དང་པོ། སྔོན་འགྲོ་རྟེན་གྱི་ཆོས་བསྟན་པ། དངོས་གཞི་བྱང་ཆུབ་ཀྱི་སེམས་སྦྱོང་བ། རྐྱེན་ངན་བྱང་ཆུབ་ལམ་དུ་ཁྱེར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག ། བློ་སྦྱོང་གི་བསླབ་བྱའོ།།

དང་པོ་ནི། དང་པོ་སྔོན་འགྲོ་དག་ལ་བསླབ། གཉིས་པ་ལ་དོན་དམ་དང་། ཀུན་རྫོབ་བྱང་ཆུབ་སེམས་སྦྱོང་གཉིས་ལས། དང་པོ་མཉམ་རྗེས་སུ་སྐྱོང་ཚུལ་གཉིས་ཏེ། དང་པོ། ཆོས་རྣམས་རྨི་ལམ་ལྟ་བུར་བསམ། ། མ་སྐྱེས་རིག་པའི་གཤིས་ལ་དཔྱད། ། གཉེན་པོ་ཉིད་ཀྱང་རང་སར་གྲོལ། ། ལམ་གྱི་ངོ་བོ་ཀུན་གཞིའི་ངང་ལ་བཞག །

གཉིས་པ། ཐུན་མཚམས་སྒྱུ་མའི་སྐྱེས་བུར་བྱ།གཉིས་པ་ཀུན་རྫོབ་བྱང་ཆུབ་སེམས་སྦྱོང་ནི། གཏོང་ལེན་གཉིས་པོ་སྤེལ་མར་སྦྱང་། ། དེ་གཉིས་རླུང་ལ་བསྐྱོན་པར་བྱ། ། ཡུལ་གསུམ་དུག་གསུམ་དགེ་རྩ་གསུམ། ། སྤྱོད་ལམ་ཀུན་ཏུ་ཚིག་གིས་སྦྱང་། ། ལེན་པའི་གོ་རིམ་རང་ནས་བརྩམས། ། 

གསུམ་པ་རྐྱེན་ངན་བྱང་ཆུབ་ལམ་དུ་བསྒྱུར་བ་ནི། སྣོད་བཅུད་སྡིག་པས་གང་བའི་ཚེ། ། རྐྱེན་ངན་བྱང་ཆུབ་ལམ་དུ་བསྒྱུར། ། ལེ་ལན་ཐམས་ཅད་གཅིག་ལ་བདའ། ། ཀུན་ལ་བཀའ་དྲིན་ཆེ་བར་སྒོམ། ། འཁྲུལ་སྣང་སྐུ་བཞིར་བསྒོམ་པ་ཡི། ། སྟོང་ཉིད་བསྲུང་བ་བླ་ན་མེད། ། སྦྱོར་བ་བཞི་ལྡན་ཐབས་ཀྱི་མཆོག ། ཕྲལ་ལ་གང་བྱུང་སྒོམ་དུ་སྦྱར། །

བཞི་བ་ཚེ་གཅིག་གི་ཉམས་ལེན་དྲིལ་ནས་བསྟན་པ་ནི། མན་ངག་སྙིང་པོ་མདོར་བསྡུས་པ། ། སྟོབས་ལྔ་དག་དང་སྦྱར་བར་བྱ། ། ཐེག་ཆེན་འཕོ་བའི་གདམས་ངག་ནི། ། སྟོབས་ལྔ་ཉིད་དང་སྤྱོད་ལམ་གཅེས། །

ལྔ་བ་བློ་འབྱོངས་པའི་ཚད་ནི། ཆོས་ཀུན་་དགོས་པ་གཅིག་ཏུ་འདུས། ། དཔང་པོ་གཉིས་ཀྱི་གཙོ་བོ་བཟུང་། ། ཡིད་བདེ་འབའ་ཞིག་རྒྱུན་དུ་བསྟེན། ། ཡེངས་ཀྱང་ཐུབ་ན་འབྱོངས་པ་ཡིན། ། 

དྲུག་པ་བློ་སྦྱོང་གི་དམ་ཚིག་ནི། སྤྱི་དོན་གསུམ་ལ་རྟག་ཏུ་བསླབ། ། 

འདུན་པ་བསྒྱུར་ལ་རང་སོར་བཞག ། ཡན་ལག་ཉམས་པ་བརྗོད་མི་བྱ། ། གཞན་ཕྱོགས་གང་ཡང་མི་བསམ་མོ། ། ཉོན་མོངས་གང་ཆེ་སྔོན་ལ་སྦྱང་། ། འབྲས་བུ་རེ་བ་ཐམས་ཅད་སྤང་། །

དུག་ཅན་གྱི་ཟས་སྤང་།གཞུང་བཟང་པོ་མ་བསྟེན། ཤགས་ངན་མ་རྒོད། འཕྲང་མ་འགུག ། གནད་ལ་མི་དབབ། མཛོ་ཁལ་གླང་མ་འབྱོ། ལྟོ་ལོག་མི་བྱ། ། མགྱོགས་ཀྱི་རྩེ་མ་གཏོད། ལྷ་བདུད་དུ་མི་དབབ། སྐྱིད་ཀྱི་ཡན་ལག་ཏུ་སྡུག་མ་འཚོལ། 

བདུན་པ་བློ་སྦྱོང་གི་བསླབ་བྱ་ནི། རྣལ་འབྱོར་ཐམས་ཅད་གཅིག་གིས་བྱ། ། ལོག་གནོན་ཐམས་ཅད་གཅིག་གིས་བྱ། ། 

ཐོག་མཐའ་གཉིས་ལ་བྱ་བ་གཉིས། ། གཉིས་པོ་གང་བྱུང་བཟོད་པར་བྱ། ། 

གཉིས་པོ་སྲོག་དང་བསྡོས་ལ་བསྲུང་། ། དཀའ་བ་གསུམ་ལ་བསླབ་པར་བྱ། ། 

རྒྱུའི་གཙོ་བོ་རྣམ་གསུམ་བླང་། ། ཉམས་པ་མེད་པ་རྣམ་གསུམ་བསྒོམ། ། འབྲལ་མེད་གསུམ་དང་ལྡན་པར་བྱ། ། 

ཡུལ་ལ་ཕྱོགས་མེད་དག་ཏུ་སྦྱོང་། ། ཁྱབ་དང་གཏིང་འབྱོངས་ཀུན་ལ་གཅེས། ། 

བཀོལ་པ་རྣམས་ལ་རྟག་ཏུ་བསྒོམ། ། རྐྱེན་ངན་དག་ལ་ལྟོས་མི་བྱ། ད་རེས་གཙོ་བོ་ཉམས་སུ་བླང་། ། གོ་ལོག་མི་བྱ། རེས་འཇོག་མི་བྱ། ། 

དོལ་ཆོད་དུ་སྦྱང་། རྟོག་དཔྱོད་གཉིས་ཀྱིས་ཐར་བར་བྱ། ཡུས་མ་བསྒོམ། ཀོ་ལོང་མ་སྡོམ། ཡུད་ཙམ་པ་མི་བྱ། འོར་ཆེ་མ་འདོད། 

སྙིགས་མ་ལྔ་པོ་བདོ་བ་འདི། ། བྱང་ཆུབ་ལམ་དུ་བསྒྱུར་བ་ཡིན། ། མན་ངག་བདུད་རྩི་སྙིང་པོ་འདི། ། གསེར་གླིང་པ་ནས་བརྒྱུད་པ་ཡིན། །

སྔོན་སྦྱངས་ལས་ཀྱི་འཕྲོ་སད་ནས། ། རང་གི་མོས་པ་མང་བའི་རྒྱུས། ། སྡུག་བསྔལ་གཏམ་ངན་ཁྱད་སད་ནས། ། བདག་འཛིན་འདུལ་བའི་གདམས་ངག་ཞུས། ། 

ད་ནི་ཤི་ཡང་མི་འགྱོད་དོ། ། ཤུ་བྷཾ།། །། ཐེག་པ་ཆེན་པོའི་བློ་སྦྱོང་དོན་བདུན་མ་བྱ་འཆད་ཁ་བའི་གསུང་གི་བདུད་རྩིའོ།། །།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn