སྲིད་པའི་འཁོར་ལོ་ཆོས་རྒྱལ་གྱི་ཕྱག་དང་ཞལ་གྱིས་དམ་དུ་འཛིན་པ་འདིས་ཁམས་གསུམ་གྱི་འགྲོ་བ་རྣམས་འཆི་བ་ལས་ཐར་ས་མེད་པ་དང༌། རིགས་དྲུག་གི་སེམས་ཅན་རྣམས་ལས་ཉོན་གྱི་དབང་གིས་འཁོར་བ་ན་ཐོག་མཐའ་མེད་པར་འཁོར་ལོ་བཞིན་་འཁོར་ཞིང་འཁོར་བ་མཚོན། །འཁོར་ལོའི་དབུས་ཀྱི་སྲོག་ཆགས་བྱ་དང་སྦྲུལ་དང་ཕག་གསུམ་གྱིས་འདོད་ཆགས་དང༌། ཞེ་སྡང་དང༌། གཏི་མུག བཅས་དུག་གསུམ་གྱི་ཉོན་མོངས་མཚོན་པས་དུག་གསུམ་ནི་འཁོར་བ་འགྲུབ་བྱེད་ཀྱི་རྩ་བ་ཡིན་པར་བསྟན་ཡོད། དེ་ཡང་དགོན་སྡེའི་གཙུག་ལག་ཁང་གི་སྒོ་ཁང་སོགས་སུ་སྲིད་པའི་འཁོར་ལོ་ཆ་ལྔ་པ་བྲིས་པའི་དགོས་པ་ནི་བཅོམ་ལྡན་འདས་ཀྱི་མདོ་ལས། དགེ་སློང་དག འདི་ནི་སྡུག་བསྔལ་འཕགས་པའི་བདེན་པའོ། འདི་ནི་ཀུན་འབྱུང་འཕགས་པའི་བདེན་པའོ། འདི་ནི་འགོགས་པ་འཕགས་པའི་བདེན་པའོ། འདི་ནི་ལམ་འཕགས་པའི་བདེན་པའོ། ཞེས་སོགས་གསུངས་པ་ལྟར་སྐུ་དངོས་ཀྱིས་གདུལ་བྱ་རྣམས་ལ་བདེན་བཞིའི་བླང་དོར་ཡང་ཡང་དུ་འདོམས་པར་མཛད་ཅིང༌། ཕྱི་རབས་རྗེས་འཇུག་རྣམས་ཀྱིས་ཀྱང་བདེན་བཞིའི་བླང་དོར་ཤིས་པ་ནི་གལ་ཆེ་བར་གཟིགས་ནས་གཙུག་ལག་ཁང་གི་སྒོ་ཁང་དང༌། དགེ་འདུན་གྱི་གནས་ཁང་སོགས་སུ་སྲིད་པའི་འཁོར་ལོ་ཆ་ལྔ་པ་འབྲི་དགོས་པ་དང༌། གཞན་དག་ལ་ཡང་རྒྱ་ཆེར་སྟོན་དགོས་སོ་ཞེས་གསུངས་པ་ལྟར་བདེན་བཞིའི་བླང་དོར་གྱི་འཇུག་ལྡོག་གྱི་འཇུག་ལྡོག་མཚོན་བྱེད་ཡིན་ལ། རི་མོའི་ཚུལ་ནི། འཆི་བདག་གཤིན་རྗེའམ་སྲིན་པོ་ཁ་གདངས་བའི་དབུས་སུ་འཁོར་ལོ་ཟླུམ་པོཆ་ལྔ་པ་ལ་མི་འབྲི་བ་དང༌། འོག་གི་ཆ་གསུམ་དུ་བྱས་པའི་ཆ་གཅིག་ལ་ལྷ་དང༌། ཅིག་ཤོས་ལ་ཡི་དྭགས་བྲིས་ཡོད། འཁོར་ལོ་ཟླུམ་པོ་དེའི་དབུས་སུ་འདོད་ཆགས་མཚོན་བྱེད་ཕུག་རོན་་དང༌། ཞེ་སྡང་མཚོན་བྱེད་སྦྲུལ་དང༌། གཏི་མུག་མཚོན་བྱེད་ཕག་གི་གཟུགས་བརྙན་བྲིས་ཡོད་ཅིང༌། འཁོར་ལོ་དེའི་ཕྱིའི་མཐའ་འཁོར་དུ་ཐོག་མར་རིག་པ་ནས་བཟུང་རྒ་ཤིའི་བར་རྟེན་འབྲེལ་ཡན་ལག་བཅུ་གཉིས་བྲིས་པ་ནི་ཡན་ལག་བཅུ་གཉིས་དང༌། ཐམས་ཅད་མི་རྟག་པ་ཉིད་ཀྱིས་བཟུང་བའི་ཕྱིར་རོ། ཞེས་གསུངས་བ་དང་མཐུན་པར། རྒན་མོ་ལོང་བ་དེ་གར་འགྲོ་འདི་འགྲོ་མེད་པར་ཅི་བྱ་གཏོལ་མེད་པར་འཁྱམས་པ་ལྟར་མ་རིག་པ་ལ་བརྟེན་ནས་འགྲོ་རྣམས་ཁམས་གསུམ་གྱི་འཁོར་བ་འདིར་སྡུག་བསྔལ་སྣ་ཚོགས་མྱོང་བས་ན་མ་རིག་པ་རྒན་མོ་ལོང་བ་ལྟ་བུ་དང༌། རྫ་མཁན་གྱིས་འཁོར་ལོ་བསྐོར་ནས་རྫའི་སྣོད་སྣ་ཚོགས་བཟོ་བ་ལྟར་དགེ་མི་དགེའི་ལས་སྣ་ཚོགས་ལ་བརྟེན་ནས་འཁོར་བའི་སྐྱེ་བ་མི་འདྲ་བ་སྣ་ཚོགས་ལེན་པས་འདུ་བྱེད་རྫ་མཁན་དང་འདྲ་བ་དང༌། ཁང་བ་སྒེའུ་ཁུང་དྲུག་ཡོད་པའི་ནང་སྤྲེའུ་ཞིག་བཅུག་པ་ན་དེའི་སྒེའུ་ཁུང་སོ་སོར་རྒྱུགས་ནས་བལྟ་བར་བྱེད་པལྟར་རྣམ་ཤེས་མིག་ལ་སོགས་པའི་སྒོ་དྲུག་གར་ཕྱིན་ནས་ཡུལ་སྣ་ཚོགས་ལ་སྤྱོད་པས་ན་རྣམ་ཤེས་སྤྲེའུ་འདྲ་བ་དང༌། གྲུའི་ཡོ་བྱད་ཐམས་ཅད་ཚང་ན་ཆུའི་ཕ་རོལ་དུ་འགྲོ་ཞིང༌། མ་ཚང་ན་འགྲོ་མི་ནུས་པ་ལྟར་མིང་གཟུགས་ཅི་རིགས་པའི་རྟེན་འབྲེལ་ཚོགས་པ་ལ་བརྟེན་ནས་འཁོར་བ་འདིར་སྐྱེ་ཞིང་དེ་དག་ཆ་མ་ཚང་བར་གཉིས་ཙམ་ལ་བརྟེན་ནས་འཁོར་བར་སྐྱེ་ཞིང་ལོངས་སྤྱོད་སོགས་ལ་སྤྱོད་མི་ནུས་པས་མིང་གཟུགས་ཀྱི་རྟེན་འབྲེལ་གྲུ་དང་འདྲ་བ་དང༌། ཁང་བ་སྟོང་བར་ཕྱི་ནས་བལྟས་ནས་མི་ཡོད་པ་འདྲ་བ་ཞིག་ཏུ་མཐོང་ཡང་དོན་དུ་སུ་ཡང་མེད་པ་དང་འདྲ་བར་སྐྱེ་མཆེད་གི་རྟེན་འབྲེལ་གྲུབ་མ་ཐག་ཕྱི་ནས་བལྟས་ན་རྣམ་ཤེས་གསུམ་འདུས་ནས་ཡུལ་གྱི་འགྱུར་བ་གཅོད་པས་ན་དེ་དང་འདྲ་བ་དང༌། མིག་གམ་པུས་མོ་ལ་མདའ་ཕོག་ན་དེ་མ་ཐག་ཚོར་ཞིང་སྡུག་བསྔལ་མྱོང་བ་ལྟར་ཚོར་བས་ཀྱང་ཡུལ་ཡིད་དུ་འོང་མི་འོང་བར་མ་གང་རུང་དང་འཕྲད་མ་ཐག་ཚོར་བ་སྣ་ཚོགས་མྱོང་བས་ན་ཚོར་བ་མིག་གམ་པུས་མོ་ལ་མདའ་ཟུག་པ་ལྟ་བུ་དང༌། ཆང་ལ་དགའ་བའི་མི་དེས་ཇི་ཙམ་བཏུངས་ཀྱང་ངོམས་པ་མེད་པར་ཆགས་པར་བྱེད་པས་སྲེད་པ་སྐྱེས་བུ་ཆང་འཐུང་བ་དང་མཚུངས་པ་དང༌། སྤྲེའུ་ཤིང་རྩེར་འཛེགས་ནས་ཤིང་ཏོག་སྔ་མའི་རོ་ཚོར་ཞིང་མཐོང་ཚད་ལག་པས་ལེན་ཞིང་ཟ་བར་བྱེད་པ་ལྟར་ལེན་པས་ཀྱང་སྲེད་པས་ཆགས་པའི་་ཡུལ་དེ་ལ་དོན་གཉེར་ཆེན་པོ་བྱེད་པས་སྤྲེའུས་ཤིང་ཏོག་ལེན་པ་དང་འདྲ། ཟླ་དགུ་ཞག་བཅུ་སོང་བའི་སྦྲུམ་མ་དེར་བུ་སྐྱེ་བའི་རྐྱེན་ཐམས་ཅད་ཚང་བས་བུ་སྐྱེ་བ་ལ་མངོན་དུ་ཕྱོགས་པ་ལྟར་བཅུ་པ་སྲིད་པའི་རྟེན་འབྲེལ་གྱིས་སྲིད་པ་ཕྱི་མ་འགྲུབ་པའི་ལས་ཀྱི་ནུས་པ་མཐུ་ཅན་དུ་བྱས་ཏེ་ཡང་སྲིད་ཕྱི་མ་འགྲུབ་པས་ན་བུད་མེད་སྦྲུམ་མ་དང་འདྲ། བུད་མེད་དེ་ལས་བུ་དངོས་སུ་སྐྱེས་པ་བཞིན་་སྐྱེ་བའི་རྟེན་འབྲེལ་ཡང་སྲིད་ཕྱི་མར་དངོས་སུ་མཚམས་སྦྱར་བས་སྐྱེ་བ་དེ་དང་འདྲ། ན་ཚོད་རབ་ཏུ་རྒས་པའི་རྒས་འཁོགས་རྣམས་དེའི་སྡུག་བསྔལ་གྱིས་ཡོངས་སུ་མནར་བ་དང༌། འཚེ་བའི་ཚེ་ཕུང་བོ་དུར་ཁྲོད་དུ་བསྐྱལ་བ་སོགས་བྱེད་པ་ལྟར་རྒ་ཤིའི་རྟེན་འབྲེལ་གྲུབ་པའི་ཚེ་ཡང་དེ་ལྟར་བྱེད་པས་ན་དེ་དང་འདྲ་བར་བྲིས་ལ། དེ་དག་འཁོར་ལོའི་རྣམ་པ་འཆི་བདག་གི་ཁ་དང་རྐང་ལག་གིས་དམ་པོར་བཟུང་བར་བྲིས་པ་ནི། ལས་དང་ཉོན་མོངས་བའི་དབངགིས་སྲིད་པ་འདིར་སྐྱེ་བ་ལེན་པ་མཐའ་དག་མཐར་འཆི་བདག་གིཁ་དབང་གིས་སྲིད་པ་འདིར་སྐྱེ་བ་ལེན་པ་མཐའ་དག་མཐར་འཆི་བདག་གི་དབང་རྣམས་སྡུག་བསྔལ་མཚོན་པར་བྱེད་ཅིང༌། དེ་ལྟ་བུའི་ཁམས་གསུམ་འཁོར་བའི་སེམས་ཅན་རྣམས་སྡུག་བསྔལ་གྱིས་མཚོན་པར་བྱེད་ཅིང༌། འདོད་པའི་ལྷ་དང་མི་གཉིས་ཀྱིས་འགྱུར་བའི་སྡུག་བསྔལ་དང༌། གཟུགས་ཁམས་ཀྱི་ལྷ་རྣམས་ཀྱིས་ཁྱབ་པ་འདུ་བྱེད་ཀྱི་སྡུག་བསྔལ་མཚོན་པར་བྱེད་པ་སོགས་དེ་དག་ནི་སྡུག་བསྔལ་འཁོར་བའི་ཉེས་དམིགས་དང༌། ཀུན་འབྱུང་འཁོརབ་འི་འཇུག་རིམ་མཚོན་པར་བྱེད་དོ། ། འགོག་པ་མྱ་ངན་ལས་འདས་པ་མཚོན་བྱེད་འཁོར་ལོའི་རྩེ་མོར་སྟོན་པ་མཉམ་མེད་བཅོམ་ལྡན་འདས་ཀྱི་ཕྱག་གཡས་པའི་མཛུབ་མོས་དཀྱིལ་འཁོར་ཉ་གང་བ་ལྟ་བུའི་ཐིག་ལེ་དཀར་པོ་ཞིག་སྟོན་པའི་རྣམ་པ་བྲིས་ལ། མདོག་དཀར་བ་ནི་འགོག་བདེན་དེ་ཉིད་རང་གི་སྤང་བའི་སྐྱོན་ཐམས་ཅད་དང་བྲལ་བར་མཚོན་ཞིང༌། དེ་ཕྱག་གིས་སྟོན་པ་ནི་འགོག་བདེན་དེ་སྟོན་པ་སངས་རྒྱས་ཁོ་ན་ལ་རག་ལས་པའམ་སངས་རྒྱས་ཀྱིས་ཇི་ལྟར་བསྟན་པ་དེར་འགྲོ་བར་རིགས་པ་མཚོན་ལ། ལམ་བདེན་མཚོན་པའི་ཕྱིར་དུ་འཁོར་ལོའི་འོག་ཏུ། ། བརྩམས་པར་བྱ་ཞིང་དབྱུང་བར་བྱ། ། སངས་རྒྱས་བསྟན་ལ་འཇུག་པར་བྱ། ། འདམ་བུའི་ཁྱིམ་ལ་གླང་ཆེན་བཞིན། ། འཆི་བདག་སྡེ་ནི་གཞོམ་པར་བྱ། ། གང་ཞིག་རབ་ཏུ་བག་ཡོད་པས། ། ཆོས་འདུལ་འདི་ལ་སྤྱོད་གྱུར་པ། ། སྐྱེ་བའི་འཁོར་བ་རབ་སྤངས་ཏེ། ། སྡུག་བསྔལ་ཐ་མར་བྱེད་པར་འགྱུར། ། ཞེས་པའི་ཚིགས་བཅད་བྲིས་སོ། །
འཁོར་ལོ་དེ་ཉིད་ཟླུམ་པོར་བྲིས་པའི་དགོས་པ་ཡང་མ་རིག་པ་ནས་རྒ་ཤིའི་བར་རྟེན་འབྲེལ་ཡན་ལག་བཅུ་གཉིས་དང༌། འཁོར་བའི་འགྲོ་བ་ལྔ་རྣམས་ཟོ་ཆུན་གྱི་འཕྲུལ་འཁོར་རམ་མགལ་མེའི་འཁོར་ལོ་ལྟར་སྔ་ཕྱི་བར་མ་ཆད་པར་འཁོར་བར་ཤེས་པའི་ཆེད་དུ་ཡིན་ལ། རྟེན་འབྲེལ་ཡན་ལག་བཅུ་གཉིས་འཁོར་ལོའི་མཐར་འབྲི་བ་ནི་དེ་དག་ལས་བརྒལ་ན་འཁོར་བ་ལས་ནམ་ཡང་མི་འདའ་བར་ཤེས་པའི་ཕྱིར་ཡིན་ནོ། །