བདག་གི་བྱ་བ་བྱ་བའི་དུས་གཡོ་བས། །
དང་པོ་ཁོ་ནར་བྱ་བའི་མེལ་ཚེ་གྱིས། །
བདག་གིས་དང་པོ་དེ་ལྟར་བྱས་ན་ནི། །
བྱ་བ་བྱ་བའི་དུས་ལྟ་ཟས་འདོད་ཅིང་། །
ཇི་ལྟར་འདོད་པ་དེ་བཞིན་འབྱོར་འགྱུར་བར། །
དེ་ཡི་རང་བཞིན་ང་ཡིས་མཐོང་བས་ན། །
ཇི་སྲིད་དོན་ནི་ཕུན་སུམ་ཚོགས་འགྱུར་བ། །
དེ་སྲིད་བར་དུ་མི་ཡིས་བསྒྲིམ་པར་གྱིས། །
བསྒྲིམ་ཞིང་བརྩོན་པར་བྱ་བ་ཡིས། །
བདག་ཉིད་གླིང་དུ་འགྱུར་བར་བྱ། །
མགར་བ་ཡིས་ནི་དངུལ་བཞིན་དུ། །
རང་གི་དྲི་མ་སྦྱང་བར་གྱིས། །
དྲི་མ་སྦྱངས་བ་སྐྱོན་མི་འབྱུང་། །
ཕྱི་ནས་སྐྱེ་དང་རྒ་མི་འཐོབ། །
ངོ་ཚ་མིན་ལ་ངོ་ཚ་ཞིང་། །
ངོ་ཚ་བ་ལ་ངོ་མི་ཚ། །
མི་འཇིགས་པ་ལ་འཇིགས་ལྟ་དང་། །
འཇིགས་ལ་མི་འཇིགས་ལྟ་བ་ཡི། །
ལོག་པར་ལྟ་བ་བླངས་པ་ཡིས། །
སེམས་ཅན་ངན་འགྲོར་འགྲོ་བར་འགྱུར། །
འདི་ན་གང་སྔོན་བག་མེད་ལས། །
ཕྱི་ནས་བག་དང་ལྡན་གྱུར་ཏེ། །
སྤྲིན་བྲལ་ཉི་མ་ཟླ་བ་ལྟར། །
འཇིག་རྟེན་འདི་ན་ཀུན་ནས་གསལ། །
འདི་ན་གང་སྔོན་བག་མེད་ལས། །
ཕྱི་ནས་བག་དང་ལྡན་གྱུར་ཏེ། །
འཇིག་རྟེན་འདི་ན་སྲེད་པ་ལས། །
དྲན་པ་ལེགས་པར་འདའ་བར་འགྱུར། །
གང་ཞིག་གཞོན་ནུར་རབ་བྱུང་ནས། །
སངས་རྒྱས་བསྟན་ལ་འཇུག་པ་དེ། །
སྤྲིན་བྲལ་ཉི་མ་ཟླ་བ་ལྟར། །
འཇིག་རྟེན་འདི་ན་ཀུན་ནས་གསལ། །
གང་ཞིག་གཞོན་ནུར་རབ་བྱུང་ནས། །
སངས་རྒྱས་བསྟན་ལ་འཇུག་པ་དེ། །
འཇིག་རྟེན་འདི་ན་སྲེད་པ་ལས། །
དྲན་པས་ལེགས་པར་འདའ་བར་འགྱུར། །
གང་ཞིག་སྡིག་པའི་ལས་བྱས་པ། །
དགེ་བས་འགབས་པར་བྱེད་པ་དེ། །
སྤྲིན་བྲལ་ཉི་མ་ཟླ་བ་ལྟར། །
འཇིག་རྟེན་འདི་ན་ཀུན་ནས་གསལ། །
གང་ཞིག་སྡིག་པའི་ལས་བྱས་པ། །
དགེ་བས་འགེབས་པར་བྱེད་པ་དེ། །
འཇིག་རྟེན་འདི་ན་སྲེད་པ་ལས། །
དྲན་པས་ལེགས་པར་འདའ་བར་འགྱུར། །
གང་ཞིག་གསོན་ལ་མི་དགའ་བ། །
དེ་ནི་ཤི་ནའང་མྱ་ངན་མེད། །
བརྟན་པ་གོ་འཕང་མཐོང་བ་དེ། །
མྱ་ངན་དབུས་ནའང་གདུང་མི་འགྱུར། །
གང་ཞིག་གསོན་ལ་མི་དགའ་བ། །
དེ་ནི་ཤི་ན་མྱ་ངན་མེད། །
བརྟན་པ་གོ་འཕང་མཐོང་བ་དེ། །
གཉེན་འདུན་དབུས་ན་ལམ་མེར་འདུག །
དགེ་སློང་དཀར་པོ་བསྒོམ་གྱིས་ལ། །
ནག་པོའི་ཆོས་ནི་རྣམ་པར་སྤོངས། །
ཁྱིམ་ནས་ཁྱིམ་མེད་སོང་ནས་སུ། །
སྤྱོད་ཡུལ་དབེན་པ་གང་ཡིན་པ། །
དེ་ལ་མངོན་པར་དགའ་བསླབ་ཅིང་། །
འདོད་པ་ཅི་ཡང་མེད་པར་སྤོངས། །
རྟག་ཏུ་སྙིང་པོ་དག་པ་དང་། །
རྟག་ཏུ་གསོ་སྦྱོང་དག་པ་དང་། །
གཙང་མའི་ལས་ནི་དག་པ་དེའི། །
བརྟུལ་ཞུགས་ཕུན་སུམ་ཚོགས་པར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་འདོད་ཆགས་སྐྱོན། །
དེ་བས་འདོད་ཆགས་བྲལ་རྣམ་ལ། །
བྱིན་ན་འབྲས་བུ་ཆེན་པོར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་ཞེ་སྡང་སྐྱོན། །
དེ་བས་ཞེ་སྡང་བྲལ་རྣམས་ལ། །
བྱིན་ན་འབྲས་བུ་ཆེན་པོར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་གཏི་མུག་སྐྱོན། །
དེ་བས་གཏི་མུག་བྲལ་རྣམས་ལ། །
བྱིན་ན་འབྲས་བུ་ཆེན་པོར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་ང་རྒྱལ་སྐྱོན། །
དེ་བས་ང་རྒྱལ་བྲལ་རྣམས་ལ། །
བྱིན་ན་འབྲས་བུ་ཆེན་པོར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་ཆགས་པ་སྐྱོན། །
དེ་བས་ཆགས་དང་བྲལ་རྣམས་ལ། །
བྱིན་ན་འབྲས་བུ་ཆེན་པོར་འགྱུར། །
ཞིང་གི་སྐྱོན་ནི་རྩྭ་ཡིན་ལྟར། །
སྐྱེ་དགུ་འདི་ལ་སྲེད་པ་སྐྱོན། །
དེ་བས་སྲེད་དང་བྲལ་རྣམ་ལ། །
བྱིན་ན་འབྲས་བུ་ཆེན་པོར་འགྱུར། །
དྲུག་པ་བདག་པོ་རྒྱལ་པོ་སྟེ། །
ཆགས་པར་གྱུར་ན་ཆགས་ཅན་ཡིན། །
མ་ཆགས་གྱུར་ན་མ་ཆགས་ཡིན། །
ཆགས་པ་བྱིས་པ་ཞེས་བརྗོད་དོ། །
འདོད་ཆགས་ཞེ་སྡང་ང་རྒྱལ་དང་། །
འཆབ་པ་གང་དུ་གནས་པ་ཡི། །
གྲོང་ཁྱེར་རུས་པའི་ར་བ་ཅན། །
ཤ་དང་ཁྲག་གིས་ཞལ་ཞལ་བྱས། །
རྒྱུ་ཡིས་ཀུན་ནས་བསླང་བ་ལས་བྱུང་སྡུག་བསྔལ་ཅན། །
དེ་མ་མཐོང་ན་དེར་ནི་དེ་དག་འཆིང་འགྱུར་ཞིང་། །
དེ་དག་རྟོགས་ན་ཆུ་བོ་རྣམས་ནི་རབ་ཏུ་སྤོང་། །
ཕྱི་རོལ་པ་ལ་ཆགས་པ་དེ་དག་སྤོང་པ་མེད། །
སིལ་བུའི་ཚོམས་ཏེ་བཅུ་དྲུག་པའོ།། །།

གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                     དྲ་བའི་སྦྲེལ་ཐགhttp://www.tb1025.cn