༄༅།  ། ན་མོ་ཨཱརྱ་ལོ་ཀེ་ཤྭ་རཱ་ཡ། བློ་ངན་ཁྱིམ་པ་རྣམས་ཀྱིས་སྨྱུང་གནས་བསྲུང་བའི་ཚེ། ཚེས་བཅོ་ལྔ་ལྟ་བུ་ལ་མཚོན་ན། བཅུ་གསུམ་གྱི་ཕྱི་དྲོར་གནས་ལ་ཕྱགས་དར་དང་། གཙང་སྦྲ་ལ་གནས་དགོས། ཤ་ཆང་སྒོག་ཙོང་འཁྲིག་སྤྱོད་སོགས་སྤངས་ལ། མར་གྱུར་སེམས་ཅན་ཐམས་ཅད་ཀྱི་དོན་དུ་སྨྱུང་གནས་བྱ་སྙམ་དུ་ཕྱག་སྐོར་སོགས་དགེ་བ་ལ་བརྩོན་བཞིན་དུ་ལུས་ངག་བག་དང་ལྡན་པར་བྱ།

ཚེས་བཅུ་བཞིའི་ཐོ་རངས་ལག་རིས་མཐོང་པའི་དུས་སུ་ཁྲུས་ལེགས་པར་བྱས་ལ། རྟེན་གྱི་དྲུང་དུ་ཕྱག་གསུམ་འཚལ་ནས་སངས་རྒྱས་ཆོས་ཚོགས་མ་ལན་གསུམ། ས་གཞི་སྤོས་བྱུགས་མས་མཎྜལ་ཕུལ་ཏེ། ཐལ་མོ་སྦྱར་ལ། ཕྱོགས་བཅུའི་རྒྱལ་བ་སྲས་བཅས་བདག་ལ་དགོངས། །སྔོན་གྱི་རྒྱལ་བས་གསོ་སྦྱོང་མཛད་པ་བཞིན། །བདག་ཀྱང་སང་ཉིན་ཉི་མ་མ་ཤར་བར། །འགྲོ་ལ་ཕན་ཕྱིར་གསོ་སྦྱོང་བླངས་པར་བགྱི། །ལན་གསུམ་གྱིས་སྡོམ་པ་བླངས་ལ་ཡན་ལག་བརྒྱད་པོ་མིག་འབྲས་ལྟར་བསྲུང་བར་དམ་བཅའ། ཚུལ་ཁྲིམས་བསླབ་པ་རྒྱུད་ལ་སྐྱེས་ནས་ཀྱང་། །མི་ཉམས་གོང་འཕེལ་སངས་རྒྱས་ཐོབ་ཕྱིར་བསྔོ། །ཞེས་བསྔོས་ལ་ནངས་ཇ་གསོལ། 

དེ་ནས་ཁྲུས་བྱས་ཏེ་གདན་ལ་འཁོད་སྨྲ་བ་བཅད་ནས།  སངས་རྒྱས་ཆོས་ཚོགས་མ་ལན་གསུམ་བརྗོད་ལ། རང་མདུན་ནམ་མཁའ་པད་དཀར་ཟླ་བའི་སྟེང་། །སྐྱབས་གནས་ཀུན་འདུས་བླ་མ་སྤྱན་རས་གཟིགས། །སྐུ་མདོག་གངས་རི་ལྟར་དཀར་བཅུའི་གཅིག་ཞལ། །ཕྱག་སྟོང་སྤྱན་སྟོང་རིན་ཆེན་རྒྱན་གྱིས་སྤྲས། །ཞབས་གཉིས་མཉམ་བཞག་དར་གྱི་ན་བཟའ་གསོལ། །སྔོན་ཚེ་རིན་ཆེན་སྙིང་བོ་སྤྱན་སྔ་རུ། །དམ་བཅས་ཇི་བཞིན་ཉམ་ཐག་འགྲོ་ཀུན་ལ། །ཐུགས་རྗེས་གཟིགས་ཤིག་མགོན་པོ་སྤྱན་རས་གཟིགས། །ཞེས་ཕྱག་དང་བཅས་པོ་བསྟོད་པ་ཉེར་གཅིག་བརྗོད། ༀ་འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་བཤེགས་དཔག་མེད་སྐུ་སྟེ་སྐུ་བཟང་འཛིན་པ་པོ། །བདེ་གཤེགས་སྣང་བ་མཐའ་ཡས་དབུ་བརྒྱན་འཛིན་པ་པོ།  ། ཕྱག་གཡས་མཆོག་སྤྱིན་ཡི་དྭགས་བཀྲེས་སྐོམ་སེལ་པ་པོ། །ཕྱག་གཡོན་གསེར་གྱི་པད་མས་རྣམ་པར་བརྒྱན་པ་པོ།  ། དྲི་ཞིམ་རལ་བའི་ཕྲེང་བ་དམར་སེར་འཁྱུག་པ་པོ།  ། ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ།  ། སྤྱན་གྱི་པད་མ་མཆོག་ཏུ་བཟང་ཞིང་ཡངས་པ་པོ།  ། ཁ་བ་དུང་ལྟར་རྣམ་དཀར་དྲི་ངད་ལྡན་པ་པོ།  ། དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ།  ། སྟོན་ཀའི་སྤྲིན་གྱིས་མདོག་དང་ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ།  ། ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ།  ། རི་དྭགས་པགས་པས་ནུ་མ་གཡོན་པ་བཀབ་པ་པོ།  ། སྙན་ཆ་གདུ་བུས་སྒེག་ཅིང་རྒྱན་རྣམས་འཆང་པ་པོ།  ། དྲི་མ་མེད་པ་པད་མའི་མཆོག་ལ་གནས་པ་པོ།  །  ལྟེ་བའི་དངོས་ནི་པད་མའི་འདབ་ལྟར་འཇམ་པ་པོ།  ། གསེར་གྱི་སྐེ་རགས་མཆོག་ལ་ནོར་བུས་སྤྲས་པ་པོ།  ། སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ།  ། ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་པ་པོ།  ། མཆོག་བརྙེས་བསོད་ནམས་མང་པོ་ཉེ་བར་གསོག་པ་པོ།  ། རྟག་ཏུ་བདེ་བའི་འབྱུང་གནས་རྒ་ནད་སེལ་པ་པོ།  ། གསུམ་མཐར་མཛད་ཅིང་མཁའ་སྤྱོད་སྤྱོད་པ་སྟོན་པ་པོ།  ། ལུས་ཅན་མཆོག་སྟེ་བདུད་དཔུང་འཁྲུག་ལས་རྒྱལ་པ་པོ།  ། གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་པ་པོ།  ། ཚངས་པའི་གནས་པ་བཞི་ཡིས་དབེན་པར་མཛད་པ་པོ།  །  ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པ་པོ། །ཡོངས་རྫོགས་ཉེ་བར་བསགས་ཤིང་བསྟན་པ་གཉེར་པ་པོ།  ། འོ་མའི་མཚོ་དང་ཆུ་ཡི་མཚོ་ལས་སྒྲོལ་པ་པོ།  ། གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས།  ། སྤྱན་རས་གཟིགས་ཀྱི་དབང་བོ་ཡིད་ལ་སེམས་བྱེད་ཅིང་། །བསྟོད་པའི་མཆོག་འདིས་དག་ཅིང་གསལ་བར་བསྟོད་བྱེད་ན། །འདི་ནི་སྐྱེས་པའམ་བུད་མེད་ཡིན་ཡང་རུང་།  ། སྐྱེ་བ་འདི་འམ་མ་འོང་སྐྱེ་བ་ཐམས་ཅད་དུ།  ། འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །ཞེས་ཕྱག་དང་བཅས་པོ་བསྟོད་པ་ཉེར་གཅིག་བྱའོ། །མི་ཤེས་པ་རྣམས་ཀྱིས། ཕྱག་སྟོང་འཁོར་ལོས་ཞེས་སོགས་བརྒྱ་རྩ་བརྒྱད་འདོན། དེ་ནས། མཆོད་ཚོགས་ཀུན་འབུལ་སྡིག་ལྟུང་མ་ལུས་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །དགེ་བ་བླ་མེད་བྱང་ཆུབ་ཆེན་པོར་བསྔོ། །འཕགས་པའི་ཐུགས་ཀར་ཟླ་སྟེང་སྔགས་ཕྲེང་ལས། །འོད་འཕྲོས་རང་གཞན་སྡིག་སྒྲིབ་ཀུན་བྱང་ནས། །སྐུ་གསུང་ཐུགས་ཀྱི་བྱིན་རླབས་ཐོབ་པར་གྱུར་བར་བསམ་ལ། གཟུངས་རིང་དང་། ༀ་མ་ཎི་པདྨེ་ཧཱུཾ། ཞེས་ཡིག་དྲུག་ཁོ་ན་བཟློས་ཀྱང་ཆོག      རབ་ཁྲི་ཕྲག        འབྲིང་སྟོང་ལྔ།    མ་མཐའ་སྟོང་ཕྲག་ཙམ་རེ་བཟླས། མཇུག་དུ། སྤྱན་རས་གཟིགས་དབང་དགྱེས་བཞིན་རང་ལ་ཐིམ། །ཚེ་རབས་ཀུན་ཏུ་འབྲལ་བར་མ་གྱུར་ཅིག      ། འདི་སྣ་འགག་ཚེ་བདེ་ལྡན་ཞིང་མཆོག་ཏུ། །སྐྱེས་ནས་འོད་དཔག་མེད་ཀྱི་ཞལ་མཐོང་ཤོག    ། དགེ་བ་འདི་ཡིས་མྱུར་དུ་བདག  ། སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག  ། འདི་དང་དུས་གསུམ་འབྲེལ་བ་ཡིས། །དགེ་རྩ་ཇི་སྙེད་བསག་པ་ཀུན། །མར་གྱུར་སེམས་ཅན་ཐམས་ཅད་ཀྱི། །སངས་རྒྱས་འཐོབ་པའི་རྒྱུ་རུ་བསྔོ། །

དེ་ནས་ཐུན་བཏང་ལ་དྲོས་ཇ་གསོལ། ཡང་ཁྲུས་བྱས་ལ་སྔར་ལྟར་ཆོ་ག་བཏོན་ནས། ཉིན་གུང་གི་ཚེ་ཟས་ཕུད་བླངས་ལ། སངས་རྒྱས་གཙོ་ལ་ཕྱག་འཚལ་ལོ། །སྐྱོབ་པ་ཆོས་ལ་ཕྱག་འཚལ་ལོ། །དགེ་འདུན་སྡེ་ལ་ཕྱག་འཚལ་ལོ། །གསུམ་པ་རྟག་ཏུ་གུས་ཕྱག་འཚལ། །སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །སྐྱབས་གནས་དཀོན་མཆོག་གསུམ་ལ་མཆོད་པ་འབུལ། །ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ།  ། དད་པས་ཕུལ་བས་འགྲོ་བ་འདི་དག་ཀུན།  ། འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག  ། འདོན། ཤ ཆང་། སྒོག        ཙོང་། ལ་ཕུག    ཏིལ། སྲན་མ། ཁ་འཕྲོ། སྦགས་པ་མ་ཡིན་པའི་དཀར་གསུམ་གྱི་ཟས་ལ་སྲེད་ཞེན་མེད་པར་གསོལ་བའི་མཇུག་ཏུ། ༀ་ཨུ་ཙྪི་ཤྜ་པིཎྜ་ཨ་ཤི་བྷྱཿསྭཱ་ཧཱ། ཞེས་པས་འཆང་བུ་གཅིག་ཟློས་ནས། སྦྱིན་པ་འདི་ཡི་བསོད་ནམས་ཀྱིས། །བསྟན་ལ་དད་པའི་ལྷ་རྣམས་དང་། །རྒྱལ་པོ་སྦྱིན་བདག་ལ་སོགས་པའི། །སེམས་ཅན་སངས་རྒྱས་ས་ཐོབ་ཤོག  །དེ་ནས་ཡང་སྔར་ལྟར་ཁྲུས་དང་ཆོ་ག་བྱ། ཕྱི་དྲོ་རུང་བ་ཕྱག་ལེན་ལྟར་བྱས་ལ་རུང་ཆུ་བཏུང་།  ཉལ་ཁར་ཕྱག་འཚལ་ནས། འཕགས་པ་ལ་གསོལ་བ་ཤུགས་དྲག་བཏབ་སྟེ། དེས་དགེ་སེམས་དང་ལྡན་པས་ཉལ་བར་བྱའོ། །ཕྱི་ཉིན་ཡང་ལག་རིས་མཐོང་ཙམ་དུ་ཁྲུས་བྱེད་པ་ནས་བཟུང་སྟེ་གཏམ་མི་སྨྲ་བ་དང་། བཟའ་བཏུང་མི་བྱེད་པ་དང་། སྣ་ནང་ནས་ལོང་གཏམ་སྨྲ་བ་མང་བས། ལོག་སྤྱོད་དེ་འདྲ་སྤངས་ཏེ། འབྲུ་ཉག་དང་། ཆུ་ཐིགས་ཙམ་ཁོང་དུ་མ་ཤོར་བ་དང་། ཁ་སྣ་ནས་གཏམ་མི་སྨྲ་བར། བྱ་བ་རྣམས་ལ་རྣམ་འགྱུར་གྱིས་བརྡ་བྱས་ནས་ཉམས་སུ་བླང་བར་བྱའོ། །གྲོལ་བའི་ཉིན་ལག་རིས་མཐོང་བའི་ཚེ་ཐོར་ཐུག་བཏུང་། ཐོར་ཐུག་གི་སྔ་ཕྱི་གང་རུང་དུ་ཆོ་ག་ཚར་གཅིག་འདོན། བསྟོད་པ་བདུན་སོགས་འདོན་པས། ཆོ་ག་གནས་པར་བྱའོ། །ནམ་མ་ལངས་པར་ཉེས་སྤྱོད་འཇུག་མི་རུང་། འདི་ཁྱིམ་པའི་དོན་ཁོ་ན་ཡིན་པས། ཆོ་ག་ཇི་བཞིན་མཁྱེན་པ་རྣམས་ཀྱིས། །སླ་ཆོས་འདི་ལྟ་བུ་བྱེད་པ་ག་ལ་རུང་། །ཞེས་བྱ་རྒྱུད་ཀྱི་གདུལ་བྱ་ཕལ་བ་འདི། སྨྱུང་བར་གནས་པའི་ཆོ་ག་ཐར་བའི་ལམ་གསལ་བྱེད་ཅེས་བྱ་བ་འདི་ནི། མཁྱེན་དཔྱོད་ཡངས་པ་དགེ་སློང་འཇིགས་མེད་བསྟན་པས་བསྐུལ་ངོར། མཁས་གྲུབ་ཐམས་ཅད་མཁྱེན་པའི་རྒྱུད་སྡེ་སྤྱིའི་རྣམ་བཤད་དུ། བྱ་རྒྱུད་ཀྱི་གདུལ་བྱ་ལ་རང་ལྟར་མི་བསྒོམ་པར་མདུན་དུ་ལྷ་བསྒོམས་ནས་དངོས་གྲུབ་ལེན་ཞེས་པ་ལྟར་རྨོངས་རྟུལ་བླ་རྒན་སྨྱུང་གནས་པ་བསམ་འཕེལ་ནོར་བུས་བྲིས་པ་དགེ་བའོ།  །  དགེ་ལེགས་འཕེལ།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn