ལྷ་མོ་གསེར་ཁྲི་སྐུ་ཕྲེང་བཞི་བ༧རྗེ་བཙུན་བློ་བཟང་བསྟན་འཛིན་སེང་གེ་དཔལ་བཟང་བོ་མཆོག་གི་གསུང་འབུམ་དཀར་ཆག་བཞུགས་སོ། །

ཡོང་ཁུངས།   དགེ་ལུགས་དྲ་བ།     སྤེལ་དུས།  2021-02-13 07:56:11     རྩོམ་པ་པོ།   འཇིགས་མེད་གྲགས་པ།     ཀློག་ཐེངས།  

༡   རྗེ་བཙུན་བློ་བཟང་བསྟན་འཛིན་སེངྒེའི་དད་གུས་འདྲེན་པའི་ཤིང་རྟ།

༢   ཞབས་བརྟན་གསོལ་འདེབས་དད་གུས་རིན་ཆེན་འདྲེན་པའི་ཤིང་རྟ།

༣   རཱ་ལོ་ཙཱ་བའི་ཞབས་བརྟན་སྨོན་ཚིག་བཅོལ་དམ་ཀུན་ཕན་བདེ་ལམ།

༤   རྗེ་བཙུན་བློ་བཟང་བསྟན་འཛིན་སེངྒེའི་སྐུ་བསྟོད།

༥   གསོལ་འདེབས་ཉེས་ལྟུང་ཀུན་སེལ།

༦   གདུགས་ཐུང་།

༧   དྲུག་ཅུ་བའི་གཏོར་བསྔོས་བསྡུས་པ།

༨   བཟའ་བཏུང་རྣམས་ནང་གི་སྦྱིན་བསྲེག་གི་ཚུལ་དུ་ལོངས་སྤྱོད་ཚུལ།

༩   མགོན་པོའི་བསྐང་བཤགས་བསྡུས་པ།

༡༠  མགོན་པོའི་འཕྲིན་བཅོལ།

༡༡  མགོན་པོའི་ཚོགས་ལས་ཆུང་བ།

༡༢  དམ་ཅན་ཆོས་རྒྱལ་གྱི་འཕྲིན་བསྐུལ་ལྷུན་འགྲུབ་བདེ་ཆེན།

༡༣   ཆང་བུ་ཆུ་གཏོར་ཉུང་བསྡུས།

༡༤   མ་མོའི་འཁྲུགས་བསྐང་།

༡༥   བག་ཙེ་ལྕམ་སྲིང་གི་བསང་།

༡༦   དམ་ཅན་རྡོ་རྗེ་ལེགས་པའི་གསོལ་མཆོད་ཙིནྡ་མ་ཎིའི་འཕྲེང་མཛེས།

༡༧   མཁའ་འགྲོའི་བརྡ་ཡིག་རྨོངས་མུན་ཀུན་འཇོམས།

༡༨   འགོང་བཀར་བསྡུས་པ།

༡༩   དགྲ་ལྷའི་འཕྲིན་བཅོལ་བསྡུས་པ།

༢༠   སྡེ་བརྒྱད་འཁྲུགས་བསྐང་བསྡུས་པ།

༢༡   དཔུང་རྒྱན་བསྡུས་པ།

༢༢   རླུང་རྟ་ཡར་བསྐྱེད་བསྡུས་པ།

༢༣   རྒྱ་ནག་སྐག་བཟློག

༢༤   ལྷ་མོ་འོད་ཟེར་ཅན་མའི་དགྲ་བཟློག་བསྡུས་པ།

༢༥   ཕྱོགས་བཅུའི་མུན་སེལ་བསྡུས་པ།

༢༦   གདུགས་དཀར་བྱད་གྲོལ།

༢༧   ཁ་མཆུ་ཞི་མདོ་བསྡུས་པ།

༢༨   གཟའི་གཡང་འགུགས།

༢༩   ཁ་འབར་མ་བསྡུས་པ།

༣༠   བླ་མ་དང་རྟ་མགྲིན་ངོ་བོ་དབྱེར་མེད་དུ་རྣལ་འབྱོར་བསྒོམ་ཚུལ།

༣༡   དམ་ཅན་བཤགས་པ།

༣༢   ཚབ་ཆེན་མཆོད་སྦྱིན་བར་ཆད་ཀུན་སེལ།

༣༣   གཤེད་མ་ཕྱིར་བཟློག་གི་འཕྲིན་བཅོལ།

༣༤   དགྲ་བགེགས་ཆིངས་བྱེད་ཀྱི་སྔགས་འདོན་ཐབས།

༣༥   དགྲ་ལ་དམ་བདར་ཞིང་འཕྲིན་ལས་དམོད་བཅོལ།

༣༦   རྒྱལ་རྫོངས་ཕ་ལམ་གཡུལ་འཇོམས།

༣༧   མི་ཁ་བྲ་མཆུའི་ཁྲམ་བཟློག

༣༨   ལས་མགོན་ཚོགས་ཀྱི་རིམ་པ།

༣༩   རྟ་མགྲིན་པདྨ་དབང་ཆེན་གྱི་སྨད་ལས་བཟློག་གཏོར་རིམ་པ།

༤༠   སྨད་ལས་ཡང་བསྡུས་སྤུ་གྲིཿ

༤༡   སོ་ནད།

༤༢   གདུགས་མཆོག་དབང་སྡུད་ཟིལ་མནོན།

༤༣   མཁའ་འགྲོའི་གནས་བསྲུང་བཙན་རྒོད་རྡེ་རྗེ་འབར་བ།

༤༤   སྟག་རྒོད་དགྲ་འདུལ།

༤༥   རྐྱང་ཚའི་ཡུལ་ལྷའི་བསང་།

༤༦   ཟམ་ཚའི་གཞི་བདག་སྤྱིའི་བསང་མཆོད།

༤༧   གཉན་ཆེན་བཙན་རྒོད་སྟག་ཕྲུག་གི་དགྱེས་མཆོད།

༤༨   སུ་རུའི་བསང་མཆོད།

༤༩  དགེ་བསྙེན་ལྭ་རྒོའི་བསང་ཡིག

༥༠  ལྷ་བསང་ཀུན་བསྒྲུབ་ནོར་བུ།

༥༡   དངོས་གྲུབ་ཆར་འབེབ་མ།

༥༢   དགྲ་ལྷ་དུང་ཐོད་རྡོ་རྗེ་དྲག་རྩལ་སོགས་ཀྱི་བསང་།

༥༣   ཡུལ་སྐྱོང་ལྷ་རྒོད་རྡོ་རྗེ་ཐོག་རྩལ་གྱི་བསང་།

༄༅། ། ལྷ་མོ་གསེར་ཁྲི་སྐུ་ཕྲེང་བཞི་བ༧རྗེ་བཙུན་བློ་བཟང་བསྟན་འཛིན་སེང་གེ་དཔལ་བཟང་བོ་མཆོག་གི་མཛད་རྣམ་མདོར་བསྡུས་བཞུགས་སོ། །

དེ་ཡང་ཇི་སྐད་དུ། རྣམ་དག་བློ་གྲོས་ལུས་རྩལ་ཡོངས་སུ་རྫོགས། ། དོན་བཟང་ལུང་རིགས་བྱེ་བའི་གད་རྒྱངས་སྒྲོགས། ། ཐུབ་བསྟན་ས་འཛིན་ལྷུན་པོའི་སྤོར་གནས་པ། ། མཆོག་སྤྲུལ་སྨྲ་བའི་སེངྒེ་ཞེས་བསྔགས་པ་ལྟར། ཕུལ་བྱུང་རྣམ་པར་དག་པའི་བློ་གྲོས་ཀྱི་ལུས་རྩལ་ཡོངས་སུ་རྫོགས་ཤིང་། མདོ་སྔགས་གཞུང་བརྒྱའི་གནད་དོན་རྨད་དུ་བྱུང་བ་མཐའ་དག་རེས་འཇོག་མེད་པར་མཁྱེན་པའི་སྟོབས་ཤུགས་ཀྱིས། ལུང་རིགས་བྱེ་བའི་གད་རྒྱངས་རྒྱུད་མར་སྒྲོག་ཅིང་ལུང་དང་རྟོགས་པའི་ཐུབ་བསྟན་གངས་ཀྱི་རི་བོའི་སྤོ་ལ་རླབས་ཆེན་འཁོར་ལོ་གསུམ་དང་འཆད་རྩོད་རྩོམ་གསུམ་གྱི་མཛད་འཕྲིན་མཉམ་པ་མེད་པས་དུས་རྟག་ཏུ་གནས་འཆའ་བ་ངེས་དོན་ཆོས་ཀྱི་རྒྱལ་བོ་ཁྲི་ཆེན་ང་གསུམ་པ་དྷྭ་ཛ་སིདྷའི་མཆོག་སྤྲུལ་སྨྲ་བའི་སེངྒེ་ཞེས་གྲགས་སྙན་གྱི་བ་དན་དཀར་བོ་སྲིད་པ་གསུམ་ན་མངོན་པར་གཡོ་བ་དཀྱིལ་འཁོར་འཁོར་ལོ་བྱེ་བའི་སྤྲོ་བསྡུའི་བྱེད་པོ་མཁས་ཤིང་གྲུབ་པའི་རིགས་དང་དཀྱིལ་འཁོར་ཀུན་གྱི་བདག་པོ་རང་ཅག་རྣམས་ཀྱི་མེ་ཏོག་ཕོག་པའི་ལྷ་སྐལ་གཅིག་བུ་སྐྱབས་གཅིག་མཐོང་བ་དོན་ལྡན་གོང་ས་ཐམས་ཅད་མཁྱེན་ཅིང་གཟིགས་པ་ཆེན་པོ༧རྗེ་བཙུན་བློ་བཟང་བསྟན་འཛིན་སེངྒེ་དཔལ་བཟང་བོ་དེ་ཉིད་ནི་དབང་ཕྱུག་ཅེས་པ་མེ་མོ་གླང་གི་ལོར་དཔའ་མཛངས་རྟུལ་ཕོད་སོགས་ཀྱིས་མཛེས་པའི་ཡབ་ཀླུ་འབུམ་བཀྲ་ཤིས་དང་། རྣམ་དཀར་གྱི་ལས་ལ་བརྩོན་པ་མི་དམན་ཞིང་བུད་མེད་ཀྱི་སྐྱོན་ལྔ་དང་བྲལ་བ་མཉེས་གཤིན་བྱམས་བརྩེའི་བདག་ཉིད་ཡུམ་སྒྲོལ་མ་འཚོ་སྟེ་ཡབ་ཡུམ་རིགས་རུས་ཆོ་འབྲང་ཕུན་སུམ་ཚོགས་པའི་རྒྱུད་དུ་ངོ་མཚར་བའི་ལྟས་མང་ཟད་མི་ཤེས་པ་དང་བཅས་ཏེ་ལྷར་བཅས་སྐྱེ་དགུ་ཡོངས་ཀྱི་མགོན་དུ་སྐུ་བལྟམས།

དེ་ནས་དགུང་ལོ་བཞི་བཞེས་པ་རྣམ་གནོན་ཞེས་པ་ལྕགས་ཕོ་འབྲུག་གི་ལོར་ལྷར་བཅས་སྐྱེ་དགུ་ཡོངས་ཀྱི་རལ་བའི་ཅོས་པཎ་གྱིས་ཉེ་བར་གཏུགས་པའི་ཡབ་རྗེ་གོང་མའི་མི་འཇིགས་གདོང་ལྔ་འབར་བས་བཏེགས་པའི་ཁྲི་འཕང་མཐོན་པོར་ཞབས་ཀྱི་པདྨོ་ཉེ་བར་བཀོད་དེ་རྫོགས་ལྡན་གསར་བའི་དགའ་སྟོན་མངོན་དུ་གྱུར།

དགུང་ལོ་བདུན་བཞེས་པ་ཉི་མ་ཞེས་གྲགས་པ་ཆུ་ལུག་ལོར་མཁས་གྲུབ་ཡོངས་ཀྱི་འཁོར་ལོས་བསྒྱུར་བ་ཆེན་པོ་བརྟན་མཁས་ཀྱི་ཡོན་ཏན་གཉིས་དང་ལྡན་པའི་མཁན་རིན་པོ་ཆེ་བློ་བཟང་ཐུབ་བསྟན་རྒྱ་མཚོ་དཔལ་བཟང་བོའི་ཞལ་སྔ་ནས་ངེས་པ་ལྔ་བྲལ་གྱི་སྒོ་ནས་འཆལ་ཚུལ་གྱི་རྒྱུན་སྡོམ་པར་བྱེད་པའི་དགེ་བསྙེན་དང་། བར་མ་རབ་བྱུང་གི་ཚུལ་ཁྲིམས་དགེ་ཚུལ་གྱི་སྡོམ་པ་རྣམ་པར་དག་པ་རྣམ་བྱང་ཞི་བ་མཆོག་གི་བདུད་རྩིའི་བགོ་སྐལ་ཐོག་མར་བཞེས་པའི་ཚུལ་མཛད་དེ་བསྲུང་བྱ་མཐའ་དག་མིག་གི་འབྲས་བུ་ལྟར་བསྲུང་བར་མཛད། དེ་ནས་མཁས་མཆོག་དབྱིག་གི་གཉེན་པོས། ཚུལ་གནས་ཐོས་དང་བསམ་ལྡན་པས། ། སྒོམ་པ་ལ་ནི་རབ་ཏུ་སྦྱོར། ། ཞེས་གསུངས་པ་ལྟར། མཚན་ཉིད་བཅུ་ལྡན་གྱི་ཐེག་པ་ཆེན་པོའི་དགེ་བའི་བཤེས་གཉེན་དག་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཏེ་ཕྲལ་སྦྱོར་གཉིས་ཀྱི་ཀློལ་ཚུལ་དང་ཆོ་ག་ཆོས་སྤྱོད་སོགས་ལ་ཞིབ་སྦྱངས་མཛད་ཐོག་ཀ་རི་ཀ་བཅུ་བ་ནས་རྒྱུད་རྒྱལ་གསང་བ་འདུས་པའི་བར་གྱི་བཀའ་པོད་ཆེན་པོ་ལྔ་དང་གསང་ཆེན་རྒྱུད་སྡེ་བཞི། རིག་པའི་གནས་ལྔ་སོགས་ལ་ཐུགས་སྦྱངས་རྡོ་རུས་ཐུག་པ་མཛད་དེ་གསེར་མདོག་ཅོད་པཎ་འཆང་བའི་བསྟན་འཛིན་མཁས་དབང་ཡོངས་ཀྱི་གཙུག་རྒྱན་ཟླ་མེད་པར་གྱུར།

དགུང་ལོ་བཅུ་དགུ་བ་མྱོས་བྱེད་ཅེས་པ་ཤིང་ལུག་ལོར་མཁས་གྲུབ་བྱེ་བའི་གཙུག་རྒྱན་རིགས་དང་དཀྱིལ་འཁོར་རྒྱ་མཚོའི་མངའ་བདག༧རྗེ་བློ་བཟང་བསྟན་པའི་དབང་ཕྱུག་ཚུལ་ཁྲིམས་ཕུན་ཚོགས་དཔལ་བཟང་བོའི་ཞལ་སྔ་ནས་སོ་ཐར་གྱི་བསླབ་གཞི་ཡོངས་སུ་རྫོགས་པའི་བདུད་རྩིའི་རྒྱུན་གྱིས་ཐུགས་ཀྱི་བུམ་བཟང་ཡོངས་སུ་བཀང་སྟེ་མཉམ་མེད་བུ་རམ་ཤིང་བའི་གདུང་འཚོབ་གཅིག་བུར་གྱུར། མགོན་པོ་གང་དེའི་ཞལ་སྔ་ནས་ལ་སོགས་པ་མཚན་ལྡན་བཤེས་གཉེན་དག་ལས་དཔལ་དུས་ཀྱི་འཁོར་ལོའི་བྱིས་པ་ལྟར་འཇུག་པའི་དབང་བདུན། གོང་མ་གོང་ཆེན། རྡོ་རྗེ་སློབ་དཔོན་བདག་པོ་ཆེན་པོའི་དབང་དང་བཅས་པ་མན་ངག་ཕྲ་ཞིབ་ཀྱིས་བརྒྱན་པ་དང་། མི་ཏྲ་བརྒྱ་རྩ། རྡོ་རྗེ་འཕྲེང་བ། རིན་འབྱུང་དང་རྒྱ་རྒྱམ་གཉིས་ལ་སོགས་པ་དབང་བཀའ་རྗེས་གནང་གི་སྐོར་དང་། ཁྲིད་ལུང་མན་ངག་གི་སྐོར་མཐའ་དག་བུམ་པ་གང་བྱོའི་ཚུལ་དུ་གསན་བཞེས་མཛད་དེ་ས་སྟེང་གི་རྒྱལ་བསྟན་ཡོངས་ཀྱི་བདག་པོ་གཅིག་བུར་གྱུར། གསེར་འཕྱང་མེ་བྱ་ལོར་འདུས་སྡེ་རིན་པོ་ཆེར་ཆུ་མཆོད་བྱེ་ཆེན་བརྒལ་བ་འབུལ་དུ་བཅུག་སྟེ། དེ་ནས་ལོ་ལྟར་ཆག་མེད་ཀྱིས་ས་ག་ཟླ་བའི་ཡར་ངོ་ཡོངས་རྫོགས་ལ་ཚོགས་མང་ནས་ཆུ་མཆོད་དང་མར་མེ་སྟོང་ཕྲག་བརྒལ་བ་འབུལ་བའི་སྲོལ་གསར་འཛུགས་མཛད། རྣམ་འཕྱང་ཞེས་པ་ས་ཁྱི་ལོར་རང་རེ་རི་བོ་དགེ་ལྡན་པའི་ཕ་ཆོས་ཐུན་མོང་མ་ཡིན་པ་རྒྱུད་སྡེ་གཞན་ལས་ཁྱད་ཆོས་ལྔ་སོགས་ཀྱིས་ཁྱད་པར་དུ་འཕགས་པའི་ཡི་དམ་རྡོ་རྗེ་འཇིགས་བྱེད་བཅུ་གསུམ་ལྷའི་འཁོར་ལོའི་བསྙེན་ཆེན་གྱི་གཞི་བཏིང་སྟེ་ཕག་ལོའི་ཟླ་བ་ལྔ་བའི་བཅོ་ལྔའི་ཟླ་བ་གཟའ་འཛིན་དུས་དངོས་གྲུབ་ཀྱི་རྫས་བསྒྲུབས་པས་ནང་མཆོད་ཁོལ་ཏེ་འཕྱུར་བ་སོགས་རྟགས་མཚན་མཐའ་ཡས་པ་བྱུང་།

དགུང་གྲངས་ཉེར་བརྒྱད་བཞེས་པ་ཤིང་འབྲུག་ལོར་དུས་འཁོར་གྲྭ་ཚང་ཨེ་ཝཾ་གཉིས་མེད་ཆོས་འཁོར་གླིང་གསར་འདེབས་མཛད་དེ་དཔལ་དུས་ཀྱི་འཁོར་ལོའི་དབང་ཆེན་བསྩལ། ཟམ་ཚ་རོང་འབྲོག་ཨ་ལ་དགོན་གྲོང་སོགས་ལ་དཔལ་དུས་ཀྱི་འཁོར་ལོ་སོགས་རྒྱུད་སྡེ་བཞིའི་དབང་ལུང་རྗེས་གནང་ཁྲིད་ལུང་མན་ངག་གི་ཆོས་ཆར་ཕབས་ཏེ་མཐོང་ཐོས་དྲན་རེག་གི་འབྲེལ་ཚད་དོན་ལྡན་དུ་མཛད་ཅིང་སྐུ་གསུང་ཐུགས་ཀྱི་ཆོ་འཕྲུལ་རྨད་དུ་བྱུང་བ་དང་། མངོན་ཤེས་གྲུབ་རྟགས་བསམ་ལས་འདས་པས་སྐྱེ་དགུ་མཐའ་དག་གི་དོན་གཉིས་ལྷུན་གྱིས་གྲུབ་པར་མཛད།

དེ་ལྟར་ཐོས་བསམ་སྒོམ་གསུམ་འཆད་རྩོད་རྩོམ་གསུམ་སོགས་རླབས་ཆེན་འཁོར་ལོ་གསུམ་གྱི་མཛད་འཕྲིན་ཉི་ཟླའི་འོད་ཀྱིས་ཡངས་པའི་ས་ཆེན་པོའི་ཁོར་ཡུག་ཀུན་ཏུ་ཁྱབ་པར་མཛད་དེ་དགུང་ལོ་རེ་གསུམ་པ་མྱོས་ལྡན་ཞེས་པ་ས་ཡོས་ལོའི་ཁྲུམས་ཟླའི་ཚེས་གཉིས་ཀྱི་ཉི་ཤར་དུས་རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར་དུ་འཇའ་འོད་ཀྱི་གུར་དང་། འབྲུག་སྒྲ་ལན་གསུམ་སྒྲོགས་པ་སོགས་ངོ་མཚར་བའི་ལྟས་དུ་མ་དང་བཅས་ཏེ་ཟླ་སྐུ་གཟི་འོད་འབར་བཞིན་དུ་སེངྒེ་ཉལ་བའི་སྟབས་སུ་བཞུགས་ཏེ་སྣང་མཆེད་ཐོབ་གསུམ་གྱི་སྟོང་བ་གསུམ་རིམ་གྱིས་ཐིམ་པའི་མཐར་ཐམས་ཅད་སྟོང་བ་འོད་གསལ་མངོན་དུ་མཛད་དེ་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་དུས་ཆེན་ཁྱད་པར་ཅན་དང་འབྲེལ་བར་བླ་མའི་སྐུ་དྲིན་དྲན་པའི་དད་གུས་དང་། དུས་ཆེན་གྱི་དགེ་རྩའི་འགྱུར་སོགས་ཐུགས་ལ་དགོངས་ཏེ་ཁྱེད་དགེ་འདུན་འདུས་པ་རྒྱ་མཚོའི་ཚོགས་ཀྱིས་ཐོས་བསམ་སྒོམ་པ་ཉམས་བཞེས་ཕྱག་མཆོད་སྐོར་བ་མཚན་མོ་གླིང་མེ་སྦར་བ་སོགས་སྐལ་ལྡན་དང་བ་འདྲེན་པའི་དམིགས་རྐྱེན་དུ་འགྲོ་ངེས་པ་རེ་ཞེས་ཀྱང་ཐུགས་རྗེ་གཟིགས་པར་ཞུ། ཞེས་པ་འདི་ནི་མདོ་སྔགས་རབ་འབྱམས་སྨྲ་བའི་རྡོ་རམས་པ་ལྷ་མོ་ཚུལ་ཁྲིམས་རྒྱ་མཚོས་སྤེལ་བ་དགེ་ལེགས་སུ་གྱུར་ཅིག །

འཇམ་དབྱངས་གྲགས་པས་གཏག་ནས་གནང་།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn 

བརྒྱུད་འགོད།