བླ་མ་དང་ངོ་བོ་དབྱེར་མ་མཆིས་པའི་རྗེ་བཙུན་མཁྱེན་པའི་གཏེར་ལ་སྒོ་གསུམ་གུས་པ་ཆེན་པོའི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ།།ཚེ་རབས་ཐམས་ཅད་དུ་རྗེས་སུ་གཟུང་དུ་གསོལ།།སྦྱོར་བའི་ཆོས་དྲུག་འདི་བླ་མ་གསེར་གླིང་བས་རང་བཟོ་མིན་པར་སྟོན་པས་མདོ་ལས་གསུངས་པ་རྣམས་གུང་བསྒྲིགས་ཏེ་རྩལ་དུ་བཏོན་ནས་ཉམས་ལེན་དུ་མཛད་པ་རེད།སྦྱོར་ཆོས་འདིས་མཚོན་པའི་དགེ་བ་གཞན་གང་བྱས་ནའང་སྦྱོར་དངོས་མཇུག་གསུམ་ཆ་ཚང་ན་གནད་དུ་འགྲོ་བ་ཡིན་ཞིང་།དེ་ལྟར་མིན་པར་དང་བོ་ཀུན་སློང་གཏོང་རྒྱུ་མེད།བར་དུ་ཀུན་སློང་གིས་ཟིན་རྒྱུ་མེད།མཐའ་མ་མཇུག་ཏུ་བསྔོ་བ་ཙམ་ཡང་མེད་པའི་དགེ་བ་བྱེད་ཁུལ་བྱས་པ་ཐམས་ཅད་ལྟར་སྣང་ལས་མེད་པས་སྦྱོར་ཆོས་འདི་ཤིན་ཏུ་གལ་ཆེན་པོ་རེད།དེ་ལ་ཐོག་མར་སྦྱོར་བའི་ཆོས་དྲུག་ནི།༡གནས་ཁང་བྱི་དོར་བྱས་ལ་སྐུ་གསུང་ཐུགས་ཀྱི་རྟེན་དགྲམ་པ།༢མཆོད་པ་གཡོ་མེད་པར་བཙལ་ལ་བཀོད་པ་མཛེས་པར་བཤམ་པ།༣སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ་སྐྱབས་འགྲོ་སེམས་བསྐྱེད་བྱ་བ།༤ཚོགས་ཞིང་གསལ་གདབ་པ།༥བསག་སྦྱང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱང་བ།༦མཎྜལ་ཕུལ་ཏེ་འདོད་པའི་དོན་ལ་གསོལ་བ་འདེབས་པ་བཅས་སོ།།

   དང་བོ་གནས་ཁང་བྱི་དོར་བྱས་ལ་སྐུ་གསུང་ཐུགས་ཀྱི་རྟེན་དགྲམ་པ་ནི། གནས་ཞེས་པ་རང་ཉིད་འདུག་སའི་ས་ཕྱོགས་དང་།ཁང་ནི་རང་གིས་སྒྲུབ་པ་ཉམས་ལེན་བྱེད་སའི་གནས་ཡིན།བྱི་བ་ནི་མི་གཙང་བ་ཕྱགས་པ་རེད།དོར་བ་ནི་རྡུལ་ཕྱི་རོལ་དུ་ཕོ་བ་ཡིན་པས་ཚིག་བཞི་ལ་དོན་མི་འདྲ་བ་བཞི་བསྟན་ཡོད།ཚིག་རེ་རེ་ལ་བསམ་བློ་བཏང་ན་གོ་བ་སྐྱེ་བ་ལ་དགོས་པ་ཆེ།བརྡ་དོན་ཇི་བཞིན་མི་ཤེས་པ་ལ་གོ་བ་རྣལ་མ་མི་སྐྱེ་བས་ཚིག་རེ་རེའི་སྟེང་ནས་གོ་བ་བླངས་ན་ཤེས་རྒྱུ་ཞིག་ཡོད།འཁྱོངས་ན་རང་གི་སྒྲུབ་ཁང་གི་ཉེ་འཁོར་དང་།བླ་མའི་བཞུགས་གནས།སྐུ་གསུང་ཐུགས་རྟེན།དགེ་འདུན་གྱི་གཙུག་ལག་ཁང་གི་ཉེ་འཁོར་དང་བཅས་པ་བྱི་དོར་བྱས་ན་ཉམས་ལེན་རྨད་དུ་བྱུང་བ་ཞིག་རེད།སྦྱོར་བའི་ཆོས་དྲུག་ནང་གི་ཉམས་ལེན་གཅིག་ཀྱང་འཁྱོངས་སོང་བ་ཡིན།སྔོན་ཆད་དགོན་པ་སོ་སོས་གླིང་བར་གཙང་སྦྲ་བྱེད་པའི་སྒྲིག་ལམ་བཙུགས་ཡོད་པ་ཡང་རྒྱུ་མཚན་དེ་ལྟ་བུ་ལ་ཐུག་ཡོད།དེང་སང་འོ་སྐོལ་གྱིས་གནས་ཁང་བྱི་དོར་བྱས་པའི་ས་རྡུལ་མི་གཙང་བ་སྒོ་འགྲམ་དུ་བསགས་ནས་འཇོག་པ་ཡོད་ཀྱང་དེ་མི་རུང་།ས་རྡུལ་ལ་སྐྱུག་བྲོ་བ་དང་གྲ་མི་དག་པས་རྐྱེན་མིན།རྟེན་འབྲེལ་ལོག་འགྲོ་བ་རེད།དེ་ཅི་ཡིན་ཞེ་ན།གནས་ཁང་བྱི་དོར་བྱས་པས་སོ་སོར་བརྟགས་མིན་གྱི་འགོག་པ་འཐོབ་པའི་བག་ཆགས་འཇོག་པ་དང་།ས་དང་བོ་ནས་ས་བཅུའི་བར་ཆད་མེད་ལམ་གྱི་མཚོན་བྱེད་ཡིན།མི་གཙང་བའི་ས་རྡུལ་ཕྱི་རོལ་ཏུ་དོར་བས་སྤང་བྱ་སྐྱེ་མི་རུང་གི་ཆོས་ཅན་དུ་བྱས་པའི་སོ་སོར་བརྟགས་འགོག་དང་།རྣམ་གྲོལ་ལམ་ཐམས་ཅད་ཀྱི་བག་ཆགས་འཇོག རྡུལ་ཕྱི་ལ་ཕོ་བ་ན་རྐུན་པོ་ཕྱིར་ཕྱུང་བ་དང་སྒོ་འཕར་བཅད་པ་དང་འདྲ་ཞིང་།རྡུལ་མ་དོར་ན་ཕྱིར་ཡོང་གྲབས་ཡོད་པས་སྒོ་འཕར་མ་བཅད་པ་དང་འདྲ་བས་རྟེན་འབྲེལ་ཞིག་ལོག་ཡོད་པ་རེད།དེ་བས་ས་རྡུལ་མི་གཙང་བ་བསགས་ནས་འཇོག་མི་རུང་།ཁྱད་པར་བྱ་རྒྱུད་དང་སྤྱོད་རྒྱུད་ཀྱི་བསྙེན་པའི་སྐབས་ཧ་ཅང་འཛེམ་དགོས་པ་ཞིག་ཡིན།

  གནས་ཁང་བྱི་དོར་བྱས་པས་དགོས་པ་ཅི་ཡོད་ཅེ་ན།གནས་སྐབས་རང་གི་རིག་པ་དྭངས་ཤིང་སྡོད་ཉམས་སྤྲོ་བ།དཀར་ཕྱོགས་དང་གཙང་སྦྲ་ལ་དགའ་བའི་ལྷ་རྣམས་འཁོར་བ་རེད།མ་དག་པའི་ཞིང་དུ་མི་སྐྱེ་ཞིང་དག་ཞིང་དུ་སྐྱེ་བ།མཐར་ཐུག་ལོངས་སྤྲུལ་གྱི་ཞིང་རྣམ་དག་འགྲུབ་པའི་ཕན་ཡོན་འཐོབ།ཁང་བུ་བརྩེགས་པའི་མདོ་ལས།གནས་ཁང་བྱི་དོར་བྱས་པས།རང་གི་སེམས་དྭངས་པར་འགྱུར།གཞན་གྱི་སེམས་དྭངས་པར་འགྱུར།ལྷ་རྣམས་དགའ་བར་འགྱུར།མཛེས་པའི་ལས་གསོག་པར་འགྱུར།ཚེ་འཕོས་ནས་ལྷར་སྐྱེ་བར་འགྱུར་ཞེས་གསུངས།དཔེར་ན།རྒྱལ་བོ་ཆེན་པོ་ཞིག་མགྲོན་དུ་ཕེབས་པའི་ཚེ་གནས་ཁང་བྱི་དོར་བྱེད་པ་བཞིན་རྒྱལ་བ་སྲས་དང་བཅས་པ་སྤྱན་འདྲེན་པའི་གནས་ཡིན་པའི་ཆ་ནས་གཙང་སྦྲ་བྱེད་པ་གལ་ཆེན་པོ་ཡིན།བྱི་དོར་བྱེད་སྐབས་རང་དང་གཞན་གྱི་སེམས་རྒྱུད་ཀྱི་དྲི་མ་བག་ཆགས་དང་བཅས་པ་སྦྱང་བར་བྱའོ་སྙམ་པའི་འདུ་ཤེས་འཛིན་དགོས།བསམ་པ་བྱང་ཆུབ་ཀྱི་སེམས་ཀྱིས་ཟིན་ན་ཕྱགས་མ་གཅིག་གཉིས་ཙམ་གཡུགས་པ་དེ་ཡང་ཐེག་པ་ཆེན་པོའི་ཆོས་སུ་འགྲོ།ཐེག་དམན་གང་ཟག་གིས་བསྐལ་བ་མང་བོར་བསགས་པའི་དགེ་བ་ཟིལ་གྱིས་གནོན་ཞིང་དེ་ལས་ལྷག་པའི་བསོད་ནམས་རླབས་པོ་ཆེ་གསོག་ཐུབ།ཁྱད་པར་མ་འོངས་པ་ན་རང་ཉིད་གང་དུ་འཚང་རྒྱ་བའི་ལོངས་སྤྲུལ་གྱི་ཞིང་ཁྱད་པར་ཅན་འགྲུབ་པའི་རྒྱུ་ཐུན་མོང་མ་ཡིན་པ་གནས་ཁང་བྱི་དོར་བྱེད་པ་རེད།ངག་ནས་སྤྱོད་འཇུག་ལས་གསུངས་པ་ལྟར།ཐམས་ཅད་དུ་ནི་ས་གཞི་དག།གསེག་མ་ལ་སོགས་མེད་པ་དང་།།ལག་མཐིལ་ལྟར་མཉམ་བེེ་ཌཱུརྱའི།།རང་བཞིན་འཇམ་པོར་གནས་གྱུར་ཅིག།ཅེས་ཚིག་དེ་བརྗོད་ན་ཤིན་ཏུ་བཟང་།དམ་པ་གོང་མའི་གསུང་རྒྱུན་ལའང་།དགེ་བ་གཞན་དང་གཞན་ཞིང་སྦྱོང་གི་རྒྱུ་རུ་འགྲོ་བ་བསྔོ་སྨོན་གྱིས་ཁ་སྒྱུར་བ་ལ་རག་ལས་ཡོད།གནས་ཁང་བྱི་དོར་བྱེད་པ་དེ་བསྔོ་སྨོན་གྱིས་ཁ་སྒྱུར་མི་དགོས།རང་གི་ངོ་བོའི་སྒོ་ནས་ཞིང་སྦྱོང་གི་རྒྱུ་ཡིན་གསུངས།དེ་རྐྱེན་གྱིས་རྫོགས་སྨིན་སྦྱང་གསུམ་དུ་མ་འདུས་པའི་བྱང་ཆུབ་སེམས་དཔའི་ཉམས་ལེན་མེད།སྦྱང་ཞེས་པ་སངས་རྒྱས་ཀྱི་ཞིང་སྦྱོང་བ་རེད།ཀུན་སློང་དེ་ལྟ་བུས་ཟིན་པའི་སྒོ་ནས་དངོས་གཞི་ས་རྡུལ་འཕྱག་པའི་སྐབས་ཡིན་ནའང་།རྡུལ་ཕྱིས་དྲི་མ་ཕྱིས།རྡུལ་སྤོང་དྲི་མ་སྤོང་།ཞེས་བརྗོད་ན་དགོས་པ་ཆེ།དེའི་སྐབས་སུ་དམིགས་རྣམ་ཇི་ལྟར་སྐྱོང་དགོས་ཞེ་ན།དགེ་བའི་བཤེས་གཉེན་ལ་བསྟེན་པ་ནས་བཟུང་སྟེ་མི་སློབ་པའི་ཟུང་འཇུག་བར་གྱི་ལམ་རྒྱུད་ལ་སྐྱེ་བའི་འགལ་རྐྱེན་སྡིག་སྒྲིབ་བག་ཆགས་དང་བཅས་པ་ལྷག་མེད་དུ་དག་ནས།ལམ་དེ་དག་ཚད་མེད་པ་རང་རྒྱུད་ལ་སྐྱེ་བའི་སྣོད་རུང་དུ་གྱུར་སོང་སྙམ་པའི་འདུ་ཤེས་བསྟེན་ན་ཚོགས་གསོག་སྒྲིབ་སྦྱོང་བླ་ན་མེད་པ་ཞིག་རེད།ཆོས་སྒྲུབ་ཤེས་ན་ཕྱགས་མ་ལག་ཏུ་བཟུང་བ་དེ་ཡང་སྡིག་ལྟུང་སྦྱོང་བའི་ཐབས་ཤེས་ཁྱད་པར་ཅན་ཡིན།ལྷག་པར་སྐུ་གསུང་ཐུགས་རྟེན་གྱི་བཞུགས་གནས་བྱི་དོར་བྱས་ན་དཀོར་སྒྲིབ་སྦྱོང་བ་ལ་ཆེས་མཆོག་ཏུ་གྱུར་བ་རེད།

ཡང་བླ་མ་ལ་བརྟེན་པའི་ཉེས་པ།སྡོམ་པ་གསུམ་གྱི་བཅས་པ་དང་འགལ་བའི་ཉེས་ལྟུང་ལྷག་མེད་དུ་དག་སོང་བསམས་ན་མོས་པ་ཙམ་མིན་པར་དག་འགྲོ།རང་རྒྱུད་ཀྱི་ཉོན་མོངས་གང་ཤུགས་ཆེ་བ་བརྟགས་ནས་གཙོ་བོ་དེ་ལ་དམིགས་སུ་སྐྱོང་ན་དགོས་པ་ཆེ།དཔེར་ན་དགྲ་ཞིག་ལ་འཐབ་ན།ཕ་རོལ་དགྲ་བོའི་ནང་གི་གཙོ་བོ་དེ་ཐུལ་སོང་ན་གཞན་པ་རྣམས་ཞོར་ལ་ལྷོད་ཀྱིས་འགྲོ་བ་ལྟར་རེད།འཕགས་པ་རྟག་ཏུ་ངུ་དང་།གནས་བརྟན་ལམ་ཆུང་སོགས་ཀྱིས་གནས་ཁང་བྱི་དོར་བྱས་པས་ས་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེས་པ་ཡིན།སྔོན་བྱོན་སྟོན་པའི་རྣམ་ཐར།རྗེས་འཇུག་གདུལ་བྱའི་ཉམས་ལེན་དུ་འཆར་དགོས།དེས་ན་རྡུལ་འཕྱག་པའི་སྐབས།རང་གཞན་གྱི་སྡིག་སྒྲིབ་བག་ཆགས་དང་བཅས་པ་དག་སོང་སྙམ་པའི་མོས་པ་སྦྱངས་ན་ཆོས་ཐམས་ཅད་རྟེན་འབྲེལ་གྱི་རང་བཞིན་ཡིན་པའི་རྐྱེན་གྱིས་སྡིག་སྒྲིབ་ངེས་པར་འདག་པ་རེད།གུང་ཐང་འཇམ་པའི་དབྱངས་བསྟན་པའི་སྒྲོན་མེས།ཉམས་ལེན་བྱེད་ཤེས་ན་སྡིག་སྒྲིབ་ཕྱགས་མས་འཕྱག་ཚུལ་ཡང་ཡོད།གནས་བརྟན་ལམ་ཆུང་གི་རྣམ་ཐར་ལྟ་བུ་རེད་ཅེས་གསུངས།ཐུན་མོང་སྣང་ཚོད་ལ་གནས་བརྟན་ལམ་ཆུང་དབང་རྟུལ་མཐར་ཐུག་ཅིག་རེད།ཁོ་ལ་རྡུལ་སྤོང་དྲི་མ་སྤོང་ཞེས་པ་བསླབས་ནས་ཚིག་གཅིག་ཤེས་ན་ཅིག་ཤོས་བརྗེད་སོང་བས་དགེ་འདུན་པའི་གཙུག་ལག་ཁང་དང་མཆིལ་ལྷམ་གཙང་སྦྲ་བྱེད་དུ་བཅུག་པས།དེ་ལ་བརྟེན་ནས་ཤེས་རབ་གོང་དུ་འཕེལ་བས་རྡུལ་སྤོང་ཞེས་པ་རང་བཞིན་གྱི་ས་རྡུལ་མིན་པར་རང་རྒྱུད་ཀྱི་ཉོན་མོངས་དུག་གསུམ་གྱི་དྲི་མ་སྤོང་བའི་དོན་ཡིན་པར་གོ་སྟེ།རྡུལ་ནི་ས་རྡུལ་མ་ཡིན་འདོད་ཆགས་རྡུལ།།རྡུལ་ནི་འདོད་ཆགས་མིང་སྟེ་རྡུལ་གྱི་མིན།།མཁས་པ་རྣམས་ཀྱིས་རྡུལ་དེ་རྣམས་སྤངས་པ།།དེ་ནི་བདེ་གཤེགས་བསྟན་ལ་བག་ཡོད་འགྱུར།།ཞེས་གསུངས་པ་རེད།སྡིག་སྒྲིབ་དག་སོང་ན་རྐྱེན་ལ་བརྟེན་པ་ཙམ་གྱིས་ལམ་གྱི་རྟོགས་པ་རང་བཞིན་དུ་རྒྱུད་ལ་སྐྱེ་འགྲོ་བས་ཆོས་བསླབས་པ་མང་ཉུང་ལ་ཐུག་མེད།དེས་ན་གནས་ཁང་བྱི་དོར་བྱེད་པ་རང་རྒྱུད་ལ་སྦྱོར་ན།གནས་ཁང་གིས་རང་གི་ཤེས་རྒྱུད་དང་ཕྱིའི་སྣོད་ཀྱི་འཇིག་རྟེན་མཚོན།དེ་བྱི་དོར་བྱས་པས་བདེན་པ་བཞིའི་འཇུག་ལྡོག་གི་སྒོ་ནས་རང་རྒྱུད་དང་ཕྱིའི་སྣོད་ཀྱི་མ་དག་པ་སྦྱངས་པ་མཚོན་ནོ།།

  སྐུ་གསུང་ཐུགས་ཀྱི་རྟེན་དགྲམ་པའི་ཁུངས་ནི།སྔོན་རྒྱ་གར་དུ་དགེ་འདུན་པའི་ཚོགས་དབུར་སྟོན་པ་མ་ཕེབས་པའི་ཚེ་ན་མི་མཛེས་པས་ཁོང་གི་སློབ་མ་ཉན་ཐོས་ཆེན་པོ་རྣམས་ཀྱིས་ཞུས་ཏེ་སྟོན་པའི་ཚབ་ཏུ་སྐུ་བརྙན་བཞེངས་ཏེ་བཞུགས་སུ་གསོལ་བ་རེད།དེ་ལ་སྤོས་དང་དྲི་དང་བྱུག་པ་ལ་སོགས་པས་མཆོད་པ་དང་བསྙེན་བཀུར་བ་བྱ་ཞེས་གསུངས་ཡོད།འོ་ན་ལྷག་པའི་ལྷ་ཞིག་སྒྲུབ་ན་དེའི་དམིགས་རྟེན་དུ་འབག་སྐུ་དང་བྲིས་སྐུ་ལས་གང་བཟང་ཞེ་ན།གཙོ་བོ་བྲིས་སྐུ་བཟང་བ་རེད།བྲིས་སྐུ་སྒྲུབ་ན་དངོས་གྲུབ་མྱུར་བ་བདེ་མཆོག་ཉུང་ངུའི་རྒྱུད་ལས།བྲིས་སྐུ་སྒྲུབ་ན་མྱུར་བར་ནི།།དངོས་གྲུབ་རྒྱ་ཆེན་འཐོབ་པར་འགྱུར།།ཞེས་གསུངས།རྒྱུད་ལས་བྲིས་སྐུ་མ་གཏོགས་འབག་སྐུ་གསུངས་མེད།རྡོ་རྗེ་འཇིགས་བྱེད་ཀྱི་རྒྱུད་ལས་ཀྱང་བྲིས་སྐུ་རྟོག་པ་ཞེས་གསུངས་ཡོད།དེ་བས་ཡི་དམ་ཆོས་སྐྱོང་གི་རྟེན་ལའང་ཐང་ག་དང་ཙ་ག་ལི་གཙོ་བོར་བྱེད་པ་བྲིས་སྐུ་སྒྲུབ་ན་བྱིན་རླབས་འཇུག་ཚབས་ཆེ་བས་རྐྱེན་རེད།རྟེན་བཀྲམ་ཚུལ་ལ་བསྟན་པའི་བདག་པོ་སྟོན་པའི་སྐུ་བརྙན་ངེས་པར་བཤམ་དགོས་ཤིང་།དེ་ཡང་མིག་གིས་གསལ་བོ་མཐོང་ཐུབ་པ་ཞིག་གལ་ཆེ།གསུང་རྟེན་ལ་མ་མཐའ་མདོ་སྡུད་པ་ཡན་ཆད་ཤེར་ཕྱིན་གྱི་མདོ་སྡེ་མེད་དུ་མི་རུང་བ་བཀའ་གདམས་གོང་མའི་ཕྱག་སྲོལ་ཡིན།སྐུ་གསུང་ཐུགས་རྟེན་གྱི་རྒྱུ་ཡི་བཟང་ངན་དང་ཐང་ག་གསར་རྙིང་གི་ཁྱད་པར་ཕྱེས་ཏེ་གོ་རིམ་འཕྱུགས་ན་རྟེན་འབྲེལ་ལོག་འགྲོ་བ་རེད།ཐུགས་རྟེན་ལ་བྱང་ཆུབ་མཆོད་རྟེན་གཙོ་བོ་ཡིན་ཞིང་དེ་ལ་ལམ་འབྲས་ཀྱི་མཚོན་དོན་མཐའ་དག་ཚང་བས་ཡོད་ན་རབ་ཡིན།གལ་ཏེ་མ་འཛོམས་ན་རྡོ་དྲིལ་ཡང་ཆོག་སྟེ་རི་ཁྲོད་པ་ལྟ་བུ་འབྱོར་བ་ཞན་ན་རྡོ་ལེབ་དང་ཟངས་གོར་གོར་ལ་དྲི་བཟང་གི་ཆུས་བྱུགས་ནས་འབྲུ་དང་བྱེ་མ་གང་རུང་གིས་ཚོམ་བུ་བཀོད་པ་དེར།བླ་མ་ཡི་དམ་མཁའ་འགྲོ་ཆོས་སྐྱོང་སྐྱབས་གནས་མ་ལུས་པ་འདུས་ཡོད་སྙམ་པའི་མོས་པ་བྱས་ན་ཆོག་པ་རེད།གང་ཞིག་མོས་པ་གཙོར་བྱེད་པ།།དེ་ཡི་མདུན་ན་ཐུབ་པ་བཞུགས།།ཞེས་གསུངས།དཔེར་ན་སྔོན་རྒན་མོ་ཞིག་ལ་འདི་དགྲ་བཅོམ་པའི་ཚེམས་ཡིན་ཟེར་ནས་ཁྱི་ཡི་སོ་བྱིན་པ་དེ་ལས་འོད་ཟེར་བྱུང་བ་ལྟ་བུ་རེད།མདོ་ཕྱོགས་ན་སྔགས་ཀྱི་བསྐྱེད་ཆོག་དེ་འདྲ་མི་དགོས་གཙོ་བོ་རང་གིས་མོས་པ་བྱེད་པ་གལ་ཆེ།རང་ཉིད་འདུག་སའི་ཁང་བ་ལྟ་བུའི་ནང་གཙང་སྦྲ་ཐོན་ན་སྐུ་གསུང་ཐུགས་རྟེན་ཡོད་ན་བཟང་སྟེ།མིག་གིས་མཐོང་བ་ཙམ་གྱིས་སངས་རྒྱས་དངོས་མཐོང་བའི་ཕན་ཡོན་འཐོབ།གལ་ཏེ་བརྩི་འཇོག་དང་གཙང་སྦྲ་བྱེད་མི་ཐུབ་ན་གཏན་ནས་མེད་ན་གཙང་མ་རེད།མེད་ན་ཆོས་ལ་བརྟེན་པའི་སྡིག་པ་གསོག་མི་ཐུབ་ཅེས་གསུངས།།   

  གཉིས་པ་མཆོད་པ་གཡོ་མེད་པར་བཙལ་ལ་བཀོད་པ་མཛེས་པར་བཤམ་པ་ནི།གཡོ་ལ་རྒྱུའི་གཡོ་དང་།ཀུན་སློང་གི་གཡོ་གཉིས་ཡོད།སྲོག་གཅོད་མ་བྱིན་ལེན་སོགས་མི་དགེ་བའི་ལས་ཅི་རིགས་ཀྱིས་བསགས་པའི་དངོས་པོས་མཆོད་པར་འབུལ་བ་ནི་རྒྱུའི་གཡོ་དང་།གཞན་གྱི་མིག་སྔར་མཛེས་ཆོས་དང་ཚེ་འདིའི་རྙེད་བཀུར་གྲགས་འདོད་ནད་གདོན་ཞི་ཕྱིར་འབུལ་བ་ཀུན་སློང་གི་གཡོ་ཡིན་པས་དེ་དག་དང་བྲལ་བ་ཞིག་དགོས།མཆོད་པ་འབུལ་སྐབས་གང་བྱུང་བྱུང་དུ་མི་བྱེད་པར་སྒྲིག་བཀོད་གང་མཛེས་གང་ལེགས་བྱ་བ་གནས་ཁང་བྱི་དོར་བྱེད་པ་ནས་ལམ་རིམ་ཡོངས་རྫོགས་ཀྱི་ཉམས་ལེན་དུ་མཛད་དགོས།ཐ་ན་འགྲོ་འདུག་སྤྱོད་གསུམ་ཟ་མ་བཟའ་བ་ཚུན་ཆད་ལ་གཡོ་མེད་བཀོད་མཛེས་ཡོད་པ་དགེ་བའི་བཤེས་གཉེན་སྟེན་ཚུལ་དང་།འདུལ་བའི་བཅས་ཁྲིམས་ལ་བལྟས་ན་ཤེས་པ་ཡིན།བྱང་ཆུབ་སེམས་དཔའི་བསླབ་བྱའི་སྐབས།ཐང་ལ་མཆི་མ་འཕེན་ལུགས་དང་།ལུད་པ་ལུ་བའང་གང་འདོད་དུ་བྱ་མི་རུང་བ་དེ་བཀོད་པ་མཛེས་པ་རེད།སྤྱོད་འཇུག་ལས།འཇིག་རྟེན་མ་དད་གྱུར་བ་གང་།།མཐོང་དང་དྲིས་ཏེ་སྤང་བར་བྱ།།ཞེས་གཞན་གྱིས་མཐོང་ན་མི་དད་པའི་བྱ་བ་ཤེས་པར་བྱས་ཏེ་སྤང་དགོས་གསུངས།རབ་བྱུང་བས་སྡོམ་པ་གསུམ་གྱི་བཅས་མཚམས་ཁ་རལ་སྣ་རལ་དུ་བཏང་ནས་རྐུ་འཕྲོག་གཡོ་གསུམ་གྱིས་རྒྱུ་བསྒྲུབས་པ་ལྟ་བུས་མཆོད་པ་ཕུལ་ཀྱང་ཕན་པ་ལས་ཉེས་དམིགས་འབྱུང་།དེ་རིང་ཤག་ཏུ་འགྲུལ་བ་ཞིག་ཡོང་རྒྱུ་ཡིན་ཚེ་གད་བདར་དང་མཆོད་པ་ནམ་རྒྱུན་ལས་ལྷག་ཙམ་བྱེད།མཆོད་མེ་ཡང་འབུལ།སྤོས་ཀྱི་དྲི་མ་སེང་ངེ་བ་བྱས་ནས་མཆོད་པས་ཕན་ཡོན་དང་ཉེས་དམིགས་གང་ཆེ་རྟོགས་དཀའ་བ་ཡིན།མཆོད་རྫས་གང་བཟང་བཟང་ནས་བྱེད་པ་དང་།སླ་ཆོས་ཁྲམ་ཆོས་སུ་མ་སོང་བར་དད་པ་དང་གུས་ཉམས་ཐོན་པ་གལ་ཆེ།འཛོམས་ན་གསེར་རྐོང་དང་དངུལ་རྐོང་དུ་འབུལ་ན་ཚོགས་རླབས་པོ་ཆེ་ཡིན་ཡང་གཙོ་བོ་བསམ་པ་རྒྱ་ཆེ་བ་ལ་རག་ལས་ཡོད།སྤོས་རྐང་ཐུར་གཅིག་ལས་མེད་ཀྱང་མཆོད་པའི་ཚོགས་རབ་འབྱམས་སྤྲས་ཏེ་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་འཐོབ་པའི་ཕྱིར་དུ་སངས་རྒྱས་ཀྱི་སྐུ་དངོས་ལ་མཆོད་པ་དང་།མྱ་ངན་ལས་འདས་རྗེས་སུ་མཆོད་པ་ལ་བསོད་ནམས་ཁྱད་པར་མེད།མཆོག་གི་ཞིང་བླ་མ་དང།ཕན་འདོགས་པའི་ཞིང་ཕ་མ།ཉམ་ཐག་པའི་སེམས་ཅན་ལ་མཆོད་སྦྱིན་བྱས་ན་དགེ་བ་རླབས་ཆེན་དུ་འགྱུར་བ་རེད།ཕན་འདོགས་པ་དང་ཡོན་ཏན་ཞིང་།།སྡུག་བསྔལ་བ་ལ་དགོས་ཆེད་འགྱུར།།ཞེས་གསུངས།ལམ་རིམ་ལས།དཀོན་མཆོག་གསུམ་དང་བླ་མ་དང་བླ་མ་དང་འདྲ་བ་དང་ཕ་མ་ལ་སོགས་པ་སྟེ་འདི་དག་ལ་བསམ་པ་ཤུགས་དྲག་པོ་མེད་ཅིང་ཕན་གནོད་ཆུང་ངུ་ཞིག་བྱས་ཀྱང་བསོད་ནམས་དང་ཁ་ན་མ་ཐོ་བ་ཆེ་བར་གསུངས།རྒྱས་པར་མཆོད་པའི་ཡན་ལག་གི་སྐབས་སུ་འཆད་དོ།།

    གསུམ་པ་སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ་སྐྱབས་འགྲོ་སེམས་བསྐྱེད་བྱ་བ་ནི།སྟན་བདེ་བ་དང་།སྤྱོད་ལམ་ཚུལ་མཐུན།སྐྱབས་འགྲོ།སེམས་བསྐྱེད་དེ་དོན་བཞི་བསྟན་ཡོད།སྟན་ཞེས་པ་བཞུགས་གདན་ཡིན།སྤྱིར་ཕྲག་དོག་དང་ཞེ་སྡང་ཆེ་བའི་གཅན་གཟན་གདུག་པ་ཅན་གྱི་པགས་རིགས་སྟན་དུ་བྱས་ན་རང་གི་སེམས་རྒྱུད་ཇེ་རྩུབ་ཏུ་སོང་ནས་དགེ་སྦྱོར་གནད་དུ་མི་འགྲོ་བས་སྟན་དུ་མ་སྤྱད་ན་བཟང་བ་ཡིན།ཆུ་ལ་ཆབ་རོམ་འཁྱག་པའི་དུས་སུ་པགས་གོས་གྱོན་ཆོག་པ་འདུལ་བ་ལས་གནང་ཡོད།མཉམ་མེད་ཇོ་བོས་རི་དྭགས་ཀྲྀ་ཎ་ས་རའི་པགས་པ་བཞུགས་སྟན་དུ་འདིང་ཞིང་རྗེ་གསེར་ཁང་བས་དེ་བཞིན་དུ་མཛད།རི་དྭགས་དེ་བྱམས་སེམས་ཆེ་བས་རང་རྒྱུད་ཇེ་འཇམ་དུ་འགྲོ་བའི་དགོས་པ་ཡོད་པར་ཡོངས་འཛིན་ཡེ་ཤེས་རྒྱལ་མཚན་གྱིས་དེ་འདྲའི་གསུང་རྒྱུན་ཡོད།སྨྱུང་གནས་བོ་བསྟོད་ལས།རི་དྭགས་པགས་པས་ནུ་མ་གཡོན་པ་བཀབ་པ་བོ།།ཞེས་པ་དེ་རེད།སྟན་བདེ་བས་དགེ་སྦྱོར་ལམ་དུ་འགྲོ་ཞིང་ཡུན་རིང་དུ་བཞུགས་པ་ཡིན་ན་ལུས་གནད་དུ་འབེབས་པ་ཡིན།དེ་བས་བོད་ལ་གྲུབ་པའི་འཁོར་ལོས་སྒྱུར་བ་རྗེ་བཙུན་མི་ལ་ལྟ་བུ་ཚེ་བློས་བཏང་ཞིག་བོད་གངས་ཅན་དུ་སྔོན་བྱོན་མ་མྱོང་ཡང་།ཁོང་གིས་ཀྱང་སྒོམ་ལ་བཞུགས་སྐབས་སྟན་བདེ་བོ་ཞིག་འདིང་བ་རེད།སྲིང་མོ་པེ་ཏ་མགོན་སྐྱིད་ལ་བདེ་བ་དྲུག་གི་མགུར་གསུངས་པ་ལས།འོག་ན་སྤྲ་བའི་འབོལ་ཆུང་བདེ།།ཞེས་གསུངས་ཡོད།མཚམས་བསྙེན་པའི་སྐབས་མིན་ཀྱང་ཉམས་ལེན་ཞེས་པ་རང་རྒྱུད་ལ་རྟོགས་པ་སྐྱེ་རག་གི་བར་དུ་ཉམས་སུ་ལེན་རྒྱུ་ཞིག་ཡིན་པས།སྟན་འོག་ཏུ་རས་དང་ས་གང་རུང་ལ་གཡུང་དྲུང་ཆོས་སྐོར་གྱི་རི་མོ་གཡས་འཁོར་འབྲི་བའི་ཕྱག་ལེན་ཡོད།ལྷའི་ཕྱག་མཚན་ལ་འགོམ་མི་རུང་བ་སྔགས་ཀྱི་དམ་ཚིག་ཡིན་པ་དེ་ཆེད་དུ་ལྷའི་ཕྱག་མཚན་དུ་བཟོས་པ་མིན་ན་ཉེས་པ་མི་འབྱུང་།ཡི་གེ་ན་གཅིག་ཡན་ཆད་ལ་ཆོས་དཀོན་མཆོག་དངོས་ཀྱི་འདུ་ཤེས་འཇོག་དགོས་གསུངས་པ་ཡང་།བརྗོད་བྱ་དམ་པའི་ཆོས་ཀྱི་ཡི་གེ་ན་གཅིག་དང་མ་ཎིའི་ཡིག་འབྲུ་གཅིག་དགེ་ཚུལ་སློང་གི་ན་བཟའ་ལྷན་པ་སེར་བོ་ཙམ་ལའང་ཆོས་དང་དགེ་འདུན་དཀོན་མཆོག་གི་འདུ་ཤེས་འཇོག་པ་ལས་མཐོང་ཚད་ལ་མིན།དེས་ན་དེང་སང་ཡི་གེ་དང་ན་བཟའ་སེར་བོ་ས་སྟེང་དུ་ཁྱབ་ཡོད་པ་རེད།སྟན་འོག་ཏུ་གཡུང་དྲུང་རི་མོ་འབྲི་བ་དེ་རྡོ་རྗེའི་ཚབ་ཡིན།རྡོ་རྗེའི་སྐད་དོད་བཛྲ་ཞེས་པ་ལོ་ཙཱ་བ་འགས་གཡུང་དྲུང་དུ་བསྒྱུར་བ་དང་།ལ་ལས་རྡོ་རྗེ་ལ་བསྒྱུར་ཡོད།གཡུང་དྲུང་འབྲི་དགོས་པའི་རྒྱུ་མཚན་ཅི་ཡིན་ཞེ་ན།སྟོན་པ་བཅོམ་ལྡན་འདས་རྡོ་རྗེའི་གདན་དུ་མངོན་པར་སངས་རྒྱས་པའི་རྣམ་ཐར་རྗེས་སུ་དྲན་པ་དང་།བསྐལ་བཟང་སངས་རྒྱས་སྟོང་གིས་ཀྱང་མ་འོངས་པ་ན་རྡོ་རྗེའི་གདན་དུ་མངོན་པར་བྱང་ཆུབ་པའི་མཛད་པ་སྟོན་པས།རང་ཉིད་གང་དུ་འཚང་རྒྱ་བའི་རྡོ་རྗེའི་གདན་འགྲུབ་པའི་རྟེན་འབྲེལ་དུ་སྟན་འོག་ཏུ་གཡུང་དྲུང་གི་རི་མོ་བྲིས་ན་སྒྲུབ་པ་གནད་ལ་འབེབས་པའི་དགོས་པ་ཡོད།སྟོན་པས་རྒྱལ་སྲིད་ཀྱི་མངའ་ཐང་ལོངས་སྤྱོད་རྣམས་མཆི་མའི་ཐལ་བ་བཞིན་སྤངས་ཏེ་རྡོ་རྗེའི་གདན་དུ་བྱང་ཆུབ་མངོན་དུ་བརྙེས་པའི་ཚེ་རྩྭ་འཚོང་ཁྱེའུ་བཀྲ་ཤིས་ཟེར་བ་ལ།བཀྲ་ཤིས་ང་ལ་རྩྭ་ཞིག་མྱུར་དུ་བྱིན།།དེ་རིང་ང་ལ་རྩྭ་ཡིས་དོན་ཆེན་འགྲུབ།།ཞེས་གསུངས་ནས་རྩྭའི་གདན་ལ་བཞུགས་ཏེ་མངོན་པར་བྱང་ཆུབ་པ་དེ་འདོད་ཆུང་ཆོག་ཤེས་གལ་ཆེ་བར་རྗེས་འཇུག་གདུལ་བྱ་རྣམས་ལ་མ་དཔེ་བསྟན་པ་ཡིན།དེ་བས་ཀུ་ཤ་དང་དུར་བ་གཡུང་དྲུང་ཆོས་སྐོར་གྱི་སྟེང་དུ་བཏིངས་ན་གཙང་ཞིང་བཀྲ་ཤིས་པར་བྱེད་ལ།རང་ཉིད་མ་འོངས་པ་ན་རྩྭའི་གདན་ལ་འཚང་རྒྱ་བ།འདོད་ཆུང་ཆོག་ཤེས་པ་ཚེ་རིང་ཞིང་སྒྲུབ་པ་ཡུན་རིང་བརྟན་པའི་རྟེན་འབྲེལ་ཡོད།

   སྤྱོད་ལམ་ཚུལ་མཐུན་བྱེད་པ་མིག་ལ་མཛེས་པ་ཙམ་མིན་པར་ལུས་རྣམ་སྣང་གི་ཆོས་བདུན་ལྡན་དུ་བྱ་དགོས།རྒྱལ་བ་ཀུན་གྱི་སྐུ་རྡོ་རྗེའི་ངོ་བོ་གཟུགས་ཕུང་རྣམ་པར་དག་པའི་དག་ཆ་ལྷར་ཤར་བ་སངས་རྒྱས་རྣམ་སྣང་ཆེན་མོའི་བཞུགས་སྟངས་ཀྱིས་མགོ་མ་ཡོ་ཞིང་ལོ་ལེགས་ཀྱི་སྙེ་མ་ལྟ་བུ་ཡུད་ཙམ་ནང་དུ་བཀུག་པ་ལྟར་ལྟེ་བའི་དྲང་ཐད་དུ་འཇོག སྐེད་པ་དྲང་བོར་བསྲངས་ན་རྩ་རྣམས་རང་གནས་སུ་འབེབས་ཤིང་རླུང་སེམས་ལས་སུ་རུང་བ་ཡིན།སེམས་མི་ཡེངས་པའི་ཆེད་དུ་མིག་བཙུམས་པ་དེས་རེ་ཞིག་ཕན་ཐོགས་ཀྱང་ཡུན་རིང་ན་བྱིང་བ་སྐྱེ་བའི་སྐྱོན་འབྱུང་།གོམས་འདྲིས་སོང་ན་མིག་ཕྱེས་ཀྱང་དམིགས་པ་འཆར་བ་ལ་གནོད་པ་མི་ཡོང་།དཔེར་ན།ཞེ་སྡང་དྲག་པོ་སྐྱེས་པའི་སྐབས་མིག་ཕྱེས་ཀྱང་ཞེ་སྡང་ལ་མི་གནོད་པ་ལྟ་བུ་རེད།མཆན་ཁུང་གི་གཡས་གཡོན་དུ་བྱིང་རྨུགས་སྐྱེ་བའི་རླུང་གི་གསང་གནས་ཡོད་པས་ཕྲག་པའི་མཐོ་དམའ་མདུན་རྒྱབ་ཏུ་མ་ཡོ་ཞིང་མཆན་ཁུང་མི་སྦྱོར་ལ་འབྱེད་པ་གལ་ཆེ།ལག་པ་ལྟེ་བའི་འོག་ཏུ་སོར་བཞིའི་མཚམས་སུ་གཡས་པ་སྟེང་ལ།གཡོན་པ་འོག་ཏུ་མཛུབ་རྩེ་སྤྲད་པའི་ཆོས་འབྱུང་གི་དབྱིབས་གྲུ་གསུམ་གྱི་རྩེ་མོ་ལྟེ་བར་ཁེལ་ན།རོ་རྐྱང་གི་རླུང་དབུ་མར་རྒྱུ་སྟེ་གཏུམ་མོའི་བདེ་དྲོད་འབར་བའི་རྟེན་འབྲེལ་ཡོད།ལུས་གནད་དུ་བཅོས་པས་རྩ་རྣམས་འདྲོངས་ཤིང་དེ་ལ་གནས་པའི་རླུང་དྲང་བོར་རྒྱུ་བར་བྱེད།རླུང་སེམས་འཇུག་པ་གཅིག་པས་སེམས་རང་མལ་དུ་བབས་ན་དགེ་བའི་དམིགས་པ་ལ་བཀོལ་དུ་རུང་བ་ཡིན།སྒྲ་སྒྱུར་མར་བའི་ཞལ་ཤོམ་དུ།བོད་ཀྱི་མན་ངག་ཟབ་དགུ་བསྡོངས་ཀྱང་།ང་མར་བ་ལོ་ཙཱའི་འདུག་སྟངས་གཅིག་པུ་ལ་མི་བསྡོ་ཞེས་དང་།རྗེ་ས་པཎ་གྱིས།རྟེན་འབྲེལ་ལུས་ལ་བསྒྲིགས་པས་ཉམས་རྟོགས་སེམས་ལ་སྐྱེ་ཡོང་ཞེས་གསུངས།སྟོན་པས་ཇི་སྙེད་གསུངས་པ་དངོས་དང་བརྒྱུད་པས་གདུལ་བྱ་སངས་རྒྱས་ཀྱི་སར་འཁྲིད་པའི་ཐབས་ཤ་སྟག་ཡིན།སངས་རྒྱས་ཀྱི་གོ་འཕང་འཐོབ་པ་ལ་མདོ་ལམ་རྐྱང་བས་བགྲོད་པའི་དབང་དུ་བཏང་ཡང་མཐའ་མ་སྔགས་ལ་བརྟེན་དགོས།རླུང་དབུ་མར་ཞུགས་གནས་ཐིམ་གསུམ་བྱས་ཏེ་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་མ་བསྐྱེད་པར་ཤེས་སྒྲིབ་ཆུང་ཕྲ་སྤོང་མི་ཐུབ་པས།རླུང་དབུ་མར་སྡུད་པ་དང་།སྣ་རྩེའི་གསུམ་གྱི་རྣལ་འབྱོར་སོགས་མདོ་ལམ་རྐྱང་བའི་སྐབས་སྟོན་པ་མིན་ཀྱང་དང་བོ་ནས་རྟེན་འབྲེལ་བསྒྲིག་པའི་ཆེད་རེད།དཔེར་ན།དཔྱིད་ཀའི་དུས་སུ་འབྲས་པུ་མ་སྨིན་ཀྱང་།ས་བོན་དང་ཆུ་ལུད་ཡག་པོ་བཞག་ནས་ལོ་ལེགས་འབྱུང་བ་ལ་གྲ་སྒྲིག་སྔོན་མ་ནས་བྱེད་པ་ལྟ་བུ་ཡིན།དེ་བས་ང་ཚོ་དགེ་ལྡན་པར་མཚོན་ན་བཤད་པ་ལ་མཐའ་མེད་ཀྱང་ཉམས་ལེན་དུ་འཁྱེར་ཤེས་པ་བླ་མ་དམ་པ་ཉུང་ཤས་ལས་མི་འདུག་ཅེས་རང་ཅག་རི་བོ་དགེ་ལྡན་པའི་བླ་མ་གོང་མ་དག་གི་དེ་འདྲའི་གསུང་སྒྲོས་ཡོད།སྒོམ་རྣམ་པར་དག་པ་ཞིག་ལ་ལུས་ཀྱི་གནད་མེད་དུ་མི་རུང་ཡང་ཅིས་ཀྱང་མི་ལྕོགས་ན་སྐྱིལ་ཀྲུང་ཕྱེད་པ་ལྟ་བུ་སྤྱོད་ལམ་གང་བདེ་བྱས་ན་ཆོག་པ་རེད།མི་ལ་ལས་ཉལ་ནས་བསྒོམས་ནའང་ཏིང་ངེ་འཛིན་བརྟན་པོ་ཡོང་རྒྱུ་ཡོད།གནས་བརྟན་བ་ལང་བདག་གིས་ཁ་སྦུབ་ཏུ་དམིགས་རྣམས་བསྐྱངས་པས་སྤྱི་དང་བྱེ་བྲག་གི་ཁྱད་པར་ཤེས་དགོས་སོ།།

  རྟེན་བདེ་བ་ལ་འཁོད་མ་ཐག་ཏུ་ཐུན་དངོས་གཞི་ལ་མི་འཇུག་པར་རང་གི་སེམས་རྒྱུད་དགེ་མི་དགེ་ལུང་མ་བསྟན་གང་གི་དབང་དུ་སོང་འདུག་པ་ཞིབ་ཏུ་བརྟག་རྒྱུ་གནད་འགག་ཅིག་ཡིན།འཁོར་འདས་ཀྱི་ལེགས་ཚོགས་ཀུན་གྱི་རྩ་བ་ཀུན་སློང་གིས་སྐྱེད་པས་ཉམས་ལེན་རང་གི་སེམས་རྒྱུད་ལ་བརྟགས་པའི་སྟེང་ནས་འབྱུང་བ་ལས།གྲངས་ཀ་མང་བོ་འདོན་པ་དང་།བྱ་བྱེད་མང་བས་ཕན་མི་ཐོགས།མཉམ་མེད་ཇོ་བོས།རྩ་བ་སྨན་ཡིན་ན་ཡལ་ག་དང་ལོ་མའང་སྨན་ཡིན།རྩ་བ་དུག་ཡིན་ན་ཡལ་ག་དང་ལོ་མའང་དུག་ཡིན་ཞེས་གསུངས།རང་གི་དགེ་རྩ་ཆེ་ཆུང་གང་ཡིན་ཡང་ཆོས་སུ་འགྲོ་མིན་དང་ཐེག་པ་ཆེ་ཆུང་གི་ཆོས་སུ་འགྲོ་མིན་དེ་བསམ་པའི་ཁྱད་པར་ལ་རག་ལས་པས་དགེ་སྦྱོར་གྱི་དང་བོ་ཀུན་སློང་འཆའ་བ་གལ་ཆེན་པོ་རེད།བློ་ཁ་ནང་དུ་ཕྱོགས་ཏེ་རང་རྒྱུད་ལ་བརྟགས་ནས་དུག་གསུམ་གང་རུང་མངོན་དུ་གྱུར་འདུག་ན་འཕྲོ་བཅད་དེ་དགེ་བའི་ངོ་བོར་བསྒྱུར་བ་ཀུན་སློང་ལ་བརྟག་ཚུལ་ཡིན།རླུང་རོ་དགུ་ཕྲུགས་དག་ཏུ་བསལ།།རིག་པ་དྭངས་སྙིགས་ལེགས་པར་ཕྱེ།།རྣམ་དག་དགེ་བའི་སེམས་ལྡན་ལས།།སྐྱབས་འགྲོ་སེམས་བསྐྱེད་ནན་ཏན་བྱ།།ཞེས་གསུངས།རླུང་རོ་དགུ་ཕྲུགས་བསལ་བ་རླུང་ཆམ་ལ་ཕབ་སྟེ་རླུང་ལ་ཞོན་པའི་ཀུན་རྟོག་ངན་པ་བཅོམ་པའི་དོན་རེད།ཀུན་སློང་དགེ་བའི་སེམས་ཡིན་ན།རླུང་ནང་དུ་རྔུབ་པའི་ཚེ་རྒྱལ་བ་སྲས་བཅས་ཀྱི་མཁྱེན་བརྩེ་ནུས་པའི་ཡོན་ཏན་མ་ལུས་པ་འོད་དཀར་བོའི་རྣམ་པར་བསྒོམས་ནས་དབུགས་བརྔུབས་པ་དང་མཉམ་དུ་སྣ་སྒོ་ནས་ཞུགས་ཏེ་རང་སེམས་ལ་ཐིམ་པས་རྒྱུད་བྱིན་གྱིས་བརླབས་པ་དང་དགེ་རྩ་གོང་དུ་འཕེལ་བའི་མོས་པ་བྱ།ལུང་མ་བསྟན་གྱི་སེམས་ཡིན་ན།དལ་འབྱོར་དོན་ཆེ་བ་དང་།རྙེད་དཀའ་བ།དལ་འབྱོར་དོན་མེད་ཆུད་ཟོས་སུ་བཏང་བར་འགྱོད་སེམས་དྲག་པོ་སྐྱེས་ནས་ད་རེས་ལུས་སེམས་ཁ་མ་བྲལ་བར་བྱང་ཆུབ་ལམ་རིམ་ཉམས་སུ་ལེན་རྒྱུ་བྱུང་བ་སྐལ་བ་བཟང་།ད་ཕྱིན་བྱང་ཆུབ་མ་འཐོབ་ཀྱི་བར།དེ་ནང་ནས་མ་ཤི་ཚུན་ཆད་དུ་ལོ་འགྲིལ་ཟླ་འགྲིལ།ཁྱད་པར་དེ་རིང་གི་ཉི་མ་འགྲིལ་བས་ད་རེས་ཐུན་འདི་ལ་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པའི་ཆེད་དུ་བག་ཆགས་བརྟན་པོ་བྱུང་ངེས་པའི་ཉམས་སུ་ལེན་སྙམ་པའི་དམ་བཅའ་བྱེད།མི་དགེ་བའི་སེམས་ཡིན་ན།དགྲ་གཉེན་བར་མ་ལ་ཆགས་སྡང་རྨོངས་གསུམ།ཚེ་འདིའི་ཆས་ཐབས་འཚོ་ཐབས་འཇིག་རྟེན་ཆོས་བརྒྱད་ཀྱི་བསམ་པ་དང་།རང་གཅེས་འཛིན་སོགས་མི་དགེ་བའི་སེམས་ཀུན་སློང་མ་དག་པས་འཕྲོ་གནད་ཀྱིས་བཅད་དེ་རླུང་ནང་དུ་མི་འཛིན་པར་སྣ་བུག་གཉིས་ཀ་ནས་ཕྱིར་དྲག་ཏུ་ཡང་ཡང་འབུད།རྣམ་རྟོག་དེས་མཚོན་པའི་སྡིག་སྒྲིབ་བག་ཆགས་དང་བཅས་པ་དུ་བ་སོགས་ཀྱི་རྣམ་པར་ནག་བུན་གྱིས་ཐོན་པས་ལུས་སེམས་ལས་རུང་དུ་གྱུར་སོང་སྙམ་པའི་མོས་པ་འཛིན་ཏོ།།ལུས་རྣམ་སྣང་གི་ཆོས་བདུན་ལྡན་དུ་བྱས་པས་གཟུགས་སྐུ་འགྲུབ་པའི་བག་ཆགས་འཇོག་པ་དང་།རང་གི་སེམས་རྒྱུད་དགེ་མི་དགེ་ལུང་མ་བསྟན་གང་གི་དབང་དུ་སོང་འདུག་པ་བརྟགས་པས་ཆོས་སྐུ་འགྲུབ་པའི་བག་ཆགས་འཇོག ང་ཚོ་ལས་དང་བོ་བས་སྒོམ་བྱེད་པ་ལས་ཐོས་བསམ་གལ་ཆེ་ཞིང་།ཚོགས་དང་ཆོས་རྭ་འགྲིམས་པའི་ཚེ་ཀུན་སློང་བྱང་ཆུབ་ཀྱི་སེམས་ཀྱིས་ཟིན་ན་གོམ་པ་གང་འདོར་བ་ཚུན་ཆད་ཀྱང་གསེར་སྲང་སྟོང་གིས་མི་དོ་བའི་རྒྱལ་སྲས་ཀྱི་སྤྱོད་པར་འགྲོ།བྱང་ཆུབ་ཀྱི་སེམས་བཅོས་མ་བསྐྱེད་པ་ལ་གོམས་པ་བཏང་སྟེ་རྩོལ་མེད་ཀྱི་མྱོང་བ་ཐོན་པ་ལས་བཅོས་མ་མེད་ན་དང་བོ་ནས་རྣམ་པར་དག་པ་ཞིག་ཡོང་ཚུལ་མེད།སྦྱོར་བའི་ཆོས་དྲུག་གི་གནས་ཁང་བྱི་དོར་བྱེད་པ་ནས་མགོ་མཇུག་མཐའ་དག་བྱང་ཆུབ་ཀྱི་སེམས་ཀྱིས་རྩིས་ཟིན་པ་གནད་ཆེ།བྱང་ཆུབ་ཀྱི་སེམས་བཅོས་མ་ཚུན་ཆད་ཡོད་ན་འགྲོ་འཆག་ཉལ་འདུག་གང་གི་སྐབས་ལའང་སྤྱོད་ལམ་ཐམས་ཅད་དོན་དང་ལྡན་པ་རེད།ཀུན་སློང་རྣམ་པར་དག་པས་མ་ཟིན་ན་ཆོས་རྩ་ཆེ་བས་མི་ཆོག་ཚེ་འདིའི་བདེ་ཐབས་སུ་རྣལ་འབྱོར་བླ་མེད་ཀྱི་ལམ་བསྒྲུབས་ཀྱང་དམྱལ་བར་སྐྱེ་ཉེན་ཡོད་ཅེས་གསུངས།།

     བཞི་བ་ཚོགས་ཞིང་གསལ་གདབ་པ་ནི།བདེ་ལམ་ལས།སྤྲིན་གྱི་ཕུང་བོ་ལྟ་བུ་བཞུགས་ཡོད་པར་བསམས་ལ་ཚོགས་གསོག་པའི་ཞིང་གསལ་གདབ་ཅེས་གསུངས།ཀུན་འདུས་ནོར་བུའི་ལུགས་ལ་བླ་མ་ཁོ་ན་གསལ་འདེབས་པ་དང་།ཡང་ངོ་བོ་རྩ་བའི་བླ་མ་ལ་རྣམ་པ་སྟོན་པ་བཅོམ་ལྡན་འདས་ཁོ་ན་གསལ་བཏབ་སྟེ་ཡེ་ཤེས་པ་ཚོགས་ཞིང་ལ་བསྟིམས་ནས་སྐྱབས་གནས་ཀུན་འདུས་སུ་བསམས་པ་དེ་དགེ་ལྡན་སྤྲུལ་བའི་གླེགས་བམ་གྱི་ཞལ་ཤེས་རེད།ངོ་བོ་རྩ་བའི་བླ་མར་མོས་ན་བྱིན་རླབས་མྱུར་ཞིང་།རྣམ་པ་ཐུབ་དབང་སོགས་སུ་མོས་ན་བྱིན་རླབས་ཆེ།རྩ་བའི་བླ་མ་ཞེས་པ་གང་ཡིན་ཞེ་ན།རང་ལ་ཆོས་འབྲེལ་དངོས་སུ་ཐོབ་པ་ཡོད་ཚད་རྩ་བའི་བླ་མ་ཡིན།ཐ་ན་མ་ཎི་དང་དམིགས་བརྩེ་མའི་ལུང་ཙམ་ཐོབ་པ་ཡན་ཆད་རྩ་བའི་བླ་མ་རུ་འཛིན་དགོས་པ་སྟོན་པ་བཅོམ་ལྡན་འདས་ཀྱི་དགོངས་པ་རེད།སེམས་བསྐྱེད་འབོགས་པ་དང་།ཕར་ཕྱིན་དང་དབུ་མ་མཛུབ་ཁྲིད་བྱེད་མཁན་ཐེག་ཆེན་ཐུན་མོང་བའི་བླ་མ་དང།དབང་བསྐུར་རྒྱུད་བཤད་མན་ངག་གནང་བ་སྔགས་ཀྱི་ཐུན་མོང་མ་ཡིན་པའི་བླ་མ་ཡིན་པ་ཐུགས་ལ་ངེས་དགོས།ཚོགས་ཞིང་རྣམས་རང་རང་གི་ཞིང་ཁམས་ཐག་རིང་བོ་ན་བཞུགས་ཡོད་པར་གསོལ་བ་བཏབ་ན་མི་མཁྱེན་པ་མེད་ཀྱང་རྒྱུད་ལ་བྱིན་རླབས་འཇུག་མིན་དང་།རང་གི་མོས་ངོར་ཡེ་ཤེས་སྐྱེ་མིན་གྱི་ཁྱད་པར་ཡོད་པས་མདུན་གྱི་ཐད་དྲང་གི་ནམ་མཁའི་གནས་སུ་གསལ་འདེབས་དགོས་པའི་རྒྱུ་མཚན་དེ་རེད།ཚོགས་ཞིང་མཐོ་ན་རླུང་སེམས་འཇུག་པ་གཅིག་པས་རླུང་ནད་དང་རྒོད་པ་སྐྱེ་ཉེན་ཆེ།དམའ་ན་བྱིང་བ་སྐྱེ་ཞིང་རྟེན་ལ་མ་གུས་པའི་ཉེས་པ་འབྱུང་།སེང་གེ་ཆེན་པོ་བརྒྱད་ཀྱིས་བཏེགས་པའི་ཁྲི་ལ་དབང་ཕྱུག་བརྒྱད་དང་སྟོབས་བཅུའི་མཚོན་དོན་ཡོད།སེང་གེ་ཕོ་མོ་རེ་རེའི་རྐང་བ་ས་ལ་བཙུགས་ཏེ་ཡར་འཁུར་བའི་ཉམས་དགོས་ཤིང་ལག་པས་ཁྲི་བཀྱགས་པ་ཡོངས་འཛིན་ཡེ་ཤེས་རྒྱལ་མཚན་གྱིས་མ་དག་པར་གསུངས།སེང་གེས་ཁྲི་བཏེགས་པའི་རྒྱུ་མཚན་ཅི་ཡིན་ཞེ་ན།སྟོན་པ་བཅོམ་ལྡན་འདས་འོག་མིན་སྟུག་པོ་བཀོད་པའི་ཞིང་དུ་རྡོ་རྗེའི་འོད་ཀྱི་དཀྱིལ་འཁོར་གྱི་གཙོ་བོ་མངོན་པར་རྫོགས་པར་སངས་རྒྱས་པའི་ཚེ་ན།ས་བཅུའི་དབང་ཕྱུག་གི་བྱང་ཆུབ་སེམས་དཔའ་མང་བོ་སེང་གེའི་གཟུགས་སུ་སྤྲུལ་ཏེ་ཁྲི་བཏེགས་ནས་བསྡད་པས་སྟོན་པའི་རྣམ་ཐར་གདུལ་བྱའི་ཉམས་ལེན་དུ་འཆར་བ་རེད།སེང་གེས་རི་དྭགས་གཞན་སྐྲག་པར་བྱེད་པ་དང་ཟིལ་གྱིས་གནོན་པས་ཁྲི་དེ་ན་བཞུགས་པའི་སྟོན་པ་འཁོར་བཅས་ཀྱིས་འཇིག་རྟེན་པའི་ལྷ་མཐུ་བོ་ཆེ་ཟིལ་གྱིས་གནོན་ཞིང་བདུད་དང་མུ་སྟེགས་ཅན་རྣམས་སྤ་བཀོང་བར་བྱེད་པ་མཚོན།ཁྲི་དེ་ཡང་རིན་པོ་ཆེ་སྣ་བདུན་ལས་གྲུབ་པ་དང་།ཕྲ་རྒྱན་མང་བོས་སྤྲོས་པ་བསམས་ན་ལམ་དང་འབྲས་བུ་སྨིན་བྱེད་དུ་འགྲོ་བའི་རྟེན་འབྲེལ་ཡོད།རིན་པོ་ཆེ་དཀོན་པོ་ཡིན་པ་བཞིན་དུ་ཚོགས་ཞིང་རྣམས་མཁྱེན་བརྩེ་ནུས་གསུམ་གྱི་ཡོན་ཏན་རྒྱ་ཆེ་བ་དང་འཇིག་རྟེན་དུ་འབྱུང་བ་དཀོན་པ་མཚོན།ཁྲིའི་སྟེང་དུ་པད་མའི་གདན་དང་།ཟླ་བའི་གདན།ཉི་མའི་གདན་གསུམ་འགོད།མེ་ཏོག་པད་མའི་དབྱིབས་ཅན་དངོས་པོའི་གནས་ཚོད་ལ་ཡེ་ཤེས་རང་སྣང་ལས་གྲུབ་པ་འདམ་ལས་སྐྱེས་ཀྱང་འདམ་གྱིས་མ་གོས་པ་ལྟར་ཚོགས་ཞིང་རྣམས་འཁོར་བའི་སྐྱོན་གྱིས་མ་གོས་པ་དང་།སྐྱེས་བུ་ཆུང་ངུ་དང་།འབྲིང་དང་ཐུན་མོང་བའི་ལམ་རིམ་མཚོན།ཟླ་བའི་གདན་གྱིས་ཀུན་རྫོབ་བྱང་ཆུབ་ཀྱི་སེམས་དང་།ཉི་མའི་གདན་གྱིས་དོན་དམ་བྱང་ཆུབ་ཀྱི་སེམས།དེ་གཉིས་ཀྱིས་སྐྱེས་བུ་ཆེན་པོའི་ལམ་རིམ་མཚོན།གདན་དུ་བྱས་པས་ཚོགས་ཞིང་ལ་དེ་ལྟ་བུའི་རྟོགས་པ་མངའ་ཞིང་སློབ་མ་རང་གི་རྒྱུད་ལའང་དེ་འདྲའི་རྟོགས་པ་སྐྱེ་བའི་རྟེན་འབྲེལ་ཡོད།སྟོན་པ་བསྟན་པའི་བདག་པོ་དང་།ང་ཚོ་རྗེས་སུ་འཇུག་པ་ཡིན་པས་ངོ་བོ་རྩ་བའི་བླ་མ་དང་རྣམ་པ་རྒྱལ་བ་ཤཱཀྱ་ཐུབ་པར་བསམས་ན་བླ་མའི་རྣལ་འབྱོར་ལམ་གྱི་སྲོག་ཏུ་བྱེད་པའི་མན་ངག་འདུས་ཡོད།སྟོན་པས་བདུད་དམག་བྱེ་བ་དུང་ཕྱུར་བྱམས་པའི་ཏིང་ངེ་འཛིན་གྱིས་བཅོམ་པའི་གནད་ཀྱིས་སྒྲུབ་པ་བོ་ལ་ཕྱི་ནང་གི་བར་ཆད་མི་འབྱུང་བའི་མཚོན་བྱེད་དུ་ཕྱག་གཡས་བདུད་འདུལ་གྱི་ཕྱག་རྒྱའི་རྩེ་མོ་གདན་ལ་རེག་ཅིང་།གཡོན་མཉམ་བཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པས་ཆོས་སྒྲུབ་པའི་མཐུན་རྐྱེན་གྱིས་མི་ཕོངས་པའི་དགོས་པ་ཡོད།དབུ་ལ་ནས་འབྲུ་སོར་བཞི་སྤུངས་པ་ལྟ་བུའི་གཙུག་ཏོར་གྱི་རྩེ་མོར་འོད་ཟེར་གྱི་ཕུང་བོ་ཤར་བ་ལས་ནོར་བུའི་ཏོག་ཅན་མཐོང་རྒྱུ་ཡོད་ཀྱང་དེ་འདྲ་མིན།སྐུ་དེ་ཡང་ཤ་ཁྲག་བེམ་ཆོས་ཀྱི་རྣམ་པ་ཅན་མིན་པར་འོད་དང་འོད་ཟེར་གྱི་རང་བཞིན་དྭངས་ཤིང་གསལ་ལ་དྲི་མ་མེད་ཅིང་ཆོས་གོས་གསུམ་མཛེས་པར་གསོལ་བ།སྐུ་རང་ལས་སྐྱེས་པའི་འོད་ཀྱི་ཕུང་བའི་དབུས་ན་ཞབས་རྡོ་རྗེ་སྐྱིལ་ཀྲུང་གིས་བཞུགས་པ་བསམ།ལམ་རིམ་གྱི་སྐབས་འདིར་མདུན་དུ་ལེགས་ཚོགས་ཀུན་གྱི་རྩ་བར་གྱུར་བ་རང་ལ་བྱང་ཆུབ་ལམ་རིམ་སྟོན་པའི་བླ་མ་གཙོ་བོ་དང་།ཐུབ་པའི་གཡས་སུ་རྒྱ་ཆེན་སྤྱོད་བརྒྱུད་ལ་མཉམ་མེད་ཇོ་བོ་ལས་བརྒྱུད་པའི་བླ་མ་རྣམས་གཙོ་བོར་འཛིན་དགོས་པ་བཀའ་གདམས་གསར་རྙིང་གི་ཁུངས་གཏུག་ས་ཇོ་བོ་ཡིན་པས་རེད།གཡོན་དུ་ཤེས་རབ་ཀྱི་ཆ་གཙོ་བོར་གང་ལས་བྱུང་བ་ཟབ་མོ་ལྟ་བརྒྱུད་དང་།རྒྱབ་ཏུ་རླབས་ཆེན་འཕྲིན་ལས་ཕུན་ཚོགས་ཀྱི་ལག་རྗེས་གཙོ་བོར་འཇོག་བྱེད་རླབས་ཆེ་བ་སྟོང་ཉིད་སྙིང་རྗེ་སྙིང་བོ་ཅན་གཙོ་བོར་གང་ལས་བརྒྱུད་པ་ལ་རླབས་ཆེན་སྤྱོད་བརྒྱུད་དེ་བློ་སྦྱོང་དོན་བདུན་མའི་བརྒྱུད་རིམ་དེ་རེད།སྟེང་གི་ཆ་ལ་ཉམས་ལེན་བྱིན་རླབས་བརྒྱུད་པར་བླ་མ་འཇམ་པའི་དབྱངས་ཀྱི་སྐུ་ཏག་ཏག་བཞེངས་ཡོད་པ་དེ་ལ་རྒྱུ་མཚན་ཞིག་ཡོད།དེ་ཡང་མཉམ་མེད་ཇོ་བོ་ཆེན་པོ་ནས་བརྒྱུད་པ་ཡིན།སྒྲུབ་ཁང་དགེ་ལེགས་མཚོས།ཚོགས་ཞིང་ནམ་མཁའ་གང་བ།སེམས་ཅན་ས་གཞིར་གང་བ།གནམ་ས་ཁ་སྦྱོར་བ་ལྟ་བུ་བསྒོམ་དགོས་གསུངས།དཔེར་ན།ཐང་ཆེན་པོ་ཞིག་ཏུ་ཚོགས་ཡོད་ན་རིགས་དྲུག་གི་སེམས་ཅན་ཡོངས་སུ་རྫོགས་པ་རང་གི་མཐའ་སྐོར་དུ་འཁོད་ཡོད་པར་བསམ།བླ་མས་བྱིན་གྱིས་རློབ་ཚུལ་ལ།ཕྱག་མགོ་ལ་བཞག་པ་དང་།དགོངས་པ་གཏད་པ།ཆོས་གསུངས་པས་བྱིན་གྱིས་བརླབས་པ་སོགས་སྣ་ཚོགས་ཡོད།སློབ་མ་དད་པ་ཅན་ལ་བླ་མ་རྟོགས་ལྡན་པ་ཁྱད་པར་བ་ཞིག་གིས་དངོས་སུ་མ་ཐུག་ཀྱང་རྒྱང་རིང་བོ་ནས་ཐུགས་ལ་བསྣམས་པ་ཙམ་གྱིས་བྱིན་རླབས་འཇུག་པ་རེད།དེ་ལྟ་བུའི་ལོ་རྒྱུས་མང་བོ་བཤད་རྒྱུ་ཡོད།སྐྱབས་འཇུག་ཞུ་བ་དང་གནང་བ་ཡང་བླ་མའི་ཐུགས་ལ་འཇོག་པ་དེ་ལ་གོ་དགོས།མདུན་དུ་རང་གི་ཡི་དམ་གྱི་ལྷ་གང་རུང་དང་།ང་ཚོ་དགེ་ལྡན་པར་མཚོན་ན་རྗེ་བླ་མའི་ཐུགས་དམ་གྱི་ལྷ་ལྔ་ངེས་པར་ཚང་དགོས།རྒྱུད་སྡེ་བཞིའི་ལྷ་ཚོགས་ལ་འཁོར་གྱིས་བསྐོར་བ།བསྐལ་བཟང་སངས་རྒྱས་སྟོང་།ལྟུང་བཤགས་སོ་ལྔ།སྨན་བླ་བདེ་གཤེགས་མཆེད་བརྒྱད་སོགས་ཕྱོགས་བཅུའི་སངས་རྒྱས།སྤྱིར་སངས་རྒྱས་ལ་མཐའ་ཡས་ཀྱང་བསྐལ་བཟང་སངས་རྒྱས་རྣམས་རང་ཅག་ལ་འབྲེལ་ཆེ་ཞིང་།བདེ་གཤེགས་བདུན་གྱི་སྨོན་ལམ་ཤཱཀྱའི་བསྟན་པའི་མཐའ་འདིར་འགྲུབ་པར་གསུངས་པ་དང་།ལྟུང་བཤགས་སོ་ལྔ་སྡིག་སྒྲིབ་སྦྱོང་བ་ལ་སྟོབས་ཆེ་བའི་གནད་ཀྱིས་ཡིན།དེའི་མཐར་བྱང་སེམས་ཉེ་བའི་སྲས་བརྒྱད།སྤྱོད་རྒྱུད་ལས་གསུངས་པའི་རང་རྒྱལ་བཅུ་གཉིས།གནས་བརྟན་ཆེན་པོ་བཅུ་དྲུག་སོགས་ཉན་ཐོས་འཕགས་པ་རྣམས་དགེ་སློང་གི་རྣམ་པ་ཅན་སྦྱངས་པའི་ཡོན་ཏན་ལ་གནས་པ།དེའི་མཐར་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་བ་ཅན་དང་།མཁའ་འགྲོ་སྡེ་ལྔ་སོགས་དཔའ་བོ་དཔའ་མོ་རྣམས་ནང་དུ་བདེ་བ་ཆེན་པོའི་དེ་ཁོ་ན་ཉིད་ཕོངས་པ་སོགས་ལ་གཏོད་པའི་ཡེ་ཤེས་འབར་བ་ལ་ཅི་དགར་ལོངས་སྤྱོད་པ་དང་།ལུས་ཀྱི་གར་སྟབས་ཤིག་གེ་བ།ཆོས་སྐྱོང་རྣམས་ཀྱི་ཐུགས་རྒྱུད་དུ་ཁ་བ་བཞིན་འཁྱིལ་བའི་སྙིང་རྗེ་ཆེན་པོས་རྒྱུད་གང་ཞིང་།ཕྱིའི་མ་རུང་བ་འདུལ་བའི་ཕྱིར་དུ་དྲག་པོའི་སྐུར་མཛད་པའི་སྐྱེས་བུ་གསུམ་གྱི་ཆོས་སྐྱོང་།ཁྱད་པར་མྱུར་མཛད་ཡེ་ཤེས་མགོན་པོ་ཕྱག་དྲུག་པ་མདུན་གྱི་ཐད་དྲང་དུ་བཞུགས་ཤིང་སྒྲུབ་པ་བོ་ལ་སྤྱན་གདངས་པས་གཟིགས་པ།ཕྱོགས་བཞི་ལ་རྒྱལ་ཆེན་བཞི་བཅས་གསལ་གདབ།

   ཚོགས་ཞིང་གི་གྲས་སུ་བསྟན་སྲུང་ཡེ་ཤེས་པ་ཁོ་ན་མ་གཏོགས་འཇིག་རྟེན་པའི་ལྷ་གཞན་འགོད་མི་རུང་།ངོ་བོ་ཡེ་ཤེས་པ་ཡིན་ཡང་རྣམ་པ་འཇིག་རྟེན་པའི་ཚུལ་བཟུང་བ་ཡང་འགོད་མི་རུང་བ་རེད།རྒྱལ་བོ་སྐུ་ལྔ་དང་།དམ་ཅན་རྡོར་ལེགས་ལྟ་བུ་ངོ་བོ་འཇིག་རྟེན་ལས་འདས་པ་ཡིན་ཡང་རྣམ་པ་འཇིག་རྟེན་ཕལ་བའི་ཚུལ་བཟུང་ཡོད་པས་དེ་ལྟར་མཆོད་བཀུར་བྱས་ན་འཕྲིན་ལས་སྒྲུབ་ཅིང་།འཇིག་རྟེན་ལས་འདས་པའི་གོ་ས་རུ་བཞག་ན་ཐུགས་མི་དགྱེས་པ་ཡིན།དམ་པ་གོང་མའི་གསུང་སྒྲོས་ལ།དཔེར་ན་རྒྱལ་བོ་ཆེན་པོ་ཞིག་སྤྲང་བོའི་ཚུལ་དུ་ས་གནས་གཞན་ལ་རྟོག་དཔྱོད་དུ་འགྲོ་བའི་ཚེ།ལམ་བར་དུ་གཞན་པས་ངོ་ཤེས་ཀྱང་མ་ཤེས་ཁུལ་བྱས་ནས་སྤྲང་བོ་ཡིན་པ་ལྟར་ཞབས་ཕྱི་སྒྲུབ་པ་ལ་ཐུགས་དགྱེས་པ་དང་།གལ་ཏེ་རྒྱལ་བོ་ཡིན་པར་ཤེས་སུ་བཅུག་ན་མཐའ་མར་ཁྲིམས་ཆད་ཕོག་པ་ལྟ་བུ་རེད།ཀུན་མཁྱེན་འཇིགས་མེད་དབང་བོས།འཇིག་རྟེན་པའི་ལྷ་མཐོ་སར་འཁྱེར་མི་རུང་།ཕྱིན་ཆད་དེ་ལྟར་མི་འཇོག་པའི་ངེས་པ་མེད།དེ་ལྟར་བཀུར་ན་སྐྱབས་འགྲོ་རྣམ་དག་མི་ཡོང་ཞིང་སྔར་རྒྱུད་ལ་ཡོད་པ་ཞིག་ཡིན་ན་ལྟུང་འགྲོ་གསུངས།སྟོང་ཉིད་རྟོགས་པའི་ལྟ་བ་རྒྱུད་ལ་སྐྱེས་ཡོད་པ་དང་།རྗེས་ཐོབ་སྒྱུ་མ་ལྟ་བུའི་སྟོང་བ་ཉིད་ལ་མྱོང་བ་ཐོན་ཡོད་པའི་གང་ཟག་ཅིག་གིས་འཇིག་རྟེན་པའི་གཞི་བདག་ལྟ་བུ་ལའང་ཕྱག་འཚལ་ན་ཆོག་པ་རེད།གང་ཟག་དེའི་ངེས་ངོར་ཐ་སྙད་དུ་ཁྱད་པར་མེད་ཀྱང་དོན་དམ་དུ་ཆོས་ཐམས་ཅད་མཉམ་པ་ཉིད་དུ་གནས་ཡོད་པས་འགལ་བ་མེད།ཁྱད་པར་བསྐྱེད་རིམ་གྱི་རྟོགས་པ་ཐོབ་པ་ཞིག་ཡིན་ན།སྣོད་ཐམས་ཅད་གཞལ་ཡས་ཁང་དང་བཅུད་ཐམས་ཅད་ལྷ་དང་ལྷ་མོའི་རང་བཞིན་གྱི་དག་པ་རབ་འབྱམས་འབའ་ཞིག་ཏུ་སྣང་བས་ཐ་ན་ཐེའུ་རང་ལའང་ཕྱག་འཚལ་ན་སྐྱོན་མེད།ང་རང་ལྟ་བུའི་ཕལ་བ་ཞིག་གིས་འཇིག་རྟེན་པའི་ལྷ་ལ་གཏན་ནས་ཕྱག་འཚལ་མི་ཆོག་པའི་ཁྱད་པར་ཡོད།དོན་དམ་པའི་ཆོས་དངོས་འགོག་ལམ་ཡིན་ཡང་དམ་པའི་ཆོས་ཀྱི་གླེགས་བམ་གཉིས་མཆོག་དམན་འབྱེད་མི་རུང་།ཆོས་དཀོན་མཆོག་དངོས་ཡིན་པར་མོས་ན་བྱིན་རླབས་འཇུག་པ་རེད།ངན་སོང་སྦྱོང་རྒྱུད་ལས།

བློ་མཆོག་རྣམས་ཀྱི་ཀུན་དགའ་ར་བ་སྟེ།།དམན་པས་འཇིགས་པ་རྣམས་ཀྱི་རྒྱལ་བྱེད་ཚལ།།སྲིད་པའི་འབྱོར་བ་ཟིལ་གྱིས་གནོན་པའི་མཆོག།གསུང་མཆོག་ཆོས་ལ་བདག་ནི་སྐྱབས་སུ་མཆི།།ཞེས་སྒྲུབ་བྱེད་ཀྱི་ཚིག་དེ་རེད།ཚོགས་ཞིང་གི་མདུན་དུ་ཆོས་དཀོན་མཆོག་འགོག་ལམ་གྱི་རང་བཞིན་རང་རང་གིས་གསུངས་པའི་ལུང་གི་ཆོས་པོ་ཏིའི་རྣམ་པ་ཅན་གདོང་དར་ཁྲ་ལམ་མེར་རང་ལ་བསྟན་པ་དགོས།དཔའ་བོ་དཔའ་མོ་རྣམས་དགེ་འདུན་དཀོན་མཆོག་དང་།སྟོན་པ་བཅོམ་ལྡན་འདས་སངས་རྒྱས་དང་དགེ་འདུན་དཀོན་མཆོག་གཉིས་ཀ་ཡིན།དགེ་འདུན་དཀོན་མཆོག་དངོས་འཕགས་པའི་གང་ཟག་ཡིན་པས་རབ་བྱུང་བ་ཡིན་མིན་ལ་ཐུག་མེད།སྒྲ་སྒྱུར་མར་བ་དང་།རྗེ་བཙུན་མི་ལ་ལྟ་བུ་དགེ་འདུན་དཀོན་མཆོག་ཡིན་ནོ།།

  འོ་ན་རྟེན་ལ་གོ་རིམ་ཡོད་པས་སངས་རྒྱས་བྱང་སེམས་ལ་སྤངས་རྟོགས་ཀྱི་ཡོན་ཏན་མཆོག་དམན་ཡོད་པ་ཨེ་ཡིན་ཞེ་ན།ངོ་བོའི་སྒོ་ནས་ཁྱད་པར་མེད་ཀྱང་གདུལ་བྱའི་དབང་གིས་གཙོ་བོ་དང་འཁོར་གྱི་ཚུལ་དུ་བཟུང་ཡོད།བྱམས་འཇམ་དབྱངས་ཡིན་ན་སྟོན་པའི་འཁོར་གྱི་ཚུལ་བཟུང་བ་རེད།སངས་རྒྱས་སྤྲུལ་བ་དགྲ་བཅོམ་འཕགས་པའི་ཚོགས།།ཞེས་གསུངས།དེ་རྐྱེན་གྱིས་གོ་རིམ་ནོར་ན་རྟེན་འབྲེལ་འཕྱུག་ཉེན་ཡོད།དཔེར་ན།གྲུབ་ཆེན་ནཱ་རོ་བ་དང་།སྒྲ་སྒྱུར་མར་བ་ལོ་ཙཱ་གཉིས་མཚན་མོ་ཐང་སྟོང་ཞིག་ཏུ་ཞག་བཞུགས་པའི་སྐབས།ནཱ་རོ་བས།བུ་ཁྱོད་ལོངས་ལ་ནམ་མཁའ་ལ་ལྟོས་དང་།ཡི་དམ་གྱི་ལྷའི་རྟེན་དང་བརྟེན་པའི་དཀྱིལ་འཁོར་མངོན་སུམ་དུ་གྲུབ་འདུག་གསུངས་པས།ཁོང་གིས་གཟིགས་དུས་འཇའ་ཚོན་གྱིས་རི་མོ་བྲིས་པ་ལྟར་མིན་པར་དངོས་གནས་སུ་གྲུབ་འདུག་པ་མཇལ་རྒྱུ་བྱུང་སྐད།བུ་ཁྱོད་ཀྱིས་ཐོག་མར་གང་ལ་ཕྱག་འཚལ་དྲིས་པ་ན།སྒྲ་སྒྱུར་མར་བས་བླ་མ་ལ་དུས་རྟག་ཏུ་འབྲལ་མེད་དུ་གནས་ཡོད།ཡི་དམ་གྱི་ཞལ་མཐོང་བ་ད་རེས་ལས་མ་བྱུང་བས་ཐོག་མར་ཡི་དམ་ལ་ཕྱག་འཚལ་བས་རྟེན་འབྲེལ་འཕྱུགས་པ་རེད།དེ་བས་གྲུབ་ཆེན་ནཱ་རོ་བས།བླ་མ་མེད་པའི་གོང་རོལ་ན།།སངས་རྒྱས་བྱ་བའི་མིང་ཡང་མེད།།བསྐལ་བ་སྟོང་གི་སངས་རྒྱས་ཀྱང་།།ཡི་དམ་བླ་མའི་སྤྲུལ་བ་ཡིན།།ཞེས་གསུངས་ནས་ཡི་དམ་གྱི་ལྷའི་དཀྱིལ་འཁོར་ཐུགས་ཀར་ཐིམ་སོང་བའི་ལོ་རྒྱུས་ཡོད།དེ་རྐྱེན་གྱིས་ཁོང་གི་སྲས་ཀྱི་ཐུ་བོ་སྲས་དར་མ་མདོ་སྡེ་སྐུ་ཚེ་མཐར་མ་ཕྱིན་པར་གདམས་ངག་མང་བོའི་བརྒྱུད་པ་ཆད་སོང་བ་ཡང་ཐོག་མའི་རྟེན་འབྲེལ་འཕྱུགས་པས་རྐྱེན་ཡིན་ཞེས་གསུང་རྒྱུན་འདུག མི་ཤི་ཁ་མར་བྱང་ཆུབ་ལམ་རིམ་ཆེན་མོ་སྔས་སུ་བཞག་ནས་དད་གུས་དང་བཅས་འཆི་བ་ཞིག་བྱུང་ན་འཕོ་བའི་གདམས་ངག་གི་མཆོག་ཡིན་པས་ངན་སོང་དུ་མི་ལྟུང་ཐག་ཆོད་ཡིན།ང་ཚོའི་ས་ཕྱོགས་སུ་རང་ལ་ཆོས་དཔེ་མེད་ཀྱང་གཞན་ལ་གཡར་ནས་སྔས་སུ་འཇོག་པའི་སྲོལ་དར་ཡོད།གལ་ཏེ་མ་འཛོམས་ན་སྐུ་མཐེ་བོང་ཙམ་མ་གཏོགས་མེད་ཀྱང་སྐུ་དེའི་རྡུལ་ཕྲ་མོ་རེ་རེ་ལའང་རྡུལ་དེའི་གྲངས་དང་མཉམ་པའི་སངས་རྒྱས་ཐམས་ཅད་བཞུགས་ཡོད་པར་མོས་ན་བྱིན་རླབས་འཇུག་པ་རེད།རྟེན་ཟེར་བ་རྟེན་གཞི་ཡིན།བྱིན་རླབས་འཇུག་སའི་གནས་ཡིན་པའི་ཆ་ནས་རྟེན་ཟེར།གསེར་བྲིས་དང་དངུལ་བྲིས་ཀྱིས་ཁྱད་མི་འབྱེད་པར་སངས་རྒྱས་དངོས་ཀྱི་འདུ་ཤེས་བཞག་ན་སྐུ་དེ་ནམ་མཐོང་རེས་ཀྱིས་སངས་རྒྱས་དངོས་མཐོང་བའི་ཕན་ཡོན་འཐོབ།ཉམས་ལེན་ཡོད་པ་ཞིག་གིས་ཉིན་རེ་བཞིན་མདུན་ན་བཞུགས་པའི་རྟེན་དེ་ལ་སྐྱབས་ཡུལ་མཐའ་དག་སྤྱན་དྲངས་ཏེ་འགུག་བསྟིམས་བྱས་ན་ཡེ་ཤེས་པ་དངོས་སུ་བཞུགས་པས་རྟེན་བྱིན་རླབས་ཅན་ཟེར་བའང་དེ་ལྟ་བུ་ལ་གོ་དགོས།རབ་གནས་མང་ན་བཟང་ཞིང་།རབ་གནས་བརྒྱ་རྩ་མ་དང་སྟོང་བྱས་ན་བྱིན་རླབས་ཇེ་ཆེ་ཇེ་ཆེ་ཡིན།སྔོན་གྱི་ལས་ཀྱིས་མནར་བ་མ་གཏོགས་གཞན་བདུད་དང་བདུད་ཀྱི་རིགས་ཀྱིས་གླགས་མི་རྙེད།ནམ་མཐོང་རེས་ཀྱིས་བགེགས་དང་བར་ཆད་ཀྱིས་མི་ཚུགས་པའི་སྲུང་བ་ཆེན་པོར་འགྱུར་བ་ཡིན།ཀུན་སློང་གིས་མ་ལྕོགས་པར་སླ་ཆོས་དང་ཁང་བའི་མཛེས་རྒྱན་དུ་སོང་ན་དགོས་པ་ཅི་ཡང་མེད་ཅེས་གསུངས།།

 ལྔ་བ་བསག་སྦྱང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱང་བ་ནི།བཟང་སྤྱོད་ལས།ཕྱག་འཚལ་བ་དང་མཆོད་ཅིང་བཤགས་པ་དང་།།རྗེས་སུ་ཡི་རང་བསྐུལ་ཞིང་གསོལ་བ་ཡི།།དགེ་བ་ཅུང་ཟད་བདག་གིས་ཅི་བསགས་པ།།ཐམས་ཅད་བདག་གིས་བྱང་ཆུབ་ཆེན་པོར་བསྔོ།།ཞེས་གསུངས།དཔེར་ན།ཤིང་རྟའི་ཡན་ལག་ལ་བརྟེན་ནས་ཤིང་རྟ་འགྲོ་བ་བཞིན་དུ་ཕྱག་འཚལ་བ་སོགས་བདུན་པོ་འདི་ཡན་ལག་སྟེ་ཐབས་སུ་བྱས་ནས་སངས་རྒྱས་སུ་འགྲོ་དགོས་པས་ན་ཡན་ལག་ཅེས་བརྗོད།བསག་སྦྱང་གི་གནད་དང་སྒྲིབ་སྦྱོང་གི་གནད་བསྡུས་པ་ཡན་ལག་བདུན་པ་ཡིན།རྗེ་བཙུན་འཇམ་པའི་དབྱངས་ཀྱིས་སྔར་བསགས་ཀྱི་སྡིག་ལྟུང་སྦྱོང་ཞིང་ཚོགས་རྒྱ་ཆེན་པོ་གོང་ནས་གོང་དུ་སྤེལ་བའི་བསག་སྦྱང་ལ་འབད་དགོས་ཞེས་དང་།འབྲོམ་སྟོན་པས་ཀྱང་།བསོད་ནམས་ཀྱི་ལས་ལ་འབད་པ་རྟག་ཏུ་བྱ།བསོད་ནམས་མ་བསགས་པ་ལ་སེམས་བཟང་བོ་མི་འོང་།བསོད་ནམས་བསགས་པ་ལ་སེམས་བཟང་བོ་ཡོང་ཞེས་གསུངས།སེམས་བཟང་བོ་ཞེས་པ་ངེས་འབྱུང་དང་བྱང་ཆུབ་ཀྱི་སེམས་རེད།སྟོང་ཉིད་རྟོགས་པ་ལའང་ཚོགས་གསོག་སྒྲིབ་སྦྱོང་གཙོ་བོ་ཡིན་ཏེ།སེམས་ཀྱི་ངོ་བོ་མཐོང་བ་ཡང་།།ཚོགས་གསོག་སྒྲིབ་སྦྱོང་ལ་ལྟོས་པས།།ཞེས་གསུངས།དེ་རྐྱེན་གྱིས་ང་ཚོ་དགོན་པ་ཞིག་ལ་མཚོན་ན།ཕྱག་འཚལ་བ་དང་།སྐོར་བ་བྱེད་པ།མཆོད་པ་འབུལ་བ་སོགས་སློབ་གཉེར་གྱི་གེགས་དང་འགལ་རྐྱེན་དུ་ལྟ་བ་ཡོད་ཀྱང་རྒྱལ་བའི་བཀའ་དང་དགོངས་འགྲེལ་གྱི་བསྟན་བཅོས་རྣམ་དག་དང་བསྡུར་ན་རྒྱབ་འགལ་རེད།འཇམ་མགོན་གཉིས་པ་ཀུན་མཁྱེན་བླ་མ་འཇམ་དབྱངས་བཞད་པའི་རྡོ་རྗེ་ཚང་རྒྱུན་དུ་ཚོགས་གསོག་སྒྲིབ་སྦྱོང་རྐྱང་རྐྱང་གིས་མ་ཁོམ་པར་བཞུགས་ཡོད་པ་དེ་འདྲ་རེད།ཁོང་སྐུ་ན་གཞོན་དུས་འབྲས་སྤུངས་སུ་སློབ་གཉེར་གནང་བཞིན་པའི་སྐབས་དེར།དཔའ་རིས་ཀྱི་དགེ་བཤེས་རྒན་པ་ཞིག་ཕེབས་ནས་དཔེ་ཆ་ལེགས་པོ་བལྟ་དགོས་ལུགས་དང་།ཕྱག་སྐོར་རྐྱང་རྐྱང་གིས་ས་ཆོད་མི་འོང་ཚུལ་གསུངས་པ་ལ།ལགས་སོ།ཁོ་བོ་བློ་གྲོས་དམན་པའི་སྟབས་ཀྱིས་དེ་ལ་བསག་སྦྱང་གལ་ཆེ་བ་ཨེ་ཡིན་ནམ་བསམས་པ་ཡིན་ཞུས་པས།དགེ་བཤེས་དེས་ཀྱང་དོན་གྱི་གནད་རྟོགས་ནས་སྐྱེས་པུ་དམ་པ་འདི་ལྟ་བུ་ལ་འབྲེལ་ཞིག་མ་ཐོག་པར་ཤི་ན་ཕངས་སེམས་ཆེ་བས་རྗེས་སུ་གུང་ཚིགས་སུ་གདན་དྲངས་པའི་ལོ་རྒྱུས་ཡོད་པ་རེད།ལམ་རིམ་ལས།མཉན་ན་ཚིག་མི་ཟིན།བསམས་ན་དོན་མི་གོ།བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་ཞེས་གསུངས།དེ་བས་གཞུང་དོན་རྟོགས་པའི་ཆེད་དང་།བརྩོན་འགྲུས་དང་ཤེས་རབ་གོང་འཕེལ་དུ་འགྲོ་བ་ཚོགས་གསོག་སྒྲིབ་སྦྱོང་ལ་རག་ལས་ཡོད།གཞུང་དོན་རྟོགས་པ་དེ་ཡང་རང་གི་སེམས་རྒྱུད་དུ་ཆུ་དང་འོ་མ་བཞིན་མ་འདྲེས་པར་ང་རྒྱལ་དང་ཕྲག་དོག་ཞེ་སྡང་ཆེ་རུ་ཆེ་རུ་སོང་ནས་ཡུལ་དམ་པ་ལ་སྨོད་པ་དང་།གཞན་ལ་ཁྱད་གསོད་སྨ་འབེབ་བྱེད་པའི་ངར་ཕྱུང་བ་ཡིན་ན།ཆོས་དེ་ཐར་བའི་རྒྱུ་རུ་མ་སོང་བར་ངན་འགྲོ་སྒྲུབ་བྱེད་དུ་སོང་བ་རེད།ལྷ་བདུད་དུ་བབ་པ་དང་ཆོས་དེ་ཉིད་ཉོན་མོངས་པའི་གྲོགས་སུ་འགྲོ་བ་ཆེས་མང་བར་སྣང་བས་གསུངས་པ་ལྟར།གཞུང་ཆེན་མོ་ལ་སྦྱངས་པ་བྱས་བྱས་ནས་ལུང་དང་རིགས་པ་དེ་ཡང་གཡོ་སྒྱུ་ཁྲམ་གསུམ་གྱི་ལས་སྒྲུབ་བྱེད་དུ་འགྲོ་བ་ལས།གང་ཡང་མ་བསླབས་པར་བླུན་དད་ཁོ་ནས་མ་ཎི་བགྲང་ན་དོན་ཆེན་པོ་འགྲུབ་པ་ཡིན་ཞེས་ཐུའུ་བཀན་ཆོས་ཀྱི་ཉི་མས་གསུངས་སོ།།

  ༡ཕྱག་འཚལ་བའི་ཡན་ལག་ནི།སྡོང་བོ་བཀོད་པའི་མདོ་ལས།ལུས་ཐམས་ཆད་ས་ལ་ཕབ་པའི་བརྐྱངས་ཕྱག་ཅེས་དང་།མདོ་རྩ་ལས།ལག་མཐིལ་གཉིས།པུས་མོའི་ལྷ་ང་གཉིས་མགོ་བཅས་ས་ལ་རེག་པ་ཡན་ལག་ལྔའི་ཕྱག་དང་།རང་གི་རྩ་བའི་བླ་མ་ལྟ་བུ་རྐུབ་སྟེགས་སུ་བཞུགས་ཡོད་པ་ཡིན་ན་སྒྱིད་པ་ལ་འཁྱུད་དེ་མགོས་གཏུགས་པ་སྒྱིད་པ་ལ་འཁྱུད་པའི་ཕྱག་ཅེས་གསུངས།དབྱེ་ན་ལུས་ངག་ཡིད་གསུམ་གྱི་ཕྱག་བཟང་སྤྱོད་ལས་གསུངས་པ་ལྟར་རེད།ཐལ་མོ་ཡ་གཅིག་སྦྱོར་བ་དང་། མགོ་བོ་དུད་པ་དེ་ཡང་ཕྱག་ཡིན།ཕྱག་དེ་རང་གིས་ཉམས་སུ་ལེན་ཚུལ་ཅི་ཡིན་ཞེ་ན།ལུས་དྲང་བོར་བསྲངས།རྐང་བ་གཉིས་བཤིབས།ཕྱག་གཉིས་ཐལ་མོ་སྦྱར་ཏེ་ཡིད་ཀྱིས་སྐྱབས་ཡུལ་གྱི་སྐུ་གསུང་ཐུགས་མཛད་པ་འཕྲིན་ལས་ཀྱི་ཡོན་ཏན་དྲན་པས་དད་པ་སྒོམ་པ་ཡིད་ཀྱི་ཕྱག་དང་།ངག་གིས་སྐད་གསང་མཐོན་པོས་བླ་མ་སངས་རྒྱས་རྣམས་ཀྱི་གསོལ་འདེབས་དང་བསྟོད་པ་སོགས་སྙན་པའི་དབྱངས་ཀྱིས་བརྗོད་པ་ངག་གི་ཕྱག་ཡིན།ཐལ་མོ་སྦྱོར་ཚུལ་ལ།སྤྱི་བོ།མཛོད་སྤུ།མགྲིན་པ།སྙིང་ག་བཞི་ལ་སྦྱོར་བ་དང་།སྤྱི་བོ་མགྲིན་པ་སྙིང་ག་གསུམ་ལ་སྦྱོར་བ།ཐལ་མོ་གཅིག་སྦྱོར་བ་ཡང་གཏན་ནས་མི་རུང་བ་མིན།ཕྱི་རོལ་བས་གང་ཟག་གི་བདག་ཡོད་པའི་མཚོན་བྱེད་ལ་ཐལ་མོ་ལེབ་སྦྱོར་བྱེད་པ་རེད།ང་ཚོས་ཐལ་མོ་ཁོང་སྟོང་དུ་སྦྱར་བས་བདག་མེད་མཚོན་པས་ཆོས་སྐུ་དང་།ཐལ་མོའི་དབྱིབས་ཀྱིས་གཟུགས་སྐུ།ཡ་གཉིས་ཀྱིས་ཐབས་ཤེས།དེ་གཉིས་སྦྱར་བས་ཐབས་ཤེས་ཟུང་འབྲེལ་གྱི་ལམ་མ་སྐྱེས་པ་སྐྱེ།སྐྱེས་པ་གོང་འཕེལ་དུ་འགྱུར་བའི་རྟེན་འབྲེལ་གྱི་གནད་ཅིག་ཡོད་པས་ཕྱག་འཚལ་སྐབས་ཧ་ཅང་གཟབ་དགོས།མཚན་དཔེ་གཙོ་བོ་དབུ་གཙུག་ཏོར་འགྲུབ་པའི་རྟེན་འབྲེལ་དུ་སྤྱི་བོ་ལ་སྦྱོར་བ་དང་།མགྲིན་པས་གསུང་དབྱངས་ཡན་ལག་དྲུག་ཅུ།སྙིང་གས་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་འགྲུབ་པའི་བག་ཆགས་འཇོག་པ་དང་།དེ་གསུམ་གྱིས་སྒོ་གསུམ་གྱི་སྡིག་སྒྲིབ་འདག མདོ་ལས།ཕྱག་འཚལ་བའི་ལུས་ཀྱིས་ས་ཇི་ཙམ་ནོན་པ་ནས།འོག་དཔག་ཚད་བརྒྱད་ཁྲི་བཞི་སྟོང་ན་གསེར་གྱི་ས་གཞི་ལ་ཐུག་པའི་བར་གྱི་རྡུལ་གྱི་གྲངས་དང་མཉམ་པའི་འཁོར་ལོའི་སྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་གསུངས།ཕྱག་གཉིས་ས་ལ་ཕབ་སྐབས་ལག་མཐིལ་ལེབ་སྦྱོར་མི་བྱེད་པར་ཁུར་ཚུར་ལྟ་བུར་བྱས་ན་དུད་འགྲོ་རྨིག་པ་ཅན་དུ་སྐྱེ་བ་དང་།མགོ་ས་ལ་མ་རེག་ན་སྲིན་བུའམ་དམྱལ་བ་མགོ་འཕྱང་།ལུས་དྲང་བོར་མ་བསྲངས་ན་སྒུར་བོ་དང་དུད་འགྲོར་སྐྱེ་བར་སྟོན་པས་གསུངས་ཡོད་པ་རེད།ཕྱག་མང་ན་བཟང་ཡང་སྤྱོད་ལམ་ཚུལ་དང་མཐུན་པ་གལ་ཆེ་བ་ཡིན་ཞེས་གསུངས།།

  ༢མཆོད་པ་འབུལ་བའི་ཡན་ལག་ནི།མཆོད་པའི་ངོ་བོ་སྐྱབས་ཡུལ་དམ་པ་རྣམས་ཀྱི་ཐུགས་དགྱེས་པའི་ཆ་ནས་བཞག་པའི་ཕུང་བོ་ལྔ་བ་ཅན་ཡིན།ངོ་བོ་ཞེས་པ་རང་བཞིན་གྱི་དོན་རེད།ཆོས་ཉིད།བདག་ཉིད།ངོ་བོ་རྣམས་ཕལ་ཆེར་དོན་གཅིག་པ་ཡིན།མཆོད་པའི་སྐད་དོད་པཱུ་ཛ་ཞེས་པ་བོད་སྐད་དུ་བསྒྱུར་ན་མཉེས་བྱེད་ལ་འཇུག མདོ་ལུགས་ལ་བླ་ན་ཡོད་པ་དང་བླ་ན་མེད་པའི་མཆོད་པ་གཉིས་ཡོད།བླ་ཞེས་པ་གོང་མའི་དོན་ཡིན་ལ་འཇིག་རྟེན་པ་ལ་ལྟོས་ཏེ་འཇིག་རྟེན་ལས་འདས་པའི་མཆོད་པ་བླ་ན་མེད་པ་དང་།འཇིག་རྟེན་པའི་མཆོད་པ་བླ་ན་ཡོད་པའི་མཆོད་པ་ཡིན།བཟང་སྤྱོད་ལས་གསུངས་པ་ལྟར།མེ་ཏོག་དང་།སིལ་སྙན་དང་།བྱུག་པ་དང་།གདུགས་མཆོག་དང་། མར་མེ་དང་།བདུག་སྤོས་དང་།ན་བཟའ་སོགས་བླ་ན་ཡོད་པའི་མཆོད་པ་དང་།སངས་རྒྱས་བྱང་སེམས་ཀྱིས་བཟང་དགུ་སྤྲུལ་བའི་མཆོད་པ་བླ་ན་མེད་པ་ཡིན་པས་དེའི་གོང་ན་མཆོད་པ་གཞན་མེད་པའི་དོན་མིན།བྱང་ཆུབ་ཀྱི་སེམས་ཀྱིས་ཀུན་ནས་བསླངས་པའི་མཆོད་པ་དང་།བདེ་སྟོང་གི་ཡེ་ཤེས་ཀྱིས་ཀུན་ནས་བསླངས་པའི་མཆོད་པ་ལ་ཀུན་ཏུ་བཟང་བོའི་མཆོད་པ་ཟེར་བ་རེད།ཆུ་མཆོད་བདུན་ཚར་གཅིག་དང་།སྤོས་རྐང་ཐུར་གཅིག་ལས་མེད་ཀྱང་མཆོད་པའི་ཚོགས་རབ་འབྱམས་སྤྲོས་ཏེ་རྒྱལ་བ་སྲས་དང་བཅས་པའི་ཐུགས་མཉེས་པར་བྱས་སོང་སྙམ་པའི་མོས་པ་བསྟེན་ན་དེའི་ཕན་ཡོན་འཐོབ།མཆོད་པ་ཕུལ་བ་འདི་ལ་བརྟེན་ནས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པའི་སྨོན་ལམ་གནང་ན་བྱང་ཆུབ་ལམ་རིམ་གྱི་ཉམས་ལེན་ཡོངས་རྫོགས་ཚང་བ་རེད།མཆོད་པའི་གྲངས་མང་ཉུང་དང་།གསེར་རྐོང་དང་དངུལ་རྐོང་གི་རྒྱ་ཆེ་ཆུང་ལ་མི་ལྟོས་པར་བསམ་སྦྱོར་ཆ་ཚང་ཞིང་ཉིན་རེའི་ཉམས་ལེན་གྱི་གོ་རིམ་ལས་མ་འཆོལ་བར་བསམ་པ་བྱང་ཆུབ་ཀྱི་སེམས་ཀྱིས་ཟིན་ན་ཕན་ཡོན་རྒྱ་ཆེ་བ་ནམ་མཁའ་དང་མཉམ་ཞིང་དེ་ཡང་མཛེས་ཉམས་དང་གུས་ཉམས་ཐོན་པ་གལ་ཆེ།བསམ་སྦྱོར་སྡིག་དང་མ་འབྲེལ་བར་བྱས་པས་རང་རྒྱུད་ཀྱི་ཉོན་མོངས་ས་བོན་དང་བཅས་པ་སྤོང་བའི་ཆོས་སྐུ་འགྲུབ་པའི་བག་ཆགས་འཇོག མཆོད་པ་མཛེས་པར་བཤམས་པས་གདུལ་བྱ་རང་རང་གི་མོས་པ་བཞིན་སྟོན་པའི་གཟུགས་སྐུ་འགྲུབ་པའི་བག་ཆགས་འཇོག་པ་དང་།བསམ་པ་འཇིག་རྟེན་ཆོས་བརྒྱད་ཀྱིས་མ་སྦགས་པར་སེམས་ཅན་ཐམས་ཅད་ཀྱི་དོན་དུ་སངས་རྒྱས་ལ་དམིགས་ཏེ་མེ་ཏོག་རྐང་གཅིག་ཕུལ་ནའང་བསོད་ནམས་བསམ་གྱིས་མི་ཁྱབ་པ་ཡོད་པར་མདོ་ལས་གསུངས་ཡོད།གཞན་གྱིས་རང་ལ་བྱིན་པའི་དངོས་པོ་ཆེ་ཆུང་གང་ཡིན་ཡང་ཞག་གཅིག་ལ་མཆོད་ཁང་དུ་ཕུལ་ཏེ་དངོས་གྲུབ་ཀྱི་ཚུལ་དུ་བླངས་ན་དཀོར་སྒྲིབ་ཀྱིས་མི་ཚུགས་པའི་མན་ངག་ཆེན་པོ་དང་རང་གཞན་གྱི་ཚོགས་རྫོགས་པའི་ཐབས་མཁས་ཀྱི་འཕྲུལ་ཆེན་པོ་ཡིན།དངོས་སུ་འབུལ་མི་འོས་པ་རྣམས་ཡིད་ཀྱིས་ཕུལ་ཏེ་ལོངས་སྤྱད་ན་དཀོར་སྒྲིབ་ཏུ་མི་འགྱུར་བ་དམ་པ་གོང་མའི་ཕྱག་ལེན་རེད།ཁུངས་ནི།དེ་བཞིན་གཤེགས་པའི་ལྷག་མ་འདི།།སྡིག་པ་ཐམས་ཅད་ཉམས་ཕྱིར་གསོལ།།ཞེས་པ་ལྟར་རེད།རྗེ་གསེར་ཁང་བའི་ཕྱག་ལེན་ལྟར་རྒྱུན་དུ་དྭངས་ཤིང་བསིལ་བའི་ཡོན་ཆབ་འབུལ་བ་གལ་ཆེ་སྟེ།རྙེད་སླ་ཞིང་སེར་སྣས་མི་སྦགས་པ།བརླན་ཞིང་བསིལ་བའི་རྟེན་འབྲེལ་གྱིས་ཉམས་སུ་བླང་བྱའི་གཙོ་བོ་བྱང་ཆུབ་ཀྱི་སེམས་ཀྱིས་རྒྱུད་བརླན་པའི་དགོས་པ་དང་།ངོ་བོ་དག་བྱེད་ཀྱི་རྫས་ཡིན་པའི་ཆ་ནས་སྡིག་པ་འདག་པ་དང་།གཟུགས་བརྙན་འཆར་བའི་ཆ་ནས་སྟོང་ཉིད་རྟོགས་པའི་ཤེས་རབ་རྒྱུད་ལ་སྐྱེ་བའི་དགོས་པ་ཡོད།ཚུལ་ཁྲིམས་རྣམ་པར་དག་པ་འབྱུང་བའི་ཕྱིར་དུ་དྲི་ཞིམ་པོའི་བདུག་སྤོས་འབུལ་བ་དང་།གཏུམ་མོ་དང་འོད་གསལ་འཆར་བ་དང་ཤེས་རབ་ཁྱད་པར་ཅན་རྒྱས་པའི་ཆེད་དུ་མར་མེ་འབུལ་བ་གལ་ཆེ།མཆོད་པ་ཕུལ་བ་ལས་ལྷག་པའི་ཤེས་རབ་སྐྱེད་པ་དང་།ལོངས་སྤྱོད་སྒྲུབ་པ།ཚེ་སྒྲུབ་དང་གཏེར་སྒྲུབ་མེད་པས་དེ་ལ་གལ་ཆུང་བྱེད་པ་མ་ཤེས་པའི་རྟགས་རེད།མཆོད་རྫས་གང་ཡོད་མཆོད་པའི་འཁོར་གསུམ་བདེན་མེད་ཀྱི་ལྟ་བས་རྒྱས་བཏབ་སྟེ་སེམས་བསྐྱེད་ཀྱིས་རྩིས་ཟིན་པར་བྱས་ན་ཐབས་ཤེས་ཟུང་དུ་འབྲེལ་བས་བསོད་ནམས་དང་ཡེ་ཤེས་ཀྱི་ཚོགས་ཀྱི་ཉམས་ལེན་དུ་འགྱུར།དཔེར་ན།མི་དཔོན་ཆེན་ཞིག་ལ་ཇ་འདྲེན་པ་ལྟར་ཧ་ཅང་གཟབ་དགོས་པ་ལྟ་བུ་རེད།བདེ་ལེགས་གང་བྱུང་ཐམས་ཅད་དཀོན་མཆོག་གི་དྲིན་དུ་ཤེས་ནས་རྟག་ཏུ་མཆོད་པ་ལ་བརྩོན་ཞིང་།རང་ལ་ལམ་ཕྱིན་ཅི་མ་ལོག་པ་སྟོན་པའི་དགེ་བའི་བཤེས་གཉེན་སྟོན་པའི་སྐུ་ཚབ་ཏུ་བཞུགས་པས་དེ་ལ་མཆོད་པ་ཕུལ་ན་སངས་རྒྱས་ཀྱི་སྐུ་དངོས་ལ་མཆོད་པའི་ཕན་ཡོན་འཐོབ།སྟོན་པའི་སྐུ་དང་རང་གི་རྩ་བའི་བླ་མའི་ན་བཟའ་ཚེམ་བུ་ཙམ་ཡང་མཆོད་པའི་རྟེན་ཡིན་པའི་ཆ་ནས་བྱིན་རླབས་ཆེ་བ་དང་།སྐུ་གསུང་ཐུགས་རྟེན་དངོས་སུ་མི་བཞུགས་ན་ཕྱོགས་བཅུའི་སངས་རྒྱས་ལ་དམིགས་ཏེ་མཆོད་པ་ཕུལ་ན་ཆོག་པ་རེད།སྐུ་དེ་ཡང་སངས་རྒྱས་དངོས་ཀྱི་འདུ་ཤེས་བཞག་ན་མིག་གིས་ལན་རེ་མཐོང་བ་ཙམ་གྱིས་སངས་རྒྱས་དངོས་ཀྱི་ཞལ་མཐོང་བའི་ཕན་ཡོན་འབྱུང་།བཀའ་འགྱུར་བསྟན་འགྱུར་ལྟ་བུ་ཆོས་དཀོན་མཆོག་དངོས་མིན་ཀྱང་དེ་ལ་མཆོད་བཀུར་བྱས་པས་ཆོས་དཀོན་མཆོག་དངོས་ལ་མཆོད་པའི་ཕན་ཡོན་འཐོབ།དེ་བཞིན་མཆོད་པའི་རྟེན་ལ་ངན་སྨྲས་བྱས་ནའང་སྡིག་པ་དེ་བཞིན་འབྱུང་བ་ཆོས་ཉིད་རེད།དཔེར་ན།ནམ་མཁའ་ན་ཟླ་བ་གཅིག་ལས་མེད་ཀྱང་ས་ཡི་མཚོ་ཇི་སྙེད་ལ་ཟླ་བའི་གཟུགས་བརྙན་དེ་སྙེད་འཆར་བ་ཆོས་ཉིད་ཡིན་པ་ལྟ་བུ་ཡིན།དངོས་སུ་མཆོད་པའི་ཡུལ་གཅིག་ལས་མེད་ཀྱང་ཤེས་བྱ་ལ་སྲིད་པའི་ཚོགས་ཞིང་གྲངས་མེད་ལ་མཆོད་སྙམ་པའི་འདུ་ཤེས་བཟུང་ན་དེ་སྙེད་ཀྱི་མཆོད་པའི་ཕན་ཡོན་འཐོབ་པ་དང་།བསམ་པ་ཇི་ལྟར་རྒྱ་ཆེ་ན་ཕན་ཡོན་དེ་ལྟར་འབྱུང་བ་སྟོན་པས་མདོ་ལས་གསུངས་ཡོད།མཆོད་པ་གྲངས་མང་བོ་ལ་མི་ལྟོས་པར་སྦྱོར་དངོས་མཇུག་གསུམ་ཚང་བ་གནད་ཆེ་ཞིང་དེ་ཡང་རང་གིས་ལག་བསྟར་ནས་འབུལ་བ་གལ་ཆེ།ངན་སེམས་དང་འགྲན་སེམས་ཀྱིས་མ་བསླད་པར་སྙན་གྲགས་ལ་མི་རེ་བ།དྲི་ངན་བྲོ་ཞིང་ཚེར་མའི་རིགས་དང་དུག་གི་མེ་ཏོག་ལྟ་བུ་མི་རུང་།འཇིག་རྟེན་གྱི་ཁམས་ན་མཆོད་པ་བཤམས་པ་ཇི་སྙེད་ལ་ཡི་རང་བྱས་ན་ཚེགས་ཆུང་ངུས་ཚད་མེད་པའི་མཆོད་པ་རྒྱ་ཆེན་པོ་འགྲུབ།དངོས་སུ་འབུལ་རྒྱུ་ཡོད་མེད་གང་བྱས་ཀྱང་ཡིད་ཀྱིས་སྤྲུལ་བའི་མཆོད་པ་འཇིག་རྟེན་གྱི་ཁམས་གང་བ་དགོས་ཤིང་དེ་ལ་དགའ་བཞིན་སྤྲོ་བཞིན་འཇུག་པ་གལ་ཆེ།དཀོན་མཆོག་སྤྲིན་ལས།བདག་པོས་མ་བཟུང་བའི་མེ་ཏོག་དང་འབྲས་བུ་དང་ཤིང་དང་རིན་པོ་ཆེ་ལ་སོགས་པ་རྣམས་དབུལ་བར་བྱའོ་ཞེས་གསུངས།སྡུག་བསྔལ་གྱི་སྡུག་བསྔལ་འཛིན་པའི་བློ་དུད་འགྲོ་ལའང་ཡོད་པས་འཁོར་བའི་ཕུན་ཚོགས་ལ་སྲེད་པའི་སྲེད་པ་འགོག་པའི་ཆེད་དུ་ཟག་བཅས་ཐམས་ཅད་སྡུག་བསྔལ་བར་སྒོམ་པ་དང་།ལས་ཉོན་གྱི་གཞན་དབང་ཅན་ཡིན་པ་ཤེས་དགོས།དཔེར་ན།རྒྱལ་སྲིད་དཔལ་འབྱོར་ལྟ་བུར་མཚོན་ན།དར་བའི་མཐའ་མ་རྒུད་པ།སྐྱེ་མཐའ་འཆི་བ།འགྲོགས་པའི་མཐའ་འབྲལ་བ།བསགས་པའི་མཐའ་འཛད་པ་སྟེ་འཁོར་བའི་ཕུན་ཚོགས་མཐའ་བཞིས་མ་བསྡུས་པ་གཏན་ནས་མི་སྲིད་པ་ང་ཚོས་དངོས་སུ་དཔྱད་པ་བཏང་ན་ཤེས་པ་ཡིན།དུས་ཆེན་བཞི་དང་ཉ་སྟོང་བརྒྱད་ལ་རང་གིས་ནུས་པ་དང་བསྟུན་པའི་མཆོད་པ་བཟང་བོ་རེ་བྱ་བ་ལམ་རིམ་ལས་གསུངས།རང་གི་བླ་མ་དང་ཕ་མ་ལྟ་བུ་གཤེགས་པའི་དུས་ཚིགས་ལ་དགེ་སྒྲུབ་བྱས་ན་དགེ་རྩ་རྒྱ་ཆེན་པོ་རེད།ལམ་ཡིན་ན་མཆོད་པ་ཡིན་པས་ཁྱབ་སྟེ་མགོ་བཤེས་གཉེན་བསྟེན་ཚུལ་ནས་མི་སློབ་ཟུང་འཇུག་བར་གྱི་ལམ་མཐའ་དག་མཆོད་པ་ཡིན་པར་མ་ཟད་སྒྲུབ་པའི་མཆོད་པ་ཡིན་ཏེ།སངས་རྒྱས་ཀྱི་བཀའ་བཞིན་བསྒྲུབས་ན་ཐུགས་མཉེས་པས་ལམ་ཡིན་ན་མཆོད་པ་ཡིན་པས་ཁྱབ་བ་ཡིན།རང་གི་སྐྱེ་བ་ཕྱི་མར་དལ་འབྱོར་ཚང་བའི་མི་ལུས་འཐོབ་པའི་ཆེད་དུ་མཆོད་པ་འབུལ་བ་ནི་ཀུན་འབྱུང་རང་འགའ་བར་གྱུར་བའི་དགེ་བ་སྟེ་འདོད་ཆགས་ཀྱི་དབང་གིས་འཁོར་བའི་ཕུན་ཚོགས་ལ་སྲེད་པས་བསྐྱེད་པའི་དགེ་བ་ཡིན་ཡང་གནས་སྐབས་ཀྱི་མཆོད་པ་ཡིན།འགྲོ་བ་མང་བོ་མངོན་མཐོའི་ལྷ་མིའི་རྟེན་བཟང་འཐོབ་པའི་ཆེད་དུ་དགེ་འདུན་ལ་བསྙེན་བཀུར་དང་དཀོན་མཆོག་ལ་མཆོད་པ་འབུལ་བ་གནས་སྐབས་ཀྱི་དབང་དུ་བཏང་བའི་འགྲོ་ལ་ཕན་བྱེད་དང་རྒྱལ་བ་དགྱེས་བྱེད་རེད།སེམས་ཅན་ཟེར་དུས་གྲངས་མེད་ཅིག་ལ་གོ་མི་དགོས་ཤིང་རང་ལས་གཞན་པའི་མི་གཅིག་ཀྱང་འགྲོ་བ་ཡིན།སེམས་ཅན་ལ་ཕན་པ་ཕྲ་མོ་ཞིག་བསྒྲུབས་ནའང་རྒྱལ་བ་སྲས་བཅས་ཐུགས་དགྱེས་པ་དང་།སེམས་ཅན་གཅིག་ལ་ཟན་ཆངས་གཅིག་སྦྱིན་པ་དང་སྨན་ཐུམ་གཅིག་སྦྱིན་པའང་རྒྱལ་བ་དགྱེས་པའི་མཆོད་པ་ཡིན་ཡང་།དགེ་བ་དེའི་ངོ་བོའི་སྒོ་ནས་སྲིད་པའི་འཁོར་ལོ་སྐོར་བྱེད་ཡིན་པས་མཐར་ཐུག་གི་རྒྱལ་བ་དགྱེས་བྱེད་དུ་མི་འགྱུར་བའི་ཞིབ་ཆ་འབྱེད་དགོས།དགེ་མི་དགེ་དང་རྣམ་སྨིན་ཡིད་དུ་འོང་མི་འོང་སྟོབས་ཆེ་ཆུང་སོགས་ཚང་མ་ཀུན་སློང་གིས་སྐྱེད་པས།ཉོན་མོངས་དུག་གསུམ་གྱིས་ཀུན་ནས་བསླངས་ཚད་མི་དགེ་བ་ཡིན་པའི་ངེས་པ་མེད།དཔེར་ན།དེད་དཔོན་སྙིང་རྗེ་ཆེན་པོས་མི་ནག་མདུང་ཐུང་ཅན་བསྒྲལ་པས་བསྐལ་ཆེན་བཞི་ཁྲིའི་ཚོགས་རྫོགས་པ་ལྟ་བུ་རེད།དེ་ལྟར་མཆོད་པ་ཕུལ་བའི་ཕན་ཡོན་ཡང་།སྙིང་རྗེ་ཆེན་པོ་པད་དཀར་ལས།ཀུན་དགའ་བོ།གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་གཏོར་ན།ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་པུ་མྱ་ངན་ལས་འདས་པ་ཡིན་ཏེ།ཐ་མ་མྱ་ངན་ལས་འདའ་བར་ང་སྨྲའོ་ཞེས་གསུངས།།

   ༣སྡིག་པ་བཤགས་པའི་ཡན་ལག་ནི།རང་གིས་ཐོག་མེད་ནས་བསགས་པའི་སྡིག་པ་དང་གཞན་ལ་སྒྲུབ་ཏུ་བཅུག་པ།རང་གཞན་གྱིས་བགྱིས་པ་ལ་རྗེས་སུ་ཡི་རང་བྱས་པ་ཡོད་ཚད་བཤག་བྱ་ཡིན།ང་རང་ལྟ་བུར་མཚོན་ན།སྤྱིར་བསྟན་པ་ཡོངས་རྫོགས་ལ་བག་ཆགས་དང་སྨོན་ལམ་གྱིས་ཀྱང་འབྲེལ་འཇོག་དགོས་མོད་ངེས་པར་གལ་ཆེ་བ་སྡིག་སྒྲིབ་སྦྱོང་བ་ཡིན།སྡིག་སྒྲིབ་མ་སྦྱངས་པར་ཤི་ན་འགྲོ་ས་དམྱལ་བ་ལས་མེད་པ་རང་གི་མྱོང་ཐོག་ནས་གྲུབ་འདུག་པས་ངན་སོང་དུ་སྐྱེ་མི་དགོས་པ་ཞིག་འཁྱོངས་ན་གྲུབ་སོང་བ་རེད།གལ་ཏེ་སྡིག་པ་སྤོང་མ་ཐུབ་ཀྱང་བདག་གིས་མྱུར་དུ་སྤོང་ནུས་པར་ཤོག་ཅིག་ཅེས་སྨོན་ལམ་འདེབས་པ་དང་།ལོ་དང་ཟླ་བ་ཉིན་ཞག་འདིའི་བར་དུ་སྡིག་པ་མི་བྱེད་པར་སྨོན་ལམ་ཚུན་ཆད་ཀྱིས་སྦྱངས་ན་ཕྱིན་ཆད་སྤོང་ཐུབ་པ་ཞིག་བྱུང་བ་ཡིན།དེས་ན་ཕྱིན་ཆད་སྡོམ་པར་ཁས་བླངས་ཀྱང་ཕྱིས་སུ་སྡོམ་མ་ཐུབ་ན་ཉེས་པ་མི་འདག་པའི་སྟེང་དུ་དཀོན་མཆོག་ལ་རྫུན་སྨྲས་པའི་ཉེས་པ་འབྱུང་བར་འདུལ་བ་རྒྱ་ཆེར་འགྲེལ་ལས་གསུངས་ཡོད་ཀྱང་།ཡོངས་འཛིན་ཡེ་ཤེས་རྒྱལ་མཚན་གྱིས་བཤགས་པའི་སྐབས་སུ་སྡོམ་སེམས་བསྟེན་དགོས་པ་སངས་རྒྱས་ཀྱི་བཅས་དབང་ཡིན་པས་ཕྱིན་ཆད་སྡོམ་མ་ཐུབ་ཀྱང་རྫུན་དུ་མི་འགྱུར་བར་མ་ཟད་སྡིག་ལྟུང་འདག་པའི་ཐབས་སུ་འགྲོ་བ་དང་།ལྟུང་བ་ཐུན་མོང་བ་བྱིན་གྱིས་བརླབས་པས་ལས་ལ་མི་སྒྲིབ་པ་དང་འདྲ།དཔེར་ན།མི་ཞིག་གིས་ཇ་འདྲེན་པའི་ཚེ་སྐབས་ཐོག་དེར་ཇ་མི་འཐུང་ཞེས་སྨྲས་ཀྱང་སང་ཉིན་འཐུང་ཡང་རྫུན་དུ་མི་འགྲོ་བ་ལྟ་བུ་རེད་ཅེས་གསུངས།ང་ཚོས་ཐོག་མེད་ནས་སྡིག་པ་མཐའ་མེད་པ་བསགས་པས་ཟླ་གཅིག་དང་ཉིན་ཞག་འགའ་ལ་བཤགས་པས་འདག་མི་ཐུབ་སྙམ་པ་ལས་འབྲས་བསམ་མ་ཤེས་པ་ཡིན།དེར་མ་ཟད་གཉེན་པོ་ལ་ཡིད་མི་ཆེས་པའི་སྐུར་འདེབས་ཀྱི་ཉེས་པ་འབྱུང་།སྡིག་པ་ཚབས་ཆེ་ཡང་གཉེན་པོ་སྟོབས་བཞི་ཚང་ངེས་ཀྱི་བཤགས་པ་ལན་གཅིག་གིས་འདག་ཐུབ་པ་རེད།དཔེར་ན།ཐང་ཆེན་པོ་ཞིག་ཏུ་བྱ་སྟོང་ཕྲག་འགའ་བབས་ཡོད་ན།འུར་རྡོ་གཅིག་འཕངས་པས་སྤུར་ཐུབ་པ་དང་།ལོ་སྟོང་དང་ཁྲི་ལ་མུན་པ་འཐིབས་པའི་ཁང་བ་ཞིག་ཏུ་སྒྲོན་མེ་གཅིག་བཀར་བས་མུན་པ་ལྷན་གཅིག་སངས་འགྲོ་བ་ལྟ་བུ་ཡིན།བཤགས་པའི་སྐབས་སྡིག་པ་དག་སོང་སྙམ་པའི་འདུ་ཤེས་བསྟེན་ན་སྡིག་པ་འདག་ངེས་པ་སྟོན་པས་གསུངས་པ་རེད།ཉེས་ལྟུང་སྦྱོང་བ་ཡང་སྟོན་པས་གསུངས་པ་དང་།བཤགས་པས་འདག་པའང་སྟོན་པས་གསུངས་པས་ཡིད་ཆེས་བྱེད་ན་གཉིས་ཀ་ལ་བྱེད་དགོས།སངས་རྒྱས་ཀྱི་མཚན་ལན་རེ་བརྗོད་ན་བསྐལ་བ་སྟོང་ལ་བསགས་པའི་སྡིག་པ་འདག་པར་མདོ་ལས་གསུངས་ཡོད།དེ་ལ་དྲང་དོན་དང་ངེས་དོན་གྱི་ཁྱད་མི་འབྱེད་པར་སྒྲ་ཇི་བཞིན་དུ་ཁས་ལེན་དགོས་ཤིང་ཁས་མ་བླངས་ན་སྟོན་པ་ལ་ཡིད་མ་ཆེས་པ་རེད།རྗེ་བླ་མ་ཙོང་ཁ་བས།སྒོ་གསུམ་སྡིག་ལྟུང་དྲི་མས་སྦགས་པ་འདིས།།ལྷག་པར་ལས་སྒྲིབ་སྦྱོང་བ་གནད་ཆེ་བས།།རྒྱུན་དུ་སྟོབས་བཞི་ཚང་བར་སྟེན་པ་གཅེས།།ཞེས་ང་ཚོའི་ལུས་ངག་ཡིད་གསུམ་པོ་སྡིག་ལྟུང་གི་དྲི་མས་སྦགས་པས་དགེ་བ་གཞན་སྒྲུབ་པ་ལས་ལྷག་པར་ལས་སྒྲིབ་སྦྱོང་བ་གནད་ཆེ་ཞིང་ཉིན་རེ་བཞིན་གཉེན་པོ་སྟོབས་བཞི་ཚང་ངེས་ཀྱི་བཤགས་པ་རེ་གལ་ཆེ་གསུངས།ལྟུང་བས་ལས་ལ་བསྒྲིབས་ཤིང་།སྡིག་པས་རྣམ་སྨིན་མྱོང་བས་སྔ་མ་ཕྱིར་བཅོས་དང་།ཕྱི་མ་སྟོབས་བཞིས་སྦྱང་དགོས།ང་ཚོ་དགེ་ལྡན་པས་ལྟུང་བཤགས་དང་འབྲེལ་བའི་ཕྱག་འཚལ་བ་རྗེའི་བླ་མའི་རྣམ་ཐར་ལྟར་ཕྱག་ལེན་དུ་མཛད་པ་ཡིན།སྟོབས་བཞི་ཚང་ངེས་ཀྱིས་རྡོ་རྗེ་སེམས་དཔའི་བསྒོམ་བཟླས་དང་འབྲེལ་བའི་ཡིག་བརྒྱ་འབུམ་ཕྲག་བཟླས་པས་ཚད་མེད་ཀྱི་ལས་ཀྱང་འདག་ཐུབ།སངས་རྒྱས་ཀྱི་མཚན་གང་བརྗོད་ན་ཁྱད་མེད་ཀྱང་རང་རང་གི་ཐུགས་བསྐྱེད་ཀྱི་དབང་གིས་ངན་སོང་སྦྱོང་བ་ལ་མཆོག་ཏུ་བསྔགས་པའི་གཟུངས་སྡེ་ལྔ་སྟེ།རྣམ་རྒྱལ་མའི་གཟུངས་དང་།མི་འཁྲུགས་པའི་གཟུངས།དོན་ཡོད་ཞགས་པའི་གཟུངས།ཀུན་རིག་གི་རྩ་སྔགས།གཙུག་ཏོར་དྲི་མེད་ཀྱི་གཟུངས་བཅས་བརྗོད་པ་ཁྱད་པར་དུ་གལ་ཆེ་བ་ཡིན།གཟུངས་སྡེ་ལྔ་ལན་བདུན་དང་ཉེར་གཅིག་ཙམ་ས་ཆུ་འབྲུ་ལ་བརྗོད་པ་གཤིན་པོའི་ལུས་སྟེང་དུ་གཏོར་ན་ཚེ་འདས་ངན་སོང་དུ་སྐྱེས་ཟིན་པ་ཞིག་ཡིན་ཡང་ལྷ་དང་མིའི་སྐྱེ་བ་ལེན་ངེས་པར་རྒྱུད་ལས་གསུངས་ཡོད།མ་ཤི་ཚུན་ཆད་དུ་སྟོབས་བཞིའི་བཤགས་བསྡམས་ཀྱིས་དག་པར་མ་བྱས་ན་ཕྱི་མར་ངན་འགྲོའི་སྡུག་བསྔལ་བཟོད་གླགས་མེད་པ་མྱོང་ངེས་པས།སྔར་བྱས་ཀྱི་སྡིག་པ་ལ་དུག་ཁོང་དུ་སོང་བ་ལྟ་བུའི་འགྱོད་སེམས་དྲག་པོ་སྐྱེས་པ་རྣམ་པར་སུན་འབྱིན་པའི་སྟོབས་ཀྱིས་སྡིག་པའི་འཕེལ་ཁ་གཅོད་པར་བྱེད།གཟུངས་སྔགས་ཟབ་མོ་བཟླ་བ་དང་།མཆོད་པ་འབུལ་བ་སོགས་གཉེན་པོ་ཀུན་ཏུ་སྤྱོད་པའི་སྟོབས་ཀྱིས་སྡིག་པ་ཉམས་དམའ་བར་བྱེད།ཕྱིན་ཆད་སྲོག་ལ་བབས་ཀྱང་སྡིག་ལྟུང་ལ་མི་འཇུག་སྙམ་པའི་སྡོམ་སེམས་ཡང་ཡང་བསྟེན་པ་ཉེས་པ་ལས་སླར་ལྡོག་པའི་སྟོབས་ཀྱིས་སྡིག་པ་རྩ་བ་ནས་འདོན་པར་བྱེད།ཉེས་པ་དེ་དག་ལས་སྐྱོབ་པའི་ནུས་པ་དཀོན་མཆོག་ལ་ཡོད་པར་ཡིད་ཆེས་པའི་རྟེན་གྱི་སྟོབས་ཀྱིས་སྡིག་པའི་འབྲས་བུ་སྡུག་བསྔལ་ལས་སྐྱོབ་པར་བྱེད།ལམ་རིམ་ལས།ངན་འགྲོའི་སྡུག་བསྔལ་ཆེན་པོར་སྐྱེ་བའི་རྒྱུ་རྣམས་སྡུག་བསྔལ་ཆུང་བར་སྐྱེ་བའི་རྒྱུར་འགྱུར་བའམ།ངན་འགྲོར་སྐྱེས་ཀྱང་དེའི་སྡུག་བསྔལ་མི་མྱོང་བའམ་ད་ལྟའི་རྟེན་ལ་མགོ་བོ་ན་བ་ཙམ་གྱིས་དག་ནས་འགྲོ་བ་དང་།དེ་བཞིན་དུ་རྒྱུན་རིང་བོར་མྱོང་དགོས་པ་རྣམས་ཡུན་ཐུང་ངུའམ་གཏན་མྱོང་མི་དགོས་པར་འགྱུར་ཏེ།དེ་ཡང་སྦྱོང་མཁན་གྱི་སྟོབས་ཆེ་ཆུང་དང་གཉེན་པོ་སྟོབས་བཞི་རྫོགས་མ་རྫོགས་དང་ཤུགས་དྲག་མིན་དང་རྒྱུན་རིང་ཐུང་ལ་རག་ལས་པར་གསུངས་སོ།།

  ༤རྗེས་སུ་ཡི་རང་བའི་ཡན་ལག་ནི།ཞེ་ཐག་པ་ནས་ཕྲག་དོག་མེད་པར་གཞན་གྱིས་དགེ་བ་བྱེད་པ་མཐོང་ཐོས་དྲན་གསུམ་ལ་དབུལ་བོས་གཏེར་རྙེད་པ་ལྟ་བུས་དགའ་བ་སྒོམ་པ་རྗེས་སུ་ཡི་རང་ཡིན།རྗེས་སུ་ཡི་རང་བྱེད་པའི་ཡུལ་ལ་ཕྱོགས་བཅུའི་སངས་རྒྱས་དང་།བྱང་ཆུབ་སེམས་དཔའ།རང་རྒྱལ།ཉན་ཐོས།ལམ་དུ་མ་ཞུགས་པའི་འགྲོ་བ་ལྔའི་ནང་དུ་མ་འདུས་པ་མེད།སངས་རྒྱས་ཀྱིས་དང་བོ་ཐུགས་བསྐྱེད་པ་དང་།བར་དུ་ཚོགས་བསགས་པ།མཐར་སངས་རྒྱས་ནས་འགྲོ་བ་སེམས་ཅན་གྱི་དོན་མཛད་པ་མཐའ་དག་བསམས་ཏེ་ཡི་རང་བྱས་ན་ཕན་པ་རྒྱ་ཆེན་པོ་ཡོད།དགེ་བ་སྒྲུབ་ཤེས་ན་དཀའ་ཚེགས་མྱོང་མི་དགོས་པར་ཉལ་ནས་བསྡད་ན་ཆོག་པ་རེད།གུང་ཐང་འཇམ་པའི་དབྱངས་བསྟན་པའི་སྒྲོན་མེས།ཉལ་ནས་དགེ་ཆེན་ཞིག་བྱེད་ན།།གཞན་ལ་ཡི་རང་རང་བསྒོམ་དགོས།།ཞེས་གསུངས།ཞེ་ཐག་པ་ནས་ཕྲག་དོག་མེད་པར་ཡི་རང་བྱས་ན་དགེ་བ་རླབས་ཆེན་པོ་འཐོབ་པ་ཡིན།མི་ཞིག་གིས་མ་ཎི་དུང་ཕྱུར་བརྒྱ་བཏོན་པ་ཡིན་ན་རང་གིས་སྐད་ཅིག་མ་གཅིག་ལ་ཡི་རང་བྱས་པས་རྒྱུད་ཚོད་མཉམ་པ་ལ་ཕན་ཡོན་མཉམ་པ་དང་།སྟོན་པའི་རྣམ་ཐར་དང་ས་ཐོབ་ཀྱི་སེམས་དཔའི་དགེ་བ་ལ་ཡི་རང་བྱས་པས་ཕན་ཡོན་མཉམ་པ་མི་འཐོབ་ཀྱང་དགེ་རྩ་རླབས་ཆེན་པོ་རེད།རྟོགས་པ་གོང་མ་ཞིག་གིས་དམའ་བ་ལ་ཡི་རང་བྱས་ན་དེ་ལས་ལྷག་གི་ཕན་ཡོན་འབྱུང་བ་ཡིན།དེ་བས་རྗེ་བླ་མ་ཙོང་ཁ་བས།འབད་པ་ཆུང་ངུས་རླབས་ཆེན་ཚོགས་སྡུད་ལ།།དགེ་ལ་རྗེས་སུ་ཡི་རང་མཆོག་ཏུ་གསུངས།།ཞེས་འབད་པ་ཆུང་ཆུང་ཞིག་གིས་ཚོགས་རླབས་པོ་ཆེ་སྡུད་ཐུབ་པ་དགེ་བ་ལ་རྗེས་སུ་ཡི་རང་བྱེད་པ་ཡིན་གསུངས་པ་རེད།རང་གི་དགེ་བ་ལ་ཡང་རློམ་སེམས་མེད་པར་ཡི་རང་བྱས་ན་གོང་ནས་གོང་དུ་འཕེལ་བས་གལ་ཆེ།སྔོན་བྱས་ཀྱི་དགེ་བ་ལ་འགྱོད་པ་བསྐྱེད་པ་དང་།རང་དོན་དུ་རྣམ་སྨིན་ལ་རེ་བ།རང་གི་དགེ་བ་གཞན་ལ་མི་བསྔོ་བར་ང་རྒྱལ་དང་རློམ་སེམས་བྱེད་པ་དེ་རྣམས་དགེ་བ་ཆུད་འཛའ་བའི་རྒྱུ་ཡིན།གཞན་གྱིས་རང་ལ་མི་དགའ་བའི་དགྲ་ཞིག་བསད་པ་ཡིན་ན་དེ་ལ་ཡི་རང་བྱས་པས་སྡིག་པ་དངོས་གཞི་མི་འབྱུང་ཡང་ཉེས་པ་ཆེན་པོ་རེད།འདུལ་བ་ལས་ཕམ་པའི་ཆར་གཏོགས་ཀྱི་སྤོམ་པོ་ཞེས་གསུངས་ཡོད།ཁྱད་པར་དགྲ་ལྟ་བུའི་དགེ་བ་ལ་ཡི་རང་མི་འབྱུང་བའི་ཁར་ཕྲག་དོག་འབྱུང་ཉེན་ཆེ་བས།དེ་ལ་དམིགས་སུ་བཀར་ནས་བསྒོམ་དགོས།གཞན་གྱིས་མ་ཎི་འདོན་པ་དང་ཕྱག་སྐོར་བྱེད་པ་རྐྱང་རྐྱང་ཙམ་ལ་ཡི་རང་བྱེད་པ་མིན་པར་རང་གི་རྩ་བའི་བླ་མ་དང་།སྐྱེས་བུ་དམ་པའི་རྣམ་ཐར་ལ་མཇལ་ཏེ་ཡི་རང་བྱས་ན་ཕན་ཡོན་ཆེ་ཞིང་རང་ལའང་མན་ངག་མང་བོ་ལེན་རྒྱུ་ཡོད་པས་གལ་ཆེ་བ་རེད།རྒྱལ་བོ་གསལ་རྒྱལ་ལ་གདམས་པའི་མདོ་ལས།རྒྱལ་བོ་ཆེན་པོ་ཁྱོད་བྱ་བ་དང་བྱེད་པ་མང་བས་རྣམ་པ་ཐམས་ཅད་དུ་སྦྱིན་པ་ནས་ཤེས་རབ་ཀྱི་ཕར་ཕྱིན་གྱི་བར་ལ་བསླབ་མི་ནུས་པས།འགྲོ་འཆག་ཉལ་འདུག་གི་སྤྱོད་ལམ་ཐམས་ཅད་དུ་ཕྱོགས་བཅུ་དུས་གསུམ་གྱི་འགྲོ་བ་ལྔའི་དགེ་བ་ལ་ཡི་རང་དང་དེའི་དགེ་བ་རྒྱལ་བ་སྲས་བཅས་ལ་ཕུལ།དེ་ཐམས་ཅད་བླ་མེད་བྱང་ཆུབ་ཀྱི་རྒྱུར་བསྔོས་ན་སེམས་སྐད་ཅིག་མ་རེ་རེ་ལའང་ལྷ་མིའི་རྒྱལ་བོ་དང་མཐར་ཐུག་སངས་རྒྱས་ངེས་པར་འཐོབ་པར་འགྱུར་རོ་ཞེས་གསུངས།དམ་པའི་ཆོས་ཞེས་པ་བསམ་པའི་སྟེང་ནས་བྱ་དགོས་པས་ཉིན་རེར་སྦྱོར་བའི་ཆོས་དྲུག་ཙམ་གྱི་བཤར་སྒོམ་མ་ཆད་ན་ཆོས་ཀྱི་སྲོག་ཤིང་ལོན་ཡོང་བ་ཡིན།མདོར་ན་རང་གཞན་གྱི་དགེ་རྩ་ཆེ་ཆུང་མཐོང་ཐོས་དྲན་པ་མཐའ་དག་ལ་ལུས་ཀྱིས་ཡི་རང་བའི་ཐལ་མོ་སྦྱོར།ངག་གིས་བསྔགས་པ་བརྗོད།སེམས་ཀྱིས་དགའ་བ་བསྒོམས་ཏེ་བླ་མ་དཀོན་མཆོག་གིས་འབྲས་བུ་ཁྱད་པར་ཅན་འགྲུབ་པར་བྱིན་གྱིས་རློབས་ཤིག་སྙམ་དུ་གསོལ་འདེབས་བྱས་ན་ལྷག་ཏུ་བཟང་།ངན་སེམས་ཁོག་ཏུ་བཅངས་ནས་མཐོ་བ་ལ་ཕྲག་དོག་དང་།མཉམ་པ་ལ་འགྲན་སེམས།དམའ་བ་ལ་ཁྱད་གསོད་སོགས་ཆགས་སྡང་རྨོངས་གསུམ་གྱི་རྐྱལ་བ་ལྟ་བུ་ཞིག་ཡིན་ན།རང་གིས་ལས་གང་བསགས་སྐྱེ་བ་ཕྱི་མ་རྣམས་སུ་རང་གིས་འཁྱེར་ནས་འགྲོ་རྒྱུ་ལས་གཞན་སུ་ཞིག་གིས་ཀྱང་སྐྱོབ་མི་ཐུབ།དེ་བས་བྱ་བ་བྱེད་པ་མང་བའི་རིགས་ལ་ཚེགས་ཆུང་ངུས་དགེ་བ་རླབས་ཆེན་གསོག་ནུས་པའི་ཡི་རང་གི་ཉམས་ལེན་ཤིན་ཏུ་གལ་ཆེ་བ་རེད་ཅེས་གསུངས།།

 ༥ཆོས་འཁོར་བསྐོར་བར་བསྐུལ་བའི་ཡན་ལག་ནི།འདུལ་བ་ལས།མ་གསོལ་བར་མི་བྱའོ།།ཞེས་གསུངས་པ་ལྟར།ནམ་མཁའི་མཐའ་ཀླས་པའི་འགྲོ་བ་འདི་ཐམས་ཅད་སྡུག་བསྔལ་མི་འདོད་ཅིང་བདེ་བ་འདོད་པ་ཤ་སྟག་ཡིན།གནས་སྐབས་སུ་བདེ་བ་དང་ཕྱི་མར་ཕན་པ་དམ་པའི་ཆོས་ཁོ་ན་ཡིན་ཞིང་།ཆོས་གང་ལས་འབྱུང་བ་ནི་ཆོས་སྟོན་པ་བོ་ཉིད་ལ་རག་ལས་ཕྱིར།ཕྱོགས་བཅུའི་འཇིག་རྟེན་གྱི་ཁམས་ན་བྱང་ཆུབ་ཏུ་རྣམ་པར་སངས་རྒྱས་ཏེ་མ་ཆགས་ཤིང་ཐོགས་པ་མེད་པའི་མཁྱེན་པ་བརྙེས་ནས་རིང་དུ་མ་ལོན་པའི་སངས་རྒྱས་དང་།ཕྱོགས་བཅུའི་རྒྱལ་བ་རྣམས་ལ་ཡིད་ཀྱིས་རང་ཉིད་གསེར་གྱི་འཁོར་ལོ་རྩིབས་སྟོང་དང་ལྡན་པ་ཐོགས་པའི་ཚངས་པ་ཆེན་པོར་མོས་ཏེ་ལུས་ཀྱང་དེ་སྙེད་དུ་སྤྲུལ་ནས་མཁའ་ཁྱབ་ཀྱི་འགྲོ་བ་རྣམས་ལ་ཕན་པ་དང་བདེ་བ་བླ་ན་མེད་པ་འབྱུང་བའི་དགེ་བའི་རྩ་བ་བསྐྱེད་པ་དང་།སྤེལ་བ།ཡུན་དུ་གནས་པའི་ཕྱིར་ཐེག་པ་གསུམ་གྱི་ཆོས་ཀྱི་འཁོར་ལོ་རྒྱུན་མི་འཆད་དུ་བསྐོར་བར་གསོལ་བ་བཏབ་པས།ཕྱོགས་བཅུའི་ཞིང་ན་བཞུགས་པའི་རྒྱལ་བ་རྣམས་ཀྱིས་ཐུགས་དགྱེས་བཞིན་དུ་ཞལ་གྱིས་བཞེས་ནས་སྐད་ཅིག་དེ་ཉིད་ལ་ཞིང་ཁམས་རབ་འབྱམས་སུ་གདུལ་བྱའི་རྒྱུད་ཚོད་དང་འཚམ་པའི་དམ་པའི་ཆོས་ཀྱི་ཆར་བ་ཕབ་པས།སེམས་ཅན་འཁོར་དུ་མ་བསྡུས་པ་བསྡུས།བསྡུས་པ་གྲོལ།གྲོལ་བ་ལམ་མཐར་ཕྱིན་པར་མཛད་སོང་སྙམ་དུ་བསམས་ན།ཚེ་རབས་ཐམས་ཅད་དུ་རྒྱལ་བས་རྗེས་སུ་འཛིན་པ་དང་།དམ་པའི་ཆོས་དང་མཇལ་བའི་རྒྱུ་བསམ་གྱིས་མི་ཁྱབ་པ་ཡིན་ནོ།།

 ༦གསོལ་བ་འདེབས་པའི་ཡན་ལག་ནི།ཕྱོགས་བཅུའི་ཞིང་རབ་འབྱམས་ན་མྱ་ངན་ལས་འདའ་བའི་ཚུལ་སྟོན་པར་བཞེད་པའི་སངས་རྒྱས་རྣམས་ལ།རིན་པོ་ཆེའི་སེང་ཁྲི་སྣ་ཚོགས་རྡོ་རྗེས་མཚན་པ་རེ་ཞབས་འོག་ཏུ་ཕུལ་ནས།བདག་ཅག་འགྲོ་བ་རྣམས་ལ་ཕན་པ་དང་བདེ་བ་རྒྱ་ཆེན་པོ་བསྐྱེད་པའི་ཕྱིར་དུ།ཞིང་ཁམས་རྒྱ་མཚོའི་རྡུལ་གྱི་གྲངས་དང་མཉམ་པའི་བསྐལ་བར་མྱ་ངན་ལས་མི་འདའ་བར་བདག་ཅག་གི་མགོན་སྐྱབས་དཔུང་གཉེན་དུ་བཞུགས་པར་གསོལ་བ་དྲག་ཏུ་བཏབ་པས།དེ་ལྟར་སངས་རྒྱས་དང་འཁོར་ཉན་ཐོས་རྣམས་ཀྱིས་ཅང་མི་གསུངས་པའི་ཚུལ་གྱིས་ཞལ་གྱིས་བཞེས་སོང་སྙམ་པའི་མོས་པ་བྱའོ།།བླ་མཆོད་ལས།རྡོ་རྗེའི་སྐུ་ལ་སྐྱེ་འཆི་མི་མངའ་ཡང་།།ཟུང་འཇུག་དབང་གི་རྒྱལ་བོའི་ཟ་མ་ཏོག།བདག་ཅག་མོས་པ་ཇི་བཞིན་སྲིད་མཐའི་བར།།མྱ་ངན་མི་འདའ་རྟག་པར་བཞུགས་སུ་གསོལ།།ཞེས་གསུངས་པ་ལྟར་རེད།དོན་བསམ་ཞིང་ངག་ནས་ཚིག་འདོན་པ་དེ་ལག་ཏུ་ལེན་ཚུལ་ཡིན་ནོ།།

 ༧བསྔོ་བའི་ཡན་ལག་ནི།དགེ་རྩ་རྫོགས་བྱང་དུ་བསྔོ་བའི་ཆ་ནས་བཞག་པའི་འདུན་པ་དང་སེམས་པ་ཅི་རིགས་གཙོ་འཁོར་དང་བཅས་པ་བསྔོ་བའི་མཚན་ཉིད་དུ་བྱ་ཞིང་གཙོ་བོ་འདུན་པ་ལ་གཟུང་དགོས།དགེ་བ་དེའི་མཐུ་ལས་འབྲས་བུ་དེ་འཐོབ་པར་འདོད་པ་བསྔོ་བ་དང་།འབྲས་བུ་དེ་འཐོབ་པར་འདོད་པ་ཙམ་ནི་སྨོན་ལམ་ཡིན།དཔེར་ན།སྦྱིན་བདག་ཅིག་གིས་དགེ་འདུན་ལ་བསྙེན་བཀུར་ཞུས་པའི་དགེ་བ་དེ་ལ་བརྟེན་ནས་རྫོགས་པའི་བྱང་ཆུབ་དང་ལྷ་མིའི་བདེ་བ་འཐོབ་པར་གྱུར་ཅིག་སྙམ་པ་བསྔོ་སྨོན་གཉིས་ཀ་ཡིན།བསྔོ་བ་ཡིན་ན་སྨོན་ལམ་གྱིས་ཁྱབ་བ་དང་སྨོན་ལམ་ལ་དེ་ཡིན་པས་མ་ཁྱབ་བ་རེད།ཤེར་མདོ་ལས་ཡོངས་སུ་བསྔོ་བ་བཅུ་གཉིས་དང་།ས་བཅུ་བའི་མདོ་ལས་བསྔོ་བ་འབུམ་ཕྲག་གྲངས་མེད་གསུངས་ཀྱང་དེ་དག་བསྡུས་ན་འཇིག་རྟེན་དང་འཇིག་རྟེན་ལས་འདས་པའི་བསྔོ་བ་གཉིས་སུ་འདུས་ཡོད།བདེ་འགྲོ་མཐོ་རིས་ཙམ་འཐོབ་པའི་ཆེད་དུ་བསྔོ་བ་འཇིག་རྟེན་པའི་བསྔོ་བ་དང་།སངས་རྒྱས་ཀྱི་གོ་འཕང་འཐོབ་པའི་ཆེད་དུ་བསྔོ་བ་འཇིག་རྟེན་ལས་འདས་པའི་བསྔོ་བ་ཡིན།ང་ཚོ་དགེ་ལྡན་པར་སྨོན་ལམ་རྣམ་ལྔ་དང་།རྗེ་བླ་མ་ཙོང་ཁ་བའི་ལྟ་ཁྲིད་དམ་པ་བཞི་ལྡན་གྱི་སྨོན་ལམ་འདི་གནད་ཟབ་པ་ཞིག་ཡིན་པས་སྐྱེས་བུ་དམ་པ་གོང་མ་ཚོས་མཆོད་པ་མཆོད་མེ་ལྟ་བུའི་མཇུག་ཏུ་འདོན་སྲོལ་ཡོད།དགེ་འདིས་མཚོན་ནས་དུས་གསུམ་དང་འབྲེལ་བའི།།བདག་གཞན་དགེ་བའི་རྩ་བ་ཇི་སྙེད་པ།།དེ་དག་ཐམས་ཅད་སྐྱེ་ཞིང་སྐྱེ་བ་རུ།།བྱང་ཆུབ་མཆོག་གི་རྗེས་སུ་མི་འཐུན་པའི།།ཤེས་ཀྱི་ཁེ་འདོད་པ་དང་གྲགས་པ་དང་།།འཁོར་དང་ཉེ་དུ་རྙེད་དང་བཀུར་སྟིའི་རྒྱུར།།སྐད་ཅིག་ཙམ་ཡང་ནམ་ཡང་མི་སྨིན་པར།།བླ་མེད་བྱང་ཆུབ་ཁོ་ནའི་རྒྱུར་གྱུར་ཅིག།ཅེས་དགེ་བ་གང་བསགས་མཐའ་དག་རྙེད་པ་དང་བཀུར་སྟིའི་རྒྱུ་རུ་མ་བསྔོས་པར་བདག་གི་བླ་མེད་བྱང་ཆུབ་ཁོ་ནའི་ཆེད་དུ་བསྔོས་པས་རྩ་ཆེན་པོ་ཡིན་པ་རེད།ཕུན་སུམ་ཚོགས་པ་ཡོད་ཚད་བསྔོ་སྨོན་གྱི་ཡན་ལག་ཏུ་གཟུང་འོས་ཤིང་དགེ་རྩ་སྤེལ་བ་དང་མི་ཟད་པར་བྱེད།རྒྱ་མཚོ་ཆེན་པོ་ལ་ཆུ་ཡི་ཐིགས་པ་གཅིག་དོར་ན་རྒྱ་མཚོ་མ་ཟད་བར་དུ་མི་འཛད་པ་བཞིན།རྫོགས་པའི་བྱང་ཆུབ་ཀྱི་རྒྱུར་བསྔོས་པའི་དགེ་བ་ཕྲ་མོ་ཞིག་ཀྱང་རང་གི་བྱང་ཆུབ་མ་འཐོབ་ཀྱི་བར་མི་འཛད་པས།ཐོག་མའི་ཀུན་སློང་དང་མཐའ་མར་བསྔོ་སྨོན་བྱ་བ་གལ་ཆེ།ཚོགས་བསག་པ་ལ་དབྱེ་སྒོ་མང་ཡང་བཟང་སྤྱོད་ལས་ཡན་ལག་བདུན་དུ་གསུངས་ཡོད།དེ་བསྡུས་ན་བསག་པ།སྦྱང་བ།སྤེལ་བ།མི་ཟད་པའི་སྒོ་བཞིར་འདུ།དེ་ཡང་བསག་སྦྱང་གི་སྒོ་གཉིས་སུ་འདུས་པ་ཡིན།བསླབ་བཏུས་ལས།བདག་དང་གཞན་གྱི་སྡིག་པ་བཤགས་པ་བསོད་ནམས་ཀྱི་ཚོགས་སུ་འགྱུར་རོ་ཞེས་གསུངས་ཡོད།བསླབ་བཏུས་ཀྱི་ཁུངས་བློ་གྲོས་མི་ཟད་པའི་མདོ་དྲངས་ནས་བསྟན་ཡོད་ཅིང་མཐར་གཏུགས་ན་བཅོམ་ལྡན་འདས་ཀྱི་བཀའ་མདོ་རྒྱུད་ལ་གཏུག་དགོས།འོ་ན་ཡན་ལག་བདུན་པས་ཚོགས་གསོག་མཁན་མང་ཡང་འབྲས་བུ་ཇི་ལྟ་བ་བཞིན་མི་འབྱུང་བ་ཅི་ཡིན་ཞེ་ན།ང་ཚོ་ལ་དད་པའི་སྟོབས་མ་ཚང་བ་དང་ཚུལ་ཁྲིམས་མ་བསྲུངས་པ་ཁོང་ཁྲོ་དང་ལོག་ལྟ་སོགས་ཀྱིས་དགེ་རྩ་བཅོམ་པས་འབྲས་བུ་མ་ཕྱུང་བ་རེད།རྒྱུ་རྐྱེན་ཚང་ན་འབྲས་བུ་འབྱུང་བ་ཆོས་ཉིད་ཡིན།རྣམ་འགྲེལ་ལས།མ་ཚང་མེད་རྒྱུ་དེ་ལ་ནི།།འབྲས་བུ་གང་གིས་ཟློག་པར་ནུས།།ཞེས་གསུངས།རྒྱུ་ཚོགས་མ་ཚང་ནའང་འབྲས་བུ་མི་འབྱུང་བ་ཆོས་ཉིད་དང་།དགེ་རྩ་བསགས་ཀྱང་ཁོང་ཁྲོས་མི་འཇོམས་པའི་ཐབས་ལ་འབད་དགོས་ཤིང་ཉིན་རེ་བཞིན་ཁོང་ཁྲོས་དགེ་རྩ་མི་འཇོམས་པའི་སྔགས་ལན་བདུན་དང་ཉེར་གཅིག་བརྗོད་ན་དགེ་རྩ་འཇོམས་མི་ནུས་པར་གསུངས་ཡོད།དེ་བས་ཁོང་ཁྲོ་སྲུང་བ་གལ་ཆེ་ཞིང་དམ་པའི་ཆོས་སྒྲུབ་དཀའ་ཞེས་པའང་ཉམས་སུ་ལེན་པ་དཀའ་བའི་དོན་རེད།སྒྲོལ་མའི་ཕན་ཡོན་ལས་བུ་འདོད་པས་བུ་དང་འདོད་པ་ཐམས་ཅད་འཐོབ་པར་གསུངས་པས་འབྲས་བུ་འབྱུང་ངེས་ཀྱང་དེ་ལ་རྒྱུ་ཚོགས་ཚང་དགོས།དཔེར་ན།བརླན་དང་དྲོད་མ་འཛོམས་པར་ས་བོན་བཏབ་ཀྱང་མྱུ་གུ་སྔོན་པོ་མི་སྐྱེ་བ་ལྟ་བུ་ཡིན།སྡོམ་གསུམ་རྣམ་དག་དང་བྱང་ཆུབ་ཀྱི་སེམས་ཀྱིས་རྩིས་ཟིན་པ།འཁོར་གསུམ་བདེན་མེད་དུ་རྟོགས་པའི་ལྟ་བས་རྒྱས་འདེབས་པ་གསུམ་ཚང་ན་འབྲས་བུ་འབྱུང་བ་ཆོས་ཉིད་དང་།དེ་བཞིན་གདུགས་དཀར་ལས་མེ་ཆུས་མི་ཚུགས་པར་གསུངས་པའང་རྒྱུ་རྐྱེན་ཚང་ན་འབྲས་བུ་ཇི་ལྟ་བ་བཞིན་འབྱུང་ཞིང་ང་ཚོར་རྒྱུ་རྐྱེན་མ་ཚང་བས་ལན་པ་རེད།དེ་རྐྱེན་གྱིས་སྒྲུབ་པ་གང་བྱས་ནའང་རྒྱུད་ལ་ཉམས་རྟོགས་སྐྱེ་དགོས་ན་དམ་ཚིག་དང་སྡོམ་པ་སྲུང་བ་གཙོ་བོ་ཡིན།དམ་ཚིག་སྡོམ་པ་མ་བསྲུངས་པར།།ཉམས་རྟོགས་སྐྱེས་པ་གཅིག་ཀྱང་མེད།།ཅེས་གསུངས།མདོར་ན་གོང་གི་ཡན་ལག་དྲུག་པོ་མཚོན་བྱེད་དུ་བྱས་ནས།དགེ་བ་ཅུང་ཟད་ནས་བརྩམས་ཏེ་རང་གཞན་གྱི་དུས་གསུམ་དང་འབྲེལ་བའི་དགེ་ཚོགས་ཐམས་ཅད་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ།འཐོབ་བྱ་རྫོགས་བྱང་གི་རྒྱུར་གྱུར་ཅིག་སྙམ་དུ་འདུན་པ་དྲག་པོས་བསྔོ་བ་ཤིན་ཏུ་གལ་ཆེན་པོ་ཡིན་ཞིང་།མཐར་ཐུག་རྟོགས་པ་ཕུན་ཚོགས་འཐོབ་པ་ལ་དེའི་རྒྱུ་ད་ལྟ་ནས་ཚོགས་གསོག་པ་དང་།སྤངས་པ་ཕུན་ཚོགས་འཐོབ་པ་ལ་དེའི་རྒྱུ་ད་ལྟ་ནས་སྒྲིབ་པ་སྦྱང་དགོས་སོ།།

   དྲུག་པ་མཎྜལ་ཕུལ་ཏེ་འདོད་པའི་དོན་ལ་གསོལ་བ་འདེབས་པ་ནི།སྤྱིར་ལམ་རིམ་ཆེན་མོ་དང།བདེ་ལམ།འཇམ་དཔལ་ཞལ་ལུང་གི་རྒྱུན་གྱི་དབང་དུ་བཏང་ན་མཎྜལ་གྱི་ཁྲིད་དང་།ཁྲུས་གསོལ་གྱི་ཕྱག་ཁྲིད་འཆད་པའི་སྲོལ་ཡོད་པ་རེད།ང་ཚོ་ཨ་མདོའི་ཕྱོགས་སུ་མཎྜལ་གྱི་ཁྲིད་རྒྱུན་གུང་ཐང་འཇམ་པའི་དབྱངས་བསྟན་པའི་སྒྲོན་མེའི་གསུང་གི་དཔག་བསམ་སྙེ་མ་གཙོ་བོ་ཡིན།མཎྜལ་གྱི་ཁུངས་ནི་མདོ་ལས།གང་ཚེ་འཁོར་ལོས་སྒྱུར་བའི་རྒྱལ་བོར་གྱུར།།ཆོས་ཀྱིས་རྒྱ་མཚོ་བྱས་པའི་ས་རྣམས་དང་།།གླིང་བཞིར་རིན་ཆེན་ཡངས་པར་བྱས་པ་རྣམས།།སྔོན་གྱི་རྒྱལ་བ་རྣམས་ལ་ངས་ཕུལ་ཏོ།།ཞེས་དང་།འཕགས་པ་རྟག་ཏུ་ངུས་བྱང་སེམས་ཆོས་འཕགས་ལ་ཕུལ་བའི་ས་གཞི་མའང་མཎྜལ་གྱི་ཁུངས་ཡིན།སྔགས་ཕྱོགས་ལས།ཞིང་འདིར་རིན་ཆེན་སྣ་བདུན་གྱི།།མཁས་པ་དག་གིས་ཡོངས་བཀང་ལ།།དངོས་གྲུབ་འདོད་པས་སྦྱིན་པའི་ཕྱིར།།ཉིན་རེར་ཤེས་རབ་ཅན་གྱིས་དབུལ།།ཞེས་སོགས་མང་ངོ་།།མཎྜལ་ཞེས་པ་བོད་སྐད་དུ་དོན་བསྒྱུར་བྱས་ན་སྙིང་བོ་ལེན་པར་འཇུག་པ་དང་མཎྜ་སྙིང་བོ་དང་ལ་ཏི་ནི་ལེན་པའི་དོན་ཡིན།བསོད་ནམས་དང་ཉམས་རྟོགས་ཀྱི་སྙིང་བོ་ལེན་པའི་ཆ་ནས་སྙིང་བོ་ལེན་པ་ཟེར།ཕྱག་རྒྱ་ཆེན་པོ་མཆོག་གི་དངོས་གྲུབ་འདོད་པས་བླ་མ་ཆོས་སྐུའི་རང་བཞིན་དུ་མཐོང་བ་དང་།སྲིད་ཞིའི་རྒུད་པ་མཐའ་དག་ལས་སྐྱོབ་པའི་སྐྱབས་གནས་སུ་མཐོང་བ།མཆོད་པའི་ཕན་ཡོན་སྤྱི་དང་བྱེ་བྲག་ལ་ངེས་པ་དྲངས་ནས་འབུལ་དགོས།མ་མཐའ་བྱང་ཆུབ་ཀྱི་སེམས་བཅོས་མ་ཚུན་ཆད་དང་།འཁོར་གསུམ་མི་དམིགས་པར་ལྟ་བའི་ཤེས་རབ་ཀྱིས་རྒྱས་བཏབ་པ་ཚང་ན་རབ་རེད།མཆོད་པ་འབུལ་བའི་སྐབས་ཤར་ཚོགས་ཞིང་ལ་སྟོན་པ་དང་།བཀའ་ཆོས་ལྟ་བུའི་གསོལ་འདེབས་ཀྱི་མཎྜལ་ཡིན་ན་ཤར་རང་གི་མདུན་ལ་འཁོར་བའི་ཁྱད་པར་ཡོད།དཔེར་ན།རྒྱལ་བོ་ཆེན་པོ་ཞིག་གདན་དྲངས་པ་ན་ལོངས་སྤྱོད་ཕུན་སུམ་ཚོགས་པས་བསྙེན་བཀུར་ཞུས་རྗེས་ད་གཟོད་དོན་བྱ་གསོལ་བ་ལྟ་བུ་ཡིན།མཎྜལ་ཕུལ་རྗེས་དོན་ཆེན་པོ་གསུམ་གྱི་གསོལ་འདེབས་ལན་མང་དུ་འདུན་པ་དྲག་པོས་བྱ་བ་གལ་ཆེ་ཞིང་དེ་ལ་ལམ་རིམ་ཡོངས་རྫོགས་ཀྱི་གནད་ཚང་བ་རེད།བྱང་ཆུབ་ལམ་གྱི་རིམ་པའི་ལྡོག་ཕྱོགས་སྐྱོན་གྱི་རིགས་མཐའ་དག་རང་རྒྱུད་ལ་འགག་པར་བྱིན་གྱིས་རློབ་པ་ལས་ས་ཐོག་རྡོ་ཐོག་ལ་འགག་རྒྱུ་མེད།ལམ་གྱི་རྟོགས་པ་སྐྱེ་བ་ལ་དེའི་འགལ་རྐྱེན་མ་ཞི་བར་རྒྱུད་ལ་སྐྱེ་མི་ཐུབ་པ་ཉམས་མྱོང་གིས་ཤེས་ཐུབ།ཕྱིའི་བར་ཆད་ནད་རིམས་སོགས་ཀྱིས་གནོད་པ་དང་།དགེ་བའི་བཤེས་གཉེན་བསྟེན་པའི་ཆོས་སྐོར་ཉམས་སུ་ལེན་ན་བཤེས་གཉེན་ལ་སྐྱོན་རྟོག་གི་བློ་ཤོར་བ་ནང་གི་བར་ཆད་ཡིན་ཞིང་།ང་ཚོས་ཆོས་ཀྱི་མཐུན་རྐྱེན་ཟེར་ཡང་འགལ་རྐྱེན་དུ་འགྲོ་བ་མང་བས་རྒྱུ་ནོམ་པ་ལོངས་སྤྱོད་མང་བོ་འཛོམས་ན་གཡེང་བའི་རྒྱུ་རུ་སོང་ནས་ཐོས་བསམ་སྒོམ་པ་མི་འོང་བའང་ནང་གི་བར་ཆད་ཡིན།ལྟོས་ཚོད་ལ་ཕན་ཐོགས་པ་ལྟར་སྣང་ཡང་ཕུགས་ལ་གེགས་སུ་འགྲོ་བ་དེ་གསང་བའི་བར་ཆད་ཀྱིས་ཟིན་པ་རེད།དཔེར་ན།བྱང་ཆུབ་ལམ་རིམ་ལ་སྦྱོང་བཞིན་པའི་སྐབས་དེར་རྩིས་སོགས་ལ་མགོ་འཁོར་བ་གསང་བའི་བར་ཆད་ཡིན།རྩིས་ཤེས་མི་དགོས་པ་མིན་ཀྱང་ལམ་རིམ་དང་བསྡུར་ན་གཙོ་ཕལ་གྱི་ཁྱད་པར་ཆེན་པོ་ཡོད།སྒྲུབ་པ་ཉམས་ལེན་ལ་འབད་ན་ཚེ་གཅིག་ལ་ཟུང་འཇུག་གི་གོ་འཕང་འཐོབ་ངེས་པའི་གང་ཟག་ཅིག་གིས་དཔེ་ཁྲིད་གནང་བ་དང་།བསྟན་བཅོས་རྩོམ་པ།སློབ་མ་མང་བོ་སྐྱོང་བའང་གསང་བའི་བར་ཆད་དུ་སོང་བས་རྒྱུད་ལ་རྟོགས་པ་སྐྱེས་པ་དང་བསྡུར་ན་གནམ་སའི་ཁྱད་པར་ཡོད།སྤྱིར་ཚོགས་ཞིང་ཐམས་ཅད་དང་ཁྱད་པར་རང་གི་རྩ་བའི་བླ་མ་ལ་གང་ཟག་མཆོག་གི་འདུ་ཤེས་བཟུང་སྟེ་ཡན་ལག་བདུན་པས་མཆོད་པ་བྱེད་པ་དང་།དེ་བཞིན་སངས་རྒྱས་དང་བྱང་སེམས།རྒྱལ་བ་རྡོ་རྗེ་འཆང་གི་འདུ་ཤེས་ཀྱིས་མཆོད་ན་བསོད་ནམས་ཀྱང་དེ་བཞིན་འབྱུང་བ་རེད།དོན་ཆེན་པོའི་གསོལ་འདེབས་ཀྱི་རྗེས་སུ་དབང་བཞི་བྱིན་རླབས་ཀྱི་ཚུལ་དུ་བླངས་ཏེ་བླ་མའི་མཚན་སྔགས་བཟླ་བ་གལ་ཆེན་པོ་ཡིན།རྒྱུད་ལས།བསྙེན་སྒྲུབ་བཟླས་བརྗོད་ས་ཡ་བས།།བླ་མའི་གསོལ་འདེབས་ལན་གཅིག་མཆོག།ཅེས་གསུངས།གཞན་ཡི་དམ་གྱི་ལྷའི་བསྙེན་སྒྲུབ་ས་ཡ་མང་བོ་འདོན་པ་ལས་བླ་མའི་གསོལ་འདེབས་ལན་གཅིག་བརྗོད་པ་བྱིན་རླབས་ཆེ།ཉམས་རྟོགས་ཞེས་པ་ཉམས་མྱོང་ལ་གོ་དགོས།དགེ་བའི་བཤེས་གཉེན་བསྟེན་པའི་ཆོས་སྐོར་ཉམས་སུ་ལེན་ན་བཤེས་གཉེན་སངས་རྒྱས་དངོས་སུ་སྒོམ་པའི་བློ་དེ་རྣལ་འབྱོར་ཡིན།རྣལ་འབྱོར་བ་ཞེས་པ་ཞི་གནས་ཀྱི་རྣལ་འབྱོར་བ་རྐྱང་རྐྱང་ལ་གོ་མི་དགོས།དེ་བཞིན་འཆི་བ་མི་རྟག་པ་དང་ནམ་འཆི་ངེས་མེད་བསམ་པའི་བློ་དེ་ཡང་རྣལ་འབྱོར་ཡིན།ལྷ་དང་བླ་མར་གསོལ་བ་འདེབས་པ་གལ་ཆེ་གསུངས་པ་དེ།ངོ་བོ་རང་གི་རྩ་བའི་བླ་མ་ལ་རྣམ་པ་ལྷག་པའི་ལྷར་མོས་ན་བྱིན་རླབས་འཇུག་ཚབས་ཆེ་བ་སྟོན་པས་གསུངས་པ་ལས་རིགས་པས་བསྒྲུབ་མི་ཐུབ།ཉམས་མྱོང་དང་རྟོགས་པ་ཡོད་ཚད་བླ་མའི་བྱིན་རླབས་ཀྱི་རྗེས་སུ་འགྲོ་བས་བྱིན་རླབས་ཞུགས་ན་ཉམས་རྟོགས་སྐྱེ་བ་དང་།ངེས་འབྱུང་བྱང་སེམས་ཡང་དག་པའི་ལྟ་བ་རྒྱུད་ལ་སྐྱེ་དགོས་ནའང་བླ་མའི་བྱིན་རླབས་ལ་བརྟེན་པ་གལ་ཆེ།བྱིན་རླབས་འཇུག་མིན་བླ་མའི་ཐུགས་རྒྱུད་སྐུལ་བ་ལ་རག་ལས་ཕྱིར་དེ་ལ་གསོལ་འདེབས་གལ་ཆེན་པོ་རེད།སྦྱོར་བའི་ཆོས་དྲུག་འདི་རང་གི་བློ་ལེགས་པར་སྦྱོང་བྱེད་དང་།སྦྱངས་ནས་ཕྱིན་ཅི་ལོག་གི་བློ་བསལ་རུང་དང་ཉམས་རྟོགས་སྐྱེ་རུང་དུ་བྱས་པ་རྒྱུད་སྨིན་པའི་ཚད་ཡིན།དཔེར་ན།ཞིང་འདེབས་པ་ལ་ལོག་བརྒྱབ་ནས་ས་བོན་སྐྱེ་ཆོག་ཆོག་ཏུ་བྱས་པ་ལྟ་བུ་རེད།མགོ་བཤེས་གཉེན་བསྟེན་ཚུལ་ནས་བྱང་སེམས་རྒྱུན་མཐའ་བའི་རྒྱུད་ཀྱི་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་འཐོབ་བྱེད་ཀྱི་ལམ་དང་།རྣམ་པ་ཐམས་ཅད་མཁྱེན་པའི་ཡེ་ཤེས་འཐོབ་བྱའི་ལམ་ཡིན།ལམ་གྱི་རིམ་པ་གང་ཡིན་ཡང་ཉམས་སུ་ལེན་པའི་སྐབས་བཤེས་གཉེན་སྟེན་ཚུལ་ལམ་གྱི་སྲོག་ཤིང་དུ་བྱས་ཏེ་མཐུན་རྐྱེན་ཚོགས་གསོག་པ་དང་།འགལ་རྐྱེན་སྒྲིབ་པ་མ་སྦྱངས་པར་ཉམས་ལེན་གྱི་རྒྱུ་དམིགས་རྣམ་སྐྱོང་བ་ཙམ་གྱིས་ལམ་རྒྱུད་ལ་ཤིན་ཏུ་སྐྱེ་དཀའ་བར་ལམ་རིམ་ལས་གསུངས་ཡོད།དཔེར་ན།མེ་ཏོག་ཡག་པོ་ཞིག་སྐྱེ་བ་ལ་ཆུ་དང་དྲོད་འཛོམས་དགོས་པ་དང་།རྡོ་དང་མི་གཙང་བའི་རིགས་སེལ་དགོས་པ་ལྟ་བུ་རེད།བསག་སྦྱང་ལ་མང་ཡང་གནད་བསྡུས་ན་ཡག་ལག་བདུན་པའི་ནང་འདུས་ཤིང་ཚོགས་གསོག་སྒྲིབ་སྦྱོང་སྔོན་དུ་སོང་ན་རྐྱེན་ལ་བརྟེན་པ་ཙམ་གྱིས་ལམ་གྱི་རྟོགས་པ་རང་བཞིན་དུ་རྒྱུད་ལ་སྐྱེ་འགྲོ་བ་གནས་བརྟན་ལམ་ཆུང་གི་རྣམ་ཐར་ལ་མཇལ་ན་ཤེས་ཐུབ།ང་ཚོ་ཐོག་མེད་ནས་ད་ལྟའི་བར་རང་གི་ལུས་ངག་ཡིད་གསུམ་པོ་སེམས་ཀྱི་དབང་དུ་སོང་བ་དང་།སེམས་ཉོན་མོངས་པའི་དབང་དུ་སོང་བས་ལས་སྣ་ཚོགས་བསགས་པ་རེད།ཕྱིན་ཆད་སེམས་དེ་རང་གིས་དབང་དུ་འདུས་པ་ཞིག་བྱེད་པ་དང་།དེར་མ་ཟད་དགེ་བའི་དམིགས་པ་ལ་གང་འདོད་ཅི་འདོད་དུ་བཀོལ་ཆོག་པའི་ཆེད་དུ་དཔྱད་སྒོམ་དང་འཇོག་སྒོམ་གཙོ་བོ་ཡིན།དྲན་པ་དང་ཤེས་བཞིན་གྱིས་མ་ཟིན་ན་ལུས་ནང་དུ་བསྡད་ཀྱང་སེམས་ཕྱོགས་བཞི་མཚམས་བརྒྱད་དུ་ཤོར་ན་དགེ་བ་བསྒྲུབས་ཀྱང་སྟོབས་ཆུང་བས་སེམས་དང་བོ་ནས་ངན་ལང་དུ་མི་གཏོང་བར་དགེ་སྦྱོར་སྐྱོན་ཅན་དུ་མི་འགྱུར་བ་གལ་ཆེ།སྦྱོར་བའི་ཆོས་དྲུག་ཁང་བ་ལྟ་བུ་ཡིན།འདུག་མི་རེ་རེ་བརྗེས་ནས་སོང་ཡང་ཁང་བ་ལ་བརྟེན་དགོས།དེ་བཞིན་ལམ་རིམ་གྱི་ཆོས་སྐོར་རེ་རེ་རྫོགས་ནས་འགྲོ་ཡང་སྦྱོར་བའི་ཆོས་དྲུག་ལ་བརྟེན་དགོས་པ་རེད་ཅེས་གསུངས་སོ།།  །།

    ཞེས་སྦྱོར་བའི་ཆོས་དྲུག་གི་ཟིན་བྲིས་འདི་ནི་༧སྐྱབས་རྗེ་བླ་མ་ཤར་གདོང་རིན་པོ་ཆེས་ཁྲིད་པའི་བྱང་ཆུབ་ལམ་རིམ་ཆེན་མོའི་སྒྲ་ཐག་ལས་བཤུས་པ་ཡིན།ཁོང་གི་གསུང་འབུམ་དུ་མ་ཐོན་པའི་གལ་ཆེའི་རིགས་སྒོམ་མཚེར་ཟླ་བས་ཟིན་ཕབ་བྱས་པ་ལགས་ཤིང་ཚིག་གི་སྦྱོར་བ་ཙམ་ལས་གསུང་དངོས་ལ་སྣོན་ཕྲི་ཅི་ཡང་བྱས་མེད།གུས་པ་རང་ལ་སྦྱངས་སྟོབས་ཀྱི་ཉམས་མྱོང་དབེན་པས་ཚིག་དོན་གྱི་ནོར་འཁྲུལ་གང་མཆིས་མཐའ་དག་དཔྱོད་ལྡན་མཁས་པའི་ཚོགས་ཀྱི་སྤྱན་སྔར་སྙིང་ནས་འཆགས།དགེ་བས་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་ཤིང་དེ་འཛིན་དམ་པ་རྣམས་ཀྱི་ཞབས་པད་བརྟན་པའི་རྒྱུར་གྱུར་ཅིག།

                ༢༠༢༣་༣་༡ཉིན།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn