༄༅།།སངས་རྒྱས་ཆོས་དང་ཚོགས་ཀྱི་མཆོག་རྣམས་ལ།།བྱང་ཆུབ་བར་དུ་བདག་ནི་སྐྱབས་སུ་མཆི།།བདག་གིས་སྦྱིན་སོགས་བགྱིས་པ་འདི་དག་གིས།།འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག།ལན་གསུམ་བརྗོད།ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷེ་ཉ་ཧཾ།ཆོས་ཐམས་ཅད་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དུ་གྱུར།སྟོང་པའི་ངང་ལས་སྣ་ཚོགས་པདྨ་དང་ཉི་མ་དང༌།རོའི་གདན་ལ་རང་ཉིད་ཡེ་ཤེས་ཀྱི་མཁའ་འགྲོ་མ་སེངྒེའི་གདོང་པ་ཅན།གཡས་སུ་ཡེ་ཤེས་ཀྱི་མཁའ་འགྲོ་མ་སྟག་གི་གདོང་པ་ཅན།གཡོན་དུ་ཡེ་ཤེས་ཀྱི་མཁའ་འགྲོ་མ་དོམ་གྱི་གདོང་པ་ཅན།གསུམ་ཀའང་མགྲིན་པ་མན་ཆད་སྐུ་མདོག་སྔོན་པོ།ཞལ་གཅིག་ཕྱག་གཉིས་ཕྱག་གཡས་ཉི་མའི་དཀྱིལ་འཁོར།གཡོན་ཟླ་བའི་དཀྱིལ་འཁོར།ཞབས་གཡས་བསྐུམ་ཞིང་གཡོན་བརྐྱང་བའི་གར་སྟབས་ཀྱིས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ།དེའི་སྤྱི་བོར་ཨོཾ།མགྲིན་པར་ཨཱཿཐུགས་ཀར་ཧཱུཾ།ཐུགས་ཀའི་ཧཱུཾ་ལས་འོད་ཟེར་འཕྲོས་པས།མཁའ་སྤྱོད་ཀྱི་གནས་ནས་ཡེ་ཤེས་ཀྱི་མཁའ་འགྲོ་མ་སེངྒེའི་གདོང་པ་ཅན་ལ་སོགས་པ་མཁའ་འགྲོ་མ་བྱེ་བ་འབུམ་གྱི་ཚོགས་དང་བཅས་པ།གཞན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས།བཛྲ་ས་མ་ཡ་ཛཿཛཿདུས་གསུམ་རྒྱལ་བ་མ་ལུས་བསྐྱེད་མཛད་མ།།དམ་ཉམ་དགྲ་བགེགས་ཐལ་བར་རློག་མཛད་མ།།ཡེ་ཤེས་མཁའ་འགྲོ་སེང་གེའི་གདོང་པ་ཅན།།བསྟན་སྲུང་ཆེན་མོ་འཁོར་བཅས་གཤེགས་སུ་གསོལ།།ལན་གསུམ་བརྗོད།སྤྱན་དྲངས་པའི་ལྷ་ཚོགས་དེ་རྣམས་ཀྱིས་བདག་ཉིད་ལ་མགོན་སྐྱབས་དང་དཔུང་གཉེན་གྱི་ཚུལ་དུ་བཞུགས་པར་གྱུར།རང་གི་ཐུགས་ཀའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་བཟླས་བྱའི་སྔགས་ཀྱིས་གཡས་བསྐོར་དུ་བསྐོར་བར་གྱུར།ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿཿལན་གང་མང་བརྗོད།ན་མོ་བླ་མ་ཡང་དག་པའི་ཡོངས་འཛིན་དགེ་བའི་བཤེས་གཉེན་རྣམས་ཀྱི་བདེན་པ་དང༌།ཡི་དམ་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང༌།སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བདེན་པ་དང༌།དཔལ་མགོན་དམ་པ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་བདེན་པ་དང༌།ཁྱད་པར་དུ་ཡང་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་ལ་སོགས་པ་མཁའ་འགྲོ་མ་བྱེ་བ་འབུམ་གྱི་ཚོགས་དང་བཅས་པ་རྣམས་ཀྱི་བདེན་པ་དང༌།བདེན་པ་ཆེན་པོས་བྱིན་གྱིས་བརླབས་པ་ལ་བརྟེན་ནས།རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་ཐམས་ཅད་ལ་སྡང་བའི་སེམས་དང་ལྡན་པ།གདུག་པའི་སེམས་དང་ལྡན་པ།བསམ་པ་ངན་པ།སྦྱོར་བ་རྩུབ་པ་ཐམས་ཅད་ཕྱིར་བཟློག་ཅིང་ཐལ་བའི་རྡུལ་ཕྲན་བཞིན་དུ་བརླག་པའི་འཕྲིན་ལས་མཛོད་ཅིག།མཁའ་འགྲོ་བྱེ་བའི་ཚོགས་རྣམས་ཀྱིས།།དགྲ་བགེགས་བྱད་མ་ཐམས་ཅད་ཀྱི།།ལུས་ངག་ཐལ་བའི་རྡུལ་དུ་རློགས།།རྣམ་ཤེས་ཆོས་ཀྱི་དབྱིངས་སུ་སྒྲོལ།།མཁའ་ལ་སྤྱོད་པའི་གནས་མཆོག་དམ་པ་ན།།མངོན་ཤེས་རྫུ་འཕྲུལ་མངའ་བའི་མཐུ་སྟོབས་ཅན།།སྒྲུབ་པ་པོ་ལ་མ་གཡེལ་བུ་བཞིན་གཟིགས།།གནས་གསུམ་མཁའ་འགྲོའི་གཙོ་ལ་ཕྱག་འཚལ་ལོ།།གང་གི་སྒོ་ནས་མི་བསྲུན་སྐྱེ་བོ་ཡི།།བདག་ཅག་བདེ་ལེགས་འཕྲོག་པའི་རིགས་སྔགས་སོགས།།མ་ལུས་བཟློག་ཅིང་གཞན་དུ་བསྒྱུར་བ་ཡིས།།བཤད་སྒྲུབ་བསྟན་པ་རྒྱས་པའི་འཕྲིན་ལས་མཛོད།།དགེ་བ་འདི་ཡིས་མྱུར་དུ་བདག།ཡེ་ཤེས་མཁའ་འགྲོ་འགྲུབ་གྱུར་ནས།།འགྲོ་བ་གཅིག་ཀྱང་མ་ལུས་པ།།དེ་ཡི་ས་ལ་འགོད་པར་ཤོག།

                                 རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn