༄༅། །ན་མོ་གུ་རུ་མཉྫུ་ཤྲཱི་ལ་ལི་ཏ་མ་ཏི་བྷི་ར་ཙཀྲ་སྭ་ར་སྭ་ཏྱཻ། །

ཀུན་ཁྱབ་སྒྲིབ་བྲལ་དབྱིངས་དང་དབྱེར་མེད་པའི། །

ཀུན་གཟིགས་ཡེ་ཤེས་རྣམ་བཞིའི་སྒྱུ་མའི་འཕྲུལ། །

ཀུན་བཟང་གཟུགས་སྐུའི་ངོ་བོར་ཡོངས་ཤར་བའི། །

ཀུན་འདུས་རྐང་གཉིས་མཆོག་གྱུར་དེ་ལ་འདུད། །

རྟག་ཁྱབ་གཅིག་དང་དུ་མའི་སྤྲོས་པ་ལས། །

ཡོངས་འདུས་ཡོད་མེད་མཚན་མ་ཉེར་ཞིའི་དབུས། །

ཇི་བཞིན་བརྗོད་བྲལ་སོ་སོ་རང་རིག་ཡུལ། །

རང་བཞིན་རྣམ་དག་སྟོང་པའི་དབྱིངས་དེར་འདུད། །

དོན་དམ་འདུ་འབྲལ་མེད་པའི་གཤིས་ལུགས་དེར། །

སྲིད་པར་སྦྱོར་བའི་ཀུན་འབྱུང་འཆིང་པ་དང་། །

གཉིས་སུ་སྣང་བའི་རྟོག་པའི་བག་ཆགས་བཅས། །

བཅོམ་པའི་དག་པ་གཉིས་ལྡན་དབྱིངས་ལ་འདུད། །

ཆོས་ཀྱི་དབྱིངས་སུ་མཉམ་པར་བཞག་པ་ལས། །

བསྐྱོད་པའི་འདུ་བྱེད་རྣམ་ཀུན་མི་དམིགས་པས། །

སྟོང་ཆེན་དབྱིངས་སུ་རོ་གཅིག་ཡེ་ཤེས་བཞིའི། །

བདག་ཉིད་མེ་ལོང་ཡེ་ཤེས་དེ་ལ་འདུད། །

བདག་དང་གཞན་དུ་རྟོག་པ་རབ་ཞི་ཞིང་། །

སྲིད་དང་ཞི་བའི་འདུ་ཤེས་མི་མངའ་བར། །

བཟང་ངན་བླང་དོར་མེད་པ་ཆོས་ཉིད་བཞིན། །

མངོན་བྱས་མཉམ་པ་ཉིད་དུ་གཟིགས་ལ་འདུད། །

ཀུན་ནས་ཉོན་མོངས་པ་དང་རྣམ་བྱང་གི །

ཆོས་ཅན་རེ་རེ་བཞིན་ཡང་རང་དང་སྤྱིའི། །

རྣམ་པ་མ་འདྲེས་ཀུ་ཤའི་རྩེ་མོ་ལྟར། །

ཇི་སྙེད་སོ་སོར་རྟོག་པ་དེ་ལ་འདུད། །

འགྲོ་ཁམས་རྒྱ་མཚོར་རང་དང་སྐལ་བ་བཞིན། །

སྣ་ཚོགས་འཕྲིན་ལས་རྩོལ་མེད་འཇུག་པ་ཡི། །

བདག་ཉིད་ཕན་དང་བདེ་བའི་གཏེར་གྱུར་པའི། །

བྱ་བ་གྲུབ་པའི་ཡེ་ཤེས་བརྙེས་ལ་འདུད། །

སྟོབས་བཅུ་མི་འཇིགས་བཞི་དང་མ་འདྲེས་སོགས། །

གསང་བ་བསམ་མི་ཁྱབ་པའི་ཡེ་ཤེས་འཕྲུལ། །

ཀུན་མཁྱེན་གྱིས་ཀྱང་བརྗོད་པའི་མཐའ་བྲལ་བའི། །

ཡེ་ཤེས་ཆོས་ཀྱི་སྐུ་ལ་དྭངས་བའི་འདུད། །

སྤྲོས་བྲལ་དབྱིངས་ལ་བློ་གྲོས་དབྱེར་མེད་དུ། །

འཇུག་པའི་འཕགས་མཆོག་མཐར་ཐུག་སར་འདྲེན་ཕྱིར། །

ཐེག་མཆོག་ཆོས་ལ་རྫོགས་པར་ལོངས་སྤྱོད་པའི། །

ལྔ་ལྡན་གཟུགས་སྐུའི་གཙོ་བོ་དེ་ལ་འདུད། །

འཕགས་པ་ཕལ་དང་སོ་སོའི་སྐྱེ་བོའི་སླད། །

སྣ་ཚོགས་ཐབས་ཀྱིས་ཕན་བདེའི་མཆོག་སྦྱིན་པའི། །

ཀུན་ཁྱབ་གང་འདུལ་རོལ་བ་འབྱམས་ཀླས་པ། །

གྲངས་མེད་སྤྲུལ་སྐུའི་བདག་ཉིད་དེ་ལ་འདུད། །

དང་པོའི་ལུས་ཅན་གཅིག་ཏུ་ཆགས་སོགས་ཀྱིས། །

སྲིད་པར་བཅིངས་རྣམས་གྲོལ་བའི་ཆགས་མེད་ལམ། །

སྟོན་སླད་འཁོར་བསྒྱུར་རིགས་ཀྱི་རྒྱལ་སྲིད་ཆེ། །

སྤངས་པའི་དཀའ་ཐུབ་བདག་པོ་དེ་ལ་འདུད། །

བུ་རམ་ཤིང་ལ་གྲོང་ཁྱེར་ལུད་གྲོགས་བཞིན། །

ཐེག་ཆེན་ཆོས་ལ་ནང་བྱན་ཆུད་པ་ལ། །

འཁོར་བསྒྱུར་ཆ་བྱད་འཛིན་པའི་ཆགས་བཅས་ཀྱིས། །

དེར་མཐུན་ལམ་བཟང་སྟོན་པ་དེ་ལ་འདུད། །

ཤིན་ཏུ་ཁམས་དབང་བསམ་པ་མཆོག་གྱུར་པར། །

འདོད་ཡོན་ཆེན་པོའི་བདེ་བ་ལམ་བྱེད་སླད། །

ཁ་སྦྱོར་བདེ་ཆེན་རོ་ཡིས་མྱོས་པ་ཡིས། །

གསང་བའི་མཐར་ཐུག་སྟོན་པ་དེ་ལ་འདུད། །

མི་སྲུན་འདུལ་ཕྱིར་ཧཱུཾ་སྒྲ་སྒྲོགས་པ་ཅན། །

བ་སྤུའི་ཁུང་རེ་ལས་ཀྱང་མེ་ལྕེའི་ཕྲེང་། །

འཇིག་དུས་ལྟར་འཁྲིགས་ཁྲོ་གཉེར་ངོམས་པ་ཡི། །

བགེགས་འདུལ་དྲག་པོ་ཁྲོ་བོར་འཆར་ལ་འདུད། །

རྡུལ་བྲལ་ཡེ་ཤེས་མཆོག་ཉིད་སྐུར་སྣང་བའི། །

གཞན་དོན་མིག་གི་བདུད་རྩི་ཟླ་མེད་པ། །

དག་གསལ་མཚན་དང་དཔེ་བྱད་དཔལ་འབར་བའི། །

རྣམ་ཀུན་མཆོག་ལྡན་སྐུ་ཡི་གསང་བར་འདུད། །

གནས་ལུགས་ཟབ་མོར་བཀྲི་བར་རུང་མིན་ལ། །

དྲང་ངེས་སྒོ་བརྒྱ་འབྱེད་པའི་མཛད་པའི་མཆོག། །

དྲུག་ཅུ་རྩ་བཞིའི་ཡན་ལག་རྫོགས་པའི་དབྱངས། །

རྣམ་ཀུན་མཆོག་ལྡན་གསུང་གི་གསང་བར་འདུད། །

སྟོང་ཉིད་རྡོ་རྗེ་བཙུན་མོར་རྗེས་ཆགས་པའི། །

ཡེ་ཤེས་སྐད་ཅིག་གཅིག་གིས་ཀུན་མཁྱེན་བཞིན། །

འགྲོ་ལ་ཐུགས་རྗེ་ཆེན་པོ་རྒྱུན་ཆགས་པའི། །

རྣམ་ཀུན་མཆོག་ལྡན་ཐུགས་ཀྱི་གསང་བར་འདུད། །

དེ་ལྟར་སྐུ་བཞིའི་བདག་ཉིད་མངོན་བྱས་ཏེ། །

འགྲོ་དྲུག་འདུལ་ལ་ཉིན་མཚན་དུས་དྲུག་ཏུ། །

མཁྱེན་བརྩེའི་འཕྲིན་ལས་ནམ་ཡང་མི་བསྙེལ་བའི། །

དཀོན་མཆོག་རིན་ཆེན་དང་པོར་སྐྱབས་སུ་མཆི། ། ༈ 

དཀོན་མཆོག་གསུམ་གྱི་བསྟོད་པ་གདུང་བའི་མུན་སེལ་ནོར་བུའི་ཅོད་པཎ་ཞེས་བྱ་བ་ལས། སངས་རྒྱས་ལ་བསྟོད་པའི་སྐབས་ཏེ་དང་པོའ།ོ །

༈ གང་ཞིག་མཁའ་མཉམ་ཡོན་ཏན་ཆོས་ཀྱི་སྐུ། །

གང་གིས་བདེ་བླག་ཉིད་དུ་བསྒྲུབ་པ་ཡི། །

དུས་གསུམ་འཕགས་པ་རྣམས་ཀྱི་ལམ་ཆེན་པོ། །

ཆགས་བྲལ་མཆོག་གྱུར་དམ་པའི་ཆོས་ལ་འདུད། །

ཉེས་སྤྱོད་འདུལ་ཞིང་སེམས་ནི་བརྟན་བྱེད་ཅིང་། །

དམིགས་པ་རྣམ་པར་འབྱེད་ལ་མིག་ལྟ་བུར། །

བསྔགས་པའི་རིགས་ཅན་ གསུམ་གྱི་འཇུག་ངོགས་མཆོག། །

སྡེ་སྣོད་གསུམ་གྱི་ལུང་གི་ཆོས་ལ་འདུད། །

དྲན་ཤེས་སྟོབས་ཀྱིས་ལེགས་པར་དུལ་བ་དང་། །

རྣམ་རྟོག་ཞི་བའི་ཏིང་འཛིན་རྩེ་གཅིག་པ། །

བདག་ཏུ་རྟོག་པ་ཉེར་ཞིའི་ཤེས་རབ་སྟེ། །

བསླབ་གསུམ་མངོན་པར་རྟོགས་པའི་ཆོས་ལ་འདུད། །

འཇིག་ཚོགས་ལྟ་བའི་རི་བོ་ལྷུན་སྟུག་པ། །

ཡེ་ཤེས་རྡོ་རྗེས་བཅོམ་པའི་ཆོས་ཉིད་གཤིས། །

སྡུག་ཀུན་འགོག་ཅིང་ཞི་བ་གྱ་ནོམ་པའི། །

གཏན་དུ་ངེས་འབྱུང་འགོག་པའི་བདེན་པར་འདུད། །

ཉེས་ཚོགས་གདོད་ནས་ཟད་པའི་དྲི་བྲལ་དབྱིངས། །

གང་གིས་མངོན་སུམ་རྟོགས་པ་དེ་ཡིས་ནི། །

བརྒྱད་ཁྲི་བཞི་སྟོང་དགྲ་སྡེའི་དཔུང་གནོན་པའི། །

ངེས་པར་འབྱིན་བྱེད་ལམ་གྱི་བདེན་པར་འདུད། །

ཁྱད་པར་རང་དང་གཞན་གྱི་དོན་ཆེན་པོ། །

སྒྲུབ་བྱེད་ཟབ་དང་རྒྱ་ཆེའི་ཐེག་པ་ཆེ། །

རྒྱལ་བའི་གདུང་འཚོབ་སྲས་པོ་གྲངས་མེད་པ། །

རོལ་བའི་མཚོ་ཆེན་དེ་ལ་དྭངས་བས་འདུད། །

བདེན་གཉིས་རྣམ་པ་མཐའ་དག་མངོན་མཁྱེན་པ། །

རིགས་ཅན་གསུམ་གྱི་རེ་སྐོང་ལམ་གསུམ་ཤེས། །

མཐའ་གཉིས་དག་བྱེད་ཕུང་སོགས་མཁྱེན་པ་ཡི། །

ཐེག་པ་མཆོག་གི་ཤེས་བྱའི་ཆོས་ལ་འདུད། །

མཁྱེན་པའི་རྣམ་པ་རྫོགས་པའི་གོ་རིམ་བཞིན། །

སྒོམ་པའི་མངོན་རྟོགས་ཞི་ལྷག་ཟུང་འབྲེལ་གྱིས། །

དབང་གྱུར་མི་ཕྱེད་བརྟན་པ་ཐོབ་པ་ཡི། །

ཉམས་ལེན་རྒྱུ་འབྲས་སྦྱོར་བའི་ཆོས་ལ་འདུད། །

ཐར་དང་ཐམས་ཅད་མཁྱེན་པར་གེགས་བྱེད་པའི། །

སྒྲིབ་པ་གཉིས་པོ་རྣམ་པར་སྦྱང་པ་ལས། །

དབྱིངས་དང་ཡེ་ཤེས་སྐུ་གསུང་ཐུགས་ཀྱི་དངོས། །

རོ་གཅིག་འབྲས་བུ་ཆོས་ཀྱི་སྐུ་ལ་འདུད། །

ལྷག་པར་ཐབས་མཁས་མཆོག་གི་གཞི་གཟུང་སྟེ། །

ཚོགས་གཉིས་རྒྱ་ཆེན་སྐད་ཅིག་རེ་རེར་ཡང་། །

མིག་འཕྲུལ་བཞིན་དུ་སྡུད་པའི་མྱུར་ལམ་ཆེ། །

གསང་ཆེན་རྒྱུད་སྡེ་རྒྱ་མཚོར་གུས་པས་འདུད། །

ཀུན་ཉོན་ལྕགས་ལ་སྐུ་གསུམ་གསེར་འགྱུར་རྩིས། །

བཏབ་སྟེ་གྲགས་ཆེན་རྫོགས་པའི་སངས་རྒྱས་དངོས། །

མི་རིང་ལག་རྩེར་འགོད་པའི་འཕྲུལ་འཛིན་པའི། །

གསང་བ་བླ་མེད་ཆོས་ལ་ལན་བརྒྱར་འདུད། །

རྒྱལ་དང་རྒྱལ་བའི་སྲས་པོ་ཐམས་ཅད་ཀྱི། །

ཐུགས་དམ་ཟབ་མོ་ཆོས་ཀྱི་ཉིང་ཁུ་ཆེ། །

ཀུན་འདུས་ཀུན་གྱི་སྙིང་པོ་མེད་མི་རུང་། །

རིན་ཆེན་བྱང་ཆུབ་སེམས་མཆོག་གཉིས་ལ་འདུད། །

དེ་ལྟར་གདུལ་བྱའི་ཁམས་དབང་དང་བསྟུན་ཏེ། །

གོང་འོག་ཐེག་པའི་རྣམ་གྲངས་སྣ་ཚོགས་པའི། །

ཐོག་མཐའ་བར་དུ་དགེ་བའི་ལམ་བཟང་པོ། །

དཀོན་མཆོག་རིན་ཆེན་གཉིས་པར་སྐྱབས་སུ་མཆི། ། 

དཀོན་མཆོག་གསུམ་ལ་བསྟོད་པ་གདུང་བའི་མུན་སེལ་ནོར་བུའི་ཅོད་པཎ་ཞེས་བྱ་བ་ལས། ཆོས་ལ་བསྟོད་པའི་སྐབས་ཏེ་གཉིས་པའོ། །

ཇི་ལྟར་སེངྒེའི་འོ་མ་བླུག་པ་ལ། །

གསེར་གྱི་སྣོད་བཞིན་ཐེག་གསུམ་ཆོས་འཛིན་པ། །

ངེས་ལེགས་རིན་ཆེན་གླིང་དུ་འགྲོ་བ་ཡི། །

ཚོགས་ཀྱི་མཆོག་གྱུར་དགེ་འདུན་རྣམས་ལ་འདུད། །

བདེན་པ་བཞི་ཡི་ལྡོག་འཇུག་ལ་བརྩོན་ཞིང་། །

རྟེན་འབྲེལ་བཅུ་གཉིས་ལུགས་འབྱུང་ལུགས་ལྡོག་དང་། །

མཁས་བྱའི་གནས་ལ་མཁྱེན་པ་རྒྱས་པ་ཡི། །

ཉན་ཐོས་དང་ནི་རང་སངས་རྒྱས་ལ་འདུད། །

གསུང་རབ་སྙིང་པོ་བདག་མེད་ཆོས་ཀྱི་བཅུད། །

མངོན་སུམ་ཉམས་སུ་མྱོང་བའི་དགའ་སྟོན་དུ། །

ཀུན་སྦྱོར་གསུམ་གྱི་གཡུལ་ལས་རྣམ་རྒྱལ་བ། །

འཕགས་པ་རྒྱུན་དུ་ཞུགས་པའི་ཚོགས་ལ་འདུད། །

ཁམས་ཀྱི་ཐ་མའི་ཆ་དང་མཐུན་པ་ཡི། །

ཀུན་ཉོན་གཏེར་གྱི་སུམ་ཆ་གཉིས་བྲལ་བ། །

ཟག་མེད་ཆོས་ལ་སྤྱོད་པའི་རྒྱལ་བའི་སྲས། །

འཕགས་པ་ལན་ཅིག་ཕྱིར་འོང་རྣམས་ལ་འདུད། །

འདོད་པ་དུག་དང་འདྲ་བར་སྲེད་བྲལ་ཏེ། །

འོག་མའི་ས་རུ་ནམ་ཡང་མི་འཇུག་པར། །

ཏིང་འཛིན་ཞི་བའི་དགའ་སྟོན་མྱོང་པ་ཅན། །

འཕགས་པ་ཕྱིར་མི་འོང་བ་རྣམས་ལ་འདུད། །

ཁམས་གསུམ་འཆིང་བ་མཐའ་དག་རབ་བཅད་དེ། །

ཉེ་བར་ཞི་བའི་གླིང་དུ་ངལ་གསོ་བ། །

ཡོན་གནས་དམ་པ་གསེར་གྱི་རི་བོ་ལྟའི། །

འཕགས་པ་དགྲ་བཅོམ་རྣམས་ལ་དྭངས་བས་འདུད། །

གཅིག་ཏུ་བསྟན་དང་སྟོན་པར་གུས་པ་ཡིས། །

ཆོ་ག་མཆོག་གིས་དགེ་ལས་མི་ཕྱེད་པར། །

འདུན་པ་རོ་གཅིག་བསྟན་པའི་རྩ་ལག་ཆེ། །

ཚོགས་མཆོག་འདུས་པ་རྣམས་ལའང་དགའ་བས་འདུད། །

ནམ་མཁའ་མཉམ་པའི་འགྲོ་དྲུག་ཉམ་ཐག་ཚོགས། །

ཕྱོགས་རིས་མེད་པར་སྙིང་རྗེའི་ཞགས་པ་ཡིས། །

གཅིག་ཏུ་བསྡམས་ནས་ཕྲག་པར་ཐོག་པ་ཡི། །

བྱང་ཆུབ་སེམས་དཔའ་རྣམས་ལ་རྟག་ཏུ་འདུད། །

རྒྱ་ཆེན་བསམ་པ་རྣམ་པར་དག་བྱས་ཏེ། །

ཤེས་རབ་ཕ་རོལ་ཕྱིན་པར་བྱ་བའི་སླད། །

དམིགས་པའི་དུག་རྣམས་འདོན་ལ་འབུམ་ཕྲག་གི །

རིགས་པའི་ཕྱག་མཚན་བསྣམས་པ་རྣམས་ལ་འདུད། །

ངོ་བོ་ཉིད་མེད་རྟོགས་པའི་གཟུགས་སགོ ས་ལས། །

ལྡགོ ་དང་ཐེ་ཚམོ ་མ་ིཁམོ ས་བརྒྱད་སྤང་སགོ ས། 

།དྲདོ ་རྩ་ེབཟདོ ་མཆོག་བཞི་ལ་བཞུགས་པ་ཡི། །

ཕྱིར་མི་ལྡོག་པའི་དགེ་འདུན་རྣམས་ལ་འདུད། །

སྟོང་ཉིད་མངོན་སུམ་རྟོགས་ནས་གཟུགས་སོགས་ཀྱི། །

འདུ་ཤེས་ལྡོག་དང་སེམས་བརྟན་དམན་ལོག་སོགས། །

མཐོང་ལམ་སྐད་ཅིག་བཅུ་དྲུག་ལ་བཞུགས་པའི། །

ཕྱིར་མི་ལྡོག་དཀོན་མཆོག་གསུམ་ལ་བསྟོད་པ། 

པའི་དགེ་འདུན་རྣམས་ལ་འདུད། །

སྟོང་དང་རྟེན་འབྲེལ་སོ་སོར་མི་ཕྱེད་པའི། །

སྐྱེ་འགག་དེ་བཞིན་ཉིད་སོགས་ཟབ་མོ་བརྒྱད། །

མངོན་པར་རྟོགས་པའི་བསྒོམ་ལམ་ལ་བཞུགས་པའི། །

ཕྱིར་མི་ལྡོག་པའི་དགེ་འདུན་རྣམས་ལ་འདུད། །

ཁྱད་པར་ཐབས་ཤེས་རོ་གཅིག་གསང་སྔགས་ཀྱིས། །

དངོས་གྲུབ་ཆེན་པོ་བསྒྲུབ་པའི་ཐབས་མང་པོས། །

རང་གཞན་དོན་གཉིས་བདེ་བླག་བསྒྲུབ་པ་ཡི། །

རྣལ་འབྱོར་དབང་ཕྱུག་རྣམས་ལ་དྭངས་བས་འདུད། །

ཀུན་རྫོབ་སྒྱུ་མ་དོན་དམ་འོད་གསལ་གྱིས། །

སྐུ་གཉིས་སྒྲུབ་པའི་གསང་བའི་གནད་ཕྱེ་བའི། །

གདམས་པ་མཆོག་གི་རྟོགས་པའི་དགའ་སྟོན་ཅན། །

རིག་འཛིན་དཔའ་བོ་མཁའ་འགྲོའི་ཚོགས་ལ་འདུད། །

དེ་ལྟར་ཐེག་པ་རིན་ཆེན་ཐེམ་སྐས་ལས། །

དོན་གཉིས་འབྱོར་བ་ནམ་ཡང་མི་ཟད་པའི། །

ཆོས་ཀྱི་རྒྱལ་སྲིད་མཆོག་ལ་ཆེས་པ་ཡིས། །

དཀོན་མཆོག་རིན་ཆེན་གསུམ་པར་སྐྱབས་སུ་མཆི། །

༈ དཀོན་མཆོག་གསུམ་ལ་བསྟོད་པ་གདུང་བའི་མུན་སེལ་ནོར་བུའི་ཅོད་པཎ་ཞེས་བྱ་བ་ལས། དགེ་འདུན་ལ་བསྟོད་པའི་སྐབས་ཏེ་གསུམ་པའོ། །༈ 

དེ་ལྟར་ཉམ་ཐག་ཀུན་གྱི་མགོན་གཅིག་པུ། །

རིན་ཆེན་གསུམ་ལ་གཅིག་ཏུ་དད་པའི་བློས། །

ཅུང་ཟད་བསྟོད་པའི་རྣམ་དཀར་འདི་ཡིས་མཐུས། །

དཀོན་མཆོག་གསུམ་དང་ནམ་ཡང་འབྲལ་མེད་ཤོག། །

སངས་རྒྱས་ཉི་མའི་མཚན་དཔེའི་ཞལ་མཐོང་ཞིང་། །

དམ་ཆོས་ཟླ་བའི་འོད་དཀར་སྙིང་ལ་ཞུགས། །

དགེ་འདུན་སྐར་ཚོགས་འདུས་པའི་གྲལ་ཐོབ་སྟེ། །

མཆོག་གསུམ་སྤྱི་བོའི་རྒྱན་དུ་འཛིན་པར་ཤོག། །

ཚེ་རབས་ཀུན་དུ་བཀའ་གདམས་གདམས་པའི་སྲོལ། །

སྐྱེས་བུ་གསུམ་གྱི་ལམ་རིམ་རིམ་གཉིས་ བཅས། །

ཐེག་ཆེན་ཆོས་ཀྱི་གཏེར་ཐོབ་ཐོབ་བྱའི་འབྲས། །

སྐུ་གསུམ་དབྱེར་མེད་ལྷུན་གྲུབ་གྲུབ་གྱུར་ཅིག། །

ཅེས་དཀོན་མཆོག་གསུམ་ལ་བསྟོད་པ་གདུང་བའི་མུན་སེལ་ནོར་བུའི་ཅོད་པཎ་ཞེས་བྱ་བ་འདི་ནི། རིགས་གསུམ་སེམས་དཔའི་རྣམ་རོལ་བཀའ་དྲིན་མཚུངས་པ་མེད་པའི་བདག་ཉིད་རྣམ་པ་གསུམ་དང་། མཆོག་གཟིགས་ཀྱི་རྡོ་རྗེ་འཛིན་པ་ཆེན་པོ་རྣམ་གཉིས་སོགས་གཙུག་གི་རྒྱན་དུ་ཐོབ་པའི་བཀའ་དྲིན་ལས། དཀོན་མཆོག་ལ་དད་གུས་ཕྲན་བུ་ཐོབ་པའི་དགེ་སློང་རིགས་པར་སྨྲ་བའི་གཟུགས་བརྙན་ཙམ་འཛིན་པ་བློ་བཟང་མདོ་སྔགས་ཆོས་ཀྱི་རྒྱ་མཚོ་ཞེས་བྱ་བས་སྙན་མོ་རིའི་མགུལ་རང་གནས་དཀོན་མཆོག་གསུམ་གྱི་ལྷ་ཁང་ནས་བསྒྲིགས་པའི་དགེ་བས་བསྟན་པ་རིན་པོ་ཆེ་རང་གཞན་གྱི་རྒྱུད་ལ་རྒྱས་པར་གྱུར་ཅིག། །

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn