ཨོཾ་གྲུབ་པའི་དབང་ཕྱུག་པདྨ་འབྱུང་གནས་དང༌། །བློ་བཟང་རྒྱལ་བའི་དབང་པོས་བཀའ་བསྒོས་བཞིན། །བསྟན་པ་སྐྱོང་མཛད་ལྷ་ཡི་དགེ་བསྙེན་ཆེ། །འཁོར་བཅས་ཐོགས་པ་མེད་པར་གཤེགས་སུ་གསོལ། །སྤྲིན་དཀར་གཡོ་འདྲའི་རྫུ་འཕྲུལ་རྟ་ཡི་སྟེང༌། །དར་མདུང་མདའ་གཞུ་ཞགས་པ་འཛིན་མཛད་ཅིང༌། །དཀར་གསལ་དཔལ་བརྗིད་མཛེས་པའི་རྣམ་འགྱུར་ཅན། །འཕྲིན་ལས་བསྒྲུབ་ཕྱིར་གནས་འདིར་བརྟན་པར་བཞུགས། །ཕྱི་ནང་གསང་བའི་མཆོད་པ་སྤྲིན་ལྟར་དཀྲིགས། །གསེར་སྐྱེམས་བདུད་རྩིའི་བཏུང་བ་རྒྱ་མཚོར་བསྐྱིལ། །ཤ་ཁྲག་གཏོར་མ་རི་རབ་ལྟར་སྤུངས་ནས། །དྲག་རྩལ་དགྲ་ལྷའི་རྒྱལ་པོ་འཁོར་བཅས་མཆོད། །འབར་བའི་མེ་ནང་བསངས་རྫས་སྟོང་ཕྲག་དང༌། །དྲི་ཞིམ་སྤོས་སྣ་བསྲེགས་པའི་དུད་པའི་སྤྲིན། །དབང་སྔོན་ཆུ་འཛིན་མཁའ་ལ་བསྙེགས་འདྲ་བས། །གཞི་བདག་དགེ་བསྙེན་ཆེན་པོ་འཁོར་བཅས་མཆོད། །རྣམ་འདྲེན་ཐམས་ཅད་གཟིགས་པའི་སྤྱན་སྔ་རུ། །དང་བོར་ཐུགས་བསྐྱེད་ས་བཅུའི་མཐར་སོན་ཀྱང༌། །འབྲོག་གནས་ཚུལ་བཟུང་རྨ་ཆེན་སྦོམ་ར་ཞེས། །ཆོས་འཁོར་སྐྱོང་མཛད་སྲུང་མ་ཁྱོད་ལ་བསྟོད། །དགེ་ལྡན་རྣམ་པར་རྒྱལ་བའི་གླིང་ཆེན་པོ། །བློ་གསལ་མཁས་མང་ནོར་བུས་ཡོངས་གང་ཞིང༌། །བཤད་སྒྲུབ་འདོད་དགུའི་ལོངས་སྤྱོད་ཕུན་ཚོགས་ཀྱིས། །དར་རྒྱས་སྲིད་མཐའི་བར་དུ་གནས་པར་མཛོད། །ལྷག་　བསམ་དག་པས་ཚུལ་འདིར་བརྩོན་པ་དང༌། །ཚངས་དང་དབང་བོ་འཇིག་རྟེན་སྐྱོང་བ་དང༌། །རྨ་ཆེན་སྦོམ་ར་ལ་སོགས་སྲུང་མས་ཀྱང༌། །གཡེལ་བ་མེད་པར་རྟག་ཏུ་གྲོགས་བྱེད་ཤོག ། ཞེས་སོགས་བྱའོ། །འདི་ནི་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསུང་འབུམ་ཨེ་ཝཾ་ལས་བཤུས་པའོ། །

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn 

ག་ཏུ་གྲོགས་བྱེད་ཤོག ། ཞེས་སོགས་བྱའོ། །འདི་ནི་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསུང་འབུམ་ཨེ་ཝཾ་ལས་བཤུས་པའོ། །