བླ་མ་མགོན་པོ་འཇམ་དཔལ་ལ།  ། སྒོ་གསུམ་གུས་པས་ཕྱག་འཚལ་ལོ།  ། 

གྲངས་ཅན་བདག་སྐྱེ་འདོད་ཚུལ་ནི།  ། དངོས་པོ་ཐམས་ཅད་རང་རྒྱུའི་དུས།  ། རྒྱུ་ཡི་རང་བཞིན་མི་གསལ་བར།  ། ཡོད་པ་དེ་ཉིད་རྐྱེན་སོགས་ཀྱིས།  ། གསལ་བར་བྱས་ལ་སྐྱེ་ཞེས་བཏགས།  ། གསལ་ཟིན་སླར་ཡང་མི་སྐྱེ་ཟེར།  ། 

ལོག་རྟོག་དེ་ཉིད་འགོག་པ་ལ།  ། འགྲེལ་བ་བུདྷ་པཱ་ལི་ཏར།  ། མདོར་བསྟན་རྒྱས་བཤད་གཉིས་སྦྱར་ཏེ།  ། སླར་ཡང་སྐྱེ་བ་དོན་ཡོད་དང་།  ། ཡོད་པ་འགལ་བར་བརྗོད་པ་ཡི།  ། ཐལ་འགྱུར་གཉིས་ཀྱིས་དགག་པར་མཛད།  ། དེ་ལ་གྲངས་ཅན་མ་ཁྱབ་ཅེས།  ། སྨྲ་མོད་སྐྱོན་སྤོང་མི་ནུས་སོ།  ། 

དེ་ལ་སློབ་དཔོན་ལེགས་ལྡན་འབྱེད།  ། མདོར་བསྟན་ཁོ་ནའི་གཞུང་དྲངས་ནས།  ། སྐྱེ་བ་དོན་མེད་ཐུག་མེད་དུ།  ། ཐལ་བ་འཕངས་པར་དགོངས་ནས་ནི།  ། རང་རྒྱུད་དཔེ་རྟགས་མ་བརྗོད་དང་།  ། གཞན་སྨྲས་ཉེས་པ་མ་བསལ་དང་།  ། རྒོལ་བ་གཞན་གྱིས་གླགས་རྙེད་པའི།  ། སྐྱོན་གསུམ་ཡོད་ཅེས་སུན་འབྱིན་མཛད།  ། 

དེ་ནི་བདག་སྐྱེ་འགོག་ནུས་ཀྱི།  ། རང་རྒྱུད་རྟགས་སྦྱོར་ཡང་དག་དང་།  ། རྟགས་ཆོས་གཉིས་ལྡན་མཐུན་དཔེ་ཞིག ། བརྗོད་དགོས་པ་ལ་མ་བརྗོད་དང་།  ། གྲངས་ཅན་གཞན་གྱིས་འདི་སྐད་དུ།  ། བདག་ལས་སྐྱེ་བ་མེད་ཟེར་བ།  ། གསལ་ཟིན་དངོས་པོ་ཡིན་ན་ནི།  ། ཁོ་བོས་གྲུབ་ཟིན་སྒྲུབ་པ་ཡིན།  ། རྒྱུ་ཡི་བདག་ཉིད་མི་གསལ་བ།  ། ཡིན་ན་སྐྱེ་ལྡན་དངོས་པོ་ཀུན།  ། དེ་ལས་སྐྱེ་བས་ཁྱབ་དང་འགལ།  ། ཞེས་པའི་ཉེས་པ་མ་བསལ་དང་།  ། གཞན་ཡང་འགྲེལ་ངག་དེ་ཉིད་ལ།  ། གཞན་གྱི་ཀླན་ཀའི་གླགས་རྙེད་དེ།  ། ཚིག་ཟིན་ལྟར་ན་འབྲེལ་མེད་ཕྱིར།  ། སྐབས་ཀྱི་དོན་ལས་བཟློག་དགོས་ཏེ།  ། དངོས་ཟིན་རྟགས་གཉིས་བཟློག་པ་ན།  ། སྐྱེ་བ་དོན་བཅས་ཐུག་བཅས་འགྱུར།  ། དེ་ཡི་ཤུགས་ཀྱིས་དམ་བཅའ་ནི།  ། བདག་ལས་སྐྱེ་བ་མེད་ཅེས་པ།  ། མེད་དགག་ཙམ་དུ་མ་བསྡད་པར།  ། གཞན་སྐྱེ་འཕངས་པར་འགྱུར་བས་ན།  །འཕགས་པ་ཀླུ་སྒྲུབ་ཡབ་སྲས་ཀྱིས།  ། མཐའ་བཞིའི་སྐྱེ་མེད་དམ་བཅའ་ཀུན།  ། མེད་དགག་ཙམ་དུ་གསུངས་པ་ཡི།  ། གྲུབ་པའི་མཐའ་དང་འགལ་ལོ་གསུང་།  ། 

དེ་ལྟར་བརྗོད་པའི་སྐྱོན་དེ་རྣམས།  ། སངས་རྒྱས་བསྐྱངས་ལ་མི་འཇུག་པར།  ། དཔལ་ལྡན་ཟླ་བས་བཤད་ཚུལ་ནི།  ། འགྲེལ་ངག་དེ་ཡིས་རང་རྒྱུད་ཀྱི།  ། གཏན་ཚིགས་དཔེ་བཅས་མ་བསྟན་ཀྱང་།  །འགལ་བ་བརྗོད་པའི་ཐལ་འགྱུར་གྱིས།  །གྲངས་ཅན་རང་གི་ཁས་ལེན་ལ།  ། ནང་འགལ་མཐོང་ནས་དམ་བཅའ་འདོར།  ། བསྒྲུབ་བྱ་རྟོགས་པར་འགྱུར་བ་ཡིན།  ། ཁས་བླངས་འགལ་བས་བརྩད་པས་ཀྱང་།  ། ནང་འགལ་མཐོང་ཡང་མི་ལྡོག་ན།  ། མངོན་སུམ་ལ་ནི་བསྙོན་འདིངས་ཕྱིར།  ། མཁས་པའི་རྩོད་ཟླར་འོས་མ་ཡིན།  ། 

དེས་ན་སྐབས་འདིར་རང་རྒྱུད་ཀྱི།  ། དཔེ་རྟགས་བརྗོད་ལ་དགོས་པ་དང་།  ། ནུས་པ་ལྷག་པོ་ཅི་ཡང་མེད།  ། རང་རྒྱུད་དོན་ནི་རང་མཚན་གྱིས།  ། གྲུབ་པའི་ཆོས་ལ་བྱེད་པས་ན།  ། དེ་འདྲའི་རང་མཚན་དབུ་མ་བས།  ། ཁས་ལེན་རིགས་པ་མ་ཡིན་ནོ།  ། ཐལ་འགྱུར་ཙམ་ལ་བརྟེན་པ་ནི།  ། རྗེས་དཔག་ཚད་མ་སྐྱེ་ནུས་པས།  ། བསྒྲུབ་བྱ་རྟོགས་ཕྱིར་གཞན་གྲགས་ཀྱི།  ། རྟགས་དཔེ་དགོས་པ་མིན་མོད་ཀྱང་།  ། གལ་ཏེ་དགོས་ནའང་འགྲེལ་ངག་གིས།  ། སྒྲུབ་ངག་ཡན་ལག་ལྔ་ལྡན་གྱི།  ། སྒོ་ནས་གཞན་གྲགས་གཏན་ཚིགས་བསྟན ། དམ་བཅའ་ཁྱབ་པ་དཔེ་བརྗོད་དང་།  ། ཉེར་གཏོད་མཇུག་སྡུད་ཡན་ལག་ལྔ། །བསྡུ་ན་རྒྱས་བཤད་དང་བོ་ཡི།  ། ཐལ་འགྱུར་རྟགས་སྦྱོར་ཚུལ་དུ་བཀོད།  ། སྔོན་གསལ་མྱུ་གུ་མཐུན་དཔེར་གཟུང་།  ། 

སྐྱོན་བརྗོད་གཉིས་པ་དོན་མེད་དེ། རང་རྒྱུད་གཏན་ཚིགས་ཁས་མི་ལེན།  ། གཞན་གྲགས་རྟགས་ལ་རྒྱུ་དུས་སུ། མི་སལ་མྱུ་གུ་ཆོས་ཅན་དང་།  ། གསལ་ཟིན་མཐུན་དཔེར་བཟུང་བས་ན།  ། གྲུབ་ཟིན་སྒྲུབ་། དང་གཏན་ཚིགས་ནི།  ། འགལ་བའི་དོགས་པ་མེད་པས་ན།  ། གཞན་སྨྲས་ཉེས་པ་མི་འབྱུང་ངོ།  ། 

སྐྱོན་བརྗོད་གསུམ་པའང་མི་འཇུག་སྟེ།  ། སངས་རྒྱས་བསྐྱངས་ཀྱི་འགྲེལ་ངག་གི། ཐལ་འགྱུར་དེ་ནི་གྲངས་ཅན་ལ།  ། ཁས་བླངས་ནང་འགལ་སྟོན་ཕྱིར་ཡིན།  ། བཟློག་དོན་སྒྲུབ་ཕྱིར་འཕངས་པ་མིན།  ། དེ་ཕྱིར་དེ་ཡི་བཟློག་དོན་གྱི།  ། སླར་ཡང་སྐྱེ་བ་དོན་བཅས་སོགས།  ། ཕ་རོལ་གྲངས་ཅན་ཁས་བླངས་ཀྱི།  ། ཁོ་བོ་ཅག་གི་ཁས་ལེན་མིན།  ། ལེགས་ལྡན་འབྱེད་ཀྱི་དགོངས་ཚོད་ཀྱི།  ། ཐལ་འགྱུར་དེ་ནི་འགྲེལ་ངག་གི། དངོས་ཤུགས་གང་གིའང་དོན་མིན་ཕྱིར།  ། བཟློག་དོན་ཁས་ལེན་མི་དགོས་པས།  ། གཞན་གྱིས་གླགས་རྙེད་ག་ལ་འགྱུར།  ། 

དེ་ཕྱིར་ཁོ་བོ་ཅག་ལ་ནི།  ། གྲུབ་མཐའ་འགལ་བའི་ཉེས་མེད་དོ།  ། དེ་ལྟར་སངས་རྒྱས་བསྐྱངས་ལ་ནི།  ། སྐྱོན་མི་འཇུག་པར་མ་ཟད་ཀྱི།  ། ལེགས་ལྡན་རང་གི་འགྲེལ་ངག་ལ།  ། སྐྱོན་མང་ཞུགས་པ་འདི་ལྟ་སྟེ།  ། ཡོད་པའི་རྟགས་ཀྱིས་དོན་དམ་པར།  ། མིག་སོགས་བདག་ལས་མི་སྐྱེ་སྟེ།  ། ཤེས་པ་ཡོད་པ་ཉིད་བཞིན་ནོ།  ། ཞེས་པའི་སྦྱོར་བར་དོན་དམ་གྱི།  ། ཁྱད་པར་སྦྱར་བ་མི་འཐད་དེ།  ། ཆོས་ལ་སྦྱར་ན་དབུ་མ་བས།  ། བདག་སྐྱེ་གཏན་ནས་མི་འདོད་ཕྱིར།  ། ཐ་སྙད་ཙམ་དུ་དགག་དགོས་སོ། །ཕྱི་རྒོལ་གྲངས་ཅན་བདེན་གཉིས་ལས།  ། ཉམས་ལ་གཉིས་ཀར་དགག་པར་རིགས།  ། འཇིག་རྟེན་རང་གས་སྐྱེ་ཙམ་ལས།  ། བདག་སྐྱེ་གཞན་སྐྱེ་མི་དཔྱོད་པས།  ། གང་ལ་ལྟོས་ཀྱང་དགོས་མེད་དོ།  ། 

ཆོས་ཅན་ལ་སྦྱར་སྔ་རྒོལ་ལ།  ། ལྟོས་པའི་ཆོས་ཅན་མ་གྲུབ་པའི།  ། ཕྱོགས་སམ་རྟགས་ཀྱི་སྐྱོན་དུ་འགྱུར།  ། གལ་ཏེ་ཀུན་རྫོབ་ཆོས་ཅན་ལ།  ། སྦྱར་ན་དོན་དམ་སྦྱོར་ས་འཇིག ། དེ་སྐད་བརྗོད་རིགས་མ་སྨྲས་དང་།  ། སྨྲས་ནའང་གྲངས་ཅན་མིག་ལ་སོགས།  ། བདེན་པར་གྲུབ་པར་འདོད་པས་ན།  ། གཞི་མ་གྲུབ་པའི་ཕྱོགས་སྐྱོན་འགྱུར།  ། རང་སྡེ་འོག་མས་བྱེ་བྲག་པར།  ། སྒྲ་མི་རྟག་པར་སྒྲུབ་པའི་ཚེ།  ། འབྱུང་འགྱུར་ནམ་མཁའི་ཡོན་ཏན་སོགས།  ། རང་རང་ཐུན་མོང་མ་ཡིན་པའི།  ། ཁྱད་པར་དོར་བའི་སྒྲ་ཙམ་ཞིག ། ཆོས་ཅན་ཉིད་དུ་འཛིན་པ་བཞིན། འདིར་ཡང་དོན་དམ་ཀུན་རྫོབ་ཀྱི།  ། ཁྱད་པར་དོར་བའི་མིག་སོགས་ཙམ།  ། ཆོས་ཅན་འཛིན་ཕྱིར་མ་གྲུབ་པའི།  ། ཕྱོགས་ཀྱི་སྐྱོན་སོགས་མེད་ཅེ་ན།  ། དོན་ནི་དེ་ལྟར་མི་འཐད་དེ།  ། ལེགས་ལྡན་ཆོས་ཀུན་རང་མཚན་གྱིས།  ། གྲུབ་པར་ཁས་བླངས་དེ་ལྟ་ན།  ། མིག་སོགས་གནས་ལུགས་འཇལ་བ་ཡི།  ། མ་འཁྲུལ་ཚད་མའི་རྙེད་དོན་དུ། ཁས་ལེན་དགོས་ཕྱིར་གྲངས་ཅན་གྱི།  ། འཁྲུལ་ཤེས་ཡུལ་དུ་མེད་དགོས་ཏེ།  ། ཕྱིན། ཅི་ལོག་དང་མ་ལོག་པའི།  ། རྙེད་དོན་གཉིས་པོ་འགལ་བས་སོ།  །

 ཡང་ན་དབུ་མའི་ལུགས་ལ་ནི།  ། མིག་སོགས་ཕྱིན་ཅི་ལོག་ཙམ་གྱི།  ། ཤེས་པའི་རྙེད་དོན་ཡིན་དགོས་ལ།  ། དངོས་སྨྲས་ལུགས་ལ་མ་ལོག་པའི།  ། རྙེད་དོན་ཡིན་པར་འདོད་པས་ན།  ། ཆོས་ཅན་རྒོལ་བ་གཉིས་ཀ་ལ།  ། ཚད་མས་གྲུབ་ཚུལ་མཐུན་སྣང་མེད།  །

 རབ རིབ་ཡོད་མེད་གཉིས་ཀ་ལ།  ། སྐྲ་ཤད་མཐུན་སྣང་མེད་བཞིན་ནོ།  ། མདོར་ན་རང་མཚན་ཁས་བླངས་ཕྱིན།  ། དོན་དམ་ཀུན་རྫོབ་གང་གི་ཡང་།  ། ཁྱད་པར་དོར་བའི དོན་ཙམ་ལ།  ། ཚད་མར་འགྲོ་ཚུལ་མི་སྲིད་དོ།  ། 

དཔེ་ནི་འདྲ་བ་མ་ཡིན་ཏེ།  ། རང་རྒྱུད་མན་ཆད་རང་མཚན་གྱིས།  ། གྲུབ་པ་ཁས་ལེན་མཐུན་པས་ན།  ། ཆོས་ཅན་གྲུབ་ཚུལ་མཐུན་སྣང་ཡོད།  ། ཐལ་མང་གཉིས་ལ་ཆོས་ན་ནི། ། ཆོད་མས་གྲུབ་ཚུལ་མཐུན་སྣང་མེད།  ། ཆོས་ཅན་མཐུན་ང་མ་གྲུབ་པའི། ཕྱོགས་མོས་གྱུར་། བའི་རིགས་པ་དེས། སྦྱོར་བའི་གཏན་ཚིགསཡོད་པའི་ཕྱིར། ཞེ་འགྱུ་གྲུབ་ཚུལ་ལ་སྦྱར། དེ་ལྟར་སྦྱར་ནས་འགོག་ཚུལདེ།ལེས་ལྡན་དོན་གྱིས་མ། བླངས་ཏེ།  ། དངོས་སྨྲས་སྒྲུབ་བྱེད་བཀོད་པ་ཡི།  ། རྟགས་ལ་ལེགས་ལྡན་བདེན་གཉིས་ཀྱི།  ། བརྟགས་པ་བྱས་ནས་འགོག་པས་ན།  ། དེ་ནི་རང་ལའང་མཚུངས་པས་སོ།  །

 རང་རྒྱུད་སྦྱོར་བ་གཞན་རྣམས་ལའང་།  ། སྐྱོན་བརྗོད་དེ་བཞིན་སྦྱར་བར་བྱ།  ། ཡོད་པ་རྟགས་སུ་བཀོད་པ་དེ།  ། ཤེས་པ་ཡོད་བཞིན་མི་སྐྱེ་བའམ།  ། བུམ་སོགས་ལྟར་དུ་སྐྱེ་སྙམ་དུ།  ། གྲངས་ཅན་མ་ངེས་སྐྱོན་ཡང་ཡོད།  ། ཇི་སྐད་བཤད་པའི་སྐྱོན་དེ་རྣམས།  ། རང་ལ་མི་མཚུངས་རང་རྒྱུད་ཀྱི།  ། རྟགས་སྦྱོར་འདོད་པ་མ་ཡིན་ལ།  ། གཞན་གྲགས་རྟགས་ལ་སྐྱོན་མི་འཇུག ། རྟགས་ཆོས་དོན་གསུམ་རང་ངོས་ནས།  ། གྲུབ་པར་རྒོལ་བ་གཉིས་ཀའི་ངོར།  ། མཐུན་སྣང་གྲུབ་ལ་རང་རྒྱུད་ཟེར།  །

 དེ་ལྟར་མཐུན་སྣང་མི་དགོས་པར།  ། ཕྱི་རྒོལ་རང་གི་ཁས་བླངས་ལ།  ། འཁྲིས་པའི་རྟགས་ནི་གཞན་གྲགས་ཡིན།  ། མདོར་ན་རང་རྒྱུད་འགོག་པ་ནི།  ། ཆོས་ཅན་མཐུན་སྣང་འགོག་ཚུལ་དང་།  ། དེ་ཡང་རང་ངོས་ནས་གྲུབ་པ།  ། འགོག་པའི་གནད་ལ་ཐུག་པ་ཡིན།  ། 

རང་བཞིན་གྱིས་གྲུབ་རྒྱུ་གཞན་ལས།  ། དེ་འདྲའི་འབྲས་གཞན་སྐྱེ་བ་ནི།  ། གཞན་སྐྱེའི་དོན་ཏེ་ཐལ་འགྱུར་བ། མ་གཏོགས་རང་སྡེ་ཐམས་ཅད་དང་།། གཞན་སྡེ་འགས་ཀྱང་འདོད་པ་ཡིན།  ། འགོག་ཚུལ་བུདྡྷ་པཱ་ལི་ཏར།  ། གཞན་ལས་སྐྱེ་དང་ཐམས་ཅད་ལས།  ། ཐམས་ཅད་མི་སྐྱེ་འགལ་བརྗོད་ཀྱི།  ། ཐལ་འགྱུར་སྒོ་ནས་དགག་པར་མཛད།  ། 

དེ་ལ་སློབ་དཔོན་ལེགས་ལྡན་གྱིས།  ། གཞན་སྐྱེ་རང་ཡང་འདོད་དགོས་ཕྱིར།  ། ཐ་སྙད་ཙམ་དུ་འགོག་མི་རིགས།  ། དོན་དམ་དབང་དུ་འགོག་བྱེད་ཀྱི།  ། རྟགས་དཔེ་ཡང་དག་མ་བརྗོད་དང་།  ། དངོས་ཟིན་དོན་ལས་བཟློག་དགོས་ཕྱིར།  ། གཞན་གྱིས་ཀླན་ཀའི་གླགས་རྙེད་ཅེས།  ། སྐྱོན་བརྗོད་རྣམ་པ་གཉིས་མཛད་དོ།  ། 

སྐྱོན་དེའང་འཇུག་པ་མ་ཡིན་ཏེ།  ། སློབ་དཔོན་གཞན་སྐྱེ་མི་བཞེད་ཅིང་།  ། འགལ་བ་བརྗོད་པའི་ཐལ་འགྱུར་གྱིས།  ། གཞན་སྐྱེའི་དམ་བཅའ་འགོག་ནུས་ཕྱིར།  ། རང་རྒྱུད་དཔེ་རྟགས་བརྗོད་མི་རིགས།  ། བཟློག་པ་འཕངས་ཀྱང་རྒྱུ་འབྲས་ཀྱི།  ། འབྲེལ་བ་ངེས་པས་སྐྱོན་མེད་དོ།  ། བདག་གཞན་གཉིས་ཀ་ལས་སྐྱེ་བ།  ། མུ་སྟེགས་གཅེར་བུ་པ་འདོད་དེ།  ། རྫ་བུམ་འཇིམ་པ་ལས་སྐྱེ་ཕྱིར།  ། དེ་ལ་ལྟོས་ཏེ་བདག་སྐྱེ་དང་།  ། རྫ་མཁན་འཁོར་ལོ་ལ་སོགས་ལ།  ། ལྟོས་ཏེ་གཞན་སྐྱེ་ཡིན་ནོ་ཟེར།  ། འགོག་ཚུལ་བདག་གཞན་སོ་སོ་བ།  ། འགོག་པའི་ཚུལ་དང་མཚུངས་པ་འོ།  ། རྒྱང་འཕེན་པ་ནི་དངོས་པོ་རྣམས།  ། རྒྱུ་མེད་པ་ལས་སྐྱེ་བར་འདོད།  ། རྨ་བྱའི་མདོངས་ཀྱི་མདོག་སྣ་ཚོགས།  ། རང་གི་རང་གིས་སྐྱེ་བཞིན་ཟེར།  ། འདི་ལའང་བུངྔྷཱ་པཱ་ལི་ཏར།  ། རྒྱུ་མེད་པ་ལས་སྐྱེ་བ་དང་།  ། རྟག་ཏུ་ཐམས་ཅད་ཐམས་ཅད་ལས།  ། མི་སྐྱེ་རྩོམ་པ་དོན་ཡོད་པ།  ། འགལ་བ་བརྗོད་པའི་ཐལ་འགྱུར་གྱིས།  ། ལོག་རྟོག་ཐ་ཆད་དེ་བཀག གོ། 

འདི་ལའང་སློབ་དཔོན་ལེགས་ལྡན་གྱིས།  ། གོང་བཞིན་དཔེ་རྟགས་མ་བརྗོད་དང་།  ། གླགས་རྙེད་པ་ཡི་སྐྱོན་གཉིས་བརྗོད།  ། སྐྱོན་མི་འཇུག་ཚུལ་རིགས་བསྒྲེ་འོ།  ། དེ་ཡང་བུདྷ་པཱ་ལི་ཏར།  ། ཐལ་འགྱུར་ཁོ་ནས་དགག་པ་ལ།  ། ལེགས་ལྡན་དེ་ཉིད་མ་དགོངས་པར།  ། དོན་མེད་སྐྱོན་མང་བཟུང་བ་ལ།  ། དཔལ་ལྡན་ཟླ་བས་སྐྱོན་བསལ་ནས།  ། འཁྲུལ་མེད་རང་ལུགས་གསལ་མཛད་དོ།  ། 

དབུ་མའི་ཐལ་བཟློག་ཅེས་གྲགས་པའི།  ། རགས་རིམ་ཚིགས་སུ་བཅད་པ་འདི།  ། དབྱངས་ཅན་དགའ་བའི་བློ་གྲོས་ཀྱིས།  ། རང་གི་བརྗེད་བྱང་ཆེད་དུ་བྲིས།  ། ནོངས་གང་གཟུར་གནས་མཁས་ལ་བཤགས།  ། ལེགས་ཆ་སྐལ་མཉམ་རྣམས་ལ་འབུལ།  ། དགེ་བས་ཀླུ་སྒྲུབ་ཡབ་སྲས་ཀྱི།  ། དགོངས་དོན་མ་ནོར་རྟོགས་གྱུར་ཅིག །

སརྦ་མངྒ་ལཾ།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn