ན་མོ་གུ་རུ་ལོ་ཀེ་ཤྭ་ར་ཡ། འདིར་ཀླུ་གཏོར་གཏོང་བར་འདོད་པས། དཀར་གསུམ་མངར་གསུམ་དར་སྣ་རིན་པོ་ཆེའི་རིགས་དང་འབྲུ་སྣ་ཀླུ་སྨན་སོགས་གཏོར་སྣོད་དུ་ཆུ་གཙང་དང་སྦྱར་བ་ལག་ལེན་བཞིན་བཤམས། སྐྱབས་འགྲོ་སེམས་བསྐྱེད་སྔོན་དུ་གཏང་། རང་ཆོ་ག་གསུམ་བསྐྱེད་ཀྱི་སྒོ་ནས་སྤྱན་རས་གཟིགས་སུ་བསྐྱེད། ཡེ་ཤེས་པ་བཅུག དབང་བསྐུར་རྒྱས་བཏབ་སོགས་བརྒྱ་རྩའི་ཐོག་མར་བྱ་བ་ཇི་བཞིན་དུ་བྱེད། དེ་ནས་ཀླུ་གཏོར་གྱི་རྫས་དེ་དག ཨ་མྲྀ་ཏས་བསངས། སྭ་ལྷ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་མཆོད་གཏོར་མཐུན་པའི་དམ་རྫས་དང་བཅས་པ་རྣམས། ཨོཾ་དང་རང་རང་གི་མིང་ཡིག་ཐིག་ལེས་བརྒྱན་པ་ལས་བྱུང་བའི་ཡེ་ཤེས་ཀྱི་བདུད་རྩི་དང་། སྡུག་བསྔལ་ཐམས་ཅད་སེལ་བའི་སྨན་དང་། དགོས་འདོད་འབྱུང་བའི་ཡིད་བཞིན་གྱི་ནོར་བུའི་ཚོགས་དང་། ཡིད་དུ་འོང་བའི་གནས་དང་ཕོ་བྲང་ལ་སོགས་པ་མདོར་ན། ཀླུ་རྒྱལ་འཁོར་དང་བཅས་པ་ལ་གང་ལ་གང་འདོད་པའི་ལོངས་སྤྱོད་ཕུན་སུམ་ཚོགས་པར་གྱུར།སྔགས་དྲུག་དང་ཕྱག་རྒྱ་དྲུག་དང་། ཨོཾ་ཨརྒྷཾ་ཨཱཿཧཱུཾ། ཞེས་པ་ནས། ཤཔྟ་ཨཱཿཧཱུཾ། ཞེས་པའི་བར་གྱིས་བྱིན་བརླབས། དེ་ནས་མགྲོན་བསྐྱེད་ཅིང་སྤྱན་དྲང་བ་ནི། རང་གི་མདུན་དུ་རིན་པོ་ཆེ་ལས་གྲུབ་པའི་བྲག་གསེར་གྱི་བྱ་སྐྱིབས་ཅན་གྱི་འོག་ཏུ། མཚོ་དང་། རྫིང་བུ་དང་། ལྟེང་ཀ་དང་། ནེའུ་གསིང་མེ་ཏོག་གིས་བརྒྱན་པ་དང་། ཆུ་མིག་དང་། ཁྲོན་པ་དང་། འབབ་ཆུ་དང་། ལུ་མ་དང་། སྤང་ལྗོངས་དང་། སྐྱེད་མོས་ཚལ་ལ་སོགས་པ་ཀླུའི་གནས་དང་། ཕོ་བྲང་རིན་པོ་ཆེ་ལས་གྲུབ་པ་ཡིད་དུ་འོང་བ་རྣམས་ཀྱི་ནང་དུ་ཀླུ་རྒྱལ་ཝ་རུ་ཎས་གཙོ་བྱས།ཀླུ་ཆེན་པོ་བརྒྱད་དང་ཀླུ་དང་ས་བདག་མ་ལུས་པའི་ཚོགས་ཀྱི་འཁོར་གྱིས་བསྐོར་བ་འཁོད་པར་གྱུར།རང་གི་ཐུགས་ཀའི་ཧྲཱིཿའི་འོད་ཟེར་གྱིས་རྒྱ་མཚོ་ཆེན་པོ་ནས་ཀླུ་རྒྱལ་འཁོར་བཅས་སྤྱན་དྲངས་པར་བསམས་ལ་ངག་ཏུ། གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པ་མ་ལུས་སེལ་མཛད་པའི། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་མ་ལུས་འཁོར་བཅས་གནས་འདིར་གཤེགས། ། ཨོཾ་ནཱ་ག་རཱ་ཛས་པ་རི་ཝཱ་ར་ཨེཧྱེ་ཧི་ས་མ་ཡ་ཛཿཛཿཛཿཧཱུཾ་བཾ་ཧོཿཔདྨ་ཀ་མ་ལ་ཡེསྟཾ། ནཱ་ག་རཱ་ཛ་ས་པ་རི་ཝཱ་ར་ཨརྒྷཾ། ཞེས་སོགས་ཀྱིས་མཆོད། དེ་ནས་རང་ཉིད་སྤྱན་རས་གཟིགས་སུ་གསལ་བའི་ཕྱག་གི་མཐིལ་ལས་བདུད་རྩི་འོ་མའི་རྒྱུན་ལྟ་བུ་བབས་པ་དང་འདྲེས་པའི་མདུན་གྱི་མཆོད་གཏོར་དམ་རྫས་རིན་པོ་ཆེ་དང་སྨན་སྣ་ཚོགས་ཡེ་ཤེས་ལས་གྲུབ་པའི་འདོད་དགུའི་རྒྱ་མཚོ་ཆེན་པོ་ལ་མགྲོན་རྣམས་ཀྱིས་ལོངས་སྤྱད་པས་ལུས་དང་ཡན་ལག་དང་དབང་པོ་ཉམས་པ་གསོས། སྡུག་བསྔལ་དང་སྡིག་སྒྲིབ་དག ཟག་མེད་བདེ་བས་རྒྱུད་གང་བར་བསམས་ལ། ལག་པ་གཡས་པས་མཆོད་གཏོར་ནང་དུ་ཆུ་རྒྱུན་སྒྲེང་། གཡོན་པས་སེ་གོལ་གདབ། ཨོཾ་བཱ་སུ་ཀི་མཾ་སྭཱཧཱ། ཞེས་བརྒྱ་བཟླ་བ་ནི་ཀླུ་གཏོར་གྱི་དངོས་གཞིའོ། །དེ་ནས། ཀླུ་ཚོགས་ཀུན་གྱི་རྗེར་གྱུར་ཅིང་། །གདེངས་ཀ་ནོར་བུའི་འོད་ཟེར་གྱིས། །འདོད་དགུའི་དངོས་མཆོག་སྩོལ་བའི། །ཝ་རུ་ཎ་ལ་ཕྱག་འཚལ་ལོ། །མཐའ་ཡས་དང་ནི་དང་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་དང་ནི་དུང་སྐྱོང་དང་། །པདྨ་དང་ནི་ཆུ་ལྷ་དང་། །དགའ་བོ་དང་ནི་ཉེར་དགའ་བོ། །རྒྱ་མཚོདང་ནི་རྒྱ་མཚོ་ཆེ། །དཔལ་གྱི་འོད་དང་འོད་ཆེན་དང་། །གཟུགས་ཆེན་སྦྲུལ་བཟང་སྟོབས་པོ་ཆེ། །ཀླུ་ཡི་རྒྱལ་པོ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །མཛེས་པའི་དཀར་གསུམ་མཆོད་པ་དང་། །མངར་གསུམ་འོ་མའི་རྒྱ་མཚོ་འཁྱིལ། །རིན་ཆེན་མཛེས་པའི་ཐེམ་སྐས་ཅན། །ཀླུ་ཡི་སྡུག་བསྔལ་སྐྱོབ་བྱེད་པའི། །མཐུན་པའི་རྫས་སུ་འདི་གྱུར་ཅིག །མཆོད་སྦྱིན་གཏོར་མ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །བཞི་བརྒྱ་རྩ་བཞིའི་ནད་རྣམས་དང་། །ཀླུ་ལས་གྱུར་པའི་ནད་ཀྱི་རིགས། །མཐོང་བའི་དུག་དང་རེག་པའི་དུག །བསམ་ངན་དུག་དང་ཁ་རླངས་དུག །སྦྱོར་བའི་དུག་ལ་སོགས་པ་ཀུན། །མ་ལུས་མྱུར་དུ་ཞི་གྱུར་ཅིག །བདག་ལས་གཅེས་པའི་རྫས་ཁྱེར་ལ། །ཀླུ་ཡི་ནད་རྣམས་ཞི་བར་མཛོད། །འཕྲིན་ལས་རྣམ་བཞིའི་དངོས་གྲུབ་དང་། །དཔལ་འབྱོར་ལོངས་སྤྱོད་རྒྱས་པར་མཛོད། ། རྒྱུན་པར་ཡིན་ན་ཆོས་སྦྱིན་བྱེད། ནད་པ་སོགས་ཀྱི་དོན་དུ་ཡིན་ན་ཇི་སྐད་བརྗོད་པའི་སྨན་གྱི་བདུད་རྩི་རྒྱ་མཚོས་ཀླུ་གཉན་ས་བདག་རྣམས་ཀྱི་ནད་དང་སྡུག་བསྔལ་གསོས་པར་བསམས་ལ། འདི་ལྟར། སྨན་གྱི་རྒྱལ་པོ་བཟང་དྲུག་གིས། །དོན་སྣོད་ཉམས་པ་གསོས་གྱུར་ཅིག །ཛཱ་ཏི་གུར་གུམ་བཟང་བོ་ཡིས། །ཤ་ཁྲག་མཆིན་པ་ཉམས་པ་གསོས། །མགྲོན་བུ་དུང་དང་དར་དམར་གྱིས། །སོ་རུས་ལྕེ་ཉམས་གསོས་གྱུར་ཅིག །རྨ་བྱའི་མདོངས་དང་དར་མཚོན་ལྔས། །གཟི་མདངས་རྒྱས་ཤིང་སྙིང་ཞོ་ཤ། །མཁལ་མ་ཞོ་ཤ་བླ་གོར་ཤས། །སྙིང་མཁལ་གློ་བའི་ནད་གསོས་གྱུར། །དབང་ལག་ཆུ་སྲིན་སྡེར་མོ་ཡིས། །ཡན་ལག་ཉམས་པ་གསོས་གྱུར་ཅིག །པུ་ཤེལ་རྩེ་དང་རྡོ་རྒྱུས་ཀྱིས། །རྩ་རྒྱུས་ཉམས་པ་གསོས་གྱུར་ཅིག །སྤང་སྤོས་སླེ་ཏྲེས་བྱི་ཐང་ཀ །རྒྱ་མཚོ་ལྦུ་བ་འབྲས་བུ་གསུམ། །སྨན་གྱི་བྱེ་བྲག་སྣ་ཚོགས་ཀྱིས། །ཕུང་ཁམས་སྐྱེ་མཆེད་ཉམས་པ་གསོས།།རིན་ཆེན་སྣ་ལྔ་འབྲུ་ཚོགས་ཀྱིས། །བང་མཛོད་ཉམས་པ་གསོས་གྱུར་ཅིག །དཀར་གསུམ་མངར་གསུམ་ཁ་ཟས་ཀྱིས། །ཁ་དོག་ཉམས་པ་གསོས་གྱུར་ཅིག །མདོར་ན་མཐུན་པའི་རྫས་རྣམས་ཀྱིས། །ཀླུ་དང་ས་བདག་ཐམས་ཅད་ཀྱི། །ནད་དང་སྡུག་བསྔལ་གསོས་གྱུར་ཏེ། །དབང་པོ་གསལ་ཞིང་ལོངས་སྤྱོད་རྒྱས། །བྱམས་པའི་སེམས་ཀྱིས་རྒྱུད་གང་ནས། །འཇིག་རྟེན་ཁམས་རྣམས་ཐམས་ཅད་དུ། །ལོ་ཕྱུགས་ལེགས་ཤིང་ཆར་ཆུ་སྙོམས། །རྩི་བཅུད་འབྲས་བུ་རྒྱས་པར་མཛོད། ། དེ་ནས་ཀླུ་རྣམས་ཀྱི་སྡིག་སྒྲིབ་སྦྱང་བའི་ཕྱིར།ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨཱ་བ་རཾ་པ་རཱ་ཎི་མེ་སརྦ་ས་ཏྭ་ནཱཉྩ་སྭཱཧཱ། ཞེས་སོགས་མི་འཁྲུགས་པའི་གཟུངས་ལན་བདུན་སོགས་ཅི་རིགས་བཟླས་ནས། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། ། ཞེས་སོགས་ཆོས་སྦྱིན་ཅི་རིགས་བྱ་སྟེ། ཀླུ་དང་ས་བདག་འཁོར་བཅས་རྣམས། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ཕན་པའི་འབྲས་བུ་བདེ་བ་དང་། །གནོད་པའི་འབྲས་བུ་སྡུག་བསྔལ་འབྱུང་། །ས་བོན་ཚ་བ་རྣམས་ལས་ནི། །འབྲས་བུ་ཚ་བ་འབྱུང་འགྱུར་ཞིང་། །ས་བོན་མངར་བ་རྣམས་ལས་ནི། །འབྲས་བུ་མངར་བ་འབྱུང་བར་འགྱུར། །དེ་བཞིན་དམ་ཚིག་དྲན་གྱིས་ལ། །ཞེ་སྡང་ཁྲོ་བོའི་སེམས་བོར་ཏེ། །བྱམས་པའི་སེམས་ཀྱིས་ཁྱབ་པར་མཛོད། །དབང་བོ་ལྔ་ཡི་སྤྱོད་ཡུལ་དུ། །འདོད་དགུའི་ལོངས་སྤྱོད་ཕུན་སུམ་ཚོགས། །ཀླུ་ཡི་ནད་རྣམས་གསོས་གྱུར་ནས། །སྡུག་བསྔལ་ཀུན་ལས་གྲོལ་གྱུར་ཅིག །ཕྱག་ན་རྡོ་རྗེའི་ཞལ་མཐོང་སྟེ། །མཁའ་ལྡིང་བྱེ་ཚན་འཇིགས་པ་དང་། །ངན་སོང་སྡུག་བསྔལ་ལས་གྲོལ་ནས། །རྡོ་རྗེ་སེམས་དཔའི་ཚེ་ཐོབ་ཤོག །སརྦ་ནཱ་ག་རཱ་ཛཱ་ས་པ་རི་ཝཱ་ར་གཙྪ། ཞེས་གཤེགས་སུ་གསོལ་ཞིང་། གཞན་ཡང་བསྔོ་བ་སྨོན་ལམ་ཅི་རིགས་པ་དང་། ཤིས་པ་བརྗོད་པར་བྱའོ།།