བསྡུས་གྲྭ་ཞེས་པ་གསུང་རབ་ཀྱི་བརྡ་དང་ཐ་སྙད་སྣ་ཚོགས་ཕྱོགས་གཅིག་ཏུ་བསྡུས་ཏེ་ཚད་མའི་རིགས་ལམ་ལ་བརྟེན་ནས་དཔྱོད་ཞིབ་གཏོང་བའི་བློ་རྩལ་སྦྱོང་བའི་རིག་གཞུང་ཞིག་གི་མིང་ཡིན་ལ། དེ་ནི་དུས་རབས་བཅུ་གཅིག་པའི་ནང་དུ་ཕྱ་བ་ཆོས་ཀྱི་སེངྒེས་ཚད་མའི་རིགས་ལམ་ལ་བརྟེན་ནས་སྲོལ་བཏོད་པའི་རིགས་འཕྲུལ་ཡ་མཚན་པ་གཞན་ལ་མེད་པའི་རིག་གནས་རྩ་ཆེན་ཞིག་ཡིན་ལ། བོད་ཀྱི་མཁས་པའི་ཕྱག་རྗེས་འཛམ་གླིང་དུ་ངོམ་ཆོག་པ་ཞིག་ཀྱང་ཡིན། དུས་རབས་སྔ་མའི་ལོ་རིམ་བརྒྱད་ཅུའི་ནང་ཐེ་ཝན་ཀྲུང་ཧྲན་སློབ་ཆེན་བོད་རིག་པར་ཞིབ་འཇུག་བྱེད་པའི་དགེ་རྒན་ཆེན་མོ་ཞིག་གིས་ང་ལ། ཁྱེད་ཅག་བོད་ཀྱི་རིག་གནས་ནང་གི་ཆེས་རྩ་ཆེན་ཚད་མ་རིག་པ་རེད་ཟེར། དེ་བདེན་ཏེ། མཱ་ཁེ་ཟི་དང་ཨིན་གེ་ཟི་གཉིས་ཀྱིས་སངས་རྒྱས་ཆོས་ལུགས་པ་ཚད་མ་རིག་པའི་ཐད་ནས་སྔོན་དུ་ཕྱིན་འདུག་ཅེས་བསྔགས་བརྗོད་བྱས་མྱོང་། ནུབ་ཕྱོགས་ཀྱི་མཚན་ཉིད་རིག་པའི་མཆེད་ཁུངས་ནི་ཀུ་རུ་ཟིའི་ཡུལ་ཡིན་ལ། དེའི་རིགས་འཕྲུལ་སྨྲ་བའི་མེས་པོ་སུ་ཁ་ར་ཏིས་རིགས་སྨྲའི་གཞུང་གི་རིགས་པའི་འགྲོ་ལུགས་དང་རང་རེའི་བསྡུས་གྲྭའི་རིགས་ལམ་གཉིས་ཀྱི་བར་ན་འདྲ་ས་མང་བ་ཧ་ལས་དགོས་པ་ཞིག་འདུག ཨ་རིའི་སི་ཏོད་ཀྱི་གཏན་ཚིགས་རིག་པའི་གཞུང་ནི་རྒྱ་གར་གྱི་གཏན་ཚིགས་རིག་པ་དང་འདྲ་ས་མང་བ་ཞིག་རེད་ལ་རྒྱ་གར་ནས་ཕར་མཆེད་པ་ཡིན་ཞེས་སྨྲ་མཁན་ཡོད་དོ། །དེ་ནི་དེང་སང་ནུབ་ཕྱོགས་ཀྱི་གཏན་ཚིགས་རིག་པའི་མཆེད་ཁུངས་གཅིག་པོ་རེད། ཕྱ་བ་ཆོས་སེང་གི་བསྡུས་གྲྭ་དང་ས་པཎ་གྱི་རིགས་གཏེར་གཉིས་བོད་ཀྱི་ཚད་མའི་རང་གཞུང་གི་ཐོག་མ་ཡིན་ལ། བོད་ཀྱི་མཁས་པས་འཛམ་གླིང་དུ་བཞག་པའི་རིག་གནས་ཀྱི་རྨད་དུ་བྱུང་བའི་ཕྱག་རྗེས་སུ་བརྩི་ཆོག   འཇིག་རྟེན་མིག་ཏུ་གྱུར་པའི་ཚད་མ་རིག་པ་འདི་གངས་ལྗོངས་སུ་དར་ཕྱིན་ཆད། བོད་ཀྱི་མཁས་པའི་སྐྱེ་བོ་རྣམས་ལ་རིགས་པའི་མིག་ཐོབ་ཅིང་རྨོངས་པའི་སྲོག་རྩ་གཅོད་པའི་རིགས་འཕྲུལ་གྱི་མཚོན་རྣོན་ཞིག་ལག་ཏུ་ཚུད་པ་དང་འདྲ་བར་བོད་འགྱུར་མདོ་སྔགས་གཞུང་ལུགས་གང་གི་ཐད་ནས་ཀྱང་འཐད་སྒྲུབ་ཀྱི་རིགས་པས་ཞུ་དག་བྱས་ནས་ཚིག་དང་དོན་གྱི་ཆ་ལ་སྔ་ན་མེད་པའི་ཞིབ་ཆ་དང་དག་ཆ་དེ་ཐོན། བོད་ཀྱི་ཤཱཀྱའི་རྗེས་འཇུག་མང་བོ་ཞིག་དབང་རྟུལ་དད་པའི་རྗེས་འབྲང་གི་ཁྱུ་ནས་བུད་དེ། འཛམ་གླིང་རྒྱན་དྲུག་མཆོག་གཉིས་སོགས་ནཱ་ལེནྡྲའི་མཁས་པ་རྣམས་ཀྱིས་སྲོལ་ཕྱེ་བའི་བདེན་གཉིས་ཀྱི་ཤེས་བྱ་ཐམས་ཅད་རྒྱུ་མཚན་ཡང་དག་གིས་གཏན་ལ་འབེབས་པའི་དབང་རྣོན་ཆོས་ཀྱི་རྗེས་འབྲང་གི་གྲལ་དུ་ཆུད་པ་དང་། ཐོས་བསམ་སྒོམ་པའི་ཐེམ་སྐས་རིམ་འཛེག་གི་རབ་བྱུང་རྣམས་ཀྱང་མ་ཎི་བགྲང་བའི་གྲོང་གི་རྒད་པོ་རྒན་མོ་རྣམས་ལས་ཁྱད་ཐོན་པ་དེ་ཚད་མའི་རིགས་ལམ་ལ་བརྟེན་པའི་མདོ་རྒྱུད་ཀྱི་གཞུང་ཆེན་པོ་རྣམས་ལ་བློ་མིག་ཕྱེ་བའི་དྲིན་ཡིན། ཆོས་ཀྱི་གྲགས་པས། སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས། །དོན་དུ་མི་གཉེར་ཁོ་ནར་མ་ཟད་ཕྲག་དོག་དག་གིས་སྡང་བར་ཡང་། །ཞེས་པ་ལྟར། དགྲ་འདུལ་གཉེན་སྐྱོང་དང་རྒྱུ་ནོར་སྡུད་ལེན་སོགས་ཕལ་བའི་ལས་ལ་དགའ་ན་དགའ། ཤེས་རབ་ཀྱི་རྩལ་མེད་ནའང་མེད། མདོ་སྡེའི་རྒྱན་དུ། རིན་ཆེན་རིགས་ལྡན་རིན་ཐང་མེད། །ལྟ་མི་ཤེས་པའི་མིག་མི་མགུ། །ཞེས་པ་ལྟར། ལེགས་བཤད་དོན་དུ་མི་གཉེར་ནའང་མ་གཉེར། འོན་ཀྱང་རང་གིས་མ་སྦྱངས་པ་དང་མི་ཤེས་པའི་རིག་གནས་དེ་མི་མཁོ་མི་དགོས་ཞེས་རྒྱུ་མཚན་ལྟར་སྣང་དུ་མ་བཀོད་ནས་བཀག་པ་དེ་མཁས་བླུན་སུ་ཡིན་ཡང་མི་འོས། ལོ་དུ་མའི་སྔོན་ལ་ཕྱི་རྒྱལ་དུ་སྡོད་པའི་བོད་ཀྱི་མཁས་པར་གྲགས་པ་ཞིག་ལྷོ་ནུབ་མི་རིགས་སློབ་གྲྭ་ཆེན་མོར་གཏམ་བཤད་མཛད་སྐབས་ཚད་མ་རིག་པ་མི་དགོས་ཞེས་བཤད་པས། ཉན་མཁན་གྱི་དགེ་སློབ་རྣམས་ཆ་ལྡིར་གྱིས་བགད་པའི་ཧབ་ཆ་བརྒྱབ་པ་ཐོས། མཁས་གཏམ་བརྒྱ་བཤད་ཀྱང་ཚིག་གཅིག་གིས་རང་གི་ཨོང་ལོ་ཕུད་པ་དེ་ལ་ཟེར་བ་ཡིན།  

ཐ་སྙད་ཚད་མ་མེད། རྣམ་གྲོལ་དོན་དུ་གཉེར་མཁན་ལ་ཚད་མ་མི་དགོས། ཞེས་པའི་གཏམ་དེ་གསར་བྱུང་མིན་ལ། བོད་གླེན་པའི་ཁྲོད་དུ་གནའ་ནས་ཡོད་པའི་ལྟ་ལོག་ཅིག་ཡིན་ལ། དེའི་ལན་རྗེ་ཡབ་སྲས་ཀྱིས་བཏབ་ཟིན་པས་ངེད་ཅག་གིས་ལན་འདེབས་པའི་ངལ་བ་བྱེད་མི་དགོས་ཏེ། མཁས་གྲུབ་རྗེའི་ཚད་མ་ཡིད་ཀྱི་མུན་སེལ་ལས། ཁ་ཅིག་ན་རེ། ཚད་མའི་བསྟན་བཅོས་འདི་དག་གྲོལ་བ་དོན་གཉེར་ལ་ཉེ་བར་མཁོ་བ་མ་ཡིན་ཏེ། རྟོག་གེའི་བསྟན་བཅོས་ཡིན་པས་ནང་རིག་པའི་སྡེ་སྣོད་ལས་ཕྱི་རོལ་དུ་གྱུར་པའི་ཕྱིར་རོ་ཟེར་ཏོ། །དེ་ལ་བཤད་པར་བྱ་སྟེ། དེ་ཡང་འདི་ལྟར་རྟོག་གེ་ཞེས་བྱ་བ་ནི་རྣམ་པ་གཉིས་ཏེ། ཕྱི་རོལ་བའི་སྟོན་པ་དྲང་སྲོང་གླིང་སྐྱེས་ལ་སོགས་པས་རྟོག་པས་བཏགས་པ་ཙམ་གྱི་སྒོ་ནས་བཞག་པའི་རྟོག་གེ་དང་། ཡང་མདོ་སྡེའི་རྒྱན་ལས། རྟོག་གེ་རྟེན་ཅིང་མ་ངེས་ལ། །མ་ཁྱབ་ཀུན་རྫོབ་སྐྱོ་བ་ཅན། །བྱིས་པ་ལ་ནི་བརྟེན་པར་འདོད། །ཅེས་བཤད་པ་ལྟར། དངོས་པོའི་དེ་ཁོ་ན་ཉིད་དོན་སྤྱི་ཙམ་བཟུང་བའི་སྒོ་ནས་ངེས་དགོས་ཀྱི། མངོན་དུ་མ་གྱུར་པ་ལ་རྟོག་གེར་བྱས་པའོ། །དེའི་ཕྱིར་དེ་དག་སྟོན་པའི་བསྟན་བཅོས་ལ་ནི་རྟོག་གེའི་བསྟན་བཅོས་ཞེས་བྱའོ། །ཚད་མའི་བསྟན་བཅོས་འདི་དག་འཇོག་མཚམས་སྔ་མའི་དབང་དུ་བྱས་པའི་རྟོག་གེ་བསྟན་བཅོས་ཡིན་པར་ཁྱེད་རང་ཡང་མི་འདོད་ལ། རིགས་པས་ཀྱང་མ་གྲུབ་སྟེ། རང་གི་སྟོན་པ་ཐམས་ཅད་མཁྱེན་པའི་རྗེས་སུ་འབྲངས་ནས་བཞག་པའི་བསྟན་བཅོས་ཡིན་པའི་ཕྱིར་རོ། །འཇོག་མཚམས་གཉིས་པའི་དབང་དུ་བྱས་པའི་རྟོག་གེ་ཡིན་པས། གྲོལ་བ་དོན་གཉེར་ལ་མི་མཁོ་བར་འདོད་ན། སྦྱོར་ལམ་ཆོས་མཆོག་མན་ཆད་གྲོལ་བ་དོན་གཉེར་ལ་མི་མཁོ་བར་འགྱུར་ཏེ། ཆོས་ཉིད་དོན་སྤྱིའི་ཚུལ་གྱིས་རྟོགས་དགོས་པའི་ཕྱིར་རོ། །ཚད་མ་ནང་རིག་པའི་བསྟན་བཅོས་མ་ཡིན་པར་འདོད་པ་ཡང་མི་འཐད་དེ། ནང་རིག་པའི་བསྟན་བཅོས་ཞེས་བྱ་བ་ནི། སྤང་བྱ་མ་རིག་པ་སྤང་བ་དང་། གཉེན་པོ་བདག་མེད་རྟོགས་པའི་ཤེས་རབ་སྐྱེད་པའི་ཐབས་སྟོན་པའི་བསྟན་བཅོས་ལ་བརྗོད་པ་ཡིན་ལ། ཚད་མའི་བསྟན་བཅོས་འདི་དག་ལས་ཀྱང་། གང་ཟག་དང་ཆོས་ཀྱི་བདག་མེད་གཏན་ལ་ཕབ་ནས་ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པའི་ཕྱིར་རོ། །དེ་ཙམ་གྱིས་ནང་རིག་པར་མི་འགྱུར་ན། ནང་རིག་པའི་སྡེ་སྣོད་གང་ཡིན་སྨྲོས་ཤིག ཅེས་གསུངས་སོ། །རྗེ་བདག་ཉིད་ཆེན་པོས་རྟོགས་བརྗོད་མདུན་ལེགས་མར། བྱང་ཕྱོགས་འདི་ན་ཚད་མའི་གཞུང་ལུགས་ལ། །སྦྱངས་དང་མ་སྦྱངས་དུ་མས་མགྲིན་གཅིག་ཏུ། །མདོ་དང་སྡེ་བདུན་ཀུན་ལ་བྱང་ཆུབ་ཏུ། །བགྲོད་པའི་ཉམས་ལེན་རིམ་པ་ཡོད་མིན་ཟེར། །འཇམ་པའི་དབྱངས་ཀྱིས་ཕྱོགས་ཀྱི་གླང་བོ་ལ། །དངོས་སུ་འདི་རྩོམས་འདི་ནི་མ་འོངས་དུས། །འགྲོ་བ་ཀུན་གྱི་མིག་ཏུ་འགྱུར་རོ་ཞེས། །གསུང་གི་གནང་བ་སྩལ་བའང་ཚད་མར་བྱེད། །དེ་ནི་མི་རིགས་སྨྲ་བའི་ཕུལ་བྱུང་དུ། །མཐོང་ནས་ལྷག་པར་ཚུལ་དེར་དཔྱད་པ་ན། །ཚད་མ་ཀུན་ལས་བཏུས་པའི་མཆོད་བརྗོད་དོན། །ཚད་མ་གྲུབ་པར་ལུགས་འབྱུང་ལུགས་ལྡོག་གིས། །རྣམ་གྲོལ་དོན་དུ་གཉེར་ལ་བཅོམ་ལྡན་འདས། །ཚད་མར་བསྒྲུབས་ཤིང་དེ་ལས་དེ་ཡི་ནི། །བསྟན་པ་ཁོ་ན་ཐར་འདོད་འཇུག་ངོགས་སུ། །ངེས་པ་གཏིང་ནས་རྙེད་པས་ཐེག་གཉིས་ཀྱིས། །ལམ་གྱི་གནད་ཀུན་འདྲིལ་བར་རིགས་ལམ་ནས། །ལེགས་པར་ཐོན་པས་ལྷག་པར་དགའ་བ་རྙེད། །ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །ཞེས་གསུངས། 

ཚད་མ་མི་དགོས་ཞེས་པའི་གཏམ་དེ་གྲུབ་མཐའི་ཕྱོགས་རིས་མིན་ཏེ། བཀའ་གདམས། དགེ་ལུགས། ས་སྐྱ་བ་མ་བཤད། ཉམས་ལེན་གཙོ་བོར་བྱེད་པའི་བཀའ་བརྒྱུད། རྙིང་མ་དང་། ཇོ་ནང་གི་མཁས་པའི་ཁྲོད་ན་ཡང་ཚད་མའི་རིགས་ལམ་ལ་མཁས་ཤིང་ཚད་མའི་གསུང་རྩོམ་མཛད་པ་ཡོད་དེ། དཔེར་ན་ཀརྨ་མི་བསྐྱོད་རྡོ་རྗེའི་རྣམ་འགྲེལ་ཊཱིཀ་ཆེན་དང་། རྙིང་མའི་མཁས་གྲུབ་ཆེན་པོ་འཇུ་མི་ཕམ་པའི་རྣམ་འགྲེལ་ཊཱིཀྐ་དང་། བསྡུས་ཚད་སྨྲ་བའི་སྒོ་འབྱེད། ཇོ་ནང་འབའ་མདའ་ཐུབ་བསྟན་དགེ་ལེགས་རྒྱ་མཚོའི་བསྡུས་གྲྭའི་འགྲེལ་ཆེན་སོགས་གྲགས་ཆེ་ལ། ཆོས་བརྒྱུད་གྲུབ་མཐའ་སོ་སོར་དབང་རྣོན་ཆོས་ཀྱི་རྗེས་འབྲང་གི་མཁས་པ་ཡོད་པའི་ཕྱིར་རོ། །          

སངས་རྒྱས་ཀྱི་ཆོས་ལུགས་འདི་ཀུན་མཁྱེན་གྱི་གོ་འཕང་དོན་དུ་གཉེར་བ་མཐར་ཐུག་གི་དམིགས་ཡུལ་ཡིན་པས། འཇིག་རྟེན་གྱི་རིག་གནས་ལ་དགོས་དང་མི་དགོས་མེད་པར་ཐམས་ཅད་ཤེས་བྱ་དང་ཤེས་དགོས་པ་དང་བསླབ་དགོས་པ་ཤ་སྟག་ཡིན། དེ་ཡང་རྗེ་བཙུན་བྱམས་པས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འཐོབ་སྟེ། །དེ་བས་གཞན་དག་ཚར་གཅོད་རྗེས་སུ་འཛིན་ཕྱིར་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེར་བརྩོན་བྱ། །ཞེས་གསུངས་པའི་ཚིག་རྐང་སྔ་མ་གཉིས་ཀྱིས་དོན་དུ་གཉེར་བྱ་མཐར་ཐུག་ཀུན་མཁྱེན་རྒྱལ་བའི་གོ་འཕང་ཡིན་པ་དང་། དེའི་རྒྱུ་སྒྲུབ་པ་ལ་རིག་པའི་གནས་ལྔས་མཚོན་པའི་རིག་གནས་བཅུ་དང་རིག་གནས་ཀུན་ལ་སྦྱངས་དགོས་པ་དང་མཁས་དགོས་པར་བསྟན། ཚིག་རྐང་ཕྱི་མ་གཉིས་ཀྱིས་རིག་གནས་ལ་ལོག་སྨྲ་ཚར་གཅོད་པའི་རིག་གནས་དང་། གདུལ་བྱ་རྗེས་འཛིན་རིག་གནས་དང་། རང་ཉིད་ཤེས་བྱ་ཀུན་ཤེས་པའི་རིག་གནས་ཀྱི་དབྱེ་བ་བསྟན་ཏོ། །དེ་ཡང་ལོག་སྨྲ་ཚར་གཅོད་ཀྱི་བྱེད་ལས་ལྡན་པའི་སྒྲ་དང་ཚད་མ། གདུལ་བྱ་རྗེས་འཛིན་གྱི་བྱེད་ལས་གཙོ་བོར་བྱེད་པའི་བཟོ་དང་གསོ་བ། རང་ཉིད་ཀུན་མཁྱེན་སྒྲུབ་པ་ལ་མེད་དུ་མི་རུང་བའི་ཤེས་བྱ་ནང་དོན་རིག་པ་སྟེ་ལྔའོ། །དེ་ནང་གི་ནང་དོན་རིག་གནས་རྩ་བ་དང་། གཞན་དག་དེའི་ཡན་ལག་ཡིན། ཁ་ཅིག་གིས་ཚད་མ་ནི་མུ་སྟེགས་རྒོལ་བ་བཟློག་པའི་གཞུང་ཡིན་པས། བོད་ན་མུ་སྟེགས་ཕྱི་རོལ་བ་མེད་པས་ཚད་མ་མི་དགོས་སོ་ཞེ་ན། མུ་སྟེགས་ཕྱི་རོལ་བ་མེད་ན་རང་གི་སེམས་ན་མུ་སྟེགས་པའི་ལྟ་བ་མེད་དམ། ལྟ་ལོག་ལྔ་མེད་དམ། ཡོད་ན་དེ་དག་ཤེས་པ་ཚད་མས་དམིགས་ཕྱེ་ནས་སྤངས་མི་དགོས་སམ། ཚད་མ་བསླུ་མེད་ཅན་ཤེས་པ། །ཞེས་གསུངས་པས། སྤྱི་ཚོགས་ཀྱི་འཚོ་བའི་ནང་བསླུ་བའི་འཁྲུལ་ཤེས་དང་། མི་བསླུ་བའི་ཤེས་པ་ཚད་མ་གཉིས་སོ་སོར་འབྱེད་མི་དགོས་སམ། ཞེས་པའི་འགལ་ཁུར་མང་དུ་འབབ། ཀུན་མཁྱེན་གྱི་གོ་འཕང་སྒྲུབ་པ་ལ་རིག་གནས་གང་ཡང་ཤེས་དགོས་ཤིང་བསླབ་དགོས་ཏེ། ས་པཎ་གྱིས། མ་བསླབ་པ་ལ་ཀུན་མཁྱེན་དུ། །འགྲོ་ན་རྒྱུ་འབྲས་ག་ལ་བདེན། །གསུངས་པས། རང་བཞིན་གནས་རིགས་ཡོད་པ་ཙམ་གྱིས་འཚང་མི་རྒྱ། ཐོས་བསམ་སྒོམ་གསུམ་གྱི་ཤེས་རབ་བསྐྱེད་ཅིང་བསོད་ནམས་ཀྱི་ཚོགས་བསྒྲུབས་ཏེ་རྒྱས་འགྱུར་གྱི་རིགས་སྤེལ་དགོས། ཐོས་བསམ་གྱི་ས་བོན་མ་བཏབ་པར་སྤང་གི་ཤ་མོ་བརྡོལ་བ་བཞིན་འཚང་མི་རྒྱ། མདོ་ཡི་ཞི་ལྷག སྔགས་ཀྱི་རིམ་གཉིས། ཕྱག་ཆེན། རྫོགས་ཆེན་གང་སྒོམ་ཡང་སྤྱི་དང་བྱེ་བྲག་གི་གཞུང་ལ་ཐོས་བསམ་གྱི་སློབ་སྦྱོང་གི་སྔོན་འགྲོ་དེ་སྔོན་འགྲོ་གཞན་ལས་ཀྱང་གལ་ཆེ་སྟེ། སེམས་ཀྱི་ནང་དུ་ནག་ལྡིབས་སེའི་བླུན་སྒོམ་གྱིས་རྟོགས་པ་བརྙེས་ན་དགུན་གསུམ་ཚང་དུ་ཡིབས་པའི་འཕྱི་བ་ཡང་གྲུབ་པ་ཐོབ་ངེས། གཞུང་ལ་ཐོས་བསམ་བྱེད་དགོས་ན་བླུན་པོའི་མ་བཅོས་ཤེས་པ་གཉུག་མས་གོ་མི་ཆོད། མངོན་སུམ་རྗེས་དཔག་གི་ཚད་མ་རིག་པས་བླང་དོར་དགག་སྒྲུབ་གྱི་ཤན་འབྱེད་ཤེས་དགོས། དེ་ཡང་ཚད་མའི་གཞུང་ལ་འཇུག་པའི་འཇུག་སྒོ་ལྟ་བུ་ནི་བསྡུས་གྲྭའི་རིགས་ལམ་ཆེ་འབྲིང་ཆུང་གསུམ་ཡིན། དེ་ལ་རིགས་པའི་མངོན་པ་དང་། གསུང་རབ་སྤྱིའི་དགོངས་འགྲེལ། རྒྱལ་བའི་གཞུང་གི་གསང་མཛོད་འབྱེད་པའི་ལྡེ་མིག་སོགས་མིང་གི་རྣམ་གྲངས་དུ་མ་ཡོད། བོད་བརྒྱུད་ནང་བསྟན་གྱི་བཤད་གྲྭ་རྣམས་སུ་བྱིས་པ་ཁ་དམར་རྣམས་ཀྱང་ཐལ་ཕྱིར་དང་ཁྱབ་མ་ཁྱབ་ཟེར་ཤེས་པ་བོད་བརྒྱུད་ནང་བསྟན་གྱི་གཟི་བརྗིད་དང་ངོ་སོ་ཡིན། སྔོན་ཆད་གྲུབ་མཐའ་སོ་སོའི་མཁས་པ་རྣམས་ཀྱང་རང་ལུགས་ཀྱི་ལྟ་སྒོམ་སྤྱོད་གསུམ་གྱི་གཞུང་ལ་དཔེ་ལྟོས་སྦྱངས་པ་བྱེད་པ་མ་གཏོགས་གྲུབ་མཐའ་གཞན་གྱི་གཞུང་ལུགས་ལ་ལྟ་རྟོག་མི་བྱེད། གྲུབ་མཐའ་ནང་གསེས་ཀྱང་རང་གི་གྲྭ་ཚང་གི་ཡིག་ཆ་མ་གཏོགས་ཡིག་ཆ་གཞན་ལ་ལྟ་རྟོག་མི་བྱེད། དེའི་གནད་ཀྱིས་མ་རྟོགས་པ་དང་ལོག་པར་རྟོག་པས་གྲུབ་མཐའི་ཕྱོགས་ཞེན་དང་ཡིག་ཆའི་ཕྱོགས་ཞེན་བྱུང་བ་རེད་། དེ་ནི་མི་རིགས་པ་ནང་གི་མི་རིགས་པ་ཆེན་པོ་ཞིག་ཡིན་པར་སྣང་ལ། རིག་གནས་ཀུན་ཤེས་དམིགས་ཡུལ་དུ་བྱེད་པའི་མཁས་པ་རྣམས་ཀྱིས་གྲུབ་མཐའ་གཞན་གྱི་གཞུང་ལུགས་དང་། ཡིག་ཆ་གཞན་གྱི་འདོད་ཚུལ་སོགས་མ་ཤེས་ན་ཀུན་མཁྱེན་གྱི་དམིགས་ཡུལ་དང་རྒྱབ་འགལ་དུ་གྱུར་ཅིང་། ཁྲོན་པའི་སྦལ་པར་འགྱུར་ཉེན་ཡོད་པས། རིག་གནས་དེ་དགོས། རིག་གནས་འདི་མི་དགོས་ཞེས་མི་བསམས་ཤིང་མ་སྨྲས་པར་། ལྟ་རྒྱ་ཐོས་རྒྱ་མུ་མེད་ནམ་མཁའ་ལྟར་རྒྱ་བསྐྱེད་དགོས་པར་བསམས་སོ། །ཞེས་པ་དོར་ཞིའི་སེམས་ཁོང་ནས་བརྡོལ་བའི་གཏམ་མོ། །

གསལ་འདེབས།རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།རྩོམ་ཁུངས།རྩོམ་འདིའི་སྦྲེལ་ཐགhttp://www.tb1025.cn