༄༅།།མི་འགྱུར་བདེ་བ་ཆེན་པོ།།
བརྙེས་ཀྱང་འགྲོ་བའི་དོན་དུ།།
སྤྲུལ་བའི་ཟློས་གར་སྣ་ཚོགས།།
སྟོན་མཁས་བླ་མ་ལྷ་ཚོགས།།
འཇིག་རྟེན་མི་རྟག་འཇའ་ཚོན།།
རང་སེམས་སྒྱུ་མའི་ཆོ་འཕྲུལ།།
སྣང་བ་བདེན་པར་མེད་པ།།
ཀུན་བརྟག་ཚོན་གྱི་རི་མོ།།
དགྲ་གཉེན་འགྱུར་བའི་བཞིན་རས།།
བྱིས་ཆུང་ངུ་བའི་རྣམ་འགྱུར།།
ལྷན་ཅིག་འདུས་པའི་དགའ་བ།།
མི་རྟག་ཚོང་འདུས་མགྲོན་པོ།།
ཡིད་མཐུན་གྲོགས་ཀྱི་བརྩེ་བ།།
བལྟས་ན་སྐྱིད་སྐྱིད་འདྲ་བ།།
མི་རིང་འགྱུར་བའི་རྣམ་པ།།
ཆར་རྗེས་འཇའ་ཡི་གུར་ཁྱིམ།།
སྲིད་འབྱོར་རྒྱས་པའི་མེ་ཏོག།
ཡུན་ཐུང་རྨི་ལམ་སྣང་བ།།
འདུ་འབྲལ་སྙིང་བོ་མེད་པ།།
བསམ་ཞིང་བསམ་ན་སྐྱོ་བ།།
གཅིག་རྗེས་གཅིག་ལ་བསྙེག་པའི།།
འདོད་ལྡན་ཡིད་ཀྱི་འཁོར་ལོ།།
སྡོད་པའི་རང་དབང་མེད་པར།།
ཤུགས་ཀྱིས་འཇུག་པའི་རྨོངས་པ།།
འདུ་འཛི་ཆུ་ཡི་གཉེར་མ།།
མཛེས་ཀྱང་འགྱུར་བའི་མི་རྟག།
སྣང་བ་ཡིད་ལ་ཟུག་ཀྱང་།།
འདས་རྗེས་འཁྲུལ་བའི་སྣང་བ།།
དབང་དང་གོ་སའི་བརྗིད་ཉམས།།
འཐོབ་ན་མཛེས་མཛེས་འདྲ་བ།།
ཤོར་ཁྲལ་སེམས་ཀྱི་རྟོག་བཏགས།།
མྱོང་ན་འཁོར་བའི་སྡུག་བསྔལ།།
སྙན་གྲགས་ཆུ་ཡི་རྦ་ཀློང་།།
སྟེང་དུ་འཕྱོ་བའི་རྣམ་འགྱུར།།
མི་བརྟན་ལྷུང་བའི་མཐའ་ཅན།།
འཇིག་རྟེན་རྒུད་པའི་རང་མཚང་།།
དེ་རིང་དགའ་བའི་འུར་སྒྲ།།
སང་ཉིན་སྐྱོ་བའི་མིག་ཆུ།།
དགའ་སྐྱོ་ངེས་པ་མེད་པ།།
འཇིག་རྟེན་འཁོར་བའི་ཆོས་ཉིད།།
གཉེན་ཉེ་མཁོ་དགུའི་ལོངས་སྤྱོད།།
བཞག་ནས་ཕྱི་མར་འགྲོ་དུས།།
ཚེ་གང་འབད་པའི་རྩོལ་སྒྲུབ།།
བསམ་ན་སྙིང་བོ་ཅི་ཡོད།།
དེ་རིང་དངོས་སུ་མྱོང་བའི།།
འདི་བདེ་འདི་སྐྱིད་ཟེར་བ།།
སང་ཉིན་དྲན་པའི་ངོ་ན།།
མདང་གི་རྨི་ལམ་ཇི་བཞིན།།
བདེ་སྡུག་སྣང་བ་ཙམ་ལས།།
ཞེན་པའི་རང་བཞིན་མེད་པའི།།
མི་འགྱུར་བདེ་བའི་དཔལ་ལ།།
ཀུན་གྱིས་རོལ་ན་དགའ་བ།།

ཞེས་པ་འདི་ནི་ཡུལ་མདོ་སྨད་ཀྱི་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་གྱི་གྲྭ་རིགས་ཐ་སྙད་རིག་གནས་ལའང་ཐོས་བློའི་སྐལ་བ་ཙམ་ཐོབ་པ་གང་དེས་ཁྲང་ཨན་མཁར་ནང་ནས་གང་ཤར་དུ་བྲིས་པའོ།།   

                             རྩོམ་སྒྲིག་པ།  ཤེས་རབ་རལ་གྲི། 

གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn