ན་མཿསྭ་ར་སྭ་སྟྱཻ། བླ་མ་ཡི་དམ་རྡོ་རྗེ་འཇིགས་བྱེད་དང༌། །དབྱེར་མེད་རྒྱལ་བ་གཉིས་པའི་ཞབས་པད་ལ། །གུས་པས་འདུད་དོ་མཐུ་སྟོབས་བྱིན་རླབས་ཀྱིས། །དངོས་གྲུབ་ཆར་དང་འདོད་དོན་འགྲུབ་པར་མཛོད། །སྔོན་དུས་རིང་པོའི་ཐུགས་བསྐྱེད་སྨོན་ལམ་གྱིས། །ཀླུ་རྒྱལ་སྨན་ཆུ་ཁོལ་བས་འགྲོ་བའི་ནད། །བཞི་བརྒྱ་རྩ་བཞི་ཞི་མཛད་ཤར་ཕྱོགས་ཀྱི། །ཤེལ་གྱི་ལྷ་མོ་ནུབ་ཀྱི་སྲིན་མོ་དང༌། །བྱང་གི་ལྷ་མོ་འབྲོང་མོ་ཁྱུང་རྒྱལ་མ། །ལ་སོགས་ལྷ་མོ་ཀླུ་མོ་བཙན་བདུད་ཀྱི། །མཚོ་སྨན་བྱེ་བ་འབུམ་བཅས་ཁྱོད་ལ་བསྟོད། །སྙིགས་མའི་རླིང་སྤྱོད་ངན་ཡང་ཐུགས་རྗེའི་མཚོ། །ཆེན་པོ་རྒྱ་མཚོའི་མཆེད་ཟླ་ལ་འོས་པའི། །གསོལ་མཆོད་བསྟོད་པས་རྣལ་འབྱོར་བདག་ཅག་གིས། །གང་བཅོལ་འཕྲིན་ལས་སྒྲུབ་ལ་མ་གཡེལ་ཞིག །བདུད་རྩི་སྨན་དང་དཀར་གསུམ་མངར་གསུམ་བཅས། །ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །མཐུན་པའི་མཆོད་གཏོར་འདི་བཞེས་འཛམ་གླིང་ཀུན། །ཐུབ་བསྟན་སྙིང་པོ་ཞྭ་སེར་མདོ་སྔགས་ཀྱི། །བསྟན་པའི་དྲི་བཟང་ཕྱོགས་ཀུན་འགེངས་པར་ཤོག །བསྟན་པའི་བདག་པོ་རྒྱལ་བ་ཡབ་སྲས་དང༌། །བསྟན་དང་བསྟན་འཛིན་དར་ཞིང་རྒྱས་པ་དང༌། །བསྟན་པའི་སྦྱིན་བདག་སྟོབས་འབྱོར་མངའ་ཐང་རྣམས། །མང་བཀུར་རྒྱལ་པོའི་ངང་ཚུལ་དངོས་བྱོན་མཛོད། །བླ་མ་རྡོ་རྗེ་འཇིགས་བྱེད་ནུས་མཐུ་དང༌། །བསྟན་སྲུང་མཁའ་འགྲོ་ཆོས་སྐྱོང་གཟི་བརྗིད་དང༌། །རྟེན་འབྲེལ་མི་བསླུ་ལྷག་བསམ་དག་པའི་མཐུས། །འདོད་དོན་མ་ལུས་ལྷུན་གྱིས་འགྲུབ་གྱུར་ཅིག །ཅེས་པ་འདི་ཡང་༸རྗེ་འཇམ་དབྱངས་བཞད་པས་གསུངས་སོ། །

                                                                                                                        རྩོམ་སྒྲིག་པ། མང་ར་བ།

           གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn