༄༅།། མགོན་ཐུགས་རྗེའི་གཏེར་ཆེན་སྤྱན་རས་གཟིགས།། བོད་པུར་རྒྱལ་འདྲེན་པ་དཀོན་མཆོག་འབངས།། དུས་ད་ལྟ་འཇམ་དབྱངས་བཞད་པའི་སྡེ།། ལྷ་བླ་མ་དབྱེར་མེད་ཐུགས་རྗེས་གཟིགས།། བོད་ཆེན་པོ་བྱང་གི་ཕྱོགས་མཐར་འདིར།། མ་འགྲོ་བའི་བདེ་སྐྱིད་བསྟན་ལ་རག ། ཆོས་བསྟན་པའི་འཕེལ་རྒྱས་ཁྱེད་ཀྱི་དྲིན།། འདི་བསམ་ཞིང་བཀའ་དྲིན་སྙིང་ནས་དྲན།། སྔོན་བླ་མ་དྲི་མ་མེད་པ་དང་།། མ་མཁའ་འགྲོ་གསང་བ་ཡེ་ཤེས་སོགས།། ཡོངས་གནས་གསུམ་གྱི་དཔའ་བོ་དཔའ་མོ་ཀུན།། མགྲིན་གཅིག་གིས་ལུང་བསྟན་ཇི་ལྟར་མཛད།། ཀྱཻ་གངས་རིའི་མགོན་པོ་སྤྱན་རས་གཟིགས།། གནས་དེ་ན་ཁྱོད་ཀྱི་ཞིང་ཁམས་ཡོད།། ཞིང་དེ་ན་ཁྱོད་ཀྱི་གདུལ་བྱ་ཡོད།། ཅེས་ལུང་བསྟན་གྱི་གདུལ་བྱའི་དུས་ལ་བབས།། ཆེས་སྙིགས་མ་ལྔ་བདོའ་དུས་ངན་དང་།། ལས་སྡིག་ལ་སྤྱོད་པའི་ཡུལ་མཐའ་འདིར།། ལྷ་སྙིང་རྗེའི་གཏེར་ཆེན་ཁྱོད་མིན་པ།། ང་ཉམ་ཐག་གི་མགོན་སྐྱབས་སུ་ལ་ཞུ།། ཆོས་མདོ་སྔགས་བསྟན་པ་ཉི་རྒས་འདྲ །། དེ་བཤད་སྒྲུབ་ཀྱིས་འཛིན་པའི་བསྟན་འཛིན་དཀོན།། ཆོས་ཚུལ་བཞིན་སྒྲུབ་ལ་དགྲ་བོ་མང་།། དུས་སྙིགས་མའི་རང་མཚང་མཚོ་ལྟར་རྡོལ།། འདི་བསམས་ན་ཤེས་པ་གཏིང་ནས་སྐྱོ།། སེམས་སྐྱོ་ཡང་ལས་ངན་སྒྲོག་གིས་བཅིངས།། ང་གདུངས་བའི་འོ་དོད་རྒྱང་ནས་འབོད།། ལྷ་ཐུགས་རྗེ་ཆེན་པོས་གསན་ལགས་སམ།། སྒོས་ཚེ་ཐུང་ནམ་འཆི་ཆ་མེད་ལ།། ཉིན་དེ་རིང་ཡན་ཆད་གདོན་གྱིས་སྨྱོས།། ལས་དོན་མེད་སྡིག་པས་རང་རང་ཕུང་།། ད་འགྱོད་ཀྱང་འགྱོད་པ་འཕྱིས་ནས་གདའ །། མི་རྒན་གཞོན་མེད་པར་འཆི་བ་ལ།། ཁྱད་མེད་པ་རང་གིས་མངོན་སུམ་མཐོང་།། ང་རང་རང་དེ་ལྟར་གློ་བུར་དུ།། འཆི་མི་དགོས་བློ་རྩེ་ཅི་ཞིག་ཡོད།། རི་ལུང་བ་གསེར་གྱིས་བཀང་ན་ཡང་།། རང་འཆི་དུས་རྡུལ་ཙམ་འཁྱེར་དབང་མེད།། གཟུངས་ཡིག་དྲུག་ཚར་གཅིག་བཏོན་ན་ཡང་།། དེ་འཇིག་རྟེན་ཕྱི་མའི་ལམ་རྒྱག་ཡིན།། ཆོས་གཅིག་ལ་བྱིན་རླབས་ཆེ་བ་དེ།། སྔགས་གཟུངས་མཆོག་ཡི་གེ་དྲུག་མ་ཡིན།། ཁོང་བྱིས་པ་ཚུན་ཆད་ཤེས་པ་དེ།། ངེད་བོད་ཀྱི་ཆོས་སྐལ་ཡིན་པའི་རྟགས།། མི་སྡིག་ཅན་བཙན་ཐབས་འཚང་རྒྱའི་ཆོས།། དཀོར་བག་ཆགས་ངན་པ་སྦྱོང་བ་ལ།། ཆེས་ཟབ་པའི་མཐར་ཐུག་སྨྱུང་གནས་ཡིན།། འདིའི་ཕན་ཡོན་ནམ་མཁའི་མཐའ་དང་མཉམ།། དུས་དེང་སང་ངན་པ་མགོ་མཐོ་ཡང་།། ལམ་བར་དོའ་འཕྲང་རིང་བརྒལ་བའི་ཉིན།། དགྲ་གཤིན་རྗེའི་དམག་གིས་བསྐོར་བའི་ཚེ།། ཆོས་ཚུལ་བཞིན་བྱས་པའི་མི་དེ་སྐྱིད།། འཕྲང་ཡ་ངའི་འཇིགས་པ་སེལ་འདོད་ཅིང་།། མར་ངན་སོང་སྐྱེ་སྒོ་གཅོད་འདོད་ན།། ལྷ་ཐུགས་རྗེ་ཆེན་པོའ་ཞབས་ལ་འཇུས།། དུས་ཉིན་མཚན་མེད་པར་གསོལ་བ་ཐོབ།། ཡ་མི་ལུས་དོན་དང་ལྡན།། ཆོས་བསྟན་དང་མཇལ་བའི་དགོས་པ་འགྲུབ།། ཚུལ་དེ་ལྟར་སྨྲས་པའི་དགེ་བས་ཀྱང་།། ངེད་ཡོན་མཆོད་བློ་སྣ་ཆོས་ལ་བསྒྱུར།། ལས་དཀར་བོ་དགེ་ལ་རྟག་སྤྱད་ནས།། མཆོག་ཐར་བའི་གོ་འཕང་མྱུར་ཐོབ་ཤོག ། ཅེས་སྨྱུང་གནས་སོགས་དང་འབྲེལ་བར་མ་ཎི་བསྐུལ་བའི་མགུར་དབྱངས་འདི་ལྟ་བུ་ཞིག་དགོས་ཞེས་འཕགས་པ་ཐུགས་རྗེ་ཆེན་པོའི་རྣལ་འབྱོར་ལ་བརྩོན་པའི་སྨྱུང་གནས་པ་དགེ་སློང་ངག་དབང་རྒྱལ་མཚན་གྱིས་བསྐུལ་ངོར་༧བཙུན་པ་དཀོན་མཆོག་བསྟན་པའི་སྒྲོན་མེས་ཀུན་གྱིས་གོ་བདེ་བར་བྲིས་པ་འདིས་ཀྱང་སྐྱེ་བོ་རྣམས་ལ་ཕན་ཐོགས་པར་གྱུར་ཅིག ། །།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn