ཆོས་རྒྱལ་ངག་གི་དབང་པོ་ལ།།

ལུས་ངག་ཡིད་གསུམ་གུས་པས་འདུད།།

གནས་མཆོག་བྲག་དཀར་སྤྲེལ་རྫོང་ལ།།

གནས་བསྟོད་ཅུང་ཟད་ཙམ་ཞིག་བྱ།།

ཨེ་མ་བྲག་དཀར་སྤྲེལ་རྫོང་རི།།

                                             རིན་ཆེན་ཤེལ་དཀར་སྤུངས་ལྟར་མཛེས།།

                                             རྒྱལ་དབང་པདྨ་གནས་ཀྱིས།།

བྱིན་གྱིས་བརླབས་པའི་དབེན་གནས་མཆོག།

ལྷ་དང་མི་སོགས་འགྲོ་ཀུན་སྐྱབས།།

ལྷ་་སྐུ་རང་བྱོན་དཔག་མེད་བཞུགས།།

སྒོམ་ཆེན་བྱ་བཏང་ཕལ་ཆེ་བ།།

གནས་ཆེན་འདི་ནས་གྲུབ་པ་བརྙེས།།

ཉི་མ་བཞིན་དུ་གཞན་ཕན་ཅན།།

བླ་མ་མང་པོ་གནས་འདིར་འབྱོན།།

གནས་གསུམ་དཔའ་བོ་མཁའ་འགྲོ་འདུ།།

གནས་བདག་དཀར་ཕྱོགས་ཆོས་ལ་དགྱེས།།

བྲག་ངོས་རྩི་ཤིང་མེ་ཏོག་བཀྲ།།

བྲག་གསེབ་དུ་མར་སྒྲུབ་ཆུ་འབྱུང་།།

རི་དྭགས་རྣམས་འོང་བག་ཕེབས་རྩེ།།

བོད་སོག་ཀུན་འོང་ཕྱག་སྐོར་བྱེད།།

མཁས་གྲུབ་དུ་མས་གསོལ་ཟས་ཟ།།

རང་གྲུབ་རྩི་ཐོག་སྣ་ཚོགས་འཁྲུངས།།

ལྷ་ཤིང་ཤུག་པས་གར་སྟབས་བསྒྱུར།།

ལྷ་བྱ་དུ་མས་སྐད་སྙན་སྒྲོག།

རི་ཀླུང་སྔོན་པོར་སོང་བའི་དུས།།

ཁུ་བྱུག་སྔོན་མོ་འོངས་ནས་གྲགས།།

གནས་འདིར་འདུག་པའི་གང་ཟག་ལ།།

མི་མཐུན་འགལ་རྐྱེན་གང་ཡང་མེད།།

སྒྲུབ་པའི་མཐུན་རྐྱེན་ཟས་གོས་སོགས།།

བསྒྲུབ་མི་དགོས་པར་ཚུར་ལ་འོང་།།

ཚེ་འདིར་བདེ་ཞིང་སྐྱིད་འདོད་རྣམས།།

ཚེ་བློས་ཐོངས་ལ་གནས་འདི་སྟེན།།

གཏན་དུ་བདེ་ཞིང་སྐྱིད་འདོད་རྣམས།།

རྟག་ཏུ་དབེན་པ་འདི་ཉིད་སྟེན།།

གནས་འདི་ཅུང་ཟད་བསྟོད་པའི་མཐུས།།

གནས་འདིའི་ཕྱོགས་ཀྱི་འགྲོ་རྣམས་ཀྱི།།

འགལ་རྐྱེན་བར་ཆད་ཞི་བ་དང་།།

མཐུན་རྐྱེན་བསམ་དོན་འགྲུབ་པར་ཤོག།

ཞབས་དཀར་ཚོགས་དྲུག་རང་གྲོལ་གྱི་མགུར་འབུམ་ལས་བཤུས།                  

                  རྩོམ་སྒྲིག་པ། མང་ར་བ།

གསལ་འདེབས།
       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
       དྲ་བའི་སྦྲེལ་ཐགhttp://www.tb1025.cn