རྒྱའི་སྐད་དུ།  ཏའི་ཆིང་པའི་ཧཱ་མིང་མུན་ལུན།  བོད་སྐད་དུ།  ཐེག་པ་ཆེན་པོའི་ཆོས་བརྒྱ་གསལ་བའི་སྒོའི་བསྟན་བཅོས།  འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། ། བཅོམ་ལྡན་འདས་ཀྱིས་ཆོས་ཐམས་ཅད་བདག་མེད་དོ་ཞེས་གསུངས་པ་ནི་ཆོས་ཐམས་ཅད་ཅེས་བྱ་བ་གང་ཡིན་པ་དང་།  བདག་མེད་པ་དེ་གང་ལ་བརྗོད་ཅེ་ན།  ཆོས་ཐམས་ཅད་ནི་བསྡུ་ན་ངོ་བོ་ལྔ་ཡོད་དེ།  སེམས་ཀྱི་ཆོས་དང་སེམས་ལས་བྱུང་བའི་ཆོས་དང་།  གཟུགས་ཀྱི་ཆོས་དང་།  འདུ་བྱེད་ཕན་ཚུན་མི་ལྡན་པའི་ཆོས་དང་།  འདུས་མ་བྱས་ཀྱི་ཆོས་སོ། ། དེ་ལ་ཐམས་ཅད་ཁྱད་པར་དུ་བྱ་བའི་ཕྱིར་དང་།  འདི་དང་ཕན་ཚུན་ལྡན་པའི་ཕྱིར་དང་།  མངོན་དུ་གྱུར་པའི་ཕྱིར་དང་།  བྱེ་བྲག་འདི་རྣམས་མི་འདྲ་བའི་ཕྱིར་དང་།  དོན་མངོན་དུ་བྱ་བའི་ཕྱིར་རིམ་པ་འདི་ལྟར་དབྱེ་བར་བྱའོ། ། སེམས་ཀྱི་ཆོས་ལ་ངོ་བོ་བརྒྱད་ཡོད་དེ།  མིག་གི་རྣམ་པར་ཤེས་པ་དང་།  རྣ་བའི་རྣམ་པར་ཤེས་པ་དང་།  སྣའི་རྣམ་པར་ཤེས་པ་དང་།  ལྕེའི་རྣམ་པར་ཤེས་པ་དང་།  ལུས་ཀྱི་རྣམ་པར་ཤེས་པ་དང་།  ཡིད་ཀྱི་རྣམ་པར་ཤེས་པ་དང་།  རྣམ་པར་སྨིན་པའི་རྣམ་པར་ཤེས་པ་དང་།  ཉོན་མོངས་པ་ཅན་གྱི་ཡིད་ཀྱི་རྣམ་པར་ཤེས་པའོ། ། སེམས་ལས་བྱུང་བའི་ཆོས་ལ་བསྡུ་ན་{145b4} ངོ་བོ་དྲུག་ཡོད་དེ།  ཀུན་དུ་འགྲོ་བ་ལྔ་ཡོད་པ་དང་།  གཞན་ཡུལ་ངེས་པ་ལ་ལྔ་ཡོད་པ་དང་།  དགེ་བ་ལ་བཅུ་གཅིག་ཡོད་པ་དང་།  རྩ་བའི་ཉོན་མོངས་པ་དྲུག་ཡོད་པ་དང་།  རྗེས་སུ་འགྲོ་བའི་ཉོན་མོངས་པ་ཉི་ཤུ་ཡོད་པ་དང་། གཞན་དུ་འགྱུར་བ་བཞི་ཡོད་པའོ། ། ཀུན་དུ་འགྲོ་བ་ལྔ་གང་ཞེ་ན།  ཡིད་ལ་བྱེད་པ་དང་།  རེག་པ་དང་།  ཚོར་བ་དང་།  སེམས་པ་དང་།  འདུ་ཤེས་སོ། ། གཞན་ཡུལ་ངེས་པ་ལྔ་གང་ཞེ་ན།  འདུན་པ་དང་།  ཁྱད་པར་དྲན་པ་དང་།  མོས་པ་དང་།  ཏིང་ངེ་འཛིན་དང་།  ཤེས་རབ་བོ། ། དགེ་བ་བཅུ་གཅིག་གང་ཞེ་ན།  དད་པ་དང་།  བརྩོན་འགྲུས་དང་། ངོ་ཚ་ཡོད་པ་དང་།  ཁྲེལ་ཡོད་པ་དང་།  འདོད་ཆགས་མེད་པ་དང་།  ཞེ་སྡང་མེད་པ་དང་།  གཏི་མུག་མེད་པ་དང་།  ཤིན་ཏུ་སྦྱངས་པར་གནས་པ་དང་།  བག་ཡོད་པ་དང་།  བཏང་སྙོམས་དང་།  རྣམ་པར་མི་འཚེ་བའོ། ། རྩ་བའི་ཉོན་མོངས་པ་དྲུག་གང་ཞེ་ན།  འདོད་ཆགས་དང་།  ཞེ་སྡང་{145b7} དང་། མ་རིག་པ་དང་།  ང་རྒྱལ་དང་།  ཐེ་ཚོམ་དང་།  ཕྱིན་ཅི་ལོག་གི་ལྟ་བའོ། ། རྗེས་སུ་འགྲོ་བའི་ཉོན་མོངས་པ་ཉི་ཤུ་གང་ཞེ་ན།  ཁྲོ་བ་དང་།  ཁོན་དུ་འཛིན་པ་དང་།  འཚིག་པ་དང་།  འཆབ་པ་དང་།  ་བ་དང་།  རྒྱགས་པ་དང་།  སྒྱུ་དང་།  རྣམ་པར་འཚེ་བ་དང་།  ཕྲག་དོག་{146a1} || དང་། སེར་སྣ་དང་།  ངོ་ཚ་མེད་པ་དང་།  ཁྲེལ་མེད་པ་དང་།  མ་དད་པ་དང་།  ལེ་ལོ་དང་།  བག་མེད་པ་དང་།  རྨུགས་པ་དང་།  རྒོད་པ་དང་།  དྲན་པ་དོར་བ་དང་།  ཤེས་པ་ཕྱིན་ཅི་ལོག་དང་།  རྣམ་པར་་བའོ། ། གཞན་དུ་འགྱུར་བ་བཞི་གང་ཞེ་{146a2} ན; གཉིད་དང་།  དཔྱོད་པ་དང་།  འགྱོད་པ་དང་།  རྟོག་པའོ། ། གཟུགས་ཀྱི་ཆོས་ལ་བསྡུ་ན་ངོ་བོ་བཅུ་གཅིག་གང་ཞེ་ན།  མིག་གི་དབང་པོ་དང་།  རྣ་བའི་དབང་པོ་དང་།  སྣའི་དབང་པོ་དང་།  ལྕེའི་དབང་པོ་དང་།  ལུས་ཀྱི་དབང་པོ་དང་།  གཟུགས་དང་།  སྒྲ་དང་།  དྲི་དང་།  རོ་དང་།  {146a3} རེག་བྱ་དང་།  ཆོས་ཀྱི་ཕྱོགས་སོ། ། བཏགས་པ་པ་འདུ་བྱེད་ཕན་ཚུན་མི་ལྡན་པའི་ཆོས་ལ་བསྡུ་ན་ངོ་བོ་ཉི་ཤུ་རྩ་བཞི་གང་ཞེ་ན།  ཐོབ་པ་དང་།  སྲོག་གི་རྩ་བ་དང་།  སྐལ་བ་རིགས་མཐུན་པ་དང་།  སོ་སོའི་སྐྱེ་བོ་དང་།  འདུ་ཤེས་མེད་པ་པ་དང་།  རྫོགས་པའི་འདུ་ཤེས་པ་དང་།  འགོག་{146a4} པ་སྙོམས་པར་འཇུག་པ་དང་།  མིང་གི་ཚོགས་དང་།  ཚིག་གི་ཚོགས་དང་།  ཡི་གེའི་ཚོགས་དང་།  སྐྱེ་བ་དང་།  རྒས་པ་དང་།  གནས་པ་དང་།  མི་རྟག་པ་དང་།  རྒྱུན་འཁོར་བ་དང་།  སོ་སོར་ངེས་པ་དང་།  ཕན་ཚུན་འབྲེལ་བ་དང་།  སྟོབས་མྱུར་བ་དང་།  གོ་རིམས་དང་།  དུས་དང་།  {146a5} ཕྱོགས་དང་།  གྲངས་དང་།  སྤྱོད་པ་མཐུན་པའི་ཚོགས་དང་།  སྤྱོད་པ་མི་མཐུན་པའི་ཚོགས་སོ། ། འདུས་མ་བྱས་པའི་ཆོས་ལ་བསྡུ་ན་ངོ་བོ་དྲུག་གང་ཞེ་ན།  སྟོང་པ་ཉིད་ཀྱི་འདུས་མ་བྱས་དང་།  བརྟགས་པས་འགོག་པའི་འདུས་མ་བྱས་དང་།  བརྟགས་པས་འགོག་པ་མ་ཡིན་པའི་{146a6} འདུས་མ་བྱས་དང་།  མི་་བའི་འདུས་མ་བྱས་དང་།  འདུ་ཤེས་དང་།  ཚོར་བའི་འདུས་མ་བྱས་དང་།  རྣམ་པ་དེ་བཞིན་ཉིད་ཀྱི་འདུས་མ་བྱས་སོ་ཞེས་བྱ་བའི་ཕྱིར་བདག་གི་ཆོས་དེ་མེད་པར་གསུངས་སོ། ། དེ་རྣམས་བསྡུ་ན་ངོ་བོ་ཡང་གཉིས་ཡོད་དེ།  དང་པོ་གང་ཟག་གི་བདག་མེད་པ་{146a7} དང་། གཉིས་པ་ཆོས་ཀྱི་བདག་མེད་པའོ། ། ཐེག་པ་ཆེན་པོའི་ཆོས་བརྒྱ་གསལ་བའི་སྒོའི་བསྟན་བཅོས་ཡོངས་སུ་རྫོགས་སོ། །  རྒྱའི་དཔེ་ལས་སློབ་དཔོན་དབྱིག་གཉེན་གྱིས་མཛད་པར་སྣང་།  དིང་སང་བོད་རྣམས་དཔལ་ལྡན་ཆོས་སྐྱོང་གིས་མཛད་ཅེས་གྲགས་སོ། ། {146b1} དཔལ་ལྡན་དབང་ཕྱུག་རྒྱའི་ལོ་ཙཱ་བ་ཐང་སམ་ཙང་ཞེས་བྱ་བས་རྒྱ་གར་ལས་རྒྱའི་ཡུལ་དུ་བསྒྱུར་ཞིང་ཕྱིས་སྟོན་པ་དགེ་སློང་ཆོས་ཀྱི་རྒྱལ་མཚན་ཞེས་བྱ་བས་བསྒྱུར་བར་ཞུས་པའི་དོན་དུ་གཞི་ཐམས་ཅད་ཡོད་པར་སྨྲ་བའི་སྡེ་པ་ལས་རབ་ཏུ་བྱུང་བ།  རྒྱ་ནག་ཆེན་པོའི་ལྷ་བཙུན་ཆོས་ཀྱི་རིན་ཆེན་གྱིས་{146b2} དཔལ་ས་སྐྱའི་གཙུག་ལག་ཁང་དུ་བསྒྱུར་ཞིང་ལེགས་པར་གཏན་ལ་ཕབ་པའོ། །