ལན་ནི། སྐབས་འདིར་མཚོད་བྱེད་དཔེའི་དགེ་འདུན་དང་མཚོན་བྱ་དོན་གྱི་དགེ་འདུན་གཉིས་གསུངས་པའི། དང་པོ་ལ་གསུམ། སྤྱིའི་རྣམ་པར་བཞག་པ་དང་། སོ་སོའི་རང་བཞིན་བཤད་པ་དང་།  འབྲས་བུ་བཞིར་འཇོག་པའི་རྒྱུ་མཚན་ནོ། དང་པོ་ལ་བཞི། དགེ་འདུན་གྱི་གྲངས། བརྡ་སྦྱོར་པའི་ཚུལ། ཞུགས་གནས་གང་ལ་བཞག  འབྲས་བུ་རྣམས་འཐོབ་པའི་ཚུལ་ལོ། །ཞེས་བཞི་གསུང་པའི་སྐབས་སུ་བབས་པ་བཞི་བ་འབྲས་བུ་རྣམས་འཐོབ་པའི་ཚུལ་ལ་གསུམ་ལས། འབྲས་བུ་དེ་དག་ལམ་གང་གིས་དང་། དུས་ནམ་གྱི་ཚེ་དང་། ས་གང་ལ་བརྟེན་ནས་ཐོབ་པའོ། །དང་པོ་འབྲས་བུ་དེ་དག་ལམ་གང་ལ་བརྟེན་ནས་ཐོབ་ཚུལ་བཤད་པ་ནི། འབྲས་བུ་བཞི་པོ་དེ་དག་ལམ་ཟག་མེད་དང་འཇིག་རྟེན་པའི་ལམ་གང་ལ་རྟེན་པའི་ཚུལ་ཡོད་དེ། རྒྱུན་ཞུགས་ཀྱི་འབྲས་བུ་དང་དགྲ་བཅོམ་པའི་འབྲས་བུ་གཉིས་དངོས་སུ་ཐོབ་བྱེད་ཀྱི་ལམ་ལ་འདས་ལམ་གྱི་ཁྱབ་པའི་རྒྱུ་མཚན་དུ། རྒྱུན་ཞུགས་ཀྱི་འབྲས་བུ་ཐོབ་པའི་ལམ་ཟག་མེད་ལ་བཅོ་ལྔ་བ་ལམ་ལ་རྗེས་བཟོད་དང་། དགྲ་བཅོམ་པའི་འབྲས་བུ་དངོས་སུ་ཐོབ་བྱེད་ཀྱི་འདས་ལམ་ལ་བཅུ་དྲུག་པ་ལམ་རྗེས་ཤེས་སྒོམ་ལམ་རྡོ་རྗེ་ལྟ་བའི་ཏིང་ངེ་འཛིན་ནམ་སྲིད་རྩེའི་སྒོམ་སྤང་ཆུང་ངུའི་ཆུང་ངུའི་གཉེན་པོ་ཡིན་པའི་རྒྱུ་མཚན་དུ་གསུངས་དེ། གསེར་ཕྲེང་ལས། རིམ་པ་ལྟར་ལམ་ལ་རྗེས་བཟོད་དང་སྲིད་རྩེའི་སྒོམ་སྤང་ཆུང་ངུའི་ཆུང་ངུའི་གཉེན་པོ་ཡིན་པས་སོ། །ཞེས་གསུངས་པའི་ཕྱིར། རིམ་གྱིས་པའི་འབྲས་བུ་བར་པ་གཉིས་ལ་འཇིག་རྟེན་དང་འཇིག་རྟེན་ལས་འདས་པའི་ལམ་གཉིས་ཀ་ལ་རྟེན་ནས་འབྲས་བུ་ཐོབ་པ་ཡོད་ལ། ཐོད་རྒལ་པའི་སྐབས་ཡིན་ན་དེ་གཉིས་དངོས་སུ་ཐོབ་བྱེད་ལ་འདས་ལམ་གྱི་ཁྱབ་པའི་ཕྱིར། དང་པོ་གྲུབ་དེ། གསེར་ཕྲེང་ལས། རིམ་གྱིས་པ་གཉིས་ཡིན་ན་འཇིག་རྟེན་དང་འཇིག་རྟེན་ལས་འདས་པའི་ལམ་གཉིས་ཀས་འཐོབ་པ་སྲིད་དེ།  ཞེས་དང་། གཉིས་པ་གྲུབ་དེ། ཐོད་རྒལ་བའི་དེ་གཉིས་དངོས་སུ་ཐོབ་བྱེད་ཀྱི་ལམ་ལ་འདས་ལམ་གྱིའི་ཁྱབ་དེ། ཡང་དེ་ཉིད་ལས།  འབྲས་བུ་བར་པ་གཉིས་ལ་ཐོད་རྒལ་པའི་སྐབས་ཡིན་ན་དེ་གཉིས་དངོས་སུ་ཐོབ་བྱེད་འདས་ལམ་ཡིན་ཏེ། ལམ་ལ་རྗེས་བཟོད་ཡིན་པས་སོ། །ཞེས་གསུངས་པའི་ཕྱིར། དེ་ལྟར་འབྲས་བུ་བར་པ་གཉིས་ཐོད་རྒལ་པའི་སྐབས་ཡིན་ན་འདས་ལམ་ལ་རྟེན་ནས་འབྲས་བུ་མངོན་དུ་བྱེད་པ་དང་། རིམ་གྱིས་པ་གཉིས་ཡིན་ན་འཇིག་རྟེན་དང་འཇིག་རྟེན་ལས་འདས་པའི་ལམ་གཉིས་ཀ་ལ་རྟེན་ནས་འབྲས་བུ་མངོན་དུ་བྱེད་པར་གསུངས་སོ། །

འདི་ལ་ཅུང་ཟད་དཔྱད་ན། ཁ་ཅིག་རིམ་གྱིས་པའི་འབྲས་བུ་བར་པ་གཉིས་ཡིན་ན་འཇིག་རྟེན་དང་འཇིག་རྟེན་ལས་འདས་པའི་ལམ་གཉིས་གྱིས་འབྲས་བུ་མངོན་དུ་བྱེད་ནུས་པའི་ཁྱབ་ཟེར་ན། དེ་གཉིས་ཀྱི་འབྲས་བུ་མངོན་དུ་བྱེད་པ་ལ་འདས་ལམ་ལ་རྟེན་ནས་འབྲས་བུ་མངོན་དུ་བྱེད་པའི་མ་ཁྱབ་པར་ཐལ་འདོད་པའི་ཕྱིར། འདོད་མི་ནུས་དེ། འབྲས་བུ་བཞི་པོ་གང་ཡིན་ཀྱང་དེ་མངོན་དུ་བྱེད་པ་ལ་འཇིག་རྟེན་ལས་འདས་པའི་ལམ་ཁོ་ན་ལ་རྟེན་ནས་འབྲས་བུ་མངོན་དུ་བྱེད་དགོས་པའི་ཁྱབ་པའི་ཕྱིར། དེ་ཐལ། ཀུན་མཁྱེན་ཆོས་འབྱུང་གི་དགེ་འདུན་ཉི་ཤུའི་ཡིག་ཆ་ལས། གསུམ་པ་འབྲས་བུ་བཞི་པོ་དེ་འཇིག་རྟེན་དང་འཇིག་རྟེན་ལས་འདས་པའི་ལམ་གང་ལ་རྟེན་ནས་ཐོབ་ཚུལ་ཡོད་དེ། འཇིག་རྟེན་ལས་འདས་པའི་ལམ་ཁོ་ན་ལ་བརྟེན་ནས་གསར་དུ་ཐོབ་པའི་ཕྱིར་ཏེ། རང་ཐོབ་བྱེད་ཀྱི་བར་ཆད་མེད་ལམ་ལ་བརྟེན་ནས་གསར་དུ་ཐོབ་པ་གང་ཞིག བར་ཆད་མེད་ལམ་ཡིན་ན། འདས་ལམ་ཡིན་དགོས་པའི་ཕྱིར། ཞེས་གསུངས་པའི་ཕྱིར། དེ་ཡང་མ་ཟད་སྲས་དགེ་འདུན་ཉི་ཤུའི་ཡིག་ཆ་ལས། དེ་ཐམས་ཅད་འཇིག་རྟེན་པའི་ལམ་དང་སོ་སྐྱེའི་ལམ་གྱིས་དངོས་སུ་ཐོབ་པ་མེད་དེ། འཇིག་རྟེན་ལས་འདས་པའི་ལམ་དང་འཕགས་ལམ་གྱིས་དངོས་སུ་ཐོབ་དགོས་པའི་ཕྱིར།  ཞེས་གསུངས་པའི་ཕྱིར། དེ་ལྟར་ན་འཇིག་རྟེན་པའི་ལམ་གྱི་དེ་གཉིས་ཀྱི་འབྲས་བུ་མངོན་དུ་བྱེད་མི་ནུས་པར་འདོད་དགོས་ལ། འདོད་ན། འབྲས་བུ་དེ་གཉིས་ཀྱི་འཇིག་རྟེན་པའི་ལམ་གྱིས་ཐོབ་ན་དབང་པོ་ཉེར་གཉིས་ཀྱི་ནང་ནས་ཡིད་ཀྱི་དབང་པོའི་པར་བདུན་གྱི་འཐོབ་པ་དང་། འཇིག་རྟེན་ལས་འདས་པའི་ལམ་གྱིས་འཐོབ་ན་ཀུན་ཤེས་པའི་དབང་པོའི་པར་བརྒྱད་ཀྱི་ཐོབ་པ་མ་ཡིན་པར་ཐལ། འདོད་པའི་ཕྱིར། འདོད་མི་ནུས་དེ་མཛོད་རང་འགྲེལ་ལས། ལན་ཅིག་ཕྱིར་འོང་བའི་འབྲས་བུ་མཐར་གྱིས་འཐོབ་ལ།  དེ་ཡང་འཇིག་རྟེན་པའི་ལམ་གྱིས་འཐོབ་ན་ནི།  དེ་དད་པ་ལ་སོགས་པ་ལྔ་དང་བཏང་སྙོམས་དང་ཡིད་ཀྱི་དབང་པོ་དང་དབང་པོ་བདུན་དག་གིས་འཐོབ་པོ།  །འོན་ཏེ་འཇིག་རྟེན་ལས་འདས་པའི་ལམ་གྱིས་འཐོབ་ན་ནི་དེ་དབང་བོ་བརྒྱད་དག་གིས་འཐོབ་སྟེ། བརྒྱད་པ་ནི་ཀུན་ཤེས་པའི་དབང་བོ་ཡིན་ནོ།  །ཞེས་སོ། །དེ་མ་ཟད་གསེར་ཕྲེང་ལས། །དེའི་ཕྱིར་རིམ་གྱིས་པ་ཡིན་ན་ལམ་ཟག་མེད་ཀྱིས་སྤང་བྱ་སྤོང་བ་དགོས་ཞེས་པ་ནི་ཞིབ་ཏུ་མ་བརྟགས་པའོ། །ཞེས་སོགས་གསུངས་ལ། གཞུང་འདི་དག་གི་དགོངས་པ་འགྲེལ་ཚུལ་མི་འདྲ་བ་གཉིས་འདུག་ན་མཛོད་མགྲེལ་སོགས་ཀྱི་དགོངས་པ་མཛོད་ལུགས་སམ་མངོན་པ་འོག་མའི་གཞུང་དོན་འགྲེལ་ཚུལ་ཡིན་ཟེར་དགོས་སམ་དཔྱོད་ལྡན་རྣམས་ཀྱི་དཔྱད་པར་འཚལ།

ཡང་ཕྱིར་འོང་གི་སྐབས་སུ་ཆགས་བྲལ་སྔོན་སོང་གི་ཕྱིར་འོང་ཡོད་མེད་ལ་ཅུང་ཟད་དཔྱད་ན་མཆིམས་མཛོད་ལས།  དེ་འཆད་པ་ན་བརྒྱད་དུ་དབྱེ་བ་དང་།  བདུན་དུ་དབྱེ་བ་དང་།  གཉིས་སུ་དབྱེ་བ་གསུམ་ལས་དང་པོ་ལའང་འདོད་ཆགས་དང་བྲལ་བ་སྔོན་དུ་འགྲོ་བ་དང་།  མཐར་གྱིས་པ་དང་།  ཁྱད་པར་བཤད་པ་གསུམ་གྱི་དང་པོ་ནི་འཇིག་རྟེན་པའི་སྒོམ་ལམ་གྱིས་སྲིད་རྩེ་མ་གཏོགས་པའི་ས་བརྒྱད་པོ་ལས་ཅི་རིགས་པར་འདོད་ཆགས་དང་བྲལ་བ་སྔོན་དུ་སོང་ནས་མཐོང་ལམ་ཐོབ་པར་བྱེད་པ་སྟེ། དེ་ཡང་འགྲེལ་བ་ལས་ཕལ་ཆེར་ལས་འདོད་ཆགས་དང་བྲལ་བ་དང་འདོད་པ་ལས་འདོད་ཆགས་དང་བྲལ་བ་གཉིས་བཤད་པ་ལས་དང་པོ་ནི་འདོད་པའི་རྣམ་པ་དྲུག་པ་ནས་བརྒྱད་པའི་བར་སྤངས་པ་དང་། གཉིས་པ་ནི་འདོད་པའི་རྣམ་པ་དགུ་པ་སྤངས་པ་ནས་ཅི་ཡང་མེད་པའི་སྐྱེ་མཆེད་ཀྱི་དགུ་པ་སྤངས་པའི་བར་ལ་ཊཱིཀས་བཤད་ཀྱི་རྣམ་པ་ལྔ་བ་སྤངས་ནས་མཐོང་ལམ་ཐོབ་པ་ནི་ཆགས་བྲལ་སྔོན་འགྲོར་མ་བཤད་ལ། འཇིག་རྟེན་པ་ཡིས་ཐོབ་འབྲས་ནི་ཞེས་པའི་འགྲེལ་པར་ཡང་འཇིག་རྟེན་པའི་ལམ་གྱིས་ཐོབ་པའི་འབྲས་བུ་གཉིས་ཞེས་འབྱུང་བའི་ཕྱིར་འབྲས་བུ་བར་བ་གཉིས་ལ་ཡོད་ཀྱི་སྔ་ཕྱི་གཉིས་ལ་ནི་ཆགས་བྲལ་སྔོན་འགྲོ་མེད་དོ། ཞེས་དང་། མཛོད་ཊཱིཀ་ཐར་ལམ་གསལ་བྱེད་ལས། དེ་དབང་པོ་དགུས་ཐོབ་པ་ཡོད་དེ། ཆགས་བྲལ་སྔོན་སོང་གི་ཕྱིར་འོང་གི་འབྲས་བུ་དེ་དབང་པོ་དགུས་ཐོབ་པའི་ཕྱིར། ཞེས་ཆགས་བྲལ་སྔོན་སོང་གི་ཕྱིར་འོང་ཡོད་པར་བཤད་ལ་དེ་བཞིན་དུ་ལེགས་བཤད་གསེར་ཕྲེང་ལས། གཞན་ཡང་དེ་གཉིས་ཆགས་བྲལ་སྔོན་སོང་གི་ཕྱིར་འོང་དང་ཕྱིར་མི་འོང་ཞུགས་པ་དང་། ཕྱིར་མི་འོང་དང་དགྲ་བཅོམ་ཞུགས་པ་གཞི་མཐུན་པ་ཡིན་ཀྱང་ཆགས་བྲལ་སྔོན་སོང་གི་ཞུགས་པ་ནི་མིན་ཏེ། ཞེས་དང་། དེ་བཞིན་དུ་གུང་ཐང་བློ་གྲོས་རྒྱ་མཚོས་མཛད་པའི་འགྲེལ་བ་དོན་གསལ་གྱི་མཆན་འགྲེལ་དང་། དགེ་བཤེས་དཔལ་ལྡན་བཟང་པོས་མཛད་པའི་གསེར་ཕྲེང་གི་མཆན་འགྲེལ་དང་། དགེ་བཤེས་སུ་ཉིད་ཡེ་ཤེས་རྒྱ་མཚོས་མཛད་པའི་གསེར་ཕྲེང་གི་ཚིག་སྡོམ་སོགས་ལས་ཆགས་བྲལ་སྔོན་སོང་གི་ཕྱིར་འོང་ཡོད་པར་གསུངས་པའི་ཕྱོགས་སོ། །ཀུན་བཏུས་དར་ཊཱིཀ་ལས། དེ་ཉིད་ལ་ཡང་མཐོང་ལམ་གྱི་སྔ་རོལ་ཏུ་ཕལ་ཆེར་ལ་འདོད་ཆགས་དང་བྲལ་བ་དང་།   

སྒོམ་ལམ་གྱིས་ཐོབ་པ་གཉིས་ཡོད་ལ། སྔ་མ་ལ་ཆགས་བྲལ་སྔོན་སོང་དུ་འདོད་པ་ནི་ཧ་ཅང་ཐལ་བའོ། ཞེས་གསུངས་པ་ལ་བརྟེན་ནས་རྗེ་བཙུན་ཆོས་ཀྱི་རྒྱལ་མཚན་གྱིས་མཛད་པའི་དགེ་འདུན་ཉི་ཤུའི་སྤྱི་དོན་ལས། དེ་འདྲའི་ཕྱིར་འོང་མེད་དེ། ཆགས་བྲལ་སྔོན་སོང་ཞེས་པའི་ཆགས་པ་དེ་སྤྱིར་འདོད་ཉོན་དང་ཁྱད་པར་དུ་འཇིག་རྟེན་པའི་སྒོམ་སྤང་དུ་གྱུར་པའི་འདོད་པའི་འདོད་ཆགས་ལ་བྱེད་རིགས་པ་གང་ཞིག  མཐོང་ལམ་གྱི་སྔ་རོལ་ཏུ་དེ་ལ་ཆགས་བྲལ་བྱས་པའི་ཕྱིར་འོང་མེད་པའི་ཕྱིར་ཏེ།  དེའི་སྔ་རོལ་ཏུ་བསམ་གཏན་གྱི་དངོས་གཞི་ཐོབ་པའི་ཕྱིར་འོང་མེད་པའི་ཕྱིར།  ཞེས་ཆགས་བྲལ་སྔོན་སོང་གི་རྣམ་པ་ཅན་གྱིས་རང་གི་ཞུགས་པའི་སྤང་བྱའི་གཙོ་བོ་ལ་ཆགས་པ་མངོན་གྱུར་བ་དང་བྲལ་བར་བྱས་པ་ཅིག་ལ་འཇོག་རིགས་པ་གང་ཞིག ཊཱིཀ་ཆེན་གྱིས་གསུང་དེས། ཕྱིར་འོང་མེད་པར་གསུངས་ལ། དེ་དང་མཐུན་པར་མདོ་སྔགས་རབ་འབྱམས་པ་པཎ་ཆེན་བསོད་ནམས་གྲགས་པའི་ཕར་ཕྱིན་མཐའ་དཔྱོད་དང་། བྱང་རྩེའི་མཁས་དབང་སྦྱིན་པ་དར་རྒྱས་སོགས་ཡིག་ཆའི་བདག་པོ་མང་པོས་ཆགས་བྲལ་སྔོན་སོང་གི་ཕྱིར་འོང་མེད་པར་གསུངས་སོ། དེ་ལྟར་ཕྱོགས་གཉིས་ཡོད་ཀྱང་དགོངས་པར་འགལ་བ་མེད་དེ།  རང་གི་ཞུགས་པའི་སྤངས་བྱའི་གཙོ་བོ་ལ་མཐོང་ལམ་གྱི་སྔོན་དུ་ཆགས་བྲལ་བྱས་པ་ལ་ཆགས་བྲལ་སྔོན་སོང་གི་བརྡ་སྦྱོར་མི་སྦྱོར་གྱི་ཁྱད་པར་ཙམ་མོ། །

འོ་ན་ཁྱོད་རང་ཕྱོགས་གཉིས་པོ་དེའི་གང་གི་རྗེས་སུ་འཛིན་ཞེ་ན། རེ་ཞིག་ལེགས་བཤད་གསེར་ཕྲེང་ལྟར་ཆགས་བྲལ་སྔོན་སོང་གི་ཕྱིར་འོང་ཡོད་ཅེས་སྨྲ་བར་བྱ་ལ། རང་རེའི་ཀུན་མཁྱེན་འཇམ་དབྱངས་བཞད་པའི་རྡོ་རྗེའི་ཡིག་ཆའི་རྗེས་འབྲང་དང་བཅས་པའི་དེ་ལྟར་དུ་འདོད་དོ། །ཀུན་མཁྱེན་ཆོས་ཀྱི་འབྱུང་གནས་ཀྱིའི་དགེ་འདུན་ཉི་ཤུའི་ཡིག་ཆ་ལས། ཡང་ཁ་ཅིག ཕྱིར་འོང་ལ་ཆགས་བྲལ་སྔོན་སོང་གི་བརྡ་སྦྱར་བ་མི་འཐད་པར་ཐལ། མཐོང་ལམ་གྱི་སྔ་རོལ་ཏུ་འདོད་ཉོན་ཕལ་ཆེར་ལ་ཆགས་པ་དང་བྲལ་བ་དང་མ་ལུས་པ་ལ་ཆགས་པ་དང་བྲལ་བ་གཉིས་ཡོད་པ་ལས། སྔ་མ་ཆགས་བྲལ་སྔོན་སོང་དུ་ཁས་བླངས་ན་ཧ་ཅང་ཐལ་ཆེ་བའི་སྐྱོན་ཡོད་པའི་ཕྱིར་ཏེ། ཀུན་བཏུས་ཀྱི་དར་ཊཱིཀ་ལས། འདི་ལ་འདོད་པའི་ཉོན་མོངས་ཕལ་ཆེར་ལ་ཆགས་པ་དང་བྲལ་བ་དང་མ་ལུས་པ་ལ་ཆགས་པ་དང་བྲལ་བ་གཉིས་ཡོད་ལ། སྔ་མ་ཆགས་བྲལ་སྔོན་སོང་དུ་འདོད་པ་ནི་ཧ་ཅང་ཐལ་བའོ། །ཞེས་གསུངས་པའི་ཕྱིར་ན་མ་ཁྱབ་སྟེ།

དེའི་དོན་ནི༑ མཐོང་ལམ་གྱི་སྔ་རོལ་ཏུ་འདོད་ཉོན་ཕལ་ཆེར་ལ་ཆགས་པ་དང་བྲལ་བ་དང་མ་ལུས་པ་ལ་ཆགས་པ་དང་བྲལ་བ་གཉིས་ཡོད་པ་ལས། ཕལ་ཆེར་ལ་ཆགས་པ་དང་བྲལ་བ་དེ་མ་ལུས་པ་ལ་ཆགས་པ་དང་བྲལ་བར་ཁས་བླངས་ན་ཧ་ཅང་ཐལ་བའི་སྐྱོན་དུ་འགྱུར་ཞེས་པའི་དོན་ཡིན་པའི་ཕྱིར།  ཞེས་སོགས་གསུངས་སོ། །གཉིས་པ་དུས་ནམ་གྱི་ཚེ་འབྲས་བུ་མངོན་དུ་བྱེད་ཚུལ་བཤད་པ་ལ། རྒྱུན་ཞུགས་དང་ཐོད་རྒལ་བ་གཉིས་ནི་བཅུ་དྲུག་པ་ཐོབ་པ་དང་དུས་མཉམ་ཉིད་དུ་ཐོབ་ལ། དེ་ཡང་མཐོང་ལམ་གྱི་སྔོན་དུ་འདོད་པའི་སྒོམ་སྤང་དྲུག་པའམ་དགུ་པ་ངེས་པར་སྤངས་པ་གཅིག་གིས་བཅུ་དྲུག་པ་ཐོབ་པ་དང་མཉམ་དུ་ཕྱིར་འོང་དང་ཕྱིར་མི་འོང་འབྲས་བུ་ཐོབ་པར་གསུངས་སོ། །འདོད་ཉོན་དྲུག་པ་མ་སྤངས་ན་ལྔ་བ་མན་ཆད་སྤངས་ཀྱང་བཅུ་དྲུག་པ་ལ་རྒྱུན་ཞུགས་ཀྱི་འབྲས་བུ་ཐོབ་པར་གསུང་ལ།  རིམ་གྱིས་པའི་འབྲས་བུ་བར་བ་གཉིས་ནི་བཅུ་དྲུག་པ་ཐོབ་རྗེས་སུ་འདོད་པའི་སྒོམ་སྤང་དྲུག་པ་དང་དགུ་པ་སྤངས་པ་དང་དུས་མཉམ་དུ་འཐོབ་པའི་ཁྱབ་པར་གསུངས་སོ། །དྲོད་ནས་ལམ་ལ་རྗེས་བཟོད་ཀྱི་བར་ལ་གནས་པའི་ཉན་ཐོས་གང་འདོད་ཉོན་དྲུག་པ་མ་སྤངས་པ་དེ་རྒྱུན་ཞུགས་ཀྱི་དོན་དང་། དེ་ལ་དབྱེ་ན་མཐོང་ལམ་གྱི་སྔོན་དུ་སྒོམ་སྤང་གཅིག་ཀྱང་མ་སྤངས་པ་དང༌། གཅིག་ནས་ལྔའི་བར་གང་རུང་སྤངས་པ་གཉིས་སོ། དང་པོའི་ས་མཚམས་སྦྱོར་ལམ་ནས་འཛིན་པར་ཀུན་ལས་བཏུས་པ་འདོད་དེ། ཇི་སྐད་དུ། རྒྱུན་དུ་ཞུགས་པའི་འབྲས་བུ་ལ་འཇུག་པ་གང་ཞེ་ན།  གང་ངེས་པར་འབྱེད་པའི་ཆ་དང་མཐུན་པ་ལ་མཐོང་བའི་ལམ་གྱི་སེམས་ཀྱི་སྐད་ཅིག་བཅོ་ལྔ་ལ་གནས་པའི་གང་ཟག་གོ ཞེས་དང་། ལེགས་བཤད་གསེར་ཕྲེང་ལས། ཀུན་བཏུས་ལྟར་ན་ཞུགས་པ་དང་པོ་ལ་སྦྱོར་ལམ་པའང་ཡོད་ལ་གཞན་ཞུགས་པ་རྣམས་མཚུངས་སོ། །

འབྲས་གནས་ལ་ཐོད་རྒལ་བའི་འབྲས་གནས་གཉིས་དང་རྒྱུན་ཞུགས་ལ་མཐོང་ལམ་པའང་ཡོད་དེ། བཅུ་དྲུག་པ་མཐོང་ལམ་ཡིན་པས་སོ། །འབྲས་གནས་གཞན་འདྲའོ། །གསེར་ཕྲེང་གཞིར་བཞག་ན་འདིའི་སྐབས་སུ་འགའ་ཞིག་འདི་ལྟར་དོགས་ཏེ་ཐོད་རྒལ་བའི་ཕྱིར་འོང་ཞུགས་པ་དེ་ཡང་རྒྱུན་ཞུགས་ཞུགས་པར་ཅིའི་ཕྱིར་མི་འགྱུར་ཏེ་འདོད་ཉོན་དྲུག་པ་མ་སྤངས་ཤིང་སྦྱོར་ལམ་སྟན་གཅིག་པ་ནས་ལམ་རྗེས་བཟོད་ཀྱི་བར་གང་རུང་ལ་གནས་པའི་ཉན་ཐོས་ཡིན་པའི་ཕྱིར། མ་ཁྱབ་ན། རྒྱུན་ཞུགས་ཞུགས་པའི་ངོ་བོར་བཤད་པའི་སྐབས་སུ་ལེགས་བཤད་གསེར་ཕྲེང་ལས། དྲོད་ནས་ལམ་ལ་རྗེས་བཟོད་ཀྱི་བར་ལ་གནས་པའི་ཉན་ཐོས་གང་འདོད་ཉོན་དྲུག་པ་མ་སྤངས་པའོ། །ཞེས་དང་རྗེས་མཛད་པའི་དགེ་འདུན་ཉི་ཤུ་བསྡུས་པ་ལས། འདོད་ཉོན་དྲུག་པ་མ་སྤངས་པར། །སྦྱོར་ལམ་སྟན་གཅིག་ནས་བཟུང་སྟེ། །ལམ་ལ་རྗེས་བཟོད་བར་དག་ལ། །གནས་པ་དེ་ནི་རྒྱུན་ཞུགས་ཞུགས། །ཞེས་གསུངས་པ་དང་འགལ་ལ་དེས་འདོད་ཉོན་དྲུག་པ་སྤངས་ན་འདོད་པའི་སས་བསྡུས་ཀྱི་བདག་འཛིན་སྐོར་དགུ་ཡོད་པ་ལས་དྲུག་པའི་བར་ཡང་སྤངས་པར་འགྱུར་ལ་དེ་ཡང་འདོད་ན། སོ་སྐྱེས་བསམ་གཏན་དང་པོའི་དངོས་གཞི་ཐོབ་པ་ན་འདོད་པའི་སས་བསྡུས་ཀྱི་བདག་འཛིན་ཀྱང་སྤངས་དགོས་པས་དེ་ལྟར་ན། ལེགས་བཤད་གསེར་ཕྲེང་ལས། འོན་ཀྱང་ཞིབ་ཏུ་དཔྱད་ན་བྱིས་པས་ཞི་རགས་སུ་སྒོམ་པའི་ལམ་གྱིས་འདོད་པའི་སྒོམ་སྤང་གི་ཉོན་མོངས་མངོན་གྱུར་ཀྱང་མ་ལུས་པར་སྤོང་མི་ནུས་ཏེ། འདོད་པའི་རྟེན་ཅན་ཀྱི་ཉོན་ཡིད་འཕགས་ལམ་མ་ཐོབ་བར་དུ་ལྡོག་པ་མི་སྲིད་ལ། དེ་འདོད་པའི་སར་གཏོགས་པའི་སྒོམ་སྤང་ཉོན་མོངས་ཡིན་པས་སོ། །ཞེས་དང་སའི་ཚོགས་སྒྲུབ་ཀྱི་སྐབས་སུ་གསེར་ཕྲེང་ལས། དེས་ན་ངེས་པའི་དོན་དུ་ན་གོང་མའི་སེམས་ཐོབ་ཀྱང་འོག་སའི་ཉོན་མོངས་མངོན་གྱུར་བ་ཀུན་ལྡོག་མི་དགོས་ཏེ། འོག་མའི་རྟེན་ལ་གོང་མའི་སེམས་ཐོབ་པའི་ཚུར་མཐོང་གི་ཉོན་ཡིད་བཞིན་ནོ། །ཞེས་གསུངས་པ་རྣམས་དང་འགལ་བར་དོགས་སོ། །

ཡང་དེང་སང་གི་རྩོད་པ་སྨྲ་བ་ཕལ་ཆེ་བས་རྒྱུན་ཞུགས་ཞུགས་པའི་མ་མཐའི་ས་མཚམས་སྦྱོར་ལམ་སྟན་གཅིག་པ་ཆོས་མཆོག་ནས་འཛིན་ཏེ་དེ་ནི་མཐོང་ལམ་དང་མཉམ་བཞག་ཐུན་གཅིག་ལ་སྐྱེ་དགོས་པས་དྲོད་རྩེ་སོགས་ལ་དེ་ལྟར་སྐྱེ་བ་མེད་པའི་ཕྱིར་ཞེས་སྨྲ་བར་བྱེད་དོ། འོ་ན་ལེགས་བཤད་རིན་པོ་ཆེ་གསེར་གྱི་ཕྲེང་བ་ལས། དང་པོ་ནི། དྲོད་ནས་ལམ་ལ་རྗེས་བཟོད་ཀྱི་བར་ལ་གནས་པའི་ཉན་ཐོས་གང་འདོད་ཉོན་དྲུག་པ་མ་སྤངས་པའོ། །ཞེས་དང་།  ཀུན་བཏུས་དར་ཊཱིཀ་ལས། སྦྱོར་ལམ་དྲོད་ནས་མཐོང་ལམ་གྱི་བར་སྟན་དེ་ཉིད་ལ་བར་མ་ཆད་དུ་སྐྱེ་ནུས་པ་མ་མཐའ་དྲོད་ནས་སྟན་གཅིག་པ་གཟུང་གི །ཆོས་མཆོག་ཁོ་ན་ནས་མི་བཟུང་སྟེ།  དོགས་པ་མེད་པའི་ཕྱིར་རོ། །ཞེས་པའི་ལུང་ཚན་འདི་གཉིས་ལ་སྤྱན་གཟིགས་ཙམ་མཛོད་ཅིག འོན་ཀྱང་ཉན་ཐོས་སྦྱོར་ལམ་དྲོད་ནས་དེས་མཐོང་ལམ་གྱི་བར་མཉམ་བཞག་ཐུན་གཅིག་ལ་སྐྱེ་བའི་ཁྱབ་ན་རྗེས་མཛད་པའི་བློ་གསལ་བགྲོད་པའི་ཐེམ་སྐས་ལས།  དེ་ཡང་སྟན་གཅིག་ལ་སྦྱོར་ལམ་དང་མཐོང་ལམ་གཉིས་བར་མ་ཆད་དུ་བསྐྱེད་པའི་སྦྱོར་ལམ་ཡིན་ལ། ཚེ་བརྗེས་ནས་མཐོང་ལམ་སྐྱེད་པའི་སྦྱོར་ལམ་པ་དང་། ཚེ་འདི་ཉིད་ལ་མཐོང་ལམ་སྐྱེད་ཀྱང་སྟན་གཅིག་ལ་མི་སྐྱེད་པའི་སྦྱོར་ལམ་པ་རྣམས་ཀྱི་སྦྱོར་ལམ་ལ་མི་བཞེད་པར་མངོན་ཏེ། ཞེས་གསུངས་པ་དང་འགལ་ལ།

དེའི་སྦྱོར་ལམ་དྲོད་ནས་མཐོང་ལམ་གྱི་བར་མཉམ་བཞག་ཐུན་གཅིག་ལ་སྐྱེ་བ་མེད་ན་སྟན་གཅིག་པའི་དོན་ཇི་ཡིན་དང། མཛོད་ལས། དང་པོར་མ་ཡིན་སྐད་ཅིག་མ། །སུམ་བཅུ་རྩ་བཞིས་ཐོབ་ཕྱིར་རོ། །ཞེས་པའི་སྐབས་སུ་མཆིམས་མཛོད་ལས། ཁ་ཆེ་བ་ན་རེ་ཟད་པ་དང་མི་སྐྱེ་བ་ཤེས་པའི་དང་པོར་ཏེ་སྔོན་དུ་ནི་འགོག་པ་མངོན་དུ་བྱས་པ་མ་ཡིན་ཏེ། ཅིའི་ཕྱིར་ཞེ་ན།  བྱང་ཆུབ་སེམས་དཔའ་ནི་སྟན་གཅིག་ཁོ་ན་ལ་བར་ཆད་མེད་པ་དང་རྣམ་གྲོལ་གྱི་ལམ་གྱི་ཡེ་ཤེས་སྐད་ཅིག་མ་སུམ་བཅུ་རྩ་བཞི་རྒྱུན་ཆགས་སུ་བསྐྱེད་ནས་བྱང་ཆུབ་འཐོབ་པའི་ཕྱིར་རོ། །ཞེས་དང་། ཁ་ཆེ་བ་རྣམས་ན་རེ།  འགོག་པས་བར་ཆོད་ན་བྱང་ཆུབ་སེམས་དཔའ་བསམ་པ་ལྡང་བ་ཅན་དུ་འགྱུར་རོ་ཞེས་ཟེར་རོ། །ནུབ་ཕྱོགས་པ་ནི་མི་འགྱུར་ཏེ།  ལུང་གཞི་ལས་ཇི་སྲིད་ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་གཞིག་པར་མི་བྱའོ་ཞེས་དམ་བཅས་པར་གསུངས་ཀྱི་ཟག་མེད་ཀྱི་ལམ་ལས་མི་ལྡང་བར་ནི་མ་ཡིན་པའི་ཕྱིར་སྐྱོན་མེད་དོ་ཞེས་ལན་འདེབས་པར་བྱེད་དོ། འགྲེལ་བ་ལས་ནི། སྔ་མ་ཁོ་ན་ཡིན་ནོ་ཞེས་བརྗོད་དེ་ཞེས་འབྱུང་བས་བར་དུ་འགོག་པ་མ་བསྐྱེད་ཀྱི་ཟད་པ་མཁྱེན་པ་དང་དུས་མཉམ་དུ་བརྙེས་པ་ཉིད་རིགས་སོ་ཞེས་བྱ་བའོ། །ཞེས་སློབ་དཔོན་གྱིས་ནུབ་ཕྱོགས་པ་རྣམས་བཀག་ནས་སྟན་གཅིག་པའི་དོན་མཉམ་བཞག་ཐུན་གཅིག་ལ་གསུངས་པ་དང་། ཡང་ཉན་ཐོས་ལ་ཉན་ཐོས་ཀྱི་སྦྱོར་ལམ་དྲོད་ནས་ལམ་རྗེས་ཤེས་ཀྱི་བར་མཉམ་བཞག་ཐུན་གཅིག་ལ་སྐྱེ་བ་དང་མི་སྐྱེད་པའི་ཕྱོགས་གཉིས་ཡོད་ན་དེ་དག་དབང་པོ་རྣོ་རྟུལ་ལམ་ཚོགས་སོགས་གང་གི་སྒོ་ནས་དེ་ལྟར་འགྱུར་བ་སོགས་དཔྱད་པར་བྱའོ། །

གསུམ་པ་ས་གང་ལ་རྟེན་ནས་ཐོབ་ཚུལ་བཤད་པ་ལ། གསེར་ཕྲེང་ལས། རྒྱུན་ཞུགས་དང་ཕྱིར་འོང་ཐོབ་བྱེད་ཀྱི་ལམ་ཡིན་ན་བསམ་གཏན་དང་པོའི་ཉེར་བསྡོགས་ལ་བརྟེན་པས་ཁྱབ་སྟེ། དེ་གཉིས་འདོད་པ་ལ་ཆགས་པ་དང་མ་བྲལ་བའི་འཕགས་པ་ཆགས་བཅས་ཡིན་པས་སོ། །དེ་བཞིན་དུ་མཐར་གྱིས་པའི་ཕྱིར་མི་འོང་ཐོབ་པའི་ལམ་ཡང་རིག་པར་བྱའོ། །ཐོད་རྒལ་བའི་ཕྱིར་མི་འོང་འཐོབ་པའི་ལམ་ནི་བསམ་གཏན་ས་དྲུག་གང་རུང་ལ་བརྟེན་པ་སྲིད་དེ། ཐོད་རྒལ་བའི་ཕྱིར་མི་འོང་ཐོབ་པར་བྱེད་པ་ལ་མཐོང་ལམ་གྱི་སྔོན་དུ་སྲིད་རྩེའི་ཉེར་བསྡོགས་ཐོབ་ནས་ཅི་ཡང་མེད་པ་མན་ཆད་ལ་ཆགས་པ་དང་བྲལ་བ་སྲིད་པས་དེ་ས་དྲུག་གང་ལ་བརྟེན་ཡང་དབང་དང་ལྡན་པའི་ཕྱིར་རོ། །འོན་ཀྱང་གཟུགས་མེད་ལ་བརྟེན་པ་མི་སྲིད་དེ།འདིའི་སྐབས་སུ་ཕྱིར་མི་འོང་ཐོབ་པའི་ལམ་དང་མཐོང་ལམ་གཉིས་ས་གཅིག་པའི་ཕྱིར་རོ། །དགྲ་བཅོམ་པའི་འབྲས་བུ་ནི་ཟག་མེད་ཀྱི་ས་དགུ་གང་རུང་ལ་བརྟེན་ནས་མངོན་དུ་བྱེད་པ་སྲིད་དོ། །ཞེས་པའི་གཞུང་དོན་ལ་ཡིག་ཆ་ཆེན་པོ་དག་གི་དགོངས་པ་འགྲེལ་ཚུལ་ལ་ཅུང་ཟད་དཔྱད་ན། །པན་ཆེན་བསོད་ནམས་གྲགས་པའི་ཕར་ཕྱིན་སྤྱི་དོན་ལས།  གསུམ་པ་ས་གང་ལ་བརྟེན་ནས་ཐོབ་པ་ནི། འབྲས་བུ་དང་པོ་གཉིས་དང་འབྲས་བུ་རིམ་གྱིས་པའི་ཕྱིར་མི་འོང་ནི་བསམ་གཏན་དང་པོའི་ཉེར་བསྡོགས་ཁོ་ན་ལ་བརྟེན་ནས་ཐོབ་སྟེ། འདོད་སེམས་ཀྱིས་མི་ཐོབ་ཅིང་དེ་གསུམ་ཐོབ་དགོས་ཀྱི་གང་ཟག་དེས་བསམ་གཏན་གྱི་དངོས་གཞི་མ་ཐོབ་པའི་ཕྱིར།ཆགས་བྲལ་སྔོན་སོང་གི་ཕྱིར་མི་འོང་གི་འབྲས་བུ་ནི་བསམ་གཏན་གྱི་དངོས་གཞི་ལ་བརྟེན་ནས་ཐོབ་སྟེ། མཐོང་ལམ་གྱི་སྔ་རོལ་ཏུ་འཇིག་རྟེན་པའི་སྒོམ་སྤངས་སུ་གྱུར་པའི་འདོད་ཉོན་དགུ་པ་ལ་ཆགས་པ་དང་བྲལ་བའི་སྟོབས་ཀྱིས་ཐོབ་པའི་ཕྱིར། ཞེས་དང་།

རྗེ་བཙུན་ཆོས་ཀྱི་རྒྱལ་མཚན་གྱི་རྒྱན་འགྲེལ་སྤྱི་དོན་རོལ་མཚོ་ལས། ཆགས་བྲལ་སྔོན་སོང་གི་ཕྱིར་མི་འོང་གི་འབྲས་བུ་ནི་བསམ་གཏན་གྱི་དངོས་གཞི་ལ་བརྟེན་ནས་ཐོབ་སྟེ། དེ་དངོས་སུ་གསར་དུ་ཐོབ་པའི་སེམས་རྟེན་ཡོད། དེའི་སེམས་རྟེན་དུ་གྱུར་པའི་བསམ་གཏན་གྱི་ཉེར་བསྡོགས་དང་གཟུགས་མེད་ཀྱི་སེམས་གང་རུང་ཡང་མེད། དེའི་སེམས་རྟེན་དུ་གྱུར་པའི་འདོད་སེམས་ཀྱང་མེད་པའི་ཕྱིར། ཞེས་དང་། ཀུན་མཁྱེན་ཆེན་པོ་འཇམ་དབྱངས་བཞད་པའི་ཐུགས་སྲས་ངག་དབང་བཀྲིས་ཀྱི་དགེ་འདུན་ཉི་ཤུའི་མཐའ་དཔྱོད་ལས། ཆགས་བྲལ་སྔོན་སོང་གི་ཕྱིར་མི་འོང་གི་འབྲས་བུ་དེ་བསམ་གཏན་ས་དྲུག་ལ་བརྟེན་ནས་དངོས་སུ་ཐོབ་པ་ཡོད་དེ། ཆགས་བྲལ་སྔོན་སོང་གི་ཕྱིར་མི་འོང་ཞུགས་པ་དེ་ལ་བསམ་གཟུགས་བརྒྱད་ཀ་ཐོབ་པ་ཡོད་པས་དེས་ཕྱིར་མི་འོང་གི་འབྲས་བུ་དེ་བསམ་གཏན་ས་དྲུག་པོ་གང་ལ་བརྟེན་ཡང་དབང་དང་ལྡན་པའི་ཕྱིར། ཞེས་གསུངས་པའི་ཕྱིར།

ཆེན་པོ་རྣམས་ཀྱིའི་དགོངས་པ་ཟབ་པའི་དཔྱད་དཀའ་ཡང་ཆོས་གྲྭའི་རིགས་པའི་འགྲོས་དང་བསྟུན་ནས་ཅུང་ཟད་དཔྱད་ན། གཞན་དག་གིས་ཐོད་རྒལ་པའི་ཕྱིར་མི་འོང་གི་འབྲས་བུ་ཐོབ་བྱེད་དང་མངོན་ཤེས་དང་པོ་ལྔའི་སེམས་བརྟེན་ལ་བསམ་གཏན་གྱི་དངོས་གཞིའི་ཁྱབ་ཟེར། དེ་ལྟར་ན། ཆགས་བྲལ་སྔོན་སོང་གི་ཕྱིར་མི་འོང་གི་འབྲས་བུ་དངོས་སུ་ཐོབ་བྱེད་ལ་བསམ་གཏན་དང་པོའི་ཉེར་བསྡོགས་མེད་པར་འགྱུར་ལ། དེ་ནི་རིགས་པ་མ་ཡིན་དེ།  གསེར་ཕྲེང་ལས། ས་དྲུག་གང་ལ་བརྟེན་ཡང་དབང་དང་ལྡན་པའི་ཕྱིར། ཞེས་གསུང་པའི་ཕྱིར། གཞུང་འདིའི་དོན་ལ་ཁ་ཅིག་གིས། དབང་དང་ལྡན་པ་ཙམ་ཡིན་གྱི་ཐོད་རྒལ་བའི་ཕྱིར་མི་འོང་གི་འབྲས་བུ་འཐོབ་བྱེད་ལ་བསམ་གཏན་ས་དྲུག་ཡོད་པའི་དོན་མིན་ཟེར།  འོ་ན་བསམ་གཏན་གྱི་དངོས་གཞི་ཐོབ་པའི་ཆགས་བྲལ་སྔོན་སོང་གི་ཕྱིར་མི་འོང་གི་ཉེར་བསྡོགས་ལ་བརྟེན་ནས་ཆགས་བྲལ་སྔོན་སོང་གི་འབྲས་བུ་ཐོབ་པ་མེད་ན་བསམ་གཏན་གྱི་དངོས་གཞི་ཐོབ་པའི་དགྲ་བཅོམ་ཞུགས་པས་ཉེར་བསྡོགས་ལ་བརྟེན་ནས་ཟག་པ་ཀུན་ཟད་ཀྱི་ཡོངས་ཤེས་ཐོབ་པ་མེད་དེ། དེའི་བསམ་གཏན་གྱི་དངོས་གཞི་ཐོབ་ཟིན་པའི་ཕྱིར།  འདོད་ན། བསམ་གཏན་དང་པོའི་ཉེར་བསྡོགས་ལ་བརྟེན་ནས་ཡོངས་ཤེས་དགུ་ཐོབ་པ་མེད་པར་འགྱུར་རོ། །འདོད་ན། མཛོད་ལས། མི་ལྕོག་མེད་འབྲས་ཐམས་ཅད་དོ། ཞེས་དང་། བསམ་གཏན་དག་གི་ལམ་རྣམས་སླ། །ས་གཞན་དག་གིས་དཀའ་བ་ཡིན། །ཞེས་གསུངས་པའི་ཕྱིར། ཐོད་རྒལ་པའི་ཕྱིར་མི་འོང་གི་འབྲས་བུ་ཐོབ་བྱེད་དང་མངོན་ཤེས་དང་པོ་ལྔ་རྣམས་ནི་བསམ་གཏན་གྱི་ཉེར་བསྡོགས་ལ་བརྟེན་ནས་ཐོབ་པ་ཡོད་དེ།  གུང་ཐང་བསྟན་པའི་སྒྲོན་མེའི་ཕར་ཕྱིན་མཆན་ལས། མཛོད་ལུང་འདི་མཐོང་བཞིན་དུ་ད་དུང་འདི་ལམ་སྤྱིའི་དབང་དུ་བྱས་པ་ཡིན་གྱི། མངོན་ཤེས་ཉེར་བསྡོགས་ལ་བརྟེན་པ་མི་སྲིད་ཅེས་ཡིག་འཇོག་མཁན་མང་པོས་བྲིས་སྣང་བ་མི་འཐད་དེ། ཞེས་དང་། ཆོས་མངོན་པའི་མདོ་ལས། དགེ་སློང་དག་ལམ་ནི་རྣམ་པ་བཞི་སྟེ། མངོན་པར་ཤེས་པ་བུལ་ལ་དཀའ་བའི་ལམ་དང༌། མངོན་པར་ཤེས་པ་མྱུར་ལ་དཀའ་བའི་ལམ་དང་། མངོན་པར་ཤེས་པ་བུལ་ལ་སླ་བའི་ལམ་དང་། མངོན་པར་ཤེས་པ་མྱུར་ལ་སླ་བའི་ལམ་མོ་ཞེས་གསུངས་པའི་ཕྱིར། དེ་ལྟར་མིན་ན་ལམ་མྱུར་བུལ་སོགས་ཀྱི་ལམ་བཞི་མེད་པའི་སྐྱོན་ཟློག་དུ་མེད་པའི་ཕྱིར་རོ། །

འོ་ན་རྣམ་བཤད་སྙིང་པོ་རྒྱན་ལས། ལམ་སླ་བ་བསམ་གཏན་གྱི་དངོས་གཞི་ལ་ཡོད་བཞིན་དུ་དཀའ་པའི་ས་གཞན་བརྟེན་པ་ལ་དགོས་པ་མེད་པའི་ཕྱིར། ཞེས་དང་། ཀུན་བཏུས་ལས། ཕྱི་རོལ་པའམ། ཉན་ཐོས་སམ། བྱང་ཆུབ་སེམས་དཔའ་འམ། དེ་བཞིན་གཤེགས་པ་ཡང་རུང་སྟེ་དག་པའི་བསམ་གཏན་བཞི་ལ་བརྟེན་ནས་ཚད་མེད་པ་རྣམས་མངོན་པར་སྒྲུབ་བོ། །ཚད་མེད་པ་རྣམས་ཇི་ལྟ་བར་མངོན་པར་ཤེས་པ་ལྔ་ཡང་དེ་བཞིན་ནོ། །ཞེས་སོགས་ཀྱི་དོན་ཅི་ལྟར་ཡིན་ཞེ་ན། རྣམ་བཤད་དང་ཀུན་བཏུས་ཀྱི་གསུང་ཟིན་ཐོད་རྒལ་པའི་ཕྱིར་མི་འོང་གི་འབྲས་བུ་དང་མངོན་ཤེས་དང་པོ་ལྔ་རྣམས་བསམ་གཏན་གྱི་དངོས་གཞི་ལ་བརྟེན་པར་གསུང་བ་ནི་སྐྱེ་སླ་བའི་དབང་དུ་བྱས་ནས་གསུང་བ་ཡིན་ནམ་སྙམ་དེ།  ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེའི་ཕར་ཕྱིན་སྐབས་དང་པོའི་མཐའ་དཔྱོད་ལས། སྐྱེ་སླ་བའི་དབང་དུ་བྱས་ན་བསམ་གཏན་གྱི་དངོས་གཞི་དང་། རྟེན་ཙམ་གྱི་དབང་དུ་བྱས་ན་དང་པོའི་ཉེར་བསྡོགས་མི་ལྕོགས་མེད་ལ་བརྟེན་དགོས་པའི་ཕྱིར།  ཞེས་གསུངས་པའི་ཕྱིར།                

འདིར་བྱས་དགེ་བའི་མཚན་མ་གང་མཆིས་པ། །

རྒྱལ་བའི་དབང་པོ་གཙུག་གི་ནོར་བུ་དང་། །

ཡབ་རྗེ་བླ་མ་དགྱེས་པའི་མཆོད་པ་དང་། །

མ་ལུས་འགྲོ་བ་བདེ་བའི་རྒྱུ་རུ་བསྔོ། །

       ཞེས་སྒོ་མང་དགེ་བཤེས་ལྷ་རམས་པ་ཟུང་བཟོད་པ་རྒྱ་མཚོས་སྤྱི་ལོ་ཟླ་ཚེས་བཟང་བོ་ལ་རང་དགོན་གྱི་བོད་བརྒྱུད་ནང་བསྟན་པའི་རིགས་པའི་དོགས་དཔྱོད་ཤེས་རབ་ལོ་དེབ་ཀྱི་རྩོམ་སྒྲིག་པ་ཆོས་གྲོགས་ཡོབ་ཤུལ་ཀུན་དགའ་རུ་འབོད་པའི་སྐུལ་ངོར་བྲིས་པ་དགེའོ། །2020/8/15

༢༠༢༠བོད་བརྒྱུད་ནང་བསྟན་རིགས་པའི་དོགས་དཔྱོད་ཤེས་རབ་ལོ་དེབ་ལས་བཤུས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn