དཔལ་རྒྱལ་བ་ཙོང་ཁ་པ་ལ་བསྟོད་པ་ཡིད་འཕྲོག་དྲི་ཟའི་བུ་མོའི་མགྲིན་གླུ།
སྤངས་རྟོགས་ཆ་ཤས་རྫོགས་པའི་དཀྱིལ་འཁོར་ལས།།
ཐུགས་རྗེ་བསིལ་བའི་ཟེར་ཕྲེང་འབུམ་འཕྲོ་བའི།།
དགེ་ལེགས་ཨུཏྤལ་གྲོལ་བའི་གཉེན་གཅིག་པུ།།
འདྲེན་མཆོག་ལྷ་ཡི་ཡང་ལྷ་དེ་ལ་འདུད།།
རྒྱལ་ཀུན་མཁྱེན་པའི་ཆུ་གཏེར་ལས་འཁྲུངས་པའི།།
ཀུན་རྨོངས་དབུལ་བ་སེལ་བ་ན་གའི་རྒྱན།།
མཚམས་སྤྲིན་གསར་བའི་མདངས་ཀྱིས་སྒེག་པའི་ལྷ།།
ཟུར་ཕུད་ལྔ་པས་ཚེ་རབས་ཕྲེང་བར་སྐྱོངས།།
འཕོ་མེད་ཆོས་སྐུའི་རང་རྩལ་མ་འགག་པའི།།
བཅུ་དྲུག་ལང་ཚོ་ངོམ་པའི་ཆོ་འཕྲུལ་གྱིས།།
མི་རྟོག་ཡེ་ཤེས་གར་མཛད་འཇམ་དཔལ་དབྱངས།།
ཆགས་བྲལ་མལ་ལས་སློང་བའི་མགོན་དེར་འདུད།།
མེས་པོའི་བློ་ཡི་ར་བ་ལས་འགོངས་པའི།།
ཕྱོགས་དུས་རྒྱལ་བའི་འཕྲིན་ལས་གཅིག་བསྡུས་གར།།
ཞིང་འདིར་ངོམ་པའི་ཆེ་བ་མཐར་སོན་པ།།
བློ་བཟང་གྲགས་པའི་མཚན་འཆང་ངས་འདིར་བསྔགས།།
སྙིགས་ལྔའི་དགྲ་བོ་འཇོམས་ལ་མཐུ་བཙན་པའི།།
གསང་གསུམ་མཛད་བརྒྱའི་རོལ་རྩེད་གཅིག་གིས་ཀྱང་།།
འཇིག་རྟེན་འདུལ་བའི་མཁྱེན་པ་ལས་བརྒལ་བས།།
བྱིས་པའི་བློ་ཡི་བུམ་པར་ག་ལ་ཆུད།།
འོན་ཀྱང་དད་གསུམ་ཆུ་མཚོ་ལས་འཁྲུངས་པའི།།
སྙིམ་པའི་མེ་ཏོག་ཟུམ་པའི་རྒྱན་འཆང་སྟེ།།
རྒྱལ་སྲས་སྤྱོད་པའི་ནོར་རྩེན་གན་མཛོད་ལས།།
ཆ་ཙམ་བརྗོད་པ་བསོད་ནམས་བྱེ་བའི་ཕུལ།།
ཡོན་ཏན་རྒྱན་གྱིས་མཛེས་པའི་སེངྒེ་རྩེན།།
གང་ཁྱེད་ཞིང་འདིར་མི་ཡི་གར་བསྒྱུར་རམ།།
ཆོས་དོན་གནད་དུ་སྨིན་པ་ལ་བརྟེན་ནས།།
སུ་ཞིག་སྟོབས་བཅུའི་ལང་ཚོ་རྫོགས་པ་ཡིན།།
ཁོ་བོ་འདི་འདྲའི་ཤན་ལ་རབ་རྨོངས་ཀྱང་།།
ཁྱེད་ཀྱི་འཕན་མེད་མཛད་བཟང་གླེང་ཙ་ན།།
ལུས་མེད་སྙིང་ལ་མུན་པའི་ཁུར་བླངས་ཏེ།།
མདའ་ལྔའི་གྲོགས་དང་བྲལ་བའི་ནད་ཀྱིས་ཟིན།།
དུག་གསུམ་ལང་ཀའི་བདག་པོའི་མགྲིན་པ་ལ།།
འཁྱུད་པའི་དམ་ཆོས་གཞུ་འཛིན་རྗེ་བོའི་མཚོན།།
སྙིང་བོར་སྨོན་པའི་རྩེ་དགའ་ལ་ཆགས་པས།།
དཀར་མིན་བྲང་འགྲོའི་མདུད་པ་རང་སར་གྲོལ།།
མཁའ་གླིང་དལ་གྱིས་བགྲོད་པའི་ཕང་བ་ནས།།
སྤྲིན་གྱི་ལྕུག་མ་དགོད་པའི་རྗེས་འགྲོ་བའི།།
མི་རྟག་འཁོར་བའི་དཔལ་གྱི་སྐྱེ་བས་མཐོ།།
ངེས་འབྱུང་མཚམས་ལྡན་མ་ཡི་མཛའ་བོ་ཉིད།།
འདི་སྣང་སྲིན་མོའི་མལ་དུ་གནས་འཆའ་བའི།།
འདོད་ཡོན་ནག་པོར་འཆར་བའི་མཚང་རིག་སྟེ།།
ཚངས་སྤྱོད་ཛམ་བུའི་རྐང་འཐུང་རྒྱས་པའི་ཚུལ།།
དགེ་ལེགས་བསིལ་བའི་ཡོན་ཏན་ལྷས་ཀྱང་གླེང་།།
མང་ཐོས་སིནྡྷུ་བདག་པོ་ལས་བྱུང་བའི།།
ལྔ་རིག་མཁྱེན་པའི་ཟླ་གཞོན་གསར་བའི་གཟི།།
འགྲན་པར་མ་ནུས་འོད་ཀྱི་ནོར་ཅན་ཡང་།།
བང་ལྡན་རི་ཡི་རྩལ་ལ་བརྟེན་ནས་བྲོས།།
བཀའ་བསྟན་མེས་པོའི་གཙུག་སྐྱེས་གཡོས་པ་ལས།།
བྱུང་བའི་དོན་བཟང་སྙིང་བོར་སྦྲུམས་པའི་ཆབ།།
གཅིག་ཏུ་འཁྱིལ་བའི་ལེགས་གསུང་གང་གཱ་མ།།
ལྷུག་པར་བབ་པས་ས་གསུམ་ཆོས་ཀྱིས་ཁྱབ།།
དོན་ཟབ་མཁས་བྱའི་རིན་ཆེན་རྒྱ་མཚོའི་གོས།།
དྲི་མེད་མཁྱེད་དཔྱོད་གོམ་སྟབས་གཅིག་གིས་ཀྱང་།།
གཞལ་བས་རིག་ཚུལ་ཀུན་ད་གྲོལ་བའི་གཉེན།།
ལེགས་བཤད་བཅུ་དྲུག་ཆ་ཅན་མཁའ་ནས་འཛུམ།།
འཇིགས་མེད་རྣམ་དཔྱོད་གཙུག་ཕུད་ལྔ་བ་ཡིས།།
དྲངས་པའི་བརྒལ་རྟགས་སྦར་མོའི་མཚོན་རྣོན་པོ།།
ཕས་རྒོལ་གཉིས་འཐུང་སྤྱི་བོ་ལ་བཀོད་པས།།
ལྟ་ངན་ཝ་སྐྱེས་སྲོག་ཀྱང་ལྟུངས་པར་བྱས།།
ཚད་མ་གསུམ་གྱི་མདའ་བསྐྱོད་ལ་བརྟེན་པའི།།
སྒྲུབ་དང་སུན་འབྱིན་དྲང་འགྲོ་འཕངས་གྲོལ་ཏེ།།
མ་རྟོག་མགྲིན་བཅུ་མགོ་བོ་དབྱིག་འཛིན་གྱི།།
པང་དུ་ལྷུང་བས་ལྷ་ཆེན་བྱིན་ཤ་འདར།།
ཤེས་རབ་མིག་སྟོང་པ་ཡི་ལག་ཉལ་གྱིས།།
མཐར་འཛིན་རི་བོའི་བགྲོད་བྱེད་ཀུན་བཅོམ་ཏེ།།
ངེས་དོན་ལྟ་བའི་ནགས་ཀློང་གཡོ་བའི་ཚུལ།།
དཔལ་ལྡན་ཀླུ་དབང་དགྱེས་པའི་མཆོད་སྤྲིན་ཉིད།།
མཐའ་བརྒྱད་དམ་བཅའི་སྣོད་དུ་ཤོང་མིན་པའི།།
བརྗོད་བྲལ་ཤེས་རབ་ཟབ་མོའི་མཐར་སོན་ཀྱང་།།
དང་པོའི་ལས་ཅན་ཚོགས་ལ་རབ་མཛེས་པའི།།
བདེན་སྟོང་བདུད་རྩིའི་འོད་ཀྱིས་སྣང་བར་བྱས།།
སྲིད་ལམ་དུབ་པ་དག་གི་ངལ་གསོའི་གནས།།
བསྟན་དང་སྟོན་པ་གཉིས་མེད་བདུད་བརྩིའི་མཛོད།།
སྐལ་བཟང་འགྲོ་བའི་དཔྱིད་དུ་སྒོ་ཕྱེས་པས།།
རྒྱལ་བ་གཉིས་པའི་མཚན་སྙན་ཁྱེད་ཀྱིས་བརྙེས།།
མི་སྡུག་སྲིད་རྩའི་འཁྲི་ཤིང་ལྕུག་མའི་རྒྱ།།
ཉེ་བར་གཅོད་ལ་ཟག་བཅས་ཟག་མེད་ཀྱི།།
ཆོས་རབ་འབྱེད་པའི་ཤེས་རབ་སྐྱེད་པའི་ཐབས།།
སྟོན་ལ་དབྱིག་གི་གཉེན་གྱི་དགྲ་ཟླར་ཆས།།
མཁྱེན་རབ་འོད་དཀར་དྲ་བའི་མཛེས་པ་ཡིས།།
སྦས་དོན་ཆུ་སྐྱེས་གྲོལ་བའི་ངོ་མཚར་དེས།།
གང་ཁྱེད་དགའ་ལྡན་ཞིང་གི་མགོན་པོ་དང་།།
གཅིག་ཏུ་འཁྲུལ་ཏེ་དབང་པོས་མིག་སྟོང་བགྲད།།
རིགས་ཚུལ་སྒེག་མོའི་འགྲམ་ཆང་མངར་མོ་ཡིས།།
གསུང་རབ་བ་ཀུ་ལ་ཡི་ཁ་ཕྱེས་ཏེ།།
ཟབ་དོན་དབྱར་རྔ་ལྡིར་བའི་ཆོ་འཕྲུལ་གྱིས།།
བློ་གསར་མདོངས་མཐའ་དགའ་བའི་མངལ་གྱིས་ལྕི།།
རྒྱུད་སྡེ་དུས་ཀྱི་རླབས་གཉེར་གཡོ་བའི་ངོས།།
ངོམ་མེད་བརྩོན་པའི་གྲུ་མཁན་ལ་བརྟེན་པའི།།
རིམ་གཉིས་རིན་ཆེན་གླིང་དུ་བགྲོད་པའི་གར།།
ཟུང་འཇུག་གདེངས་ཅན་རལ་བའི་རྒྱན་ལ་འཁྱུད།།
གྲོལ་བ་སྐབས་གསུམ་གྲོང་དུ་གཤེགས་པའི་སྐས།།
མན་ངག་ལེགས་བྲིས་ཟས་ཀྱི་བཅུད་མྱངས་པས།།
གྲངས་མེད་གསུམ་གྱི་ངལ་བ་མ་བརྟེན་པར།།
སྲིད་ཞིའི་གཡུལ་ལས་རྒྱལ་བའི་སྙན་པ་མཐོ།།
བཤད་སྒྲུབ་མིག་གིས་དྲེགས་པ་ན་དར་བའི།།
རྒྱལ་བསྟན་སྡེ་བཞི་སྤེལ་བའི་བཀའ་དབང་པའི།།
བདེ་ཆེན་འཁོར་ལོའི་མཛེས་བྱེད་ཁྱེད་ཀྱི་མཐུས།།
གཡོན་ཅན་སྒྱུ་མའི་རི་དྭགས་དབྱིངས་སུ་ཡལ།།
བླང་དང་དོར་བྱའི་དེ་ཉིད་མི་མཐོང་ཞིང་།།
ཀུན་རྨོངས་གདུང་བའི་དབལ་ལྡན་ལུས་ཅན་རྣམས།།
རྣམ་གྲོལ་བསིལ་བ་སྟེར་བའི་མཚན་མོའི་མགོན།།
བྱང་ཆུབ་ཐུགས་ཀྱི་རི་བོང་གཟུགས་ཀྱིས་མཛེས།།
སྡུག་བསྔལ་རྩེ་མོའི་ཞུགས་ཀྱིས་འཇིགས་པའི་འགྲོ།།
མྱ་ངན་འདམ་ལས་བསྒྲལ་བའི་མཛད་བཟང་ཁུར།།
མ་ཐེག་དབྱིག་གི་བློ་གྲོས་འཇོག་པོའི་གནས།།
ལྷུང་བར་དོགས་ཏེ་ཁྱབ་འཇུག་འཕར་འགྲོར་བརྫུས།།
རྣམ་བཞི་གདོན་གྱི་རི་རྩེ་མཐོངས་སྙེག་པའི།།
གཡེང་ལས་སྐྱོབ་བྱེད་ལག་པའི་འཆེལ་བ་རུ།།
ཟབ་ཆོས་བཻཌཱུའི་ལྗོན་ཤིང་འཕན་མེད་པ།།
བཙུགས་པས་ཐར་ལམ་བགྲོད་ལ་ངལ་བ་བོར།།
མ་རུང་རྒུད་པའི་ཆུ་མཚོ་ལ་ཟ་བའི།།
ལེགས་མཛད་རྟ་གདོང་མེ་ཡིས་དམ་འཁྱུད་པས།།
འཇིག་རྟེན་གསུམ་ན་གནག་པའི་སེམས་འཆང་བ།།
བཙལ་བས་མ་བརྙེད་འདོད་ལྷའི་ལུས་ཀྱང་བོར།།
སེམས་ཅན་ཀུན་གྱི་རེ་བའི་ཁྱད་པར་རྣམས།།
ཇི་བཞིན་འཇོ་བའི་ངོ་མཚར་འབུམ་རྫོགས་པ།།
ན་ཀྲའི་གྲོང་ལས་ཐབས་ཀྱིས་མ་བླངས་ཀྱང་།།
གང་ཁྱེད་བྱང་ཆེན་སྤྱོད་པའི་མཐུ་ལས་བྱུང་།།
བཟོད་དཀའ་དམྱལ་མེའི་མཚོན་ཆར་འབེབས་པའི་ཁྲོད།།
དྲ་བའི་རྐང་ལྡན་པད་མཚོར་ཞུགས་པ་བཞིན།།
བག་ཚ་བྲལ་བ་ལས་ཀྱིས་མ་ཡིན་ཏེ།།
གཞན་ཕན་ཁུར་གྱིས་ལྕི་བའི་མཐུ་རུ་ངེས།།
འཕྲལ་ཡུན་ཕན་བདེའི་དོན་ཆེན་སྒྲུབ་པའི་ཚུལ།།
ལེགས་པར་སྤྱོད་ལ་སྙིང་སྟོབས་དབང་བཙན་པས།།
གང་ལ་གང་འདུལ་སྒྱུ་འཕྲུལ་བསམ་ཡས་པ།།
འགྲོ་ཁམས་རྒྱ་མཚོ་སྟོང་པའི་གྲོགས་སུ་ཆས།།
གོམ་སྟོབས་ངན་འགྲོར་འཁྱེར་བའི་མ་མ་ཀུན།།
ཡང་དག་ལམ་ལ་དཀྲི་བའི་ས་མཁན་མཆོག།
ཀུན་མཁྱེན་ཆོས་ཀྱི་རྒྱལ་པོ་ཙོང་ཁ་པ།།
ཞབས་རྡུལ་སྤྱི་བོས་མཆོད་དེ་ཕྱག་བགྱི་འོ།།
མཚོ་བྱུང་གསུང་གི་མཛོད་ལས་མ་བརྐུས་ལ།།
ཡན་ལག་དྲུག་ཅུའི་གཏེར་ནས་མ་དྲངས་པའི།།
སྙན་འཇེབས་ཉམས་ཀྱི་འགྱུར་བག་སྟོང་ལྡན་པ།།
རིག་བྱེད་སྨྲ་བའི་ངག་སྒོ་རྣམ་པར་དགེ།
ཁོ་བོ་འདི་ནས་བྱང་ཆུབ་སྙིང་པོའི་བར།།
གདུང་ལྡན་འགྲོ་བའི་སླད་དུ་སྲེགས་ཟའི་ཁྲོད།།
འཇུག་ལ་སྤྲོ་བའི་བརྟུལ་ཞུགས་ལྷུར་ལེན་པའི།།
འདྲེན་མཆོག་ཁྱེད་དང་སྐལ་བ་མཉམ་པར་ཤོག།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn