིར་ཡང་མྱ་ངན་གཞན་དུའང་མྱ་ངན་བྱེད། །
སྡིག་པ་བྱས་པས་གཉིས་ཀར་མྱ་ངན་བྱེད། །
དེ་ནི་མྱ་ངན་དེ་རབ་མྱ་ངན་བྱེད། །
བདག་གིས་བསོད་ནམས་བྱས་པས་དགའ་བར་འགྱུར། །
རིང་དང་རྒྱང་རིང་བྱས་པས་དགའ་བར་འགྱུར། །
བདག་གིས་དབེན་པར་བྱས་པས་དགའ་བར་འགྱུར། །
དེ་ཡི་རྣམ་སྨིན་ཡོད་པས་དགའ་བར་འགྱུར། །
བདག་ཉིད་རྣམ་དག་ལས་དང་ལྡན་མཐོང་ནས། །
འདི་ན་དགའ་འགྱུར་གཞན་དུའང་དགའ་བར་འགྱུར། །
བསོད་ནམས་བྱས་པས་གཉིས་ཀར་དགའ་འགྱུར་ཞིང་། །
དེ་ནི་དགའ་འགྱུར་དེ་རབ་དགའ་བར་འགྱུར། །
བདག་གིས་སྡིག་པ་བྱས་པས་གདུང་འགྱུར་ཞིང་། །
རིང་བྱས་རྒྱང་རིང་བྱས་པས་གདུང་བར་འགྱུར། །
བདག་གིས་དབེན་པར་བྱས་པས་གདུང་འགྱུར་ཞིང་། །
དེ་ཡི་རྣམ་སྨིན་ཡོད་པས་གདུང་བར་འགྱུར། །
བདག་ཉིད་ནག་པོའི་ལས་དང་ལྡན་མཐོང་ནས། །
འདི་ན་གདུང་འགྱུར་ཕ་རོལ་གདུང་བར་འགྱུར། །
སྡིག་པ་བྱས་པས་གཉིས་ཀར་གདུང་འགྱུར་ཞིང་། །
དེ་ནི་གདུང་འགྱུར་དེ་རབ་གདུང་བར་འགྱུར། །
བདག་གིས་བསོད་ནམས་བྱས་པས་དགའ་འགྱུར་ཞིང་། །
རིང་བྱས་རྒྱང་རིང་བྱས་པས་དགའ་བར་འགྱུར། །
བདག་གིས་དབེན་པར་བྱས་པས་དགའ་འགྱུར་ཞིང་། །
དེ་ཡི་རྣམ་སྨིན་ཡོད་པས་དགའ་བར་འགྱུར། །
བདག་ཉིད་དཀར་པོའི་ལས་དང་ལྡན་མཐོང་ནས། །
འདི་ན་དགའ་འགྱུར་ཕ་རོལ་དགའ་བར་འགྱུར། །
བསོད་ནམས་བྱས་པ་གཉིས་ཀ་དགའ་འགྱུར་ཞིང་། །
དེ་ནི་དགའ་འགྱུར་དེ་རབ་དགའ་བར་འགྱུར། །
སྡིག་པ་བྱས་ཤིང་བསོད་ནམས་མ་བྱས་ལ། །
ཆོས་དང་གོལ་ཞིང་ཆོས་མིན་ཐོབ་པའི་མི། །
སྡིག་པའི་ལས་ཅན་འཆི་བས་འཇིགས་འགྱུར་ཏེ། །
ཆུ་ཆེན་ནང་དུ་གྲུ་ངན་ཞིག་པ་བཞིན། །
བསོད་ནམས་བྱས་ཤིང་སྡིག་པ་མ་བྱས་ལ། །
དམ་པ་རྣམས་ཀྱི་སྔོན་གྱི་ཆོས་སྤྱོད་པས། །
ང་ནི་ནམ་ཡང་འཆི་བས་འཇིགས་མེད་དེ། །
བརྟན་པའི་གྲུ་ཡིས་ཕ་རོལ་འགྲོ་བ་བཞིན། །
སྡིག་པའི་ཚོམས་ཏེ་ཉི་ཤུ་རྩ་བརྒྱད་པའོ།། །།
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
