ལན། འབྲས་བུ་དེ་དག་ལམ་གང་གིས་ཐོབ་ཚུལ་ནི། གསེར་ཕྲེང་ལས། དང་བོ་ནི། འབྲས་བུ་ཐོག་མཐའ་གཉིས་དངོས་སུ་ཐོབ་བྱེད་ཀྱི་ལམ་ཡིན་ན་འདས་ལམ་གྱིས་ཁྱབ་སྟེ།རིམ་པ་ལྟར་ལམ་ལ་རྗེས་བཟོད་དང་སྲིད་རྩེའི་སྒོམ་སྤང་ཆུང་ངུ་ཆུང་ངུའི་གཉེན་པོ་ཡིན་པས་སོ། །འབྲས་བུ་བར་བ་གཉིས་ལ་ཡང་ཐོད་རྒལ་བའི་སྐབས་ཡིན་ན་དེ་གཉིས་དངོས་སུ་ཐོབ་བྱེད་འདས་ལམ་ཡིན་ཏེ། ལམ་ལ་རྗེས་བཟོད་ཡིན་པས་སོ། །རིམ་གྱིས་པ་གཉིས་ཡིན་ན་འཇིག་རྟེན་པ་དང་འཇིག་རྟེན་ལས་འདས་པའི་ལམ་གཉིས་ཀས་འཐོབ་པ་སྲིད་དེ། བཅུ་དྲུག་པ་ཐོབ་རྗེས་སུ་ལམ་ཟག་མེད་ཀྱིས་དྲུག་པ་དང་དགུ་བ་སྤངས་ན་དེ་གཉིས་དངོས་སུ་འཐོབ་བྱེད་འདས་ལམ་དང་། ཞི་རགས་ཀྱི་རྣམ་ཅན་གྱིས་དེ་གཉིས་སྤངས་ན་འཇིག་རྟེན་པའི་ལམ་གྱིས་འབྲས་བུ་དེ་གཉིས་དངོས་སུ་འཐོབ་སྟེ། འདོད་པའི་སྒོམ་སྤང་ནི་ལམ་གཉིས་ཀས་ཀྱང་སྤང་ནུས་པའི་ཕྱིར་རོ།། ཞེས་གསུངས། གཉིས་པ་དུས་ནམ་གྱི་ཚེ་ཐོབ་ཚུལ་ནི། གསེར་ཕྲེང་ལས། གཉིས་པ་ནི། རྒྱུན་ཞུགས་དང་ཐོད་རྒལ་བའི་འབྲས་བུ་གཉིས་ནི་བཅུ་དྲུག་པ་ཐོབ་པ་དང་དུས་མཉམ་དུ་ཐོབ་པས་ཁྱབ་བོ། །ཞེས་པ་ནས། མཐར་གྱིས་པའི་འབྲས་བུ་བར་བ་གཉིས་ནི་བཅུ་དྲུག་པ་ཐོབ་རྗེས་སུ་མངོན་དུ་བྱེད་པས་ཁྱབ་ལ་དེ་ཡང་རིམ་པ་ལྟར་འདོད་པའི་སྒོམ་སྤང་དྲུག་པ་དང་དགུ་བ་སྤངས་པ་དང་དུས་མཉམ་དུ་འཐོབ་པོ། །ཞེས་གསུངས། 

གསུམ་པ་ས་གང་ལ་བརྟེན་ནས་ཐོབ་ཚུལ་ནི། གསེར་ཕྲེང་ལས། གསུམ་པ་ནི། རྒྱུན་ཞུགས་དང་ཕྱིར་འོང་ཐོབ་བྱེད་ཀྱི་ལམ་ཡིན་ན་བསམ་གཏན་དང་བོའི་ཉེར་བསྡོགས་ལ་བརྟེན་པས་ཁྱབ་སྟེ། དེ་གཉིས་འདོད་པ་ལ་ཆགས་པ་དང་མ་བྲལ་བའི་འཕགས་པ་ཆགས་བཅས་ཡིན་པས་སོ། །དེ་བཞིན་དུ་མཐར་གྱིས་པའི་ཕྱིར་མི་འོང་ཐོབ་པའི་ལམ་ཡང་རིག་པར་བྱའོ། །ཐོད་རྒལ་བའི་ཕྱིར་མི་འོང་འཐོབ་པའི་ལམ་ནི་བསམ་གཏན་ས་དྲུག་གང་རུང་ལ་བརྟེན་པ་སྲིད་དེ། ཐོད་རྒལ་བའི་ཕྱིར་མི་འོང་ཐོབ་པར་བྱེད་པ་ལ་མཐོང་ལམ་གྱི་སྔོན་དུ་སྲིད་རྩེའི་ཉེར་བསྡོགས་ཐོབ་ནས་ཅི་ཡང་མེད་པ་མན་ཆད་ལ་ཆགས་པ་དང་བྲལ་བ་སྲིད་པས་དེ་ས་དྲུག་གང་ལ་བརྟེན་ཡང་དབང་དང་ལྡན་པའི་ཕྱིར་རོ། །འོན་ཀྱང་གཟུགས་མེད་ལ་བརྟེན་པ་མི་སྲིད་དེ། འདིའི་སྐབས་སུ་ཕྱིར་མི་འོང་ཐོབ་པའི་ལམ་དང་མཐོང་ལམ་གཉིས་ས་གཅིག་པའི་ཕྱིར་རོ། །དགྲ་བཅོམ་པའི་འབྲས་བུ་ནི་ཟག་མེད་ཀྱི་ས་དགུ་གང་རུང་ལ་བརྟེན་ནས་མངོན་དུ་བྱེད་པ་སྲིད་དོ། །ཞེས་གསུངས། ལམ་གང་གིས་འཐོབ་ཚུལ་ལ་མངོན་པ་གོང་འོག་གཉིས་མི་མཐུན་ཏེ། གོང་མ་ལྟར་འཆད་ཚུལ་ནི་གོང་དུ་གསུངས་པ་དེ་བཞིན་ཡིན་ལ། འོག་མ་ལྟར་འཆད་ཚུལ་ནི། གསེར་ཕྲེང་ལས། དེ་ལ་མཛོད་ལྟར་ན། ཞེས་པ་ནས། འབྲས་གནས་གང་ཡིན་ལ་སྒོམ་ལམ་ཐོབ་པས་ཁྱབ་སྟེ། བཅུ་དྲུག་པ་སྒོམ་ལམ་ཡིན་པས་སོ། །ཞེས་གསུངས། ས་གང་ལ་བརྟེན་ནས་ཐོབ་ཚུལ་ལ་ཡིག་ཆ་ཁག་གིས་གསུང་ཚུལ་མི་འདྲ་སྟེ། གསེར་ཕྲེང་དང་སྒོ་མང་ཡིག་ཆ་ལྟར་ན་མཐར་གྱིས་པའི་ཕྱིར་མི་འོང་གི་འབྲས་བུ་དེ་བསམ་གཏན་ས་དྲུག་གང་རུང་ལ་བརྟེན་ནས་འཐོབ་དགོས་པ་དགོངས་པ་ཡིན་ལ། བླ་མ་རྗེ་བཙུན་པ་དང་པན་ཆེན་བསོད་གྲགས་པས་རིམ་གྱིས་པའི་ཕྱིར་མི་འོང་གི་འབྲས་བུ་དེ་དངོས་གཞི་ལ་བརྟེན་ནས་འཐོབ་དགོས་པར་འདོད་དེ། རྗེ་གུང་ཐང་བློ་གྲོས་རྒྱ་མཚོའི་འགྲེལ་མཆན་ལས། རྗེ་བཙུན་པ་དང་བསོད་གྲགས་པས། རྣམ་བཤད་ཀྱི་ཚིག་ཟིན་ལ་བརྟེན་ནས་དངོས་གཞིས་ཁྱབ་པར་བཤད་པ་འདི་དང་འགལ་ལ། རྣམ་བཤད་ཀྱི་དེ་ལམ་སླ་བ་ལ་དགོངས་སོ། །སྒོ་མང་ཡིག་ཆར། དེ་ལ་ཟག་མེད་དངོས་གཞི་ཐོབ་པས་མ་ཁྱབ་ལ། ཐོབ་ཀྱང་ཉེར་བསྡོགས་ནན་གྱིས་བསྐྱེད་པ་ཡོད་གསུངས་པ། དབང་དང་ལྡན་ཞེས་པ་དང་འགྲིག་གོ། །ཞེས་གསུངས། 

༢༠༢༠བོད་བརྒྱུད་ནང་བསྟན་རིགས་པའི་དོགས་དཔྱོད་ཤེས་རབ་ལོ་དེབ་ལས་བཤུས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn