༄༅། །རྒྱ་གར་སྐད་དུ། གུ་རུ་པཱུ་ཛ་སྱ་ཀལྤ་ན་མ༌། བོད་སྐད་དུ། བླ་མ་མཆོད་པའི་ཆོ་ག་ཞེས་བྱ་བ། བཀའ་དྲིན་མཉམ་མེད་བླ་མ་དམ་པ་རྣམས་ཀྱི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་དང་གནས་སྐབས་ཐམས་ཅད་དུ་རྗེས་སུ་གཟུང་དུ་གསོལ།བདེ་ཆེན་ངང་ལས་རང་ཉིད་བླ་མ་ལྷ། །གང་དེར་གསལ་བའི་སྐུ་ལས་འོད་ཟེར་ཚོགས། །ཕྱོགས་བཅུར་འཕྲོས་ནས་སྣོད་བཅུད་བྱིན་བརླབས་པའི། །དག་པ་རབ་འབྱམས་འབའ་ཞིག་ཡོན་ཏན་གྱི། །བཀོད་པའི་མཆོད་པ་ཁྱད་པར་འཕགས་པར་གྱུར། །རབ་དཀར་དགེ་སེམས་ཆེན་པོའི་ངང་ཉིད་ལས། །བདག་དང་མཁའ་མཉམ་འགྲོ་བ་མ་ལུས་པ། །དེང་ནས་བཟུང་སྟེ་བྱང་ཆུབ་སྙིང་བོའི་བར། །བླ་མ་དཀོན་མཆོག་གསུམ་ལ་སྐྱབས་སུ་འགྲོ། །ན་མོ་གུ་རུ་བྷྱཿན་མོ་བུད་ངྷཱ་ཡ། ན་མོ་ངྷཱརྨཱ་ཡ། ན་མཿསཾ་གྷཱ་ཡ། ལན་གསུམ། མ་སེམས་ཅན་ཀུན་གྱི་དོན་གྱི་ཕྱིར། །བདག་ཉིད་བླ་མ་ལྷར་གྱུར་ནས། །སེམས་ཅན་ཐམས་ཅད་བླ་མ་ལྷའི། །གོ་འཕང་མཆོག་ལ་འགོད་པར་བགྱི། །ལན་གསུམ། ཁྱད་པར་མ་སེམས་ཅན་ཐམས་ཅད་སྡུག་བསྔལ་ལས་བསྒྲལ་ནས་བདེ་ཆེན་སངས་རྒྱས་ཀྱི་ས་ལ་འགོད་པར་བྱ། མ་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་བླང་བར་བགྱིའོ། །ནང་མཆོད་དང་མཆོད་རྫས་རྣམས་བླ་མེད་ཀྱི་ཆོ་ག་གང་ཡང་རུང་བ་ལྟར་བྱིན་རླབས་བྱ་བའམ། མདོར་བསྡུ་ན། ཨོཾ་ཨཱ་ཧཱུཾ། ལན་གསུམ་བརྗོད་པས། ངོ་བོ་ཡེ་ཤེས་ལ་རྣམ་པ་ནང་མཆོད་དང་མཆོད་རྫས་སོ་སོའི་རྣམ་པ། བྱེད་ལས་དབང་བོ་དྲུག་གི་སྤྱོད་ཡུལ་དུ་བདེ་སྟོང་གི་ཡེ་ཤེས་ཁྱད་པར་ཅན་བསྐྱེད་པས་ས་དང་བར་སྣང་ནམ་མཁའི་ཁྱོད་ཐམས་ཅད་ཡོངས་སུ་ཁྱབ་པའི་ཕྱི་ནང་གསང་བའི་མཆོད་སྤྲིན་དམ་རྫས་སྤྱན་གཟིགས་མཆོད་པའི་བྱེ་བྲག་བསམ་གྱིས་མི་ཁྱབ་པས་གང་བར་གྱུར་ པར་བསམ་ལ། དངོས་གཞི་ནི་ཚིགས་སུ་བཅད་པའི་སྒོ་ནས་བརྗོད་ན་འཇུག་པ་བདེ་བས་ཡིད་མ་གཡེངས་པར་འདི་ལྟར་འདོན་ཞིང༌། དོན་བསྒོམས་ལ་ཉམས་སུ་བླང་བར་བྱའོ། །བདེ་སྟོང་དབྱེར་མེད་ལྷ་ལམ་ཡངས་པར་ཀུན་བཟང་མཆོད་སྤྲིན་འཁྲིགས་པའི་དབུས། །ལོ་མ་མེ་ཏོག་འབྲས་བུས་ཡོངས་མཛེས་འདོད་དགུའི་དཔག་བསམ་ལྗོན་པའི་རྩེར། །གདོང་ལྔ་འབར་བའི་རིན་ཆེན་ཁྲི་སྟེང་ཆུ་སྐྱེས་ཉི་ཟླ་རྒྱས་པའི་སྟེང༌། །བཀའ་དྲིན་གསུམ་ལྡན་རྩ་བའི་བླ་མ་སངས་རྒྱས་ཀུན་གྱི་ངོ་བོ་ཉིད། །རྣམ་པ་ངུར་སྨྲིག་འཛིན་པའི་དགེ་སློང་ཞལ་གཅིག་ཕྱག་གཉིས་འཛུམ་དཀར་འཕྲོ། །ཕྱག་གཡས་ཆོས་འཆད་གཡོན་པ་མཉམ་བཞག་བདུད་རྩིས་གང་བའི་ལྷུང་བཟེད་བསྣམས། །གུར་གུམ་མདངས་ལྡན་ཆོས་གོས་གསུམ་གསོལ་གསེར་མདོག་པཎ་ཞྭས་དབུ་ལ་མཛེས། ཡང་ན་སངས་རྒྱས་ཀུན་གྱི་ངོ་བོ་ཉིད། །ཅེས་པའི་མཚམས་ནས། རྣམ་པ་ཁྱབ་བདག་རྡོ་རྗེ་འཆང་དབང་ཞལ་གཅིག་ཕྱག་གཉིས་སྐུ་མདོག་སྔོ། །རྡོ་དྲིལ་བཟུང་ནས་དབྱིངས་ཕྱུག་མར་འཁྱུད་ལྷན་སྐྱེས་བདེ་སྟོང་རོལ་བས་དགྱེས། །རྣམ་མང་རིན་ཆེན་རྒྱན་གྱིས་སྤྲས་ཤིང་ལྷ་རྫས་དར་གྱི་ན་བཟས་བཀླུབས། ཞེས་པ་བློ་དང་བསྟུན་ནས་སྦྱོར། དེ་གཉིས་ཅི་བྱས་ཀྱང་ཚིག་གི་འཕྲོ་ནས་འདི་ལྟར། མཚན་དཔེའི་རྒྱན་ལྡན་འོད་ཟེར་སྟོང་འབར་འཇའ་ཚོན་སྣ་ལྔས་བསྐོར་པའི་དབུས། །རྡོ་རྗེ་སྐྱིལ་ཀྲུང་ཚུལ་གྱིས་བཞུགས་པའི་ཕུང་བོ་རྣམ་དག་བདེ་གཤེགས་ལྔ། །ཁམས་བཞི་ཡུམ་བཞི་སྐྱེ་མཆེད་རྩ་རྒྱུས་ཚིགས་རྣམས་བྱང་ཆུབ་སེམས་དཔའ་དངོས། །བ་སྤུ་དགྲ་བཅོམ་ཉི་ཁྲི་ཆིག་སྟོང་ཡན་ལག་ཁྲོ་བོའི་དབང་བོ་ཉིད། །འོད་ཟེར་ཕྱོགས་སྐྱོང་གནོད་སྦྱིན་གསང་བ་འཇིག་རྟེན་པ་རྣམས་ཞབས་ཀྱི་གདན། །མཐའ་སྐོར་རིམ་བཞིན་དངོས་བརྒྱུད་བླ་མ་ཡི་དམ་དཀྱིལ་འཁོར་ལྷ་ཚོགས་དང༌། །སངས་རྒྱས་བྱང་སེམས་དཔའ་བོ་མཁའ་འགྲོ་བསྟན་སྲུང་རྒྱ་མཚོས་བསྐོར་ནས་བཞུགས། །དེ་དག་སྒོ་གསུམ་རྡོ་རྗེ་གསུམ་མཚན་ཧཱུཾ་ཡིག་འོད་ཟེར་ལྕགས་ཀྱུ་ཡིས། །རང་བཞིན་གནས་ནས་ཡེ་ཤེས་པ་རྣམས་སྤྱན་དྲངས་དབྱེར་མེད་བརྟན་པར་གྱུར། །
        ཕུན་ཚོགས་བདེ་ལེགས་འབྱུང་གནས་དུས་གསུམ་གྱི། །རྩ་བརྒྱུད་བླ་མ་ཡི་དམ་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་སྲུང་ཚོགས་བཅས། །ཐུགས་རྗེའི་དབང་གིས་འདིར་གཤེགས་བརྟན་པར་བཞུགས། །ཆོས་རྣམས་རང་བཞིན་འགྲོ་འོང་ཀུན་བྲལ་ཡང༌། །སྣ་ཚོགས་གདུལ་བྱའི་བསམ་པ་ཇི་བཞིན་དུ། །ཅིར་ཡང་འཆར་བའི་མཁྱེན་བརྩེའི་འཕྲིན་ལས་ཀྱིས། །སྐྱབས་མགོན་དམ་པ་འཁོར་བཅས་གཤེགས་སུ་གསོལ། །ཨོཾ་རཏྣ་གུ་རུ་སརྦ་བུངྷཱ་བོ་ངྷཱ་ས་ཏྭ་ས་པ་རི་ཝཱ་ར་ཨེ་ཧྱེ་ཧེ། བཛྲ་ས་མ་ཡ་ཛ་ཛཿཛཿཧཱུཾ་བཾ་ཧོཿ པངྨ་ཀ་མ་ལ་ཡེསྟཾ། ཡན་ལག་བདུན་པ་འབུལ་བ་ལ་ཐོག་མར་ཕྱག་འཚལ་བ་ནི། གང་གི་ཐུགས་རྗེས་བདེ་བ་ཆེན་པོའི་དབྱིངས། །སྐུ་གསུམ་གོ་འཕང་མཆོག་ཀྱང་སྐད་ཅིག་ལ། །སྩོལ་མཛད་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །རབ་འབྱམས་རྒྱལ་བ་ཀུན་གྱི་ཡེ་ཤེས་ནི། །གང་འདུལ་ཅིར་ཡང་འཆར་བའི་ཐབས་མཁས་མཆོག །ངུར་སྨྲིག་འཛིན་པའི་གར་གྱིས་རྣམ་རོལ་པ། །སྐྱབས་མགོན་དམ་པའི་ཞབས་ལ་ཕྱག་འཚལ་ལོ། །ཉེས་ཀུན་བག་ཆགས་བཅས་པ་དྲུངས་ཕྱུང་ཞིང༌། །དཔག་མེད་ཡོན་ཏན་རིན་ཆེན་ཚོགས་ཀྱི་གཏེར། །ཕན་བདེ་མ་ལུས་འབྱུང་བའི་སྒོ་གཅིག་པུ། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །ལྷ་བཅས་སྟོན་པ་སངས་རྒྱས་ཀུན་གྱི་དངོས། །བརྒྱད་ཁྲི་བཞི་སྟོང་དམ་ཆོས་འབྱུང་བའི་གནས། །འཕགས་ཚོགས་ཀུན་ཀྱི་དབུས་ན་ལྷང་ངེ་བ། །དྲིན་ཅན་བླ་མ་རྣམས་ལ་ཕྱག་འཚལ་ལོ། །དུས་གསུམ་ཕྱོགས་བཅུར་བཞུགས་པའི་བླ་མ་དང༌། །རིན་ཆེན་མཆོག་གསུམ་ཕྱག་འོས་ཐམས་ཅད་ལ། །དད་ཅིང་མོས་པས་བསྟོད་དབྱངས་རྒྱ་མཚོར་བཅས། །ཞིང་རྡུལ་མཉམ་པའི་ལུས་སྤྲུལ་འཚལ་ལོ། །ཞེས་སྒོ་གསུམ་གུས་པས་ཕྱག་བྱས་ནས་མཆོད་པ་འབུལ་བ་ནི། མཆོད་པའི་འཁོར་གསུམ་པོ་རྣམ་པར་མི་རྟོག་པ་བདེ་སྟོང་དབྱེར་མེད་ཀྱི་བདག་ཉིད་དུ་རྒྱས་བཏབ་ནས་འབུལ་བ་ནི། སྐྱབས་མགོན་རྗེ་བཙུན་བླ་མ་འཁོར་བཅས་ལ། །སྣ་ཚོགས་མཆོད་སྤྲིན་རྒྱ་མཚོ་འབུལ་བ་ནི། །བཀོད་ལེགས་རིན་ཆེན་འོད་འབར་སྣོད་ཡངས་ལས། །དག་བྱེད་བདུད་རྩིའི་ཆུ་བཞི་དལ་གྱིས་འབབ། །སྡོང་བོ་སིལ་མ་ཕྲེང་བ་སྤེལ་ལེགས་པ། །མཛེས་པའི་མེ་ཏོག་ས་དང་བར་སྣང་གང༌། །དྲི་ཞིམ་སྤོས་ཀྱི་དུད་པ་བཻཌཱུརྱའི། །དབྱར་སྐྱེས་སྔོན་པོའི་སྤྲིན་གྱིས་ལྷ་ལམ་འཁྲིགས། །ཉི་ཟླ་ནོར་བུ་རབ་འབར་སྒྲོན་མེའི་ཚོགས། སྟོང་གསུམ་མུན་སེལ་འོད་ཟེར་རྩེ་དགའ་རྒོད། །ག་བུར་ཙན་དན་གུར་ཀུམ་དྲིས་བགོས་པའི། །སྤོས་ཆུའི་མཚོ་ཆེན་འཁོར་ཡུག་ཀུན་ནས་འཁྱིལ། །རོ་བརྒྱའི་བཅུད་ལྡན་བཟའ་བཅས་བཏུང་བ་དང༌། །ལྷ་དང་མི་ཡི་ཞལ་ཟས་ལྷུན་པོར་སྤུངས། །སྣ་ཚོགས་རོལ་མོའི་བྱེ་བྲག་མཐའ་ཡས་ལས། །བྱུང་བའི་གདངས་སྙན་འགྱུར་བས་ས་གསུམ་འགེངས། །གཟུགས་སྒྲ་དྲི་རོ་རེག་བྱའི་དཔལ་འཛིན་པའི། །ཕྱི་ནང་འདོད་ཡོན་ལྷ་མོས་ཕྱོགས་ཀུན་ཁྱབ། །བྱེ་བ་ཕྲག་བརྒྱའི་གླིང་བཞི་ལྷུན་པོར་བཅས། །རིན་ཆེན་བདུན་དང་ཉེ་བའི་རིན་ཆེན་སོགས། །ཀུན་དགའ་སྐྱེད་པའི་སྣོད་བཅུད་ཕུན་སུམ་ཚོགས། །ལྷ་མིའི་ལོངས་སྤྱོད་འདོད་དགུའི་གཏེར་ཆེན་པོ། །དང་བའི་སེམས་ཀྱིས་ཕུལ་བྱུང་ཞིང་གི་མཆོག །སྐྱབས་མགོན་ཐུགས་རྗེའི་གཏེར་ལ་དབུལ་བར་བགྱི། །དངོས་བཤམས་ཡིད་སྤྲུལ་ཡིད་བཞིན་རྒྱ་མཚོའི་ངོགས། །སྲིད་ཞིའི་རྣམ་དཀར་ལས་འོངས་མཆོད་རྫས་ཀྱི། །འདབ་སྟོང་རྒྱས་པས་ཀུན་གྱི་ཡིད་འཕྲོག་ཅིང༌། །འཇིག་རྟེན་འཇིག་རྟེན་ལས་འདས་རང་གཞན་གྱི། །སྒོ་གསུམ་དགེ་བའི་མེ་ཏོག་ཅི་ཡང་བཀྲ། །ཀུན་བཟང་མཆོད་པའི་དྲི་བསུང་འབུམ་འཕྲོ་ཞིང༌། །བསླབ་གསུམ་རིམ་གཉིས་ལམ་ལྔའི་འབྲས་ལྡན་པའི། །དགའ་ཚལ་རྗེ་བཙུན་བླ་མ་མཉེས་ཕྱིར་འབུལ། །གུར་ཀུམ་མདངས་ལྡན་བཟང་བོའི་དྲི་ངད་ཅན། །རོ་བརྒྱའི་དཔལ་འཛིན་རྒྱ་ཇའི་བཏུང་བ་དང༌། །ལྕགས་ཀྱུ་ལྔ་དང་སྒྲོན་མ་ལྔ་ལ་སོགས། །སྦྱངས་རྟོག་སྤར་བའི་བདུད་རྩིའི་རྒྱ་མཚོས་མཆོད། །ཡིད་འོང་ལང་ཚོའི་དཔལ་འཛིན་དྲུག་ཅུ་བཞིའི། །འདོད་པའི་སྒྱུ་རྩལ་ལ་མཁས་ལུས་ཕྲ་མ། །ཞིང་སྐྱེས་སྔགས་སྐྱེས་ལྷན་སྐྱེས་ཕོ་ཉའི་ཚོགས། །མཛེས་སྡུག་སྒྱུ་མའི་ཕྱག་རྒྱ་རྣམས་ཀྱང་འབུལ། །སྒྲིབ་བྲལ་ལྷན་སྐྱེས་བདེ་བའི་ཡེ་ཤེས་ཆེ། །ཆོས་ཀུན་རང་བཞིན་སྤྲོས་དང་བྲལ་བའི་དབྱིངས། །དབྱེར་མེད་ལྷུན་གྲུབ་སྨྲ་བསམ་བརྗོད་ལས་འདས། །དོན་དམ་བྱང་ཆུབ་སེམས་མཆོག་ཁྱོད་ལ་འབུལ། །ཉོན་མོངས་བཞི་བརྒྱ་རྩ་བཞིའི་ནད་འཇོམས་པའི། །བཟང་བོའི་སྨན་གྱི་བྱེ་བྲག་སྣ་ཚོགས་དང༌། །ཁྱོད་མཉེས་བགྱིད་ཕྱིར་བདག་བྲན་འབུལ་ལགས་ན། །ནམ་མཁའ་ཇི་སྲིད་འབངས་སུ་གཟུང་དུ་གསོལ། ཞེས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་དང༌།སྨན་དང༌། བདག་ཉིད་བྲན་དུ་འབུལ་བ་རྣམས་དམིགས་པ་དང་བཅས་པའི་སྒོ་ནས་བྱས་ཏེ། བཤགས་པ་ལ་སོགས་པའི་ཡན་ལག་ལྷག་མ་སྔར་གྱི་འཕྲོ་ནས་འདི་ལྟར། དཀོན་མཆོག་གསུམ་ལ××། ལན་གསུམ། སངས་རྒྱས་བྱང་ཆུབ××། ལན་གསུམ། ལྟུང་བཤགས×× གཙོ་བོ་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང༌། །བྱང་ཆུབ་སེམས་དཔའི་ཚོགས་ལ་ཡང༌། །དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་ནས། །ཀུན་ཏུ་བཟང་ལ་བདག་ཉིད་འབུལ། །འཇམ་པའི་དབྱངས་ལའང་བདག་ཉིད་ཀྱིས། །བདག་གི་ལུས་འདི་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་བའི། །སྤྱན་རས་གཟིགས་མགོན་དེ་ལ་ཡང༌། །ཉམ་ཐག་ང་རོས་འོ་དོད་འབོད། །སྡིག་ཅན་བདག་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་བོ་དང༌། །ས་ཡི་སྙིང་བོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། །སྐྱབས་འཚོལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཞིར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱོད་ཀྱི་བཀའ་ལས་འདས། །ད་ནི་འཇིགས་པ་ཆེ་མཐོང་ནས། །ཁྱོད་ལ་སྐྱབས་སུ་མཆི་ལགས་ཀྱིས། །འཇིགས་པ་མྱུར་དུ་རྩལ་དུ་གསོལ། ལུས་ཀྱི་ལས་ནི××བསྔོ། །དངོས་བརྒྱུད་བླ་མ་རྡོ་རྗེ་འཆང་དངོས་སུ། །ལྟ་བའི་མོས་གུས་དངོས་གྲུབ་ཐམས་ཅད་ཀྱི། །རྩ་བར་མ་ཤེས་སྐྱོན་རྟོག་སྐུར་འདེབས་སོགས། །བཀའ་དང་འགལ་བའི་ཚོགས་རྣམས་མཐོལ་ལོ་བཤགས། །དུག་གསུམ་དབང་གིས་སྒོ་གསུམ་སྡིག་པའི་ལས། །མི་དགེ་བཅུ་དང་མཚམས་མེད་ཉེས་པ་ལྔ། །སོ་སོར་ཐར་དང་རྒྱལ་སྲས་རིག་འཛིན་གྱི། །བསླབ་གསུམ་ཉམས་པ་ཐམས་ཅད་མཐོལ་ལོ་བཤགས། །
        ཐོགས་མེད་དུས་ནས་མི་དགེ་སྡིག་པའི་ལས། །བགྱིས་དང་བགྱིད་བསྩལ་ཡི་རང་ཅི་མཆིས་པ། །ཐུགས་རྗེ་ཆེ་ལྡན་སྤྱན་སྔར་འགྱོད་སེམས་ཀྱིས། །བཤགས་ཤིང་སླན་ཆད་མི་བགྱིད་སྡོམ་པ་ནོད། །ཆོས་རྣམས་རང་བཞིན་མཚན་མ་དང་བྲལ་ཡང༌། །རྨི་ལམ་ཇི་བཞིན་སྐྱེ་འཕགས་ཐམས་ཅད་ཀྱི། །བདེ་དགའ་ཅིར་ཡང་འཆར་བའི་རྣམ་དཀར་ལ། །བདག་ཅག་བསམ་པ་ཐག་པས་ཡི་རང་ངོ༌། །ཕུལ་བྱུང་མཁྱེན་བརྩེའི་ཆུ་འཛིན་འབུམ་དཀྲིགས་ཏེ། །མཐའ་ཡས་འགྲོ་འདིའི་ཕན་བདེ་ཀུན་དའི་ཚལ། །བསྐྱེད་དང་ཡུན་དུ་གནས་དང་སྤེལ་བའི་ཕྱིར། །ཟབ་རྒྱས་ཆོས་ཀྱི་ཆར་བ་དབབ་ཏུ་གསོལ། །རྡོ་རྗེའི་སྐུ་ལ་སྐྱེ་འཆི་མི་མངའ་ཡང༌། །ཟུང་འཇུག་དབང་གི་རྒྱལ་པོའི་ཟ་མ་ཏོག །བདག་ཅག་མོས་པ་ཇི་བཞིན་སྲིད་མཐའི་བར། །མྱ་ངན་མི་འདའ་རྟག་པར་བཞུགས་སུ་གསོལ། །དེ་ལྟར་བསྐྲུན་པའི་རྣམ་དཀར་དགེ་བའི་ཚོགས། །བཀའ་དྲིན་གསུམ་ལྡན་རྗེ་བཙུན་བླ་མ་ཡིས། །ཚེ་རབས་ཀུན་ཏུ་འབྲལ་མེད་རྗེས་འཛིན་ཅིང༌། །ཟུང་འཇུག་རྡོ་རྗེ་འཆང་དབང་ཐོབ་ཕྱིར་བསྔོ། ཞེས་ཡན་ལག་བདུན་པ་འབུལ་ཞིང༌། ལོང་བྱུང་ཚེ་བཤགས་པའི་མཚམས་སུ་སྡོམ་པ་གསུམ་སོ་སོའི་བཤགས་པ་དང༌། བླ་མ་རྡོར་འཛིན་མ་དང༌། བྱང་ཆུབ་ལྟུང་བཤགས་སོགས་བྱའོ། །ཡོན་ཏན་འབྱུང་ནས་ཚུལ་ཁྲིམས་རྒྱ་མཚོ་ཆེ། །མང་ཐོས་ནོར་བུའི་ཚོགས་ཀྱིས་ཡོངས་སུ་གཏམས། །ངུར་སྨྲིག་འཛིན་པ་ཐུབ་དབང་གཉིས་པའི་རྗེ། །གནས་བརྟན་འདུལ་བ་འཛིན་ལ་གསོལ་བ་འདེབས། །གང་དང་ལྡན་ན་བདེ་བར་གཤེགས་པའི་ལམ། །སྟོན་པར་འོས་པའི་ཡོན་ཏན་བཅུ་ལྡན་པ། །མ་ལུས་རྒྱལ་བའི་གདུང་འཚོབ་ཆོས་ཀྱི་རྗེ། །ཐེག་མཆོག་དགེ་བའི་བཤེས་ལ་གསོལ་བ་འདེབས། །སྒོ་གསུམ་ལེགས་བསྡམས་བློ་ཆེན་བཟོད་ལྡན་དྲང༌། །གཡོ་དང་སྒྱུ་མེད་སྔགས་དང་རྒྱུད་ཤེས་ཤིང༌། །དེ་ཉིད་བཅུ་ཟུང་འབྲི་དང་འཆད་མཁས་པའི། །རྡོ་རྗེ་འཛིན་པའི་གཙོ་ལ་གསོལ་བ་འདེབ། །ཞེས་འདུལ་བ་དང་ཐེག་ཆེན་ཐུན་མོང་པ་དང༌། རྡོ་རྗེ་ཐེག་པའི་བླ་མའི་མཚན་ཉིད་དང་ལྡན་པའི་སྒོ་ནས་གསོལ་བ་གདབ། དེ་ནས། སངས་རྒྱས་གྲངས་མེད་བྱོན་པས་མ་ཐུལ་བའི། །མ་རུང་གདུལ་དཀའི་སྙིགས་དུས་འགྲོ་བ་ལ། །བདེ་གཤེགས་ལམ་བཟང་ཇི་བཞིན་སྟོན་པ་ཡི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །ཐུབ་པའི་ཉི་མ་དུས་ཀྱིས་ནུབ་གྱུར་ཏེ། །མགོན་སྐྱབས་མེད་པའི་འགྲོ་བ་མང་པོ་ལ། །རྒྱལ་བའི་མཛད་པ་ཉེ་བར་སྒྲུབ་མཛད་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །དུས་གསུམ་ཕྱོགས་བཅུའི་རྒྱལ་བ་ཐམས་ཅད་ལས། །གང་གི་བ་སྤུའི་བུ་ག་གཅིག་ཙམ་ཡང༌། །བདག་ཅག་བསོད་ནམས་ཞིང་དུ་ལེགས་བསྔགས་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །བདེ་གཤེགས་སྐུ་གསུམ་རྒྱལ་གྱི་འཁོར་ལོ་ནི། །ཐབས་མཁས་སྒྱུ་འཕྲུལ་དྲ་བའི་འཇོ་སྒེག་ལས། །ཐ་མལ་ཚུལ་གྱིས་འགྲོ་བ་འདྲེན་མཛད་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །ཁྱོད་ཀྱི་ཕུང་ཁམས་སྐྱེ་མཆེད་ཡན་ལག་རྣམས། །བདེ་གཤེགས་རིགས་ལྔ་ཡབ་ཡུམ་སེམས་དཔའ་དང༌། །ཁྲོ་བོའི་དབང་བོའི་རང་བཞིན་མཆོག་གསུམ་གྱི། །བདག་ཉིད་བླ་མ་མཆོག་ལ་གསོལ་བ་འདེབས། །ཀུན་མཁྱེན་ཡེ་ཤེས་རོལ་བ་ལས་བྱུང་བའི། །དཀྱིལ་འཁོར་འཁོར་ལོ་བྱེ་བའི་བདག་ཉིད་དེ། །རིགས་བརྒྱའི་ཁྱབ་བདག་རྡོ་རྗེ་འཛིན་པའི་གཙོ། །ཟུང་འཇུག་དང་བོའི་མགོན་ལ་གསོལ་བ་འདེབས། །སྒྲིབ་མེད་ལྷན་སྐྱེས་དགའ་བའི་རོལ་བ་དང༌། །དབྱེར་མེདབརྟན་གཡོ་ཀུན་ཁྱབ་ཀུན་གྱི་བདག །ཐོག་མ་མཐའ་བྲལ་ཀུན་བཟང་དོན་དམ་གྱི། །བྱང་ཆུབ་སེམས་དངོས་ཁྱོད་ལ་གསོལ་བ་འདེབས། །ཞེས་ཕྱི་ནང་གསང་བ་དེ་ཁོ་ན་ཉིད་ཀྱི་ཡོན་ཏན་བརྗོད་པའི་སྒོ་ནས་རྩེ་གཅིག་ཏུ་གསོལ་བ་འདེབས་ཤིང་ཁྱད་པར་དུ།
       ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །དེང་ནས་བཟུང་སྟེ་བྱང་ཆུབ་བར་དུ་ཁྱོད་མིན་སྐྱབས་གཞན་མི་འཚོལ་བས། །འདི་དང་བར་དོ་ཕྱི་མའི་མཐར་ཡང་ཐུགས་རྗེའི་ལྕགས་ཀྱུས་གཟུང་མཛོད་ལ། །སྲིད་ཞིའི་འཇིགས་སྒྲོལ་དངོས་གྲུབ་ཀུན་སྩོལ་གཏན་གྱི་གྲོགས་མཛོད་བར་གཅོད་སྲུངས། །ལན་གསུམ། དེ་ལྟར་ལན་གསུམ་གསོལ་བ་བཏབ་པའི་མཐུས། །བླ་མའི་སྐུ་གསུམ་ཐུགས་ཀྱི་གནས་རྣམས་ལས།བདུད་རྩི་འོད་ཟེར་དཀར་དམར་མཐིང་ག་གསུམ། །རིམ་དང་ཅིག་ཅར་བྱུང་ནས་བདག་ཉིད་ཀྱི། །གནས་གསུམ་རིམ་དང་ཅིག་ཅར་ཐིམ་པ་ལས། །སྒྲིབ་བཞི་དག་ཅིང་རྣམ་དག་དབང་བཞི་ཐོབ། །སྐུ་བཞི་ཐོབ་ཅིང་བླ་མ་ གཉིས་པ་ཞིག །དགྱེས་བཞིན་ཐིམ་པས་བྱིན་གྱིས་བརླབས་པར་གྱུར། པར་སེམས། དེ་ནས་སླར་ཡང་བྱིན་གྱིས་བརླབ་པའི་ཕྱིར་དང༌། ཐུགས་རྗེ་བསྐུལ་བའི་ཕྱིར་དང༌། འདོད་བྱའི་དོན་ལ་སྨོན་ཅིང༌། ཐེག་པ་ཆེན་པོའི་ལམ་ལ་བློ་སྦྱོང་བ་ལྷན་ཅིག་ཏུ་བྱ་བའི་ཚུལ་ནི་འདི་ལྟར༌། ཞིང་མཆོག་དམ་པ་རྗེ་བཙུན་བླ་མ་ལ། །མཆོད་ཅིང་གུས་པས་གསོལ་བ་བཏབ་པའི་མཐུས། །བདེ་ལེགས་རྩ་བ་མགོན་པོ་ཁྱོད་ཉིད་ཀྱིས། །དགྱེས་བཞིན་རྗེས་སུ་འཛིན་པར་བྱིན་གྱིས་རློབས། །ལན་གཅིག་ཙམ་ཞིག་རྙེད་པའི་དལ་འབྱོར་འདི། །རྙེད་དཀའ་མྱུར་དུ་འཇིག་པའི་ཚུལ་རྟོགས་ནས། །དོན་མེད་ཚེ་འདིའི་བྱ་བས་མི་གཡེང་བར། དོན་ལྡན་སྙིང་བོ་ལེན་པརX ། །ངན་སོང་སྡུག་བསྔལ་འབར་བའི་མེས་འཇིགས་ནས། །སྙིང་ནས་དཀོན་མཆོག་གསུམ་ལ་སྐྱབས་འགྲོ་ཞིང༌། །སྡིག་སྤོང་དགེ་ཚོགས་མཐའ་དག་སྒྲུབ་པ་ལ། །བརྩོན་པ་ལྷུར་ལེན་བྱེད་པརX ། །ལས་དང་ཉོན་མོངས་རྦ་ཀློང་དྲག་ཏུ་འཁྲུག །སྡུག་བསྔལ་གསུམ་གྱི་ཆུ་སྲིན་མང་པོས་གཙེས། །མཐའ་མེད་འཇིགས་རུང་སྲིན་མཚོ་ཆེན་པོ་ལས། །ཐར་འདོད་ཤུགས་དྲག་སྐྱེ་བརX ། །བཟོད་དཀའ་བཙོན་ར་འདྲ་བའི་འཁོར་བ་འདི། །དགའ་བའི་ཚལ་ལྟར་མཐོང་པའི་བློ་སྤངས་ནས། །བསླབ་གསུམ་འཕགས་པའི་ནོར་གྱི་མཛོད་བཟུང་སྟེ། །ཐར་པའི་རྒྱལ་མཚན་འཛིན་པརX ། །ཉམ་ཐག་འགྲོ་བ་འདི་ཀུན་བདག་གི་མ། །ཡང་ཡང་དྲིན་གྱིས་བསྐྱངས་པའི་ཚུལ་བསམས་ནས། །སྡུག་པའི་བུ་ལ་བརྩེ་བའི་མ་བཞིན་དུ། །བཅོས་མིན་སྙིང་རྗེ་སྐྱེ་བརX ། །སྡུག་བསྔལ་ཕྲ་མོ་ཙམ་ཡང་མི་འདོད་ཅིང༌། །བདེ་ལ་ནམ་ཡང་ཆོག་ཤེས་མེད་པར་ནི། །བདག་དང་གཞན་ལ་ཁྱད་པར་ཡོད་མིན་ཞེས། །གཞན་བདེ་དགའ་བ་བསྐྱེད་པརX ། །རང་ཉིད་གཅེས་པར་འཛིན་པའི་གཅོད་ནད་འདི། །མི་འདོད་སྡུག་བསྔལ་སྐྱེད་པའི་རྒྱུར་མཐོང་ནས། །ལེ་ལན་བདས་ལ་ཁོན་དུ་བཟུང་བྱས་ཏེ། །བདག་འཛིན་གདོན་ཆེན་འཇོམས་པརX ། །མ་རྣམས་གཅེས་བཟུང་བདེ་ལ་འགོད་པའི་བློ། །མཐའ་ཡས་ཡོན་ཏན་འབྱུང་བའི་སྒོར་མཐོང་ནས། །འགྲོ་བ་འདི་དག་བདག་གི་དགྲར་ལངས་ཀྱང༌། །སྲོག་ལས་གཅེས་པར་འཛིན་པརX ། །མདོར་ན་བྱིས་པ་རང་དོན་ཁོ་ན་དང༌། །ཐུབ་དབང་གཞན་དོན་འབའ་ཞིག་མཛད་པ་ཡི། །སྐྱོན་དང་ཡོན་ཏན་དབྱེ་བ་རྟོགས་པའི་བློ། །བདག་གཞན་མཉམ་བརྗེ་ནུས་བརX ། །རང་ཉིད་གཅེས་འཛིན་རྒུད་པ་ཀུན་གྱི་སྒོ། །མ་རྣམས་གཅེས་འཛིན་ཡོན་ཏན་ཀུན་གྱི་གཞི། །དེ་ཕྱིར་བདག་གཞན་བརྗེ་བའི་རྣལ་འབྱོར་ལ། །ཉམས་ལེན་སྙིང་བོར་བྱེད་པརX ། །དེས་ན་རྗེ་བཙུན་བླ་མ་ཐུགས་རྗེ་ཅན། །མར་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན། །མ་ལུས་ད་ལྟ་བདག་ལ་སྨིན་པ་དང༌། །བདག་གི་བདེ་དགེ་གཞན་ལ་བཏང་བ་ཡིས། །འགྲོ་ཀུན་བདེ་དང་ལྡན་པརX། །སྣོད་བཅུད་སྡིག་པའི་འབྲས་བུས་ཡོངས་གང་སྟེ། །མི་འདོད་སྡུག་བསྔལ་ཆར་ལྟར་བབས་གྱུར་ཀྱང༌། །ལས་ངན་འབྲས་བུ་ཟད་པའི་རྒྱུར་མཐོང་ནས། །རྐྱེན་ངན་ལམ་དུ་ལོངས་བརX ། །མདོར་ན་བཟང་ངན་སྣང་བ་ཅི་ཤར་ཡང༌། །ཆོས་ཀུན་སྙིང་བོ་སྟོབས་ལྔའི་ཉམས་ལེན་གྱིས། །བྱང་ཆུབ་སེམས་གཉིས་སྤེལ་བའི་ལམ་བསྒྱུར་ཏེ། །ཡིད་བདེ་འབའ་ཞིག་བསྒོམ་པརX ། །སྦྱོར་བ་བཞི་དང་ལྡན་པའི་ཐབས་མཁས་ ཀྱིས། །འཕྲལ་ལ་གང་ཐུག་སྒོམ་ལ་སྦྱོར་བ་དང༌།བློ་སྦྱོང་དམ་ཚིག་བསླབ་བྱའི་ཉམས་ལེན་གྱིས། །དལ་འབྱོར་དོན་ཆེན་བྱེད་པརX ། །གཏོང་ལེན་རླུང་ལ་བསྐྱོན་པའི་འཕྲུལ་འདེགས་ཅན། །བྱམས་དང་སྙིང་རྗེ་ལྷག་པའི་བསམ་པ་ཡིས། །འགྲོ་རྣམས་སྲིད་མཚོ་ཆེ་ལས་སྒྲོལ་བའི་ཕྱིར། །བྱང་ཆུབ་སེམས་ཉིད་འབྱོངས་བརX ། །དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། །རྣམ་དག་རྒྱལ་སྲས་སྡོམ་པས་རྒྱུད་བསྡམས་ཤིང༌། །ཐེག་མཆོག་ཚུལ་ཁྲིམས་གསུམ་གྱི་ཉམས་ལེན་ལ། །བརྩོན་པ་ལྷུར་ལེན་བྱེད་པརX ། །
        ལུས་དང་ལོངས་སྤྱོད་དུས་གསུམ་དགེ་ཚོགས་བཅས། །སེམས་ཅན་རང་རང་འདོད་པའི་དངོས་བསྒྱུར་ཏེ། །ཆགས་མེད་གཏོང་སེམས་སྤེལ་བའི་མན་ངག་གིས། །སྦྱིན་པའི་ཕར་ཕྱིན་རྫོགས་པརX ། །སོ་ཐར་བྱང་སེམས་གསང་སྔགས་སྡོམ་པ་ཡི། །བཅས་མཚམས་སྲོག་གི་ཕྱིར་ཡང་མི་གཏོང་ཞིང༌། །དགེ་ཆོས་སྡུད་དང་སེམས་ཅན་དོན་བསྒྲུབ་པའི། །ཚུལ་ཁྲིམས་ཕར་ཕྱིན་རྫོགས་པརX ། །ཁམས་གསུམ་སྐྱེ་དགུ་མ་ལུས་ཁྲོས་གྱུར་ཏེ། །གཤེ་ཞིང་འཚང་འབྲུ་བསྡིགས་ཤིང་སྲོག་གཅོད་ཀྱང༌། །མི་འཁྲུགས་གནོད་ལན་ཕན་པ་སྒྲུབ་བྱེད་པའི། །བཟོད་པའི་ཕར་ཕྱིན་རྫོགས་པརX ། །སེམས་ཅན་རེ་རེའི་ཕྱིར་ཡང་མནར་མེད་པའི། །མེ་ནང་བསྐལ་བ་རྒྱ་མཚོར་གནས་དགོས་ཀྱང༌། །སྙིང་རྗེའི་མི་སྐྱོ་བྱང་ཆུབ་མཆོག་བརྩོན་པའི། །བརྩོན་འགྲུས་ཕར་ཕྱིན་རྫོགས་པརX ། །བྱིང་རྒོད་རྣམ་པར་གཡེང་བའི་སྐྱོན་སྤངས་ནས། །ཆོས་ཀུན་བདེན་པས་སྟོང་པའི་གནས་ལུགས་ལ། །རྩེ་གཅིག་མཉམ་པར་འཇོག་པའི་ཏིང་འཛིན་གྱིས། །བསམ་གཏན་ཕར་ཕྱིན་རྫོགས་པརX ། །དེ་ཉིད་སོ་སོར་རྟོག་པའི་ཤེས་རབ་ཀྱིས། །དྲངས་པའི་ཤིན་སྦྱངས་བདེ་ཆེན་དང་འབྲེལ་བ། །དོན་དམ་མཉམ་བཞག་ནམ་མཁའི་རྣལ་འབྱོར་གྱིས། །ཤེས་རབ་ཕར་ཕྱིན་རྫོགས་པརX ། །ཕྱི་ནང་ཆོས་རྣམས་སྒྱུ་མ་རྨི་ལམ་དང༌། །དྭངས་པའི་མཚོ་ནང་ཟླ་གཟུགས་ཇི་བཞིན་དུ། །སྣང་ཡང་བདེན་པར་མེད་པའི་ཚུལ་རྟོགས་ནས། །སྒྱུ་མའི་ཏིང་འཛིན་རྫོགས་པརX ། །འཁོར་འདས་རང་བཞིན་རྡུལ་ཙམ་མེད་པ་དང༌། །རྒྱུ་འབྲས་རྟེན་འབྲེལ་བསླུ་བ་མེད་པ་གཉིས། །ཕན་ཚུན་འགལ་མེད་གྲོགས་སུ་འཆར་བ་ཡིས། །ཀླུ་སྒྲུབ་དགོངས་དོན་རྟོགས་པརX ། །དེ་ནས་རྡོ་རྗེ་འཛིན་པའི་དེད་དཔོན་གྱི། །དྲིན་ལས་རྒྱུད་སྡེ་རྒྱ་མཚོའི་འཇིངས་བརྒལ་ཏེ། །དངོས་གྲུབ་རྩ་བ་དམ་ཚིག་སྡོམ་པ་རྣམས། །སྲོག་ལས་གཅེས་པར་འཛིན་པརX ། །སྐྱེ་ཤི་བར་དོ་རྒྱལ་བའི་སྐུ་གསུམ་དུ། །སྒྱུར་བའི་རིམ་པ་དང་བོའི་རྣལ་འབྱོར་གྱིས། །ཐ་མལ་སྣང་ཞེན་དྲི་མ་ཀུན་སྦྱངས་ཏེ། །གང་སྣང་ལྷ་སྐུར་འཆར་བརX ། །སྙིང་གའི་འདབ་བརྒྱད་ངྷཱུ་ཏིའི་དབུས་དག་ཏུ། །མགོན་ཁྱོད་ཞབས་སེན་བཀོད་པ་ལས་བྱུང་བ། །འོད་གསལ་སྒྱུ་ལུས་ཟུང་དུ་འཇུག་པའི་ལམ། །ཚེ་འདིར་མངོན་དུ་འགྱུར་བརX ། །ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་གིས། །དག་པའི་ཞིང་དུ་བགྲོད་པརX ། །མདོར་ན་སྐྱེ་ཞིང་སྐྱེ་བ་ཐམས་ཅད་དུ། །མགོན་པོ་ཁྱོད་ཀྱིས་འབྲལ་མེད་རྗེས་བཟུང་ནས། །སྐུ་གསུང་ཐུགས་ཀྱི་གསང་བ་ཀུན་འཛིན་པའི། །སྲས་ཀྱི་ཐུ་བོར་འགྱུར་བརX ། །མགོན་ཁྱོད་གང་དུ་མངོན་པར་སངས་རྒྱས་པའི། །འཁོར་གྱི་ཐོག་མ་ཉིད་དུ་བདག་གྱུར་ཏེ། །གནས་སྐབས་མཐར་ཐུག་དགོས་འདོད་མ་ལུས་བ། །འབད་མེད་ལྷུན་གྱིས་གྲུབ་པའི་བཀྲ་ཤིས་སྩོལ། །དེ་ལྟར་གསོལ་བ་བཏབ་པས་བླ་མ་མཆོག །བྱིན་གྱིས་བརླབ་ཕྱིར་དགྱེས་བཞིན་སྤྱི་བོར་བྱོན། །སླར་ཡང་སྙིང་གའི་པདྨོའི་ཟེའུ་འབྲུ་ལ། །ཞབས་སེན་འོད་ཆགས་བརྟན་པར་བཞུགས་སུ་གསོལ། དེ་ལྟ་བུའི་ཚུལ་གྱིས་བླ་མ་དང་ལྷག་པའི་ལྷ་དང་རང་གི་སེམས་གསུམ་ངོ་བོ་དབྱེར་མེད་དུ་བྱས་ཏེ། སྤྱོད་ལམ་ཐམས་ཅད་དུ་གང་སྣང་བདེ་སྟོང་གི་རང་བཞིན་ལྷ་དང་ལྷ་མོའི་རྣམ་རོལ་ཏུ་བལྟ་བ་སོགས་བསྐྱེད་རྫོགས་ཟུང་འབྲེལ་གྱི་རྣལ་འབྱོར་དང༌། ལམ་གྱི་རིམ་པའང་ཐེག་པ་ཆེན་པོའི་བློ་སྦྱོང་གི་གནད་ཡོངས་སུ་རྫོགས་པ་ལ་བློ་སྦྱོང་བ་རྣམས་ཡ་མ་བྲལ་བའི་ཉམས་ལེན་བརྩོན་པར་བྱ་ཞིང༌། མཇུག་ཏུ་དགེ་བ་རྣམས་བཟང་བོ་སྤྱོད་པ་ལ་སོགས་པ་སྨོན་ལམ་གྱི་རྒྱས་འདེབས་ཤིང༌། མདོར་བསྡུ་ན། འདི་ལྟར་བགྱིས་པའི་རྣམ་དཀར་དགེ་བ་ཡང༌། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱི། །མཛད་པ་སྨོན་ལམ་མ་ལུས་བསྒྲུབ་པ་དང༌། །ལུང་རྟོགས་དམ་ཆོས་འཛིན་པའི་རྒྱུ་རུ་བསྔོ། །དེ་ཡི་མཐུ་ལས་ཚེ་རབས་ཀུན་ཏུ་བདག །ཐེག་མཆོག་འཁོར་ལོ་བཞི་དང་མི་འབྲལ་ཞིང༌། །ངེས་འབྱུང་བྱང་སེམས་ཡང་དག་ལྟ་བ་དང༌། །རིམ་གཉིས་ལམ་གྱི་བགྲོད་པ་མཐར་ཕྱིན་ཤོག ། ཞེས་པ་འདི་ནི་པཎ་ཆེན་བློ་བཟང་ཆོས་རྒྱན་གྱིས་མཛད་པའོ། །                       སྲིད་ཞིའི་རྣམ་དཀར་ཇི་སྙེད་དགེ་མཚན་གྱིས། །དེང་འདིར་མི་ཤིས་རྒུད་པ་ཀུན་ཟད་ཅིང༌། །གནས་སྐབས་མཐར་ཐུག་དགེ་ལེགས་ནམ་མཁའི་མཛོད། །ཕུན་ཚོགས་དཔལ་ལ་རོལ་པའི་བཀྲ་ཤིས་ཤོག །བློ་བཟང་མདུན་ས་ཆོས་ཀྱི་ཕོ་བྲང་ཆེར། །བསླབ་གསུམ་རྣམ་དག་རྩེ་གཅིག་སྒྲུབ་ལ་བརྩོན། །རྣལ་འབྱོར་རབ་གྱུར་ཚོགས་ཀྱིས་ཡོངས་གང་བས། །ཐུབ་བསྟན་ཡུན་དུ་གནས་པའི་བཀྲ་ཤིས་ཤོག །གཞོན་ནུའི་དུས་ནས་བླ་མ་ལྷ་མཆོག་ལ། །གསོལ་བ་བཏབ་པས་བློ་བཟང་གྲགས་པ་ཡི། །བྱིན་རླབས་ཞུགས་ནས་གཞན་དོན་ལྷུན་གྱིས་གྲུབ། །བློ་བཟང་རྡོ་རྗེ་འཆང་གི་བཀྲ་ཤིས་ཤོག །འདོད་རྒུའི་འབྱོར་བ་དབྱར་གྱི་མཚོ་ལྟར་འཕེལ། །སྐྱོན་མེད་རིགས་ཀྱི་དལ་འགྲོ་རྒྱུན་ཆད་མེད། །ཉིན་མཚན་བློ་བཟང་དམ་པའི་ཆོས་ཀྱིས་འདའ། །ཕུན་ཚོགས་དཔལ་ལ་རོལ་པའི་བཀྲ་ཤིས་ཤོག །བདག་སོགས་རྣམས་ཀྱིས་དེང་ནས་བྱང་ཆུབ་པར། །བགྱིས་དང་བགྱིད་འགྱུར་དགེ་བ་ཅི་བསགས་པ། །ཞིང་འདིར་རྗེ་བཙུན་དམ་པའི་གཟུགས་ཀྱི་སྐུ། །འགྱུར་མེད་རྡོ་རྗེ་ལྟར་བརྟན་བཀྲ་ཤིས་ཤོག།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་བཅས་གསལ་པོར་དགོད་པར་ཞུ།
རྩོམ་ཁུངས། དགེ་ལུགས་པའི་དྲ་བ།
རྩོམ་འདིའི་སྦྲེལ་ཐག http://www.tb1025.cn