༄༅།།རྨད་བྱུང་མཚན་དཔེ་ལང་ཚོ་མཛེས་པའི་སྐུ།།

འགག་མེད་དབྱངས་ཀྱི་ཆོས་ཀུན་གླུ་རུ་འགུགས།།

ཤེས་བྱའི་དཀྱིལ་འཁོར་ཀུན་ལ་སྤྱན་ཡངས་པའི།།

ཡེ་ཤེས་ལྷ་སྐུའི་གར་མཛད་ཁྱེད་ལ་འདུད།།

བདེ་བཤེགས་ཐུབ་དབང་ལྷ་ཡི་ཚལ་དུ་ལྷགས།།

གཡོ་མེད་ཏིང་འཛིན་ཞི་བདེ་དཔལ་ལ་རོལ།།

གང་གི་མཚན་མཆོག་གཙུག་ཏོར་འཛུམ་པ་ལས།།

ལེགས་འཁྲུངས་གསང་སྔགས་ཚིག་གིས་ཤིས་པ་སྩོལ།།

བྱ༵མས་བརྩེ་སྤྲིན་པ༵་དཀར་བོའི་གུར་ཁྱིམ་ལས།།

གཞན་ཕན་གྲིབ་བསིལ་བཟ༵ང་བོ༵འི་འཕྲིན་ལས་ཆར།།

གདུལ་བྱ་རྒྱ་མཚོ་ཁམས་སུ་རྟག་འཇོ་བའི།།

འདྲེན་མཆོག་བླ་མ་གང་དེས་བདག་སྐྱོངས་ཤིག།

ལུང་རྟོགས་བསྟན་པའི་རྒྱལ་མཚན་མཁར་རུ་བསྒྲེངས།།

བགྲོད་པའི་ཐར་ལམ་འོག་མིན་ཞིང་དུ་འཐེན།།

ཟབ་རྒྱས་ཆོས་ཀྱི་གྲུ་ཆར་རྟག་འབེབས་པའི།།

སྐྱབས་ཀྱི་ཚོགས་ཀུན་སྙིང་དབུས་པད་མཚོར་བཞུགས།།

བདག་བློ་པད་དཀར་བཞད་པའི་འཛུམ་རླབས་ལས།།

ཚིག་སྦྱོར་དྲི་ངད་འཐུལ་བའི་བསུང་ཞིམ་ཅན།།

གསེར་སྙན་དྲིལ་ཆུང་འཁྲོལ་བའི་རྟོགས་བརྗོད་འདི།།

ཁོ་བོའི་ཀུན་རྟོག་བཞད་པའི་ཁོང་ནས་ཤོར།།

རིགས་རུས་ཆོ་འབྲང་གསེར་ཞུན་དྭངས་མའི་མཁར།།

སྤྲུལ་སྒྱུར་བཀོད་པའི་ཁྱེའུ་བཞིན་ལེགས་དཀར།།

ངོ་མཚར་འཇའ་ཚོན་རྩིབས་སྟོང་འཁོར་ལོའི་སྤུན།།

རྣམ་སད་སྒེག་ལྡན་འཕྲུལ་གྱིས་ཞིང་འདིར་བསུས།།

གང་གི་ཐུགས་སྨོན་ཁྱུང་གི་སྔོན་སྐྱེས་མས།།

ལེགས་པར་དྲངས་པའི་གསེར་ཞལ་འཛུམ་པའི་མདངས།།

རྨ་ཀླུང་དལ་གྱིས་བཞུར་བའི་ཁུག་པ་རུ།།

ཞབས་ཀྱི་རི་མོ་མཆོད་པའི་རྟེན་དུ་བཞད།།

ལྷོ་རྒྱུད་འཛིན་མས་བཏེགས་པ་ངལ་བའི་ཁུར།།

མཁས་དབང་དམ་པའི་བསྟི་གནས་རྭ་རྒྱ་ཞེས།།

ལུང་བསྟན་ཚིག་གིས་བསྔགས་པ་འཐོར་བའི་སྡེར།།

དམར་སེར་གོས་འཆང་སྡོམ་གཞིའི་རྩ་བ་ཚུགས།།

མཛེས་སྡུག་སྟོང་གི་ལང་ཚོ་ན་ཕྲ་ཡང་།།

རྣམ་དཔྱོད་བློ་གྲོས་རྩལ་གྱིས་ངོ་མཚར་བསྐྲུན།།

གང་གི་གསང་གསུམ་རྒྱ་མཚོར་འཁྱིལ་བ་ཡིས།།

འཛིན་མའི་དཀྱིལ་འཁོར་རལ་བས་ཁེངས་པ་འཕྲོག།

བསྐལ་བ་སྔོན་རོལ་འོག་མིན་ཞིང་གི་ཚལ།།

ཡེ་ཤེས་རྒྱུ་སྐར་ཚོམ་བུའི་དོ་ཤལ་འཕྱང་།།

སྐུ་གསུམ་ནོར་བུ་ཏོག་གི་རྩེར་བཀོད་ནས།།

ཚེ་རབས་ཕྲེང་བར་སྤྲུལ་བའི་ཟློས་གར་རྩེན།།

རྣམ་པར་རོལ་བ་མི་ཡི་སྣང་བརྙན་གཟུགས།།

ངུར་སྨྲིག་ཐུན་མཚམས་གསར་བའི་མདངས་ཀྱིས་འཁྱིལ།།

མཁས་བཙུན་བཟང་བོའི་ལྗོན་པ་འབྲས་བུའི་ཁུར།།

དོན་གཉིས་ཉི་ཟླའི་རྣ་ཆ་རིང་ནས་བཏེགས།།

བསླས་གསུམ་ནོར་གྱིས་ཐུགས་རྒྱུད་གང་བར་གཏམས།།

ཕྱིན་དྲུག་འདབ་མའི་མཛེས་པ་གྲོལ་བའི་སྒེག།

བསྡུ་བཞི་སྤྱོད་པའི་འབྲས་བཟང་ཡོངས་སུ་སྨིན།།

སྐུ་བཞིའི་བང་རིང་གདོང་ལྔའི་ཁྲི་ལ་འགྱིང་།།

ཡིན་ཀྱང་གང་གི་གསང་བ་བརྗོད་ལས་འདས།།

ཞབས་གསེར་འཁོར་ལོའི་རེ་ཁཱ་དབུས་སུ་བསྒྱུར།།

དཔལ་ལྡན་སེར་བྱེས་མཚན་སྙན་འཁྲོལ་བའི་སྡེར།།

རིགས་ལམ་གློག་གི་འོད་སྣང་མཁའ་ལ་བྲེས།།

གོ་རིགས་གྲུ་འདེགས་སྐྱོམས་པའི་སྟངས་སྟབས་ལས།།

བརྡ་སྤྲོད་ཆུ་རིས་རྒྱ་ཡིས་རྒྱས་བཏབ་པའི།།

མདོ་སྔགས་རྒྱ་མཚོའི་འཇིངས་ལ་གོམ་གཅིག་གིས།།

རིན་ཆེན་ནོར་བུས་བང་བ་མཛོད་དུ་གཏམས།།

མཁས་མང་གསེར་རིའི་མདུན་ས་ཆེར།།

བརྒལ་བརྟགས་གློག་ཕྲེང་ལྕུག་མའི་རྒྱ།།

བློ་གྲོས་ཤིང་རྟ་ལ་དྲངས་པས།།

དཀའ་གནད་ཕུགས་ཀྱི་མདུད་རྒྱ་བཀྲོལ།།

རྣམ་དཔྱོད་མཛེས་པའི་གར་གྱི་སྒེག།

ལེགས་བཤད་ངག་གི་ཕྲེང་བའི་གཏམ།།

རིགས་པའི་རྩེ་དགའ་དང་འགྲོགས་པས།།

ཕལ་རྒོལ་སྙིང་གི་སྤོབ་པ་ཞི།

འཆད་པ་ངག་ལ་གཡང་དུ་ཆགས།།

རྩོད་པ་ལུང་རིགས་གྲོགས་སུ་སྡེབ།།

རྩོམ་པ་བདུད་རྩིའི་ཁུ་བ་འཛུམ།།

རིག་པའི་དཔའ་བོའི་གྲལ་ན་འགྱིངས།།

ཆོས་ཀྱི་དགའ་ཚལ་མ་དྲོས་མཚོ་ཀླུང་དུ།།

རྣམ་དཔྱོད་རླབས་ཕྲེང་འཁྱུགས་པའི་རྩེད་འཇོ་ཡིས།།

མཁས་མང་གསེར་རིའི་མུ་ཁྱུད་འཛུམ་པའི་གྲྭར།།

གྲགས་སྙན་དཀར་བོའི་བ་དན་རླུང་གིས་གྱེར།།

གཞུང་ལུགས་མང་ཐོས་སྒྲོན་མེའི་འོད་འདངས་གསལ།།

བསམ་པའི་དོན་ལ་འཇུག་པའི་གཤོག་ཡངས་རྒྱས།།

སྒོམ་པའི་བདེན་སྟོང་མཆོག་གི་ཞལ་མཇལ་བའི།།

སྒྱུ་མའི་གྲོང་གི་ཏིང་འཛིན་ཁབ་ཏུ་རོལ།།

འགྲོ་བློའི་ཁམས་བཞིན་གསང་གསུམ་གར་ཏུ་བསྒྱུར།།

ཞལ་གྱི་ལེགས་བཤད་བདུད་རྩི་མགྲིན་པར་ཆགས།།

བརྩེ་ཆེན་ཡུར་བར་ལེགས་དྲངས་རྣམ་དཀར་ཆབ།།

དད་པའི་འཛིན་མར་འཁྱིལ་བ་མདངས་ཀྱིས་མཛེས།།

དམ་པའི་ལུང་བསྟན་བསུང་ཞིམ་འཐུལ་བ་ལ།།

རྨི་ལྟས་ངོ་མཚར་སྣང་བའི་བརྡར་བཏགས་པ།།

སྐྱེས་བསུ་ལྷ་དང་མཁའ་འགྲོའི་གར་བསྒྱུར་བའི།།

ཞབས་པད་ཤིང་རྟའི་ཁ་ལོ་སྨད་དུ་བསྒྱུར།།

གསེར་གྱི་ཁུ་བས་བརླན་པའི་ནོར་འཛིན་མའི།།

ཐ་གྲུ་ཡངས་བ་ས་ཡི་ཐིག་ལེ་ཆར།།

བཀྲ་ཤིས་ཐང་རིང་ཞེས་པའི་སྙན་པ་མོར།།

ཞབས་གསེར་འཁོར་ལོའི་རི་མོའི་འཛུམ་མདངས་བཀྲ།།

ས་ཡི་དགེ་བཅུ་ཚང་བའི་ངོ་མཚར་ཞིང་།།

གཏམ་གྱི་བསྔགས་པའི་སྙན་པ་འདིས་ཀྱང་ཁུར།།

དཀར་ཕྱོགས་ལྷ་ཡི་གྲོགས་དང་སྡེབས་པ་ཡིས།།

རྟེན་དང་བརྟེན་པའི་མཆོད་སྡོང་ལྷམ་མེར་བཞད།།

རྣམ་དཀར་དགེ་བའི་བསིལ་རླུང་འཛུམ་པ་ཡིས།།

འཕྲིན་ལས་དཀར་བོ་ཕྱོགས་ཀྱི་མཐར་རུ་བརྡལ།།

དད་པའི་མེ་ཏོག་གཙུག་གི་རྒྱན་གྱུར་བའི།།

གདུལ་བྱ་རྒྱ་མཚོའི་གོམ་ཁ་གླིང་འདིར་བསུས།།

བརྩེ་ཆེན་ལྷ་ལམ་ཡངས་བའི་དཀྱིལ་འཁོར་ཏུ།།

དོན་གཉིས་ཉི་ཟླ་ཟུང་གི་འཛུམ་ཟེར་དགོད།།

འཕྲིན་ལས་སྣང་བ་དཀར་བོའི་འོད་ཁྱིམ་ལས།།

མི་ཟད་གཏེར་གྱི་མཛའ་བའི་མེ་ཏོག་འཐོར།།

རྒྱ་ཆེན་སྤྱོད་པའི་དགྱེས་འཛུམ་དྭངས་མའི་མཚོར།།

འགྲོ་ལ་རྗེས་ཆགས་ཟབ་པའི་རླབས་ཕྲེང་རྒོད།།

གཞན་ཕན་གྲིབ་བསིལ་རྣམ་དཀར་དགེ་བའི་ཆབ།།

ལུས་ཅན་འགྲོ་ཀུན་ཉེར་འཚོའི་སྨན་གྱི་ཕུལ།།

རྒྱ་བོད་གཞུང་ལུགས་རྡུལ་བརྩེགས་གངས་ཀྱི་རི།།

རིགས་ལམ་བརྒལ་བརྟགས་གློག་འགྱུས་བཞུས་པའི་རྒྱུན།། 

སྣང་བ་རྟེན་འབྱུང་དྭངས་གཙང་འོ་མའི་མཚོར།། 

དོན་དམ་སྤྲོས་བྲལ་བདུད་རྩིའི་ཟེགས་མ་གཏོར།། 

མཉམ་རྗེས་རིས་མེད་ཐུན་གཅིག་རོལ་བ་ཡིས།། 

བདེན་གཉིས་སྣང་བ་ཡིད་ངོར་མ་འདྲེས་གསལ།།  

རྩེ་གཅིག་བསམ་གཏན་མཆོག་གི་རྣམ་འབྱོར་ལས།། 

གང་འཚམ་ཡིད་ཀྱི་མཁའ་རུ་དགའ་སྟོན་འགྲེམ།།

ཉིད་ཀྱི་ཞལ་གདམས་དྲོད་ཐིག་བདུད་རྩིའི་ཆོས།། 

བླ་མེད་ཐེག་མཆོག་གསང་སྔགས་མཛོད་ཀྱི་གཏེར།། 

མན་ངག་སྙན་རྒྱུད་གསེར་ཆོས་ཟབ་མོའི་བཅུད།། 

འཁོར་ཚོགས་རྒྱ་མཚོའི་ཉམས་བཞེས་གནད་ཀྱི་མཐིལ།། 

བདེན་ཚིག་གྲུབ་པ་ཚད་མའི་འབྲས་རྟགས་ལས།། 

ཤིང་སྐམ་ཡུ་བ་ས་ཡི་གོས་སྲུབ་ལ།། 

བཙུགས་ནས་སྐྱེས་པར་འགྱུར་ཞེས་དམ་བཅའ་ལས།། 

གྲུབ་བསིལ་ཤིང་ལོ་ཅན་གྱི་སྤྲུལ་བ་བབས།། 

དགེ་བཤེས་ཆེན་མོའི་གཟིམ་ཤག་ཀུན་དའི་ཚལ།།

མི་མངོན་རྩིགས་གསེབ་རིན་ཆེན་སྣོད་ཡངས་སུ།། 

མཆོད་གཏོར་ཉེར་བཀོད་ཀུན་བཟང་མཆོད་པའི་སྤྲིན།།

མངོན་སུམ་གཟིགས་པས་ཉིད་ཀྱི་སྤྲུལ་བར་གླེང་།།

བདེ་མཆོག་ཡབ་ཡུམ་ལྷ་ཚོགས་གར་བསྒྱུར་བའི།། 

མངོན་སུམ་བྱོན་ནས་གསུང་གླེང་བགྲོ་བ་ལ།། 

ཉེ་གནས་གང་གིས་རྒས་འཁོག་འཁར་ཐོགས་པའི།།

འགྲུལ་བའི་རྣམ་ཅན་མཐོང་བ་འདི་ཀོ་མཚར།།

འཕྲུལ་གྱིས་བཏེགས་པའི་ལྷ་ཁང་སེར་བོ་ན།།

བློས་བསླང་རྟེན་གྱི་ལྷ་གཅིག་ཕྱིར་ཕྱོགས་པས།།

རྩིག་གསེབ་བུ་གར་སྐུ་ལུས་ཤོང་མིན་ཀྱང་།།

སྤྲུལ་བསྒྱུར་འཕྲུལ་གྱིས་ཞིང་དེར་བཀོད་ལེགས་བཀྲམ།།

དམ་པ་གང་གིས་སྲས་ཀྱི་ཐུ་བོ་ལ།།

བླ་གོས་ཐུན་མཚམས་གསར་བའི་ཁུག་སོ་ནས།།

དག་པ་མཁའ་སྤྱོད་ཞིང་གི་བཀོད་པ་ནི།།

སྒྲིབ་མེད་མངོན་སུམ་སྣང་བའི་སྒོ་བརྒྱ་ཕྱེ།།

རྫུ་འཕྲུལ་མངོན་ཤེས་མཆོག་གི་མེ་ལོང་ལ།།

འཛིན་མའི་གོས་ཀྱིས་བཀབ་པའི་གཏིང་རིམ་གསལ།།

ཚངས་ཐིག་ཚད་ལ་གདབ་པའི་གཏེར་ཐོན་པ།།

འགོག་པ་རི་ལས་བཏོན་པའི་རྣམ་ཐར་བསྐྱངས།།

རྨི་ལམ་ཞིང་ནས་མཁའ་འགྲོའི་གསང་བརྡ་ལ།།

སྒོ་བརྒྱ་འབྱེད་ཅེས་ལྡེ་མིག་སྤར་གང་བསྩལ།།

ཡི་དམ་ལྷ་ཡི་བཀས་གནང་དབང་བསྐུར་སོགས།།

གསང་སྔགས་ཟབ་ཆོས་སྤེལ་ཞེས་སྐུལ་མ་ལགས།།

མདོ་རྒྱུད་ཀུན་དའི་ཚལ་ལ་ཟླ་བ་ཟེར།།

ལེགས་བཤད་དགོངས་འགྲེལ་མན་ངག་བསྡུས་པའི་བཅུད།།

ཚིག་ཉུང་དོན་གསལ་སྤྲོས་པའི་གླེགས་བམ་ཟུང་།།

རང་ཅག་བསོན་རྣམས་མཆོད་པའི་རྟེན་དུ་བཞག།

དམ་པ་གང་གི་ཞབས་སེན་འཁོར་ལོའི་སྤུན།།

སྤྱི་བོར་ལེན་པའི་སྐལ་ལྡན་བུ་སློབ་ཀུན།།

འདིར་སྣང་འགག་པ་འོད་གསལ་སྒྱུ་མའི་གྲོང་།།

ལུས་སེམས་དག་པ་བཙན་སའི་རྒྱལ་ཐབས་བསྐྲུན།།

སྟོང་གསུམ་སྣོད་དུ་དོག་པའི་ཡོན་ཏན་གཏེར།།

ངག་གི་ཕྲེང་བར་བགྱིས་བ་ངལ་བའི་རྒྱུ།།

རྒྱ་མཚོའི་ཀླུང་ལ་ཟེགས་མའི་ཆུ་ཐིགས་འདི།།

རྣམ་དཔྱོད་དར་དཀར་རིང་མོའི་ཁོང་ནས་བསུས།།

ཕྱག་གི་སྒྱུ་འཕྲུལ་སྨྱུ་གུའི་གར་ལ་འཁྱུད།།

པུར་གྱི་རྩེད་འཇོ་འཁྱུག་པའི་རོལ་བ་སྒེག།

མཚར་སྡུག་སྣང་བརྙན་རྫོགས་པའི་ངོ་མཚར་གཏམ།།

སྤྱན་ཟུང་བུང་བ་སྒེག་པའི་ཚལ་ལ་ལྷུང་།།

བློ་གྲོས་རྩལ་གྱིས་བཞེངས་པའི་སྒྱུ་འཕྲུལ་མིན།།

རྣམ་རྟོག་བཟོ་བོས་བསྐྲུན་པའི་རྟོག་བཏགས་མིན།།

སྙན་ཚིག་སྦྱོར་བ་སྡེབ་པའི་སྒྲོ་བཏགས་མིན།།

རང་བཞིན་གསེར་ཞུན་ཁུ་བའི་རྣམ་ཐར་ཡིན།།  

ཞེས་མ་འདྲིས་བའི་མཛའ་བཤེས་ཆེན་མོ་རིགས་ཀུན་ཁྱབ་བདག་རྡོ་རྗེ་འཆང་༧རྗེ་བཙུན་བྱམས་པ་བཟང་བོའི་རྟོགས་པ་བརྗོད་པ་ཚངས་སྲས་ངག་གི་བདེན་གཏམ་ཞེས་བྱ་བ་འདི་ནི་དམ་པ་ཁོང་གི་གདན་ས་ན་འཚོ་བའི་ཤེས་རབ་བསྟན་དར་རམ་ཚངས་སྲས་བཞད་པའི་བློ་གྲོས་སུ་འབོད་པས་བྲིས་པ་འདིས་ཀྱང་ལུས་ཅན་ཀུན་ལ་ཕན་ཐོགས་པར་གྱུར་ཅིག།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn