ཟླ12པའི་ཚེས17ཉིན། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚད་མ་རིག་པའི་བགྲོ་གླེང་ཚོགས་འདུ་སྐབས་གཉིས་པ་དང་མཚོ་སྔོན་ཚད་རིག་ལྷན་ཚོགས་དྲ་བའི་སྒོ་འབྱེད་མཛད་སྒོ་ཟི་ལིང་གྲོང་ཁྱེར་ཙོང་ཁ་བརྩེ་ཆེན་དར་རྒྱས་གླིང་དུ་གཟབ་རྒྱས་ངང་ཚོགས།

         མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་འབྲེལ་ཡོད་འགོ་ཁྲིད་དང་། ཀྲུང་གོ་ནང་བསྟན་མཐུན་ཚོགས་ཀྱི་རྒྱུན་ལས་ལས་འཛིན་ནམ་མཚོ་སྔོན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་དྲུང་ཆེ་གཞོན་པ། པཎ་ཆེན་ཚད་མའི་སློབ་གླིང་གི་སློབ་གཙོ། ཙོང་ཁ་བརྩེ་ཆེན་དར་རྒྱས་གླིང་གི་དགོན་གཙོ་སྒར་བ་ངག་དབང་བཟང་བོ། མཚོ་སྔོན་མི་རིགས་སློབ་ཆེན་གྱི་འབུམ་རམས་པའི་མཛུབ་སྟོན་དགེ་རྒན་བློ་བཟང་ཆོས་གྲགས། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་གླིང་གཙོ་ཟླ་བ། མཚོ་སྔོན་དགེ་འོས་སློབ་ཆེན་གྱི་དགེ་རྒན་ཆེན་མོ་ཁྱུང་ཕྲུག་བློ་བཟང་དར་རྒྱས་དང་། དྷི་ཚ་བཀྲ་ཤིས་ཆོས་སྡིངས་ཀྱི་དགེ་བཤེས་ཆེན་མོ་མུན་འཇོམས་སྒྲོན་མེ་སོགས་དགོན་སྡེ་ཁག་གི་དགེ་བའི་བཤེས་གཉེན་དང་སློབ་གྲྭ་ཆེན་མོའི་དགེ་རྒན་ཆེན་མོ། གཞི་རིམ་གྱི་མི་རིགས་སློབ་འབྲིང་ཁག་གི་དགེ་རྒན་སོགས་བསྡོམས་མི་དྲུག་ཅུ་ལྷག་ཐེངས་འདིའི་མཛད་སྒོར་ཞུགས་ཡོད།

 

          མཚོ་སྔོན་མི་རིགས་སློབ་ཆེན་གྱི་འབུམ་རམས་པའི་མཛུབ་སྟོན་དགེ་རྒན་བློ་བཟང་ཆོས་གྲགས།

 

           མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཅོན་ཆི་ཀྲང་ཚོགས་ཞུགས་མཛད་པ།

 

            མཚོ་སྔོན་ཞིང་ཆེན་འཐབ་ཕྱོགས་གཅིག་གྱུར་པུའུ་ཡི་ལོ་སྟག་ལྷ་ཚོགས་ཞུགས་མཛད་པ།

 

           མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་སྒར་བ་ངག་དབང་བཟང་བོ་མཆོག་གིས་གཏམ་བཤད་གནང་།

 

 

           ཚོགས་ཆེན་གྱི་གཏམ་བཤད་པའི་ལས་རིམ་སྐབས་སུ། རེབ་གོང་རོང་བོ་དགོན་ཆེན་གྱི་དགེ་བཤེས་འཇིགས་མེད་བློ་གྲོས་ཀྱིས་ཁ་ཡིག་ལ《ཕྱོགས་ཆོས་འཁོར་ལོའི་བྱུང་འཕེལ་གླེང་བ།》དང་།མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་དགེ་འདུན་གྱིས་ཁ་ཡིག་ལ《རྒྱ་བོད་བཀའ་བསྟན་ལས་ཚད་མ་རིག་པའི་གཞུང་དང་དེའི་ཕན་ཚུན་ཁ་སྐོང་ཞིབ་འཇུག》དང་།རྨ་ལྷོ་འགར་རྩེ་དགོན་པའི་དགེ་བཤེས་ཚུལ་ཁྲིམས་ཀྱིས་ཁ་ཡིག་ལ《གཏན་ཚིགས་ཕྱོགས་ཆོས་འཁོར་ལོའི་སྐོར་རགས་ཙམ་གླེང་བ།》དང་།མཚོ་སྔོན་དགེ་འོས་སློབ་ཆེན་གྱི་དགེ་རྒན་ཆེན་མོ་ཁྱུང་ཕྲུག་བློ་བཟང་དར་རྒྱས་ཀྱིས་ཁ་ཡིག་ལ《གཏན་ཚིགས་རིགས་པའི་ཚུལ་གསུམ་གྱི་རྣམ་གཞག་ལས་འཕྲོས་ཏེ་ཅུང་ཟད་དཔྱད་པ།》དང་། མཚོ་ལྷོ་ཀླུ་ཚང་དགོན་ཆེན་གྱི་དགེ་བཤེས་སྐལ་བཟང་རྒྱལ་མཚན་གྱིས་ཁ་ཡིག་ལ《ཕྱོགས་སྒྲའི་སྐབས་ཀྱི་ཕྱོགས་སྔ་སུ་ཡིན་འདོན་ཚུལ་ལ་ཅུང་ཙམ་དཔྱད་པ།》དང་། མཚོ་སྔོན་ཞིང་ཆེན་བོད་སྨན་ཁང་རྒྱལ་སྤྱིའི་རིག་གཞུང་སྤེལ་རེས་གཞུང་ལས་ཁང་གི་ཀྲུའུ་རིན་སྟག་འབུམ་རྒྱལ་གྱིས་ཁ་ཡིག་ལ《ཕྱོགས་ཆོས་འཁོར་ལོ་དགུ་དང་བོད་ཀྱི་གསོ་བ་རིག་པའི་ལིང་ཚེ་དགུའི་ཆུ་བརྟག་གི་འདྲ་ཁྱད།》ཅེས་པའི་གཏམ་བཤད་སྤེལ།

 

             མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཆོན་ཆི་ཀྲང་དང་མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་གླིང་གཙོ་ཟླ་བ་གཉིས་ཀྱིས་མཉམ་དུ་མཚོ་སྔོན་ཚད་རིག་ལྷན་ཚོགས་དྲ་བ་སྒོ་འབྱེད་པའི་ཡོལ་རས་ཕྱེ་བ།

 

                                                                                              རྩོམ་སྒྲིག་པ། བྱ་མདོ་གུར་ཀུམ།
             གསལ་འདེབས།
  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn