དགེ་འདུན་འདུས་པའི་གཡང་འགུགས། །

    སྤེལ་དུས།  2018-03-19 08:02:27         ཀློག་ཐེངས།  

 

0947429804.jpg


          ༄༅། །རབ་འབྱམས་ཚོགས་གཉིས་ཆུ་གཏེར་ལམ་བསྟེན་ནས། །སྐུ་བཞིའི་ནོར་བུའི་མཛོད་ལ་མངའ་བརྙེས་པ། །འཁོར་དབུལ་དུང་རྣམས་སྐྱབས་འོས་དེད་དཔོན་ཆེ། །བླ་མ་ལྷ་ཡིས་འདོད་དོན་མྱུར་སྒྲུབ་གསོལ། །གྲོང་བའི་དུ་བརྫེས་བཙན་དུག་མ་འདྲེས་ཤིང་། །ཆོས་བརྒྱད་སྣ་མའི་མེ་ཏོག་མཚར་དུ་མངར། །ཕན་བདེའི་ངད་དང་འཐུལ་བའི་སྐྱེད་ཚལ་འདིར། །ཐར་འདོད་བཅུད་འཛིན་འདུ་བའི་ཕྱྭ་གཡང་སྩོལ། །མི་བྱེད་དགུ་བྱེད་གསོད་པོ་མི་རྒྱུ་ཞིང་། །ལོག་པར་འཁུ་བའི་འཇབ་བུས་དབེན་པ་ཡི། །སྨན་ལྗོངས་བག་ཕེབས་འདི་ན་སྐལ་ལྡན་གྱི། །ས་ལུས་དཔག་མེད་འདུ་བའི་ཕྱྭ་གཡང་སྩོལ། །སྙིགས་དུས་འཁྲུག་ལོང་རྩུབ་མོས་མི་འཚེ་ཞིང་། །ལྟ་ངན་བློན་ཀུན་རྣམས་ཀྱང་དབང་མི་ནུས། །རྩེ་གཅིག་སངས་རྒྱས་ལམ་ལ་མངོན་གཞོལ་བའི། །དགེ་འདུན་བགྲང་ཡས་འདུ་བའི་ཕྱྭ་གཡང་སྩོལ། །དུལ་སོགས་བསླབ་པའི་མཚན་ལྡན་དགེ་བའི་བཤེས། །གཟུར་གནས་ལ་སོགས་ཉན་པའི་སྣོད་རུང་བ། །མ་བུའི་འབྲེལ་བཞིན་ནམ་ཡང་བྲལ་མེད་པར། །འཆད་ཉན་ཚུལ་བཞིན་གྲུབ་པའི་ཕྱྭ་གཡང་སྩོལ། །རབ་མང་ཐོས་པའི་རྩ་བ་རབ་བརྟན་ཅིང་། །རབ་འཇམ་བསམ་པའི་མེ་ཏོག་ཁ་ཕྱེ་བ། །རབ་ལེགས་སྒོམ་པའི་སྙེ་མ་གཡུར་ཟ་བའི། །སྐལ་བཟང་སྡོང་བུ་འདུ་བའི་ཕྱྭ་གཡང་སྩོལ། །བྱིང་རྨུགས་བྲལ་བའི་དྲན་ཤེས་གོ་ཁྲབ་གྱོན། །དཔྱད་འཇོག་ཟུང་འབྲེལ་གྲི་ཕུབ་དགྲ་ཐབས་ཀྱིས། །བདེན་འཛིན་ཆོམ་རྐུན་སྡེ་བཅས་མཐར་བྱེད་པའི། །རྣལ་འབྱོར་དཔའ་བོ་འདུ་བའི་ཕྱྭ་གཡང་སྩོལ་། །ཆོས་མཐུན་འབྱོར་བ་མི་ཟད་ཆུ་བོའི་གཏེར། །ཆོས་བཞིན་སྒྲུབ་པའི་འདུས་སྡེ་ཀུ་མུད་གཉེན། །ཆོས་ཀྱི་སྦྱིན་བདག་དད་ལྡན་ས་མོས་གསུམ །།གནས་འདིར་གཅིག་ཆར་འཕེལ་པའི་ཕྱྭ་གཡང་སྩོལ། །བསླུ་མེད་མཆོག་གསུམ་ཐུགས་རྗེའི་ཉིན་བྱེད་དང་། །དམ་ལྡན་ཆོས་སྲུང་ནུས་པའི་དག་བྱེད་དང་། །བདག་སོགས་རྣམ་དཀར་དགེ་བའི་ས་བོན་མཐུས། །འབྲས་བུ་སྨོན་བཞིན་གྲུབ་པའི་ཕྱྭ་གཡང་སྩོལ། །ཆོས་ཀྱི་མདུན་ས་དཔལ་ཆེན་ནོར་བུ་འདི། །སྲུང་མ་འདས་དང་མ་འདས་ཁྱེད་རྣམས་ཀྱི། །སྔོན་གྱི་དམ་བཅས་དྲན་ནས་དུས་ཀུན་ཏུ། །འདོད་དོན་གྲུབ་པའི་འཕྲིན་ལས་ཅིས་ཀྱང་མཛོད། །གྲུབ་པའི་དབང་ཕྱུག་དཔལ་ལྡན་བླ་མ་དང་། །བསླུ་བ་མེད་པའི་སྐྱབས་གནས་དཀོན་མཆོག་གསུམ། །ཐུབ་བསྟན་སྲུང་མ་གནས་གསུམ་མཁའ་འགྲོའི་ཚོགས། །དབྱེར་མེད་ཞབས་གྱི་པདྨོར་བཀའ་དྲིན་དང་། །སྲས་བཅས་རྒྱལ་བའི་རྣམ་དཀར་དགེ་ཚོགས་ཀྱིས། །ཚུལ་བཞིན་གྲུབ་ལ་མཐུན་པའི་བསམ་པ་ཡིས། །ཐུབ་བསྟན་རྒྱ་མཚོ་དཔལ་དེ་ཡུན་རིང་དུ། །གནས་ཞིང་འཕྲིན་ལས་ཕྱོགས་བཅུར་རྒྱས་པར་ཤོག །གནས་འདིར་བྱིན་རླབས་དཔལ་འབྱོར་སླར་རྒྱས་ཤིང་། །བསམ་འབྱོར་ངན་པའི་གདུག་རྩུབ་ཞི་བ་དང་། །བསླབ་གསུམ་རྣམ་པར་དག་པའི་ཁུར་འཁྱེར་པའི། །དགེ་འདུན་ཚོགས་ཀྱིས་བཀང་བའི་བཀྲ་ཤིས་ཤོག །བསླབ་པ་གསུམ་ལྡན་ངུར་སྨྲིག་འཛིན་པ་ཡི། །འདུས་པའི་ཚོགས་ཀྱིས་གནས་འདིར་ཡོངས་གང་ཞིང་། །རྟག་ཏུ་བཤད་སྒྲུབ་བྱ་བས་སྲིད་མཐའི་བར། །ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn


བརྒྱུད་འགོད།