སྐུ་འབུམ་གྱི་མེ་ཏོག་མཆོད་པ་ལ་བསྔགས་པ་པདྨ་དཀར་པོའི་འཁྲི་ཤིང་ཞེས་བྱ་བ།
༄༅༎བློ༵་བཟ༵ང༷་རྒྱལ་བའི་རང་བསྟན༷་ཞེས།།
བཤད༷་སྒྲུ༷བ༷་འཕྲི༵ན་ལ༵ས་མཛོད་འཛི༷ན་པ།།
ལུས་ཅན་རྒྱ༷་མ༷ཚོ་འདྲེན་པའི་མགོན།།
ལྷུ༵ན་གྲུ༵བ་ཆོ༵ས་ཀྱི༵་རྒྱ༵ལ་མཚ༵ན་མཆོད།།
སྟོན་མཆོག་ཉི་མ་བརྒྱ་ཡི་བྱི༷ན།།
བྱི༷ན་རླབས་གཅིག་ཏུ་འཁྱིལ་བའི་དཔ༷ལ།།
དཔ༷ལ་ལྡན་ས་གསུམ་གྲགས་པའི་མགོ༷ན།།
མགོ༷ན་ཁྱོད་ཚེ་རབས་གཏན་གྱི་སྐྱབས།།
དྭངས་བསིལ་ཡན་ལག་བརྒྱད་ལྡན་ཆབ།།
ལྷུན་གྲུབ་ནམ་མཁའི་ནགས་ཀློང་ཆེ།།
དམ་པའི་ཕྱག་རྒྱུན་མ་ཉམས་པ།།
བྱིན་རླབས་འོ་མའི་མཚོ་ཆེན་འཕྱུར།།
མར་བཟོས་མེ་ཏོག་མཆོད་པ་ཡང་།།
བློ་བཟང་ཐུབ་པའི་རིང་ལུགས་ཞེས།།
དགེ་ལེགས་ནམ་མཁའ་མཛོད་ཀྱི་སྤུན།།
ཟག་མེད་བདུད་རྩིའི་གཏེར་དུ་གྲུབ།།
བཤད་སྒྲུབ་ནོར་བུའི་འཁྲི་ཤིང་གི།
ལི་ཁྲིའི་ཆུ་གཏེར་གཡོ་བའི་རླབས།།
ཕན་བདེ་རྒྱལ་མཚན་འཛིན་པའི་རྗེ།།
གྲགས་སྙན་འོག་མིན་ཞིང་ན་ལྡིར།།
དཔྱིད་ཀྱི་འཛིན་མར་སྣུམ་གྱིས་མཛེས།།
དབྱར་གྱི་མཁའ་ལ་འཇའ་ཚོན་བཀྲ།།
སྟོན་གྱི་དལ་འགྲོས་མཆོད་ཡོན་བཤམས།།
དགུན་གྱི་ཤིང་ལའང་མེ་ཏོག་བཞད།།
ཨེ་མ་ཁྱོད་སྐུ༵་ལྗོན་པའི་གཟུགས།།
དགེ་མཚན་འབུ༵མ་གྱིས་འཛུམ་པའི་ཞལ།།
ཆུ་བུར་མིག་གཟི་འཕྲོག་པའི་དཔལ།།
སྲིད་ཞིའི་རྒྱན་དུ་བྱོན་པ་ལེགས།།
ལྷག་ཏུ་ཙན་དན་སྨན་གྱི་ལྗོན།།
ཡལ་འདབ་གསེར་གྱི་གཏམ་རྒྱུད་ཅན།།
སྣང་མཐའི་སྒྱུ་འཕྲུལ་ཐུགས་རྗེའི་སྤྱན།།
ལྗོངས་འདིར་བསམ་བཞིན་གཟིགས་པ་བདེན།།
བློ༵་བཟ༵ང་བློ༷་ཡིས་ལེགས་བྲིས་ལྗོན།།
ཨ༷་མར་ཨ༷་མཚར་གསུང་འབྱོན་པ།།
གྲག༷ས་སྙན་གྲག༵ས་པ༵་འབར་བའི་རྟེན།།
ཞ༷ལ་ཐང་ཞ༷ལ་ཁྱིམ་མཇལ་བས་སྤྲོ།།
སྟོན་པའི་ཞལ་ནས་གསུངས་པའི་བཀའ།།
འཇམ་དཔལ་མཚན་མང་བརྗོད་པའི་ཆོས།།
གཟིགས་དཔེ་གསེར་གྱི་་གླེགས་བམ་གྱི།།
བྱིན་རླབས་དྲོད་རླངས་འཕྱུར་བར་མཇལ།།
དེའི་ཕྱིར་ཁྱོད་ཞལ་མཐོང་དང་ཐོས།།
དྲན་དང་རེག་པའི་ཆ་ཡིས་ཀྱང་།།
སྲིད་པ་ཧྲུལ་བོར་བྱེད་འགྱུར་ཞེས།།
དད་འདུས་མུ་ཏིག་ཕྲེང་རྒྱུད་འཛིན།།
མེ་ཏོག་མན་ཌལ་སྤུངས་པའི་སྡེ།།
རྣམ་དཀར་ཕུན་ཚོགས་སྟོང་གི་ཟླ།།
རྒྱུ་སྐར་ཕྲེང་ཐག་ཆད་པ་བཞིན།།
མཐོང་ན་དད་པའི་སྤུ་ལོང་གཡོ།།
སྣང་གསལ་ཉི་ཟླའི་དཔལ་འབར་ཞིང་།།
ཕྱག་གི་འཁྲི་ཤིང་གཡོ་བའི་གར།།
གཟུངས་སྔགས་དབྱངས་སུ་གྱེར་བའི་ཚུལ།།
ཕན་ཚུན་འགྲན་པའི་ཟོལ་གྱིས་ལྡེམ།།
སྤོས་ཀྱིས་བརྟས་པའི་གླང་བོའི་ཁ།།
སྙིམ་པད་ཁམ་བུའི་དོག་པ་ཅན།།
མཁའ་ལྡིང་གཤེགས་པའི་སྟངས་སྟབས་སུ།།
བཞུད་པའང་རྡོ་ལ་རི་མོར་གསལ།།
ཀུན་རྟོག་ངག་རིག་སྤྲིན་ཕུང་ལས།།
དད་གསུམ་སྙན་ཚིག་ཟིམ་ཆར་གྱིས།།
ཉེས་བཤགས་གཤིན་ས་སྣུམ་པོའི་གཞིར།།
ཁྱོད་ཞབས་པདྨོའི་ཞལ་མཐོང་ཤོག།
ཅེས་གདན་ས་ཆེན་པོ་རྗེ་སྐུ་འབུམ་བྱམས་པ་གླིང་གི་མེ་ཏོག་མཆོད་པ་ལ་མཇལ་སྐབས་སྔར་མེད་མི་ཚོགས་འཕེལ་བའི་ཚུལ་ལ་དམིགས་ཏེ།འཇམ་མགོན་བླ་མའི་གདན་སའི་རྟེན་གསུམ་དང་སྦྱར་བའི་སྙན་ཚིག་པདྨ་དཀར་བོའི་འཁྲི་ཤིང་འདི།བོད་རབ་གནས་ཆུ་སྟག་སྟེ། ཕྱི་ལོ༢༠༢༢ལོའི་ཟླ༡ཚེས༢༥ཉིན་རྨོངས་རྒན་གྱི་ན་བ་གནམ་ལྷ་བཀྲ་ཤིས་ཀྱིས་གུས་པས་སྨོན་པ་དགེའོ།།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག
དྲ་བའི་སྦྲེལ་ཐགhttp://www.tb1025.cn