ཆེད་དུ་བརྗོད་པའི་ཚོམས་བམ་པོ་གཉིས་པ། །
དྲེའུ་མོ་རང་གི་མངལ་གྱིས་དང་། །
འདམ་བུ་སྨྱིག་མ་འབྲས་བུ་བུ་དང་། །
ཆུ་ཤིང་འབྲས་བུས་ཕུང་བ་ལྟར། །
ཕོ་བཤལ་བཀུར་སྟིས་ཕུལ་བར་འགྱུར། །
ཇི་སྲིད་བླུན་པོ་མཆོད་བྱས་པ། །
དེ་སྲིད་རབ་ཏུ་བརླག་པར་འགྱུར། །
བྱིས་པའི་དཀར་པོའི་ཆ་འགྲིབ་ཅིང་། །
དེ་ཡི་སྦྱི་བོའང་ངེས་པར་ཉམས། །
ངན་པ་རྙིད་པ་འདོད་པ་དང་། །
དགེ་སློང་འཁོར་ནི་འདོད་པ་དང་། །
གནས་ལ་སེར་སྣ་བྱེད་པ་དང་།
རིགས་གཞན་དག་གིས་མཆོད་པ་དང་། །
རབ་ཏུ་བྱུང་དང་ཁྱིམ་པ་དག །
གང་ཡང་རུང་བས་བདག་འཕྲིགས་ཏེ། །
བྱ་བ་བྱས་རུང་མ་བྱས་རུང་། །
བདག་དབང་གྱུར་རེ་སྟེས་ཞེས། །
དེ་ལྟར་བྱིས་པ་ཀུན་རྟོགས་ན། །
སེམས་ལ་འདོད་ཆེན་འཕེལ་བར་འགྱུར། །
རྙེད་པའི་ཐབས་ནི་གཞན་ཡིན་ལ། །
མྱ་ངན་འདས་འགྲོའི་གཞན་ཡིན་ཞེས། །
དེ་ལྟར་ཅི་རིགས་ཤེས་ནས་སུ། །
བཀུར་སྟི་དག་ལ་མི་དགའ་ཞིང་། །
དབེན་པ་རིམ་གྱིས་འཕེལ་བྱེད་པའི། །
དགེ་སློང་སངས་རྒྱས་ཉན་ཐོས་ཡིན། །
ཐམས་ཅད་ལ་ནི་མི་རྩོལ་ཞིང་། །
མི་ཡིས་འཕྲིགས་པར་མི་གྱུར་དང་། །
འཚོ་བ་གཞན་ལ་མི་རྟེན་ཅིང་། །
ཆོས་ལ་ཚོད་པ་བཞི་མི་སྤྱད། །
རང་གི་རྙེད་པ་བླང་བྱ་ཞིང་། །
གཞན་གྱི་ལ་ནི་འདོད་མི་བསྐྱེད། །
དགེ་སློང་གཞན་གྱི་འདོད་བྱེད་པས། །
ཏིང་ངེ་འཛིན་འཐོབ་པར་མི་འགྱུར་རོ། །
གལ་ཏེ་བདེ་བར་འཚོ་འདོད་ཅིང་། །
དགེ་སྤྱོད་འདི་ལ་ལྟ་འདོད་ན། །
དགེ་འདུན་གྱིས་ནི་ཆོས་གོས་དང་། །
བཟའ་བ་ཏུང་བྱིན་པར་གྱུར་ན་བླང་། །
གལ་ཏེ་བདེ་བར་འཚོ་འདོད་ཅིང་། །
དགེ་སྦྱོང་འདི་ལ་ལྟ་འདོད་ན། །
བྱི་བའི་ཁུང་ནས་སྤྲུལ་ལྟ་བུར། །
གནས་མལ་དག་ལ་བསྟེན་པར་གྱིས། །
གལ་ཏེ་བདེ་བར་འཚོ་འདོད་ཅིང་། །
དགེ་སྦྱོང་འདི་ལ་ལྟ་འདོད་ན། །
ངན་ངོན་ཙམ་གྱིས་ཆོག་ཤེས་ཤིང་། །
ཆོས་གཅིག་པོ་ཡང་བསྒོམ་པར་བྱ། །
གལ་ཏེ་མང་པོ་མི་ཤེས་ཤིང་། །
ཚུལ་ཁྲིམས་ལེགས་པར་མཉམ་གཞག་ན། །
དེ་ཤེས་པ་དག་འཚོ་དག་ཅིང་། །
སྙོམས་ལས་མེད་ཅེས་བསྟོད་པར་བྱེད། །
གལ་ཏེ་འཆི་བདག་ཉམས་བྱེད་པའི། །
ཟག་མེད་རིག་པ་གསུམ་ལྡན་ན། །
བླུན་པོས་ཅི་ཡང་མི་ཤེས་ཞེས། །
བསམས་ནས་དེ་ལ་འཕྱ་ཡང་སླ། །
གང་ཟག་སྡིག་པའི་ཆོས་ཅན་ལ། །
གལ་ཏེ་བཟའ་དང་བཏུང་བ་ཡིས། །
རྙེད་པ་དག་དང་ལྡན་གྱུར་ན། །
དེ་ལ་དེ་དག་མཆོད་པ་བྱེད། །
མགོ་བྲེགས་ངུར་སྨྲིག་བྱིས་པ་ཡི། །
བཟའ་བ་དང་ནི་བཏུང་བ་དང་། །
གོས་དང་མལ་ཆ་རྙེད་པ་ལྟ། །
དགྲ་བྱེད་མང་བ་ཁོ་ནར་ཟད། །
དེ་ལྟར་བཀུར་སྟི་འཇིགས་ཆེན་གྱི། །
སྐྱོན་རྣམས་ཁོང་དུ་ཆུད་བྱས་ནས། །
འཕྲིགས་ཉུང་སེམས་ཁྲལ་བསྐྱུངས་ནས་སུ། །
དྲན་ལྡན་དགེ་སློང་ཀུན་ཏུ་རྒྱུས། །
ཁམ་གྱི་ཟས་ཀྱིས་སེམས་ཞིང་མི་འགྱུར་ཡང་། །
འཚོ་བ་འདི་ཕྱིར་མི་བཟའ་མི་བྱ་སྟེ། །
ཁ་ཟས་ཀྱིས་ནི་ལུས་དག་གནས་འགྱུར་པ། །
དེ་ལྟར་རྟོགས་ལ་བསོད་སྙོམས་དག་ལ་རྒྱུས། །
རིགས་ཀྱིས་ཕྱག་བྱས་མཆོད་པ་གང་ཡིན་འདི། །
ཟུག་རྔུ་ཕྲ་མོ་དབྱུང་བར་དཀའ་བ་སྟེ། །
མི་ཡིས་བཟོད་དཀའ་བཀུར་སྟི་གང་ཡིན་འདི། །
འདམ་དང་འདྲ་བར་རབ་ཏུ་རྟོགས་པར་གྱིས། །
བཀུར་སྟིའི་ཚོམས་ཏེ་བཅུ་གསུམ་པའོ།། །།