༄༅༎ དཔལ་བདེ་བ་མཆོག་གི་ཕོ་བྲང་དུ། །

ཁོང་དཔའ་བོ་མཁའ་འགྲོ་སྒྱུ་འཕྲུལ་གྱིས། །

གནས་བྱིན་རླབས་གཟུགས་བརྙན་འབུམ་བཀྲ་བ། །

ངོ་མཚར་བའི་གནས་འདིར་གསོལ་བ་འདེབས། །

ཐུགས་བརྩེ་བས་ཡོངས་འཁྱིལ་སྤྱན་རས་གཟིགས། །

ཐུགས་མཚན་བཟང་དཔལ་བེའུའི་རི་མོ་ལས། །

མགོན་སྤྲུལ་བ་དུ་མས་ཆོས་ཚུལ་སྤེལ། །

བྱིན་ཆགས་པའི་གནས་ལ་གསོལ་བ་འདེབས། །

མགོན་རྒྱལ་སྲས་དཔའ་བོ་དུ་མ་ཡིས། །

གནས་རང་བྱུང་བྲག་ཕུག་དུ་མའི་མགུལ། །

སྒྲུབ་རྟོགས་པ་གོང་འཕེལ་ཉམས་བཞེས་མཛད། །

བྱིན་ཕབ་པའི་གནས་འདིར་གསོལ་བ་འདེབས། །

བློ་བཟང་ལྡན་དུ་མའི་འཕྲུལ་འཁོར་གྱིས། །

ལུང་རྟོགས་པའི་རྒྱལ་མཚན་སྒྲེང་བའི་སླད། །

བཀའ་རབ་འབྱམས་དགོངས་དོན་འཛིན་པའི་ཚོགས། །

ཕྱོགས་ཀུན་འདུས་ཆོས་སྡེར་གསོལ་བ་འདེབས། །

མགོན་ཁྱད་འཕགས་ཕྱག་ན་པདྨོ་དང་། །

དགོན་ཁྱད་འཕགས་འདུ་མོ་ཆོས་ཀྱི་རྫོང་། །

གྲོགས་ཁྱད་འཕགས་མཁས་མང་འདུས་པའི་སྡེ། །

དུས་སྐད་ཅིག་མི་འབྲལ་བསྟེན་པར་ཤོག །

ཆོས་བྱང་ཆུབ་ལམ་རིམ་ཉམས་བླངས་ཏེ། །

རྒྱུད་ཞི་དུལ་བསླབ་ཁྲིམས་བག་ཡོད་བསྟེན། །

ལམ་རིམ་གཉིས་རྣལ་འབྱོར་མཐར་ཕྱིན་ནས། །

དཔལ་སྐུ་བཞིའི་རྒྱལ་ས་ཟིན་པར་ཤོག །

ཅེས་པ་འདི་ནི། ༧ཨ་རོལ་མེ་ཏོག་གསུམ་པ་ནས་ཐུགས་བརྩེ་བ་ཆེན་པོས་གསུངས་པ་འདི་རང་ཅག་གི་ཉམས་སུ་ལེན་པར་བྲིས་པ་ཛ་ཡནྟུ། ། 

རྗེ་བཙུན་ཨ་རོལ་བློ་བཟང་ལུང་རྟོགས་བསྟན་པའི་རྒྱལ་མཚན་གྱི་གསུང་རྩོམ་ཕྱོགས་བསྒྲིགས་ལས་ཁོལ་ཏུ་ཕྱུང་།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn