ཧཱུཾ་ལྷུན་གྲུབ་བདེ་ཆེན་འབར་བའི་གཞལ་ཡས་ནས། །རྡོ་རྗེ་འཆང་དང་རྒྱལ་བ་གཉིས་པའི་ཞབས། །རྡོ་རྗེ་འཇིགས་བྱེད་ཧེ་རུ་ཀ་དཔལ་སོགས། །བླ་མ་ཡི་དམ་བསྲུང་མས་གཟི་བྱིན་བསྐྱེད། །རྒྱལ་བ་གཉིས་པ་བླ་ཆེན་ལ་སོགས་པའི། །རྩ་བརྒྱུད་བླ་མས་བསྟན་བ་སྲུངས་ཤིག་ཅེས། །བཀའ་བསྒོས་སྟོབས་ལྡན་འོད་འབར་རྒྱལ་མཚན་དང༌། །ལྷ་ཀླུ་གཉན་དང་བཙན་སོགས་གནས་འདིར་བྱོན། །མདུན་གྱི་ནམ་མཁར་འོད་འབར་གཞལ་ཡས་དབུས། །སེང་ཁྲི་པདྨའི་གདན་སོགས་ལ་བཞུགས་ནས། །དགྱེས་བྱེད་དངོས་བཤམས་ཡིད་སྤྲུལ་ལྷ་དང་མིའི། །མཆོད་རྫས་སྤྲིན་གྱི་ཕུང་པོར་འཁྲིགས་པ་བཞེས། །སྦྱངས་རྟོགས་སྦར་བའི་བདུད་རྩིའི་གཏོར་མའི་གཙོས། །རབ་མཛེས་མེ་ཏོག་དྲི་ཞིམ་བདུག་སྤོས་དང༌། །རིན་ཆེན་སྒྲོན་མེ་དྲི་ཆབ་རོ་བརྒྱའི་ཟས། །སྙན་བརྗིད་རོལ་མོའི་ཚོགས་འབུལ་འདི་བཞེས་ལ། །དགེ་འདུན་ཐོས་བསམ་བསྒོམ་གསུམ་རབ་རྒྱས་ཤིང༌། །ཕུན་ཚོགས་དཔལ་འབྱོར་མ་ལུས་ལེགས་འདུ་ཞིང༌། །དགེ་འདུན་ལ་གནོད་ནད་གདོན་དགྲ་སོགས་ཀྱིས། །ཉེ་བར་འཚེ་བ་ཐམས་ཅད་ཞི་བར་མཛོད། །ཁྱད་པར་རྒྱལ་བ་གཉིས་པའི་རིང་ལུགས་ཀྱི། །བཤད་སྒྲུབ་རྒྱལ་མཚན་འཛིན་པའི་དགེ་འདུན་སྡེ། །བསླབ་པ་གསུམ་ལྡན་མཁས་མང་ངུར་སྨྲིག་འཛིན། །འདུས་སྡེས་གནས་འདིར་དུས་ཀུན་ཁྱབ་པར་མཛོད། །སྟོབས་ལྡན་འོད་འབར་རྒྱལ་མཚན་གསོལ་མཆོད་ཚུལ། །དགེ་ལེགས་རྒྱ་མཚོའི་སྤྲིན་ཞེས་བྱ་བ་ཡང༌། །གྲུབ་དབང་ལི་གྱ་སྤྲུལ་སྐུས་བསྐུལ་པའི་ཚེ། །མང་ཐོས་ཤཱཀྱའི་དགེ་སློང་འཇམ་བའི་དབྱངས། །བཞད་པའི་རྡོ་རྗེས་དགའ་བས་སྤྲོ་བཞིན་དུ། །བསྟན་དང་འགྲོ་ལ་ཕན་པའི་སེམས་ཀྱིས་བྲིས། །དགེ་ལེགས་འཕེལ།

                                                                                                                              རྩོམ་སྒྲིག་པ། མང་ར་བ།

           གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn