༄༅། །རབ་འབྱམས་གསུང་རབ་ཀུན་ལ་ལྟ་བའི་མིག །སྐལ་བཟང་ཐར་བར་བགྲོད་པའི་འཇུག་ངོགས་མཆོག །བརྩེ་བས་བསྐྱོད་པའི་ཐབས་མཁས་མཛད་པ་ཡིས། །གསལ་མཛད་བཤེས་གཉེན་རྣམས་ལ་གུས་ཕྱག་འཚལ། །

རྫོགས་པའི་སངས་རྒྱས་སྟོང་གི་ཐུགས་སྨོན་དང་། །རྒྱལ་སྲས་བྱང་ཆུབ་སེམས་དཔའི་སྤྱོད་པ་དང་། །འཕགས་པ་གནས་བརྟན་རྣམས་ཀྱི་སྨོན་ལམ་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

སྟོན་པ་རྫོགས་སངས་རྒྱས་ཀྱི་ཐུགས་བསྐྱེད་དང་། །ཉན་ཐོས་ཆེན་པོ་རྣམས་ཀྱི་མཁྱེན་བརྩེ་དང་། །བསྟན་པའི་གཏད་རབས་རྣམས་ཀྱི་ལྷག་བསམ་གྱིས། །དཔལ་ལྡན་བླ་མའི་ཞབས་པད་བརྟན་པར་ཤོག །

འཛམ་གླིང་མཛེས་བྱེད་རྣམས་ཀྱི་མཁྱེན་བརྩེ་དང་། །བཀའ་གདམས་དགེ་བའི་བཤེས་ཀྱི་ཉམས་ལེན་དང་། །དགེ་ལྡན་དམ་པའི་མཁས་བཙུན་བཟང་གསུམ་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

འཇམ་དབྱངས་དྲག་ཏུ་ཁྲོས་པའི་འཇིགས་བྱེད་དང་། །གསང་བ་འདུས་པ་བདེ་མཆོག་ཧེ་རུ་ཀ །རབ་འབྱམས་ཡི་དམ་ལྷ་ཡི་དཀྱིལ་འཁོར་གྱིས། །དཔལ་ལྡན་བླ་མའི་ཞབས་པད་བརྟན་པར་ཤོག །

འཕགས་མཆོག་སྤྱན་རས་གཟིགས་ཀྱི་སྙིང་རྗེ་དང་། །རྗེ་བཙུན་འཇམ་པའི་དབྱངས་ཀྱི་ཤེས་རབ་དང་། །རྒྱལ་སྲས་ཕྱག་ན་རྡོ་རྗེ་མཐུ་སྟོབས་ཀྱིས། །དཔལ་ལྡན་བླ་མའི་ཞབས་པད་བརྟན་པར་ཤོག །

རྒྱལ་ཡུམ་རྗེ་བཙུན་སྒྲོལ་མའི་མཁྱེན་བརྩེ་དང་། །སངས་རྒྱས་ཚེ་དཔག་མེད་ཀྱི་བྱིན་རླབས་དང་། །གཙུག་ཏོར་རྣམ་པར་རྒྱལ་མའི་མཐུ་སྟོབས་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

སྙིང་རྗེའི་རང་གཟུགས་མྱུར་མཛད་མགོན་པོ་དང་། །ལས་འབྲས་ཤན་འབྱེད་ཆོས་ཀྱི་རྒྱལ་བོ་སྟེ། །ཚུལ་ཁྲིམས་ལྷ་མཆོག་རྣམ་སྲས་ཐུགས་བསྐྱེད་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

སྲིད་ལས་ངེས་པར་འབྱུང་བའི་བསམ་པ་དང་། །འཁོར་རྩ་དྲུངས་ནས་འབྱིན་པའི་ལྟ་བ་དང་། །སྐྱེ་རྒུའི་གསོས་གྱུར་བྱང་ཆུབ་སེམས་པའི་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

དཀོན་མཆོག་ཀུན་འདུས་དཔལ་ལྡན་བླ་མ་ལ། །བསམ་དང་སྦྱོར་བའི་ཚུལ་བཞིན་བསྟེན་པ་ལས། །བཤད་སྒྲུབ་ཟུང་འབྲེལ་རྒྱལ་མཚན་སྒྲེང་བའི་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

ལུང་ཆོས་སྡེ་སྣོད་གསུམ་གྱི་འཆད་ཉན་དང་། །ལྷག་པའི་བསླབ་པ་གསུམ་གྱི་ཉམས་ལེན་དང་། །ལྟ་སྒོམ་སྤྱོད་གསུམ་རོལ་མཚོ་རྒྱས་པའི་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

གཞུང་བཟང་ནང་ལ་བསྐོར་བའི་ཐོས་པ་དང་། །ཐོས་དོན་རྒྱུད་ལ་བསྐོར་བའི་བསམ་པ་དང་། །བསམ་དོན་གཉེན་པོར་བསྐོར་བའི་སྒོམ་པ་ཡིས། །དཔལ་ལྡན་བླ་མའི་ཞབས་པད་བརྟན་པར་ཤོག །

ཉེས་ལྟུང་ཕྲ་མོས་མ་གོས་ཚུལ་ཁྲིམས་དང་། །བྱིང་རྒོད་རྨུགས་པ་བྲལ་བའི་ཏིང་ངེ་འཛིན། །ཉོན་མོངས་གཉེན་དུ་འགྲོ་བའི་ཤེས་རབ་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

བསྟན་པ་འགྲོ་བའི་གསོས་སུ་དར་བ་དང་། །འགྲོ་བ་བསྟན་པའི་ལམ་དུ་འཇུག་པ་དང་། །མདོ་སྔགས་ཟུང་འབྲེལ་བསྟན་པ་རྒྱས་པའི་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

ལྷ་ཆོས་དགེ་བ་བཅུ་ལ་སྤྱོད་པ་དང་། །མི་ཆོས་གཙང་མར་འཇུག་པའི་ལམ་བཟང་དང་། །བླང་དོར་ལམ་བཟང་རྣམ་པར་འབྱེད་པའི་མཐུས། །དཔལ་ལྡན་བླ་མའི་ཞབས་པད་བརྟན་པར་ཤོག །

རྗེ་བཙུན་བླ་མ་སྐུ་ཚེ་རབ་བརྟན་ ཅིང་། །རྣམ་དཀར་འཕྲིན་ལས་ཕྱོགས་བཅུར་རྒྱས་པ་དང་། །བློ་བཟང་བསྟན་པའི་སྒྲོན་མེས་ས་གསུམ་གྱི། །འགྲོ་བའི་མུན་སེལ་རྟག་ཏུ་གནས་གྱུར་ཅིག །

དཔལ་ལྡན་བླ་མའི་རྣམ་པར་ཐར་བ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་ནས་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །

གང་སྣང་བླ་མའི་གསང་གསུམ་རོལ་བར་འཆར། །གང་བྱས་བླ་མ་མཉེས་པའི་རྒྱུ་རུ་འགྲོ། །གང་བསམ་བླ་མའི་ཐུགས་རྗེས་མྱུར་དུ་འགྲུབ། །གང་དུ་སྐྱེས་ཀྱང་བླ་མའི་རྗེས་འཛིན་ཤོག །

རྨད་བྱུང་སྲས་བཅས་རྒྱལ་བའི་བྱིན་རླབས་དང་། །རྟེན་འབྲེལ་བསླུ་བ་མེད་པའི་བདེན་པ་དང་། །བདག་གི་ལྷག་བསམ་དག་པའི་མཐུ་སྟོབས་ཀྱིས། །སྨོན་པའི་དོན་ཀུན་བདེ་བླག་མྱུར་འགྲུབ་ཤོག །

ཅེས་པ་འདི་ནི་མཚོ་སྔོན་པོ་ལྷོ་བརྒྱུད་ཀྱི་ཆོས་སྡེ་ཐར་ཤུལ་དགོན་པའི་དགེ་སློང་བློ་བཟང་ཚོགས་གཉིས་དང་།སྟོང་སྐོར་དང་ནགས་མཐའ་སྤྱི་བའི་སྤྱི་དཔོན་དགེ་འདུན་དང་། སྟོང་སྐོར་སྡེ་བའི་སྡེ་དཔོན་ཚེ་རིང་དོན་འགྲུབ་སོགས་ཀྱིས་རྣལ་འབྱོར་དབང་ཕྱུག་སོ་མ་སྤྲུལ་སྐུ་བློ་བཟང་ཡེ་ཤེས་དབང་ཕྱུག་གི་ཞབས་སྔ་ནས་ཀྱི་ཞབས་བརྟན་གསོལ་འདེབས་ཤིག་དགོས་ཞེས་ལྷ་རྫས་དྲི་མ་མེད་པ་སོགས་དངོས་སྐྱེས་དང་བཅས་བསྐུལ་བའི་ངོར་ཤཱཀྱའི་དགེ་སྦྱོང་གི་གཟུགས་བརྙན་འཛིན་པ་འདུ་ཤེས་གསུམ་པ་ཤེས་རབ་བསྟན་དར་གྱིས་དམ་པ་ཁོང་གིས་གཙོས་སྐྱེས་ཆེན་དམ་པ་སྤྱིའི་ཞབས་བརྟན་གསོལ་འདེབས་སུ་བོད་ལྕགས་བྱི་ལོའི་ཧོར་ཟླ་ལྔ་བའི་ཚེས་ཉེར་གཉིས་ཉིན་མང་རའི་དགོན་ཆེན་དུ་སྨོན་པས་མཚམས་སྦྱར་ཏེ་བྲིས་པའོ། །

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn