རང་མཚང་རྗེན་པར་སྟོན་ཅིང་རང་སེམས་ཆོས་ལ་སྐུལ་བའི་མགུར་དབྱངས།
མ་ལས་དུང་པའི་ཡབ་གཅིག་མཁྱེན་རབ་ཀྱི་དབང་ཕྱུག །
མ་རུང་གཤིན་རྗེའི་དཔུང་འཇོམས་བདུད་དགྲ་ཡི་དབང་པོ།།
མ་འདྲིས་འགྲོ་བའི་རྩ་ལག་འཇམ་མགོན་གྱི་བླ་མ།།
མ་ལུས་གཅིག་བསྡུས་རྗེ་བཙུན་སེངྒེའི་དཔལ་མཁྱེན་ནོ།།
སྙིང་རྗེ་མེད་པའི་གཅེས་འཛིན་འགོང་རྫོང་གི་གཤེད་མས། །
སྙིང་ལ་སྣང་ཤས་ལྕགས་ཀྱུ་རྣོན་པོ་ཡི་བཏབ་སྟེ། །
སྙིང་པོས་དབེན་པས་སྲིད་པའི་འབྲོག་དགོན་འདིར་བསྐྱུར་བའི། །
སྙིང་མེད་བུ་ལ་བྱམས་བརྩེའི་སྐྱབས་སྦྱིན་ཞིག་སྩོལ་ཅིག །
ཀ་ཡེ་ཡུན་ཐུང་གློག་གི་གར་མཁན་མར་ཞེན་ནས། །
ཁ་བཤགས་སྐམ་པོའི་དབྱར་རྔ་ལྡིར་བ་ལ་རེམས་ཀྱང་། །
ག་ཤེད་གཅིག་ནས་གཉིས་མེད་སེང་གེ་ཡི་རྗེས་འགྲོར། །
ང་ཡི་མི་ཚེ་ནམ་མཁའ་སྟོང་པ་རུ་སོང་འདུག །
ཅ་སིང་ཕ་རོལ་འདེགས་ཚེ་གཉེན་བཤེས་དང་ལོངས་སྤྱོད། །
ཆ་ཙམ་འཁྱེར་དབང་མེད་བཞིན་ཤི་སྦར་རུ་འཐམས་བཞིན། །
ཇ་རོ་ལྟ་བུར་རང་སེམས་ལས་རླུང་གིས་འདས་ནས། །
ཉ་མོ་གསོན་བསྲེག་བྱེད་འདྲའི་ཟངས་ཁ་ན་སླེབས་འདུག །
ཏ་ཐཱའི་གཞུང་ལུགས་རྒྱ་མཚོར་ཐོས་བསམ་གྱིས་བཞུགས་ཀྱང་།།
ཐ་རྒོད་རང་རྒྱུད་ཀོ་སྐམ་ཆུ་རྡོ་བཞིན་ལུས་ནས།།
ད་བར་རང་རྒྱུད་ཆོས་དང་ལྟག་སྤྲོད་དུ་སོང་འདི།།
ན་ཟུག་གཞན་ལས་ཆེ་བའི་སྙིང་ཁོང་གི་ཚེར་མ།།
པ་ཎ་འབུམ་གྱིས་བསླུས་ཀྱང་ཉོ་མེད་ཀྱི་དལ་རྟེན།།
ཕ་རོལ་བསྐལ་པར་ན་རཀ་མེ་དོང་དུ་སྐྱུར་བྱེད།།
བ་བེར་ཉེས་ལྟུང་རྙོགས་མའི་སྣུམ་ནག་གིས་ཚོས་པའི།།
མ་དུལ་སེམས་རྟ་གཡང་ཁར་ཤོར་བ་འདི་ཅི་དྲག།
ཙཀྲ་གསུམ་གྱི་དགོངས་སྙིང་དྲང་ངེས་ཀྱི་དོན་ལ།།
ཚ་ཚ་འུར་འུར་རྩོད་ངག་མེ་ལྕེ་ལྟར་འབར་ཡང།།
ཛ་ལང་དུག་གསུམ་མཚོ་ཁ་ཇེ་མཐོ་དང་ཇེ་རྒྱས།།
ཝ་ལེར་བསམ་ན་ཡིད་མུག་སྐྱེ་བ་ལས་མིན་འདུག།
ཞྭ་ལྟར་གཙུག་ཏུ་བསྟེན་འོས་བཤེས་གཉེན་གྱི་ཞལ་གདམས།
ཟ་ཕོར་ཆག་དུམ་བཞིན་དུ་གཡང་སྐྱུར་ལ་བཏང་སྟེ།།
འ་འུར་གྲགས་སྐམ་མཐོན་པོའི་འཇའ་རྗེས་སུ་བསྙེགས་ཀྱང།།
ཡ་མཚན་ཉིང་དགོས་ཀུན་གསལ་མེ་ཏོག་གི་སྤུན་ཟླ།།
ར་ལུག་འཚོ་བའི་སེ་འུ་སྨྲ་ཤེས་ཙམ་དུས་ནས། །
ལ་ཀླུང་ཆོས་གྲྭ་གང་སར་འཆད་ཉན་ལ་རེམས་ཀྱང་། །
ཤ་གཟུགས་རང་ཟའི་ཉམས་ལེན་གནད་སྒྲིལ་ཞིག་མེད་ན།།
ས་ལམ་ཉམས་རྟོགས་འཇོག་པོའི་གཙུག་རྒྱན་གྱི་གཉེན་ཟླ།
ཧ་གོ་དོན་ཐག་ཆོད་པའི་རྣམ་རིག་ཅིག་ཡོད་ན།།
ཨ་ལོང་ལྟ་བུའི་འདུན་མ་སྟབས་བདེ་ཞིག་བསྐོར་ཏེ།།
ཨ་ཏི་ཤ་དང་འཇམ་མགོན་བླ་མ་ཡི་རྗེས་སུ།།
ཧ་ཅང་སྙིང་རུས་བསྐྱེད་ནས་བང་རྩལ་གྱིས་རྒྱུག་རན།།
ས་ལམ་ཉམས་རྟོགས་གཞི་རྩ་བླ་མ་ལ་ཐུག་ཚུལ།།
ཤ་སིམ་རུས་སིམ་གཏིང་ནས་ངེས་མྱོང་ཞིག་སྐྱེས་ན།།
ལཱ་ལི་ཏ་དང་ན་རོ་པན་ཆེན་དང་མི་ལ།།
རྭ་ལོ་ལྟ་བུར་ཟུང་འཇུག་ལག་རྩེ་ན་ཡོད་འདུག །
ཡ་ཡུད་རི་ལྟར་ཆེ་བའི་སྐྱིད་སྡུག་གི་འགག་ཕྲང།།
འ་ཅག་རྣམས་ཀྱི་དལ་རྟེན་ཡིད་བཞིན་གྱི་ནོར་བུ།།
ཟ་གོས་གསོན་རྐྱེན་འདི་ཡང་འཆི་རྐྱེན་དུ་གྱུར་ནས།།
ཞ་ལོང་གཡང་ཁ་འགྲིམ་ལྟར་ནམ་འཆི་ལ་ཆ་མེད། །
ལྦ་དང་ཁྱི་སོགས་གཅིག་ལ་གཅིག་ཟ་ཡི་ཐུབ་ཚོད།།
ཛ་ཛོར་ལས་ཅན་འགའ་ཞིག་བཀྲེས་སྐོམ་གྱིས་མནར་ཞིང་།།
ཚ་གྲང་བཟོད་གླགས་བྲལ་བའི་ངན་སོང་གི་སྡུག་བསྔལ།།
ཙཀྵུས་གཟུགས་ལྟའི་ཚུལ་མིན་རྒྱུད་སྟེང་དུ་སྒོམ་རན།།
མ་ལུས་འགྲོ་བའི་སྐྱབས་མགོན་དཀོན་མཆོག་གསུམ་གྱི་ཞིང་དུ།།
བ་སྤུ་ཁོང་ནས་གཡོ་བའི་ཁྱོད་ཤེས་ཀྱི་དད་པས།།
ཕ་མ་ལུས་ཅན་དོན་དུ་སྐྱབས་སེམས་དང་ཚོགས་བསགས།།
པ་སངས་རྒྱུ་སྐར་གྲངས་ཀྱིས་བསྒྲུན་མེད་ཅིག་གསོག་རན།།
ན་རྒ་སྐྱེ་འཆིའི་རྒུད་པ་སྤྱི་ཁྱབ་ཀྱི་སྡུག་བསྔལ། །
ད་དུང་མི་འདོད་ཕྲལ་རྐྱེན་རང་ཐོག་ཏུ་བབས་འདི། །
ཐ་ཆད་སྔོན་བསགས་ལས་ངན་འབྲས་བུ་རེ་ཤེས་ནས། །
ཏ་ལེར་རྒྱུ་འབྲས་སྤང་བླང་འཇུག་ལྡོག་གཅིག་བྱེད་རན། །
ཉ་གང་ཟླ་ལྟར་ཟླུམ་པའི་བདག་སྙིང་གི་བུམ་བཟང་། །
ཇ་ཞིམ་བདུད་རྩི་ལྟ་བུའི་བསླབ་གསུམ་གྱིས་བཀང་སྟེ། །
ཆ་ཙམ་བདེ་བས་དབེན་པའི་སྲིད་མཚོ་ཡི་ཀློང་ནས། །
ཅ་ཅོ་ཁ་ཕོ་ཙམ་མིན་མྱུར་ཐར་ཞིག་བྱེད་རན། །
ང་རང་གཅིག་པུ་བདེ་འདོད་གཅེས་འཛིན་གྱི་འགོང་པོས།།
ག་འདྲ་བྱས་ཀྱང་ནམ་ཕུགས་ཕུང་བ་ལས་མེད་ན།།
ཁ་ཞེ་མཚུངས་པའི་གཞན་ཕན་ཁུར་འཁྱེར་གྱི་སེམས་མཆོག།
ཀ་བ་ལྟ་བུར་གཡོ་མེད་དྲང་བརྟན་ཞིག་སྐྱེ་རན།།
ཀ་ཤིའི་མདོག་ཀྱང་ཕམ་བྱེད་སེམས་དཀར་ཙམ་ཡོད་ཀྱང།།
ཨ་མ་རྒན་མོ་ཉམས་ཐག་མེ་དོང་དུ་ལྷུང་ལ།།
ཁ་ཡོད་ལག་ཡོད་ཕན་པའི་ལག་ལེན་ཞིག་མེད་ན།།
ཧ་ལམ་གཞན་དོན་ལྟ་ཅི་རང་དོན་ཡང་ཅི་ཆ།།
ག་རེ་ག་རེ་རང་སེམས་གཡེར་བག་གི་གླང་རྒོད།།
ས་རོང་ངན་རྟོག་རྩུབ་པའི་གཡང་ཁ་ན་རྒྱུག་འདི།།
ང་ཡིས་དྲན་པའི་ཞགས་པས་དམ་པོ་རུ་བཅིངས་ནས།།
ཤ་འཛིན་ལྟ་བུའི་ཤེས་བཞིན་ལྕགས་ཀྱུ་ཡིས་གཅུན་རན།།
ཅ་སིང་ཕུང་འཁྲོལ་རྩ་བ་དངོས་འཛིན་གྱི་གདོན་ཆེན།།
ལྭ་བ་ནག་པོས་བཀབ་འདྲའི་གཏི་མུག་གི་རྫུན་ཕུགས།།
ཆ་ཤས་རྟེན་འབྱུང་རིགས་མཚོན་ཤན་འབྱེད་ཀྱིས་བརྟོལ་ནས།།
ར་སྤྲོད་སྣང་སྟོང་ཟུང་འཇུག་ངོ་མཚར་འདི་མཐོང་རན།།
ཇ་ཕོར་གང་ཙམ་ཡུན་ལ་རྒྱང་རིང་གི་འཐོབ་བྱ།།
ཡ་མིན་ཟུང་འཇུག་བགྲོད་པའི་མྱུར་ལམ་གྱི་གསང་སྒོ།།
ཉ་གང་ཟླ་ལྟར་དཀར་བའི་དབང་བཞི་ཡི་ཆུ་རྒྱུན།།
འ་ཅག་སྒོ་གསུམ་སྒྲིབ་བཞི་དག་བྱེད་དུ་འཐུང་རན།།
ཏ་ཐཱ་ག་ཏའི་དགོངས་པ་གཅིག་གྱུར་གྱི་བཀའ་རྟགས།།
ཟ་འོག་རིས་ལྟར་བཀྲ་བའི་དམ་ཚིག་དང་སྡོམ་པ།།
ཐ་ཤལ་ཉེས་པས་མ་གོས་དག་གཙང་དུ་སྲུང་སྟེ།།
ཞྭ་སེར་སྒྲུབ་རྒྱུད་བ་དན་མཐོན་པོ་རུ་འདེགས་རན།།
ད་ནི་སྐྱེ་ཤི་བར་དོ་སྲིད་འཁོར་གྱི་རྒྱུ་ལམ། །
ཝ་ལེར་ལམ་དང་འབྲས་བུའི་སྐུ་གསུམ་དུ་བསྒྱུར་ཏེ། །
ན་མེད་རྒ་མེད་རྡོ་རྗེའི་ལང་ཚོ་དེ་གྲུབ་ནས། །
ཛ་ཡའི་གསང་གསུམ་འཕྲིན་ལས་ཁྱབ་གདལ་དུ་སྤེལ་རན། །
པ་ར་མི་ཏར་བཤད་པའི་སྟོང་ཉིད་ཀྱི་དགའ་མར། །
ཚ་ཚ་གཏུམ་མོའི་བདེ་དྲོད་བརྩེ་དགའ་དང་འགྲོགས་ཏེ། །
ཕ་མ་སྙོམས་འཇུག་ལྷན་སྐྱེས་བདེ་ཆེན་གྱི་གྲོང་དུ། །
མ་བུ་འོད་གསལ་འཕྲད་པའི་དགའ་སྟོན་དེ་གཏོང་རན། །
སྟོང་ལས་ཆེས་སྟོང་འོད་གསལ་མཁའ་དབྱིངས་ཀྱི་ཀློང་ནས།།
བཀྲ་ལས་ཆེས་བཀྲ་སྒྱུ་འཕྲུལ་འཇའ་ཚོན་གྱི་བཀོད་པ།།
ཡང་ནས་ཡང་དུ་འདབ་བརྒྱད་དྷུ་ཏི་རུ་བསྟིམས་པས།།
རྨོངས་ལས་ཆེས་རྨོངས་མ་རིག་སྦུབ་རྒྱ་འདི་གྲོལ་རན།།
དཔག་པར་དཀའ་བའི་གཏིང་ཟབ་སྲིད་མཚོ་ཡི་ནང་དུ།།
བཟོད་པར་དཀའ་བའི་སྣ་ཚོགས་ཟུག་རྡུ་ཡིས་མནར་རྣམས།།
འཇམ་དཔལ་དཔའ་བོའི་རིམ་གཉིས་གྲུ་གཟིངས་ལ་སྐྱོན་ནས།།
ཟུང་འཇུག་རིན་ཆེན་གླིང་དུ་འཁྲིད་པ་རང་ཤོག་ཅིག།།
——འདི་ཡང་བོད་རབ་བྱུང་ ༡༧ མེ་སྤྲེལ་ལོ་སྟེ། སྤྱི་ལོ། ༢༠༡༦བོད་ཟླ་༩ ཚེས། ༩ཉིན་ནས་བོད་ཟླ་༡༡ཚེས། ༨ བར་ལ་འཇིགས་མཛད་དུས་དགྲའི་དབང་པོ་བཅུ་གསུམ་པའི་ལས་བསྙེན་ལ་སྡོད་སྐབས་གདན་ས་བཀྲ་ཤིས་ལྷུན་པོའི་གསང་སྔགས་རྒྱུད་གྲྭའི་སྒྲུབ་ཁང་དུ་དགེ་མིང་དཀའ་ཆེན་ཕུན་དབང་པས་ཐུན་མཚམས་ཤིག་ལ་བྲིས་པ་འདིས་ཀྱང་རང་གཞན་ཀུན་གྱི་བློ་སེམས་ཆོས་ལ་ཁུག་པའི་ཆ་རྐྱེན་དུ་གྱུར་ཅིག། བཀྲ་ཤིས། །
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག
དྲ་བའི་སྦྲེལ་ཐགhttp://www.tb1025.cn