༄༅། །ག མྦྷཱི རོ དྦཱ ར ཉྤཱ ཏྲཱ ཡ ནཾ། །

ཟབ་དང་རྒྱ་ཆེའི་རླབས་ཆེན་སྤྱོད་པའི་ཚུལ། །མུ་ནི་ཙྪ་ན་དཿཐཱ་པ་ཙ་ནཾ༎མུ ནི ཙྪ ན དཿ ཐཱ པ ཙ ནཾ། །ཐུབ་དགོངས་ཇི་བཞིན་གསལ་བར་སྟོན་པ་ལ། །ཨ་པྲ་ཏི་སུ་བྷཱ་ཥཾ་མནྡ་རཿ༎ཨ པྲ ཏི སུ བྷཱ ཥཾ མ ནྡ རཿ། །འགྲན་ཟླ་མེད་པའི་ལེགས་གསུང་མནྡཱ་ར། །བྷ་བི་ཀཾ་དེ་བནྟྲཾ་པྟ་དེ་ཤཿ༎བྷ བི ཀཾ དེ བ ནྟྲཾ པྟ དེ ཤཿ། །སྐལ་བཟང་ལྷ་བརྒྱ་དགའ་བྱེད་འཇུག་ངོགས་ཡིན། །

དལ་འབྱོར་གྲུ་གཟིངས་སེམས་བསྐྱེད་ནོར་བུ་ཡིས། །ཕྱུར་བུར་བཀང་བ་ཀུན་མཁྱེན་རྒྱལ་སྲིད་ལ། །མེད་དུ་མི་རུང་ཡོན་ཏན་ཆེན་པོའི་ཚུལ། །ལུང་རིགས་ཀྱིས་འདོམས་རིགས་ཀྱི་སྨན་ཆེན་ཡིན། །དག་བྱེད་ཡན་ལག་བདུན་གྱིས་ཉེར་དྲངས་ཏེ། །གཞན་ཕན་སེམས་ཀྱི་འབྱོར་བ་རླབས་ཆེན་པོས། །དོན་གཉིས་སྒྲུབ་པའི་ཐུགས་བསྐྱེད་འཁོར་ལོས་བསྒྱུར། །ཡིད་མཁར་བསུ་བ་སྔོན་མེད་དགའ་སྟོན་ཡིན། །སེམས་བསྐྱེད་ནོར་བུའི་གདེངས་ཀས་ལེགས་བརྒྱན་ནས། །བྱང་ཆུབ་སྤྱོད་པའི་མེ་ཏོག་མཛེས་པའི་ཚལ། །གཏན་དུ་བདེ་བའི་ཁང་བཟང་དེར་ཞུགས་ཏེ། །བག་ཡོད་འདོམས་པ་སྒྲུབ་ལ་བསྐུལ་བའི་ལྕགས། །དེ་ཚེ་དྲན་པའི་ར་བ་བརྟན་པོ་རུ། །སེམས་ཀྱི་རི་དྭགས་བཙུད་པས་ཕྱིན་དྲུག་རྭ། །མི་མཐུན་རྔོན་པས་མི་ཚུག་བསྲུང་པའི་ཕྱིར། །ཤེས་བཞིན་གདམས་པ་གསེར་གྱིས་ཁུག་དཀའི་སྐྱེས། །སྡང་སེམས་ཚེར་མའི་གང་བའི་ཐ་རྒོད་གཞིར། །གཞན་ཕན་བསམ་སྦྱོར་སྨན་གྱི་མྱུ་གུ་མཆོག། །སྐྱེ་བར་དཀའ་སླད་བཟོད་ལ་འདོམ་པའི་ཆུས། །བྲན་འདི་ཉམས་རྟོགས་སོ་ནམ་འགྲན་མེད་ཡིན། །ཐེག་ཆེན་གཉིས་ཀའི་རླབས་ཆེན་སྤྱོད་པའི་འགྲོས། །ཀུན་ནས་མྱུར་བའི་ཤུགས་འཆང་བརྩོན་འགྲུས་རྟ། །བཞོན་ཚུལ་མཁས་པའི་ཕྱག་བཞེས་གདམས་པ་འདིས། །ཚོགས་གཉིས་ཡངས་པའི་རྒྱ་ཁྱོན་ཡུད་ཀྱིས་གཅོད། །ཆོ་གས་བཟུང་བའི་རིན་ཆེན་སེམས་ཀྱི་ནོར། །ཆགས་མེད་ཡིད་ཀྱི་ཟ་མ་ཏོག་བཟང་པོར། །བཅུད་དུ་བླུག་པའི་སེམས་སྦྱོང་བསམ་གཏན་ལ། །རིགས་ལམ་རྣོན་པོའི་ལྕགས་ཀྱུ་འདི་ཆེས་རྨད། །ཕྱི་ནང་དངོས་སྨྲའི་བདེན་པར་སྒྲོ་བཏགས་དང་། །ལྷན་སྐྱེས་འཛིན་པའི་ཞེན་སྟངས་དྲུང་ཕྱུང་ཏེ། །སྤྱོད་འཇུག་བསྟོད་པ་མནྡ་རའི་ཕྲེང་བ། དྲན་པ་ཉེར་བཞག་བཞི་ཡི་ལྷག་མཐོང་ཚུལ། །ཤེར་ཕྱིན་ཟབ་མོའི་རིགས་སྔགས་ཟླ་བྲལ་ཡིན། །རྣམ་དཀར་ཆུ་ཀླུང་སྟོང་གི་འཇུག་པ་ཀུན། །གཞན་ཕན་བསམ་པའི་ཡུར་བ་གཅིག་ཁོ་ནར། །དྲངས་ཏེ་ཀུན་མཁྱེན་དཔག་བསམ་ཤིང་སྨིན་སླད། །བསྐྱིལ་བའི་བསྔོ་བ་ཐེག་མཆོག་ཁྱད་ནོར་ཏེ། །མདོར་ན་རིང་བརྒྱུད་ཀླུ་སྒྲུབ་ལུགས་ཀྱི་སྲོལ། །ཉེར་བརྒྱུད་འཇམ་པའི་དབྱངས་ཀྱི་ཞལ་ལུང་གཉིས། །ཉམས་མྱོང་སྲང་ལ་བཅལ་བའི་ཉམས་རྟོགས་ཆེ། །ལེགས་བཤད་གཟུགས་ཀྱིས་མཇལ་དུ་ཡོད་པ་འདི། །ཀྱེ་ཀྱེ་སྐལ་བ་བཟང་ངོ་ཤེས་ལྡན་དག། །རང་རེའི་ཉམས་སུ་ལེན་དགོས་སྙིང་གི་གྲོགས། །འདི་འདྲའི་ལེགས་བཤད་གཞན་མེད་ཤེས་དགོས་ལ། །འདི་ལ་མི་འབྲལ་སྨོན་པའི་བག་ཆགས་ཞོག། །གཞན་སྡེས་སྒྲོ་བཏག་འགོག་པའི་རྟོག་གེ་ཙམ། །མ་ཡིན་བདག་ཉིད་གཅེས་པར་འཛིན་པའི་བདུད། །བརླག་བྱེད་ཐུན་མིན་རིགས་ལམ་མཚོན་རྣོན་པོ། །སྲས་བཅས་རྒྱལ་བའི་ཕྱག་མཚན་ཆེན་པོ་དེ། །འདི་ལས་འཆད་འདྲ་གཞན་ནས་མི་འབྱུང་བས། །རང་སྡེའི་འབུམ་ཕྲག་གཞུང་ལུགས་ཐམས་ཅད་ཀྱང་། །ཀུན་མཁྱེན་སྒྲུབ་པའི་ཐབས་བཟང་ཡིན་མོད་དེ། །འདི་དང་མི་མཉམ་ཆེ་བ་ཤེས་པའི་བློས། །འཁོར་བར་འཁོར་བའི་ཚེ་རབས་ཐམས་ཅད་དུ། །གཞུང་བཟང་འདི་དོན་ཡིད་ལ་བྱང་གྱུར་ཏེ། །ཐེག་ཆེན་ལམ་གྱི་གཞུང་ཤིང་སྲོང་བ་ལ། །འཇམ་དབྱངས་སྤྱན་རས་གཟིགས་དང་མཚུངས་པར་ཤོག། །ཅེས་རྨད་དུ་བྱུང་བའི་སློབ་དཔོན་ཆེན་པོ་གཉིས་སུ་གྲགས་པའི་ཡ་གྱལ་ངོ་མཚར་རྣམ་ཐར་བདུན་ལྡན་གྱི་རྒྱལ་སྲས་བདག་ཉིད་ཆེན་པོ་ཤནྟ་དེ་ཝའི་ཞལ་སྔ་ནས་ཀྱིས་མཛད་པའི་གཞུང་བཟང་བྱང་ཆུབ་སེམས་དཔའི་སྤྱོད་པ་ལ་འཇུག་པ་ཞེས་གྲགས་པའི་ཐེག་ཆེན་ཐུན་མོང་མིན་པའི་རིགས་ གཞུང་གསལ་ལ་རྣོ་བའི་ལེགས་བཤད་འགྲན་ཟླ་དང་བྲལ་བ་འདི་ཉིད། མཁྱེན་དཔྱོད་ཕུལ་དུ་བྱུང་བའི་མཆོག་སྤྲུལ་དམ་པ་ཐུབ་བསྟན་ཀ་དག་ཡེ་ཤེས་ལགས་ནས་རང་གི་ཐུགས་དམ་དུ་ཕྱག་རིས་མཛད་དེ་མཁས་པའི་བཟོ་རྒྱུན་གྱི་གླེགས་བམ་ངོ་མཚར་བ་བསྐྲུན་སྐབས། དད་མོས་དང་རྗེས་སུ་ཡི་རངས་པས་མཚམས་སྦྱར་ཏེ་གཞུང་མཆོག་དེ་ཉིད་ལ་བསྟོད་པའི་ཚིགས་སུ་བཅད་པ་འདི་ཉིད། ཐེག་པ་ཆེན་པོའི་ཟབ་རྒྱས་ཀྱི་གདམས་པ་མང་དུ་ཐོབ་ཀྱང་རྒྱུད་ལ་མ་འབྱོར་བའི་ཆོས་ཀྱི་སྤྲང་བན་དྷརྨ་སཱ་ར་ཞེས་འབོད་པས་སྙན་མོ་རི་རྣམ་རྒྱལ་དགེ་ལྡན་གྱི་རང་ཤག་དཀོན་མཆོག་གསུམ་གྱི་ལྷ་ཁང་དུ་བྲིས་པ་ཛཡནྟུ།། །།

རྩོམ་སྒྲིག་པ། མང་ར་བ།

                   གསལ་འདེབས།

                           རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                                                                            དྲ་བའི་སྦྲེལ་ཐགhttp://www.tb1025.cn