ངང་ཚུལ་གསོན་པོ།
སྡོང་ལོ་སྐམ་པོ་རླུང་གིས་ཕྱོགས་སུ་གྱེས། །
རྩྭ་དང་འཇགས་མའང་དེ་བཞིན་རང་དབང་བྲལ། །
སེམས་ཀྱི་རྣམ་རྟོག་འདི་ལ་ཚོད་མེད་པས། །
དམིགས་པའི་གཏད་སོ་ཞིག་ལ་གནས་ཐབས་མེད། །
དུག་གསུམ་དབང་ཐང་དར་བའི་ཁུག་སོ་ན། །
བྱིང་རྒོད་བདུད་ཀྱི་ཁ་རླངས་ཕྱོགས་བརྒྱར་ཐལ། །
བློ་མང་ངན་པའི་སྙིང་ལ་ནད་ཐེབས་པས། །
ཆོས་བརྒྱད་ཁ་ནས་འདི་ཕྱི་རླུང་ལ་བསྐུར། །
ཕྱི་ཡི་འཚམ་ཐོ་རི་ལྟར་ཕུངས་ན་ཡང་། །
ནང་གི་རྣམ་རྟོག་སྟོང་གསུམ་ཁྱོན་དུ་མྱུལ། །
ཁ་ནས་སྔགས་ཀྱི་བཟློ་བའང་རྒྱུན་ཆད་པས། །
བཅོས་མའི་འཚམ་པ་ཞིག་གི་རང་མཚང་བརྡོལ། །
དོན་མེད་སྟོང་སེམས་ངང་ནས་ཉིན་མཚན་འདས། །
སྒོམ་འབྲས་འཛིན་རྒྱུ་མེད་པས་ལོ་ཟླ་ཡལ། །
ད་ནས་ནམ་ཞིག་མེད་འགྲོ་མི་ཤེས་པས། །
ཤག་ཤག་ཕྲེང་བ་ཟད་པས་ཅི་ཞིག་འགྲུབ། །
ཅེས་པ་འདི་ཡང་བསྙེན་པའི་སྐབས་སུ་སེམས་ཀྱི་རྣམ་རྟོག་མང་དྲགས་པའི་རྐྱེན་གྱིས་ཐུན་མཚམས་ཤིག་ཏུ་དགེ་མིང་སི་མ་ཏི་ཤཱི་ལའམ་ཕྱོགས་སྟོན་གྱིས་བྲིས་པའོ། །
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག
དྲ་བའི་སྦྲེལ་ཐགhttp://www.tb1025.cn