བླ་མའི་རྣལ་འབྱོར་གྲུ་འཛིན་ཞིང་གི་ཐེམ་སྐས་ཞེས་བྱ་བ་བཞུགས་སོ།།

ཡོང་ཁུངས།   དགེ་ལུགས་དྲ་བ།     སྤེལ་དུས།  2015-12-29 21:46:49         ཀློག་ཐེངས།  

                        3715469692581058845.jpg3715469692581058845.jpg

  ན་མོ་ཨཱ་རྱ་ལོ་ཀེ་ཤྭ་རཱ་ཡ། བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་མདོར་བསྡུས་ཉམས་སུ་ལེན་པར་འདོད་པས་སྐྱབས་སེམས་སྔོན་དུ་བཏང་སྟེ།  རང་གི་སྤྱི་བོར་པད་ཟླའི་སྟེང། །དྲིན་ཅན་རྩ་བའི་བླ་མ་དང། །དབྱེར་མེད་འཕགས་མཆོག་འཇིག་རྟེན་དབང། །ཞལ་གཅིག་ཕྱག་བཞིའི་དང་པོ་གཉིས། །ཐལ་སྦྱར་འོག་མ་ཤེལ་ཕྲེང་དང་། །རབ་རྒྱས་པད་དཀར་སྡོང་བུ་འཛིན། །ཞབས་ཟུང་མི་ཤིགས་སྐྱིལ་ཀྲུང་ཚུལ། །གསལ་རྫོགས་མཚན་དཔེའི་ཟླ་གཞོན་སྐུ། །དར་དང་རིན་ཆེན་རྒྱན་གྱིས་ཀླུབས། །རྡོ་རྗེ་གསུམ་མཚན་ཧཱུཾ་འོད་ཀྱིས། །མཆོག་གསུམ་མ་ལུས་སྤྱན་དྲངས་བསྟིམས། །སྐྱབས་གནས་ཀུན་འདུས་ངོ་བོར་གྱུར། །དྲི་བྲལ་ལྷུན་རྫོགས་དངོས་གྲུབ་གཏེར། །བླ་མ་ལྷ་ལ་གུས་ཕྱག་འཚལ། །ཀུན་བཟང་མཆོད་སྤྲིན་རྒྱ་མཚོས་མཆོད། །ནོངས་པ་གང་བགྱིས་བཤགས་ཤིང་སྡོམ། །གསང་གསུམ་མཛད་པར་རྗེས་ཡི་རང། །ཟབ་རྒྱས་ཆོས་ཆར་འབེབས་པར་བསྐུལ། །བསྐལ་བརྒྱར་མི་གཡོ་བརྟན་བཞུགས་གསོལ། །དགེ་ཚོགས་བྱང་ཆུབ་ཆེན་པོར་བསྔོ། །ཐུགས་སྲོག་ཧྲཱིཿཡིག་སྔགས་ཕྲེང་ལས། །འོད་འཕྲོས་མ་དག་སྣོད་བཅུད་སྦྱངས། །འགྲོ་ཀུན་ཕྱག་ན་པདྨོ་ཡི། །གོ་འཕང་མཆོག་ལ་འགོད་པར་གྱུར། །ཅེས་བཟླས་དམིགས་དང་འབྲེལ་ཡིག་དྲུག ༈ ཨོཾ་མ་ཎི་པདྨེ་ཧཱུཾཿ། ཅི་ནུས་བཟླ། ༈ བླ་མ་རྗེ་བཙུན་སྤྱན་རས་གཟིགས། །ཁྱོད་ལས་རེ་ས་གཞན་མེད་པས། །འདི་ནས་བྱང་ཆུབ་མ་ཐོབ་བར། །བརྩེ་ཆེན་ཐུགས་ཀྱིས་རྗེས་གཟུང་མཛོད། །དེ་ལྟར་སྙིང་ནས་གསོལ་བཏབ་མཐུས། །བླ་མ་འོད་ཞུ་རང་ལ་ཐིམ། །གསང་གསུམ་རྡོ་རྗེའི་བྱིན་བརྒྱ་ཡིས། །སྒོ་གསུམ་བྱིན་གྱིས་བརླབ་པར་གྱུར། །དགེ་བ་འདི་ཡིས་མྱུར་དུ་བདག །སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་ཡང། །གོང་ནས་གོང་དུ་འཕེལ་བར་ཤོག། །།

 

གསལ་འདེབས།     
       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་བཅས་གསལ་པོར་དགོད་པར་ཞུ།     

       རྩོམ་ཁུངས། དགེ་ལུགས་པའི་དྲ་བ།
        རྩོམ་འདིའི་སྦྲེལ་ཐག 
http://www.tb1025.cn

བརྒྱུད་འགོད།