ཀྱེ་མ་ཀྱེ་ཧུད། 

              ངས་མི་ལོ་མང་བོའི་རིང་ལ། 

          འདི་ལྟར་བསམ་བློ་ཞིག་མ་བཏང་བ་འདྲ།

                   ད་ནི་རྐྱེན་དབང་གིས་བློ་ཡུལ་དུ་འཁོར་བ་ནི།

                འདི་ལྟར་རེད་དེ།

                      གསལ་ལ་མི་གསལ་བའི་རང་སྣང་གི་འཇིག་རྟེན་ནི

                 དལ་ཅག་གེར། འཇམ་ཐིངས་ངེར།

                                      རྒྱ་མཚོ་བཞིན་རླབས་རིས་ཉིལ་ལེར། 

                            སྟོང་འདང་དང་རྨི་ལམ་ཁྲོད་ཀྱི་རེ་བ་ནི། 

                        རྒྱང་རིང་རྒྱང་རིང་ན་འོད་ཀོར་ཙམ། 

                    ཚུར་ཚུར་འོངས་པ་ནི།

            ཉི་གཞོན་་མཚོ་ལ་ལྷུང་བ་ལྷུང་བ་ལྟ་བུའི་ཟིན་མེད་ཀྱི་ཟེགས་མ་ཙམ།                                 དབྱིབས་རིས་ལས་མཐོང་བ་ནི།

               གནས་མལ་གཅིག་ཏུ་སྡོད་མི་བཏུབ་པའི་སྐད་ཅིག་མའི་འགྱུར་བ་ཙམ། 

                                               རེ་བའི་འོད་ཀོར་གྱིས་བསྩལ་པ་ནི། 

                སྐྱི་གཡའ་བའི་འཇིགས་རུང་གི་རླབས་རྩེ་ན།

                                            སིབ་སིབ་ཀྱི་ཝུ་བ་ཙམ།

                                                   དེ་དང་མཉམ་དུ་གཡོ་བ་ནི། 

           ཡིད་རྟོན་མི་རུང་བའི་ཚེ་སྲོག་གིས་འཚོ་བའི་ཕུང་བོ་འདི་རེད།

                 དོན་དངོས་སུ། འདི་ནི་འཇིགས་སྐྲག་གིས་འཕྱོ་བའི་ལུས་ཀྱི་གྲུ་རྫིངས། 

                               ཡིན་ནའང་ཁོ་ལ་ཞིབ་ཏུ་བལྟས་ན། འཐོར་ལ་ཁད། 

                                                      ཞིག་ལ་ཁད། 

                                                     ཡལ་ལ་ཁད་ཀྱི་དངོས་པོ། 

                                             གདོས་བཅས་ཀྱི་ཕུང་བོ། 

                                         ཚུ་རོལ་ཙམ་མཐོང་བ་དག་ལ།

                                   སྣང་བ་བན་བུན་པ་དང་མཉམ་དུ་

                              མེ་ཏོག་ལྟར་མཛེས་ནའང་།

                               གང་ལ་བལྟས་ཀྱང་། 

                          ཞིབ་ཏུ་བརྟག་ན།

                                ལྗན་ལྗིན་དང་རྣག་ཁྲག་གིས་ཁེངས་པའི་གོང་བུ་ཙམ།

                      ནམ་རྒྱུན་མི་བཟད་པའི་གདོན་གྱིས་ཉེ་བར་གཙེས་ནའང། །

                  སྣེ་འདུས་ཀྱི་སྐྱུགས་བྲོ་བའི་་དྲི་མནམ་པ་མི་བཟོད་ནའང་།

              དེ་དང་འབྲལ་འདོད་མེདཔ་ཙམ་དུ་མ་ཟད།

      ད་རུང་ཕག་པས་འམ་རྫབ་ཀྱི་དཔེ་བཞིན།

                                          ཞེན་ཅིང་འཁྲེན། 

མགོ་ནས་མཇུག་བར་མི་གཙང་བའི་འདམ་གྱིས་སྦགས་ནའང་།

                    དེ་ལ་མི་གཙང་བར་ངོ་མི་ཤེས་པ་འདི་ལ་ཞེ་རེ་ནོངས། 

                          ཞེན་པ་ནི་རྣོ་སྐུད་ལྟར་དབལ་ཚ།

        ཞིབ་ཏུ་བསམ་ན།  དེ་ལྟར་འཁྲེན་དགོས་པ་ནི

             ཞེན་ཆགས་ཀྱི་ཀློང་ན་ཁུ་སིམ་མེརསྡོད་པ་མང་དྲགས་པས། 

        ལར་ང་ཚོར་ཐོབ་པའི་དངོས་པོ་འདིས།

                        བྱང་གྲོལ་གྱི་ལམ་བཟང་སྟེར་ནའང་།

                                         ད་ལྟའི་གནས་བབས་ལ་བལྟས་ན། 

                             ཡ་ཆུང་གི་སེམས་པ་དང་གླན་རྒྱུ་ནི།

                                      གློག་གི་བརྙན་རིས་ལ་བལྟ་བ་དང་ཅི་ཁྱད། 

                                                     དོན་དངོས་སུ་རེ་བའི་ཉི་མ་ནི།

                                      ལུས་ཀྱི་གྲུ་རྫིངས་དང་ཁད་ཉེ་བར་ཡོད་ནའང། 

                         རང་སེམས་གྲུ་རྫིངས་ཀྱི་ཁ་ལོ་ནི་བྱང་ནས་་བྱང་དུ་སྐྱོད། 

                                    རྔམ་ཤིན་ཏུ་མཐུག་པའི་རྨག་ནག་གི་ཆར་སྤྲིན་ནི།

                              གཤིན་རྗེའི་བཙན་རྫོང་ལས་གཞན་དུ་མེད། 

                         ད་ནི་མྱ་ངམ་གྱི་ཐང་ཆེན་ལྟ་བུའི་ཟད་དུ་མེད་པ་ནི། 

                    རྟག་པར་རློམ་པའི་འཁྲུལ་སྣང་གི་འཇིག་རྟེན་ཙམ།

          ནམ་ཞིག་གཤིན་རྗེའི་རྡུལ་ཕྲན་གྱིས་མི་རློག་པའི་ངེས་པ་ནི་ཅི་ཆ།

                                                 ཚེ་སྲོག་ནི་རླུང་ནང་གི་མར་མེ། 

                                       རྟ་རྔའི་ཉག་མ་ཙམ་རེད། 

                      མདོར་ན་ཅི་ཞིག་ལ་ཞེན་པའི་སྐུད་པ་འདི་མ་ཆོད་ཀྱི་བར་དུ། 

                  མིག་ལྷེམ་ལྷེམ་དང་སྒྱིད་པ་གུག་གུག

              ལ་ས་ལགས་སོ་ཅི་ཙམ་ཞུས་ཀྱང་། 

         ནམ་ཞིག་སྒྲེན་མོ་ལག་སྟོང་ལས་མ་འདས་སོ། །

             ཞེས་རང་ལ་དྲན་སྐུལ་ཙམ་དུ།

                                 སྔགས་རམས་པ་དགེ་འདུན་ཆོས་གྲགས་ཀྱིས།  བྱང་ཉི་མ་བླ་བྲང་དུ་བྲིས་པའོ། །ེེ༢༠༢༢-༢-༡༡ཉིན་ལ།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn