དགེ་ལུགས་དྲ་བའི་འཁྲུངས་སྐར་ལ་འབྱོར་བའི་ཤིས་ཚིག་འགའ།
དམ་པ་གསེར་རིའི་ཕྲེང་བའི་རྣམ་ཐར་མཛེས།།
སྔོན་བྱུང་གཏམ་དང་ཆོས་ཀྱི་འབེལ་གཏམ་མང་།།
ལུགས་ལ་བྱང་ཆུབ་མཁས་པའི་བགྲོ་གླེང་གིས།།
བློ་གསལ་བློ་ཡི་སྒོ་མོ་ལེགས་པར་ཕྱེས།།
རིང་ནས་བརྒྱུད་པའི་རང་གི་ཕ་ཁྱིམ་གྱི།།
དྲི་མེད་ལུགས་བཟང་དགོས་འདོད་ཀུན་འབྱུང་ནོར་།།
ངོ་མཚར་དྲ་བའི་ལམ་ནས་མཇལ་བ་འདི།།
དགེ་ལུགས་དྲ་བའི་འཕྲིན་ལས་ཨེ་མ་ཧོ།།
༢༠༡༦ལོའི་ཧོར་ཟླ་བཅུ་བའི་ཉེར་ལྔ་ལ་དགེ་ལུགས་དྲ་བའི་སྒོ་ཕྱེས་ནས་ལོ་གཅིག་འཁོར་བའི་ཉིན་མོར་ངག་རིག་སྨྲ་བའི་གྲལ་མཐར་གནས་པ་བྱ་མདོ་རབ་རྒྱས་ཀྱིས་གུས་པས་ཕུལ་པའོ།།
ཤིས་སྨོན་ལྷ་དར་དཀར་བོ།
དགེ་ལྡན་བསྟན་པའི་ཟབ་མོ་ལྟ་བ་དྲི་བྲལ་སྟོན་གྱི་ཟླ་བའི་འོད་དཀར་སྲིད་པ་ཆེན་པོའི་དབྱིངས་སུ་གསལ།།
ལུགས་བཟང་ཡང་དག་ཏིང་འཛིན་སྒོམ་གྱི་ཉམས་ལེན་རིམ་པས་བྱིང་རྨུགས་སེལ་ཞིང་དཔག་མེད་ཆོས་དབྱིངས་ཀློང་དུ་འབྱམས།།
དྲ་བའི་མིག་བཞིན་རིས་སུ་གསལ་བའི་འདུལ་བའི་བཅས་ཁྲིམས་རྒྱན་དུ་འཆང་བ་རིན་ཆེན་ནོར་བུའི་དོ་ཤལ་བཞིན།།
སྲིད་པའི་ཁྱོན་ན་འགྲན་པའི་ཟླ་བྲལ་ཞྭ་སེར་རིང་ལུགས་འཛིན་པའི་གྲུབ་མཐའ་ངོ་མཚར་རིག་པའི་འཕྲུལ་གྱིས་སྤེལ།།
དགེ་ལུགས་པའི་དྲ་བ་ནི་དེང་སྐབས་ཀྱི་ཆོས་ལུགས་སློབ་གཉེར་བ་ཞིག་གམ། དགེ་ལུགས་པའི་གྲུབ་མཐར་ཞིབ་འཇུག་བྱེད་མཁན་ཞིག་ལ་མཚོན་ན་ཤེས་བྱའི་སྒྲོམ་བུ་ཞིག་གམ་སྟབས་བདེའི་མྱུར་ལམ་ལྟ་བུ་ཞིག་ཏུ་མཐོང་སྟེ། ང་ལ་མཚོན་ན་དགེ་ལུགས་པའི་དྲ་བ་ནས་དམ་པའི་རྣམ་ཐར་གཏམ་རྒྱུད་དང་། ལོ་རྒྱུས་ཤེས་བྱ། རྒྱུན་མཁོའི་འདོན་ཆོག་སོགས་རང་ལ་དགོས་པའི་ལག་ཡོང་མང་བོ་ཞིག་རེག་བྱུང་། མ་འོངས་པར་ཡང་ཆོས་ལུགས་ཀྱི་གཏམ་རྒྱུད་དང་ཞིབ་འཇུག་སྐོར་གྱི་དཔྱད་རྩོམ་སྔར་ལས་མང་དུ་སྤེལ་བའི་རེ་བ་ཆེ། ཞེས་གཟི་མིག་གསུམ་པས་གུས་ཕུལ།
ཤིས་ཚིག
དགེ་ལྡན་ལུགས་བཟང་དྲི་མེད་མན་ཤེལ་ཕྲེང་།
ཚིག་དོན་སྲད་བུར་བརྒྱུས་པའི་ལེགས་བཤད་གཏམ།།
གངས་ཅན་མཁའ་རུ་འདྲེན་པའི་གྲུ་གཟིངས་མཆོག།
དགེ་ལུགས་དྲ་བ་སྐྱེ་རྒུའི་དཔལ་དུ་འཁྲུངས།།
ཞེས་དགེ་ལུགས་དྲ་བ་ཚུགས་ནས་མི་ལོ་གཅིག་འཁོར་བའི་བཀྲ་ཤིས་དུས་བཟང་ལ་རྟེན་འབྲེལ་མཚོན་བྱེད་དུ་རྭ་རྒྱ་བཟོད་པ་བཟང་བོས་གངས་ལྗོངས་ཤེས་རིག་ནོར་བུའི་སློབ་གླིང་ནས།
༢༠༡༦.༡༠.༢༥ཉིན།
དགེ་ལུགས་དྲ་བར་ཕུལ་བའི་ཤིས་ཚིག
རྒྱལ་བའི་བསྟན་པ་སྤེལ་བས་ན།།
རྒྱལ་བ་གཉིས་པར་མཚནགསོལ་བ།།
རྒྱལ་བསྟན་སྙིང་བོ་ཉམས་ལེན་མཛད།།
རྒྱལ་སྲས་དམ་པས་དགེ་ལེགས་སྩོལ།།
དུས་མཐར་བློ་བཟང་རྒྱལ་བའི་བསྟན།།
མཇལ་དཀའ་བླ་མའི་དྲིན་ལས་མཇལ།།
ས་གསུམ་གྲགས་པའི་རིན་ཆེན་གཏེར།།
འགྲོ་རྣམས་བདེ་དགའི་དཔལ་ལ་སྤྱོད།།
རྨད་བྱུང་རྣམ་ཐར་གདུལ་བྱའི་རྒྱུད།།
མཐོང་ཐོས་དྲན་པས་བདེ་ལ་བཀོད།།
དེ་སྤེལ་ཚན་རྩལ་འཇིག་རྟེན་ཁྱབ།།
༼དགེ་ལུགས་དྲ་བ༽དུས་ཀུན་རྒྱལ།།
ཞེས་དགེ་ལུགས་དྲ་བར་ཤིས་ཚིག་ཅིག་གི་དོད་དུ་བློ་བཟང་ཤེས་རབ་ཀྱིས་གུས་པས་ཕུལ་བ་ལགས།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
རྩོམ་ཁུངས། རྩོམ་འདིའི་སྦྲེལ་ཐགhttp://www.tb1025.cn