དེ་ཡང་དབུས་ཀྱི་སྨད་རྒྱུུད་གྲྭ་ཚང་ཕྱག་བཏབ་ནས་ལོ་ཞེ་གཅིག་སོང་བའི་རྗེས་རྗེ་ཤེས་རབ་སེང་གེའི་དངོས་སློབ་རྒྱུད་ཆེན་ཀུན་དགའ་དོན་གྲུབ་ཀྱིས་རབ་བྱུང་བརྒྱད་པའི་ཤིང་རྟ་སྤྱི་ལོ་1474ལོར་གསང་ཆེན་སྟོད་རྒྱུད་གྲྭ་ཚང་ཕྱག་བཏབ།   ཐོག་མར་གྲྭ་ཚང་འདི་ཉིད་དབུས་སྟོད་བྱམས་པ་གླིང་དུ་ཆགས་པ་ཡིན་ཞིང་།   རྗེས་སུ་རྗེ་ཀུན་དགའ་དོན་གྲུབ་ཀྱིས་ལྷ་སའི་སྐྱིད་ཆུའི་འཇིག་ཉེན་ཞི་བར་མཛད་པའི་ལེགས་སྐྱེས་སུ་ལྷ་སའི་ར་མོ་ཆེ་གཙུག་ལག་ཁང་ཕུལ་ནས་སྟོད་རྒྱུད་གྲྭ་ཚང་གི་ཚོགས་ཁང་གནང་བར་གྲགས་སོ།   ། 

                      གསང་ཆེན་སྟོད་རྒྱུད་གྲྭ་ཚང་གི་བླ་རྒྱུད་དང་པོ་རྒྱུད་ཆེན་ཀུན་དགའ་དོན་གྲུབ་ནས་སྤྱི་ལོ་1959ལོར་ཤར་རྩེ་དགེ་བཤེས་དཔལ་ལྡན་བར་རིམ་པ་སྟར་བྱོན་ནས་སྟོད་རྒྱུད་ཀྱི་འཆད་ཉན་ལེགས་པར་མཛད་དོ།   །   དེ་ལྟར་གསང་སྔགས་རིག་པ་འཛིན་པའི་རྒྱུད་གྲྭ་རྣམ་གཉིས་ཀྱི་ཁྱད་ཆོས་ལྟ་བུར་མཚོན་ན།   ཕྱི་འདུལ་བའི་ཀུན་སྤྱོད་རྣམ་པར་དག་པ་ལ།   ནང་གསང་སྔགས་ཟབ་མོའི་རྣལ་འབྱོར་གྱིས་རྒྱུད་ཕྱུག་པ་དང་།   མདོ་སྔགས་ཟུང་འབྲེལ་གྱིས་རྒྱལ་བསྟན་འཛིན་པའི་དགོས་པ་ལ་རྟེན་ཐོག་མར་གྲྭ་ས་ཆེན་པོ་རྣམས་སུ་གཞུང་ཆེན་བཀའ་པོད་ལྔ་ལ་སློབ་གཉེར་མཐར་ཕྱིན་པ་མཛད་ནས།   དེ་རྗེས་རྒྱུད་གྲྭ་སྟོད་སྨད་གཉིས་ཀྱི་གྲྭ་ཚང་གང་རུང་དུ་ཕེབས་ཏེ།   འབྲས་བུ་གསང་སྔགས་རྡོ་རྗེ་ཐེག་པའི་མན་ངག་མཐར་ཐུག རྣལ་འབྱོར་བླ་མེད་རྩ་རྒྱུད་ཀྱི་གསང་སྔགས་རྒྱུད་སྡེ་རྒྱ་མཚོ་ཆེན་པོར་ཐོས་བསམ་སྒོམ་གསུམ་དང་སྒྲུབ་པ་ཉམས་བཞེས་གནང་ཏེ།   མདོ་སྔགས་ཀྱི་གནད་ཐམས་ཅད་རྫོགས་པའི་དགེ་བའི་བཤེས་གཉེན་དུ་བསྒྱུར་བ་དེ་དག་ལ་ལ་ནི་དགའ་ལྡན་གསེར་ཁྲི་དང་དགོན་སྡེ་སོ་སོའི་མཁན་པོ་མཛད།   ལ་ལ་ནི་དབེན་པའི་རི་སུལ་དུ་ཚེ་དང་སྒྲུབ་པ་མཉམ་པར་མཛད་དེ་རྒྱལ་བསྟན་ཉི་མ་ལྟར་གསལ་བ་མཛད་དོ།   ། 

    གསལ་འདེབས། 
        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
        རྩོམ་ཁུངས། རྩོམ་འདིའི་སྦྲེལ་ཐགhttp://www.tb1025.cn