ཞྭ་དམར་ཆབ་ཤོག་ལས་ཇ་སག་ཐོ་ཡོན་དགེ་ལེགས་ལ་སྤྲིངས་པ།
དགེ༷་ལེག༷ས་རླབས་ཕྲེང་དུས་ལས་ཡོལ་མེད་པར། །
འགྲེམ་པའི་ལེགས་བཤད་ཡིད་བཞིན་རྒྱ༷་མཚོ༷འི་ངོགས། །
དོན་ལྡན་སྙིང་པོའི་རིན་ཆེན་འཚོལ་མཁས་པའི། །
རྣམ་དཔྱོད་ལང་ཚོའི་སྒེག་འཆང་དེར་སྤྲིངས་པ། །
ཀ་ཡེ་འཛམ་གླིང་ཡངས་པའི་བྱང་གི་ཕྱོགས། །
ཁ་བ་ཅན་ཡུལ་མདོ་སྨད་ཁྲི་ཀའི་ལྗོངས། །
གབ་རོམ་ཉེ་འཁོར་རང་བྱུང་ཁྲུས་རྫིང་དུ། །
ང་སྙམ་མེད་པའི་དམན་སར་གནས་ལགས་སམ། །
ཅ་ཅོའི་རྒྱ་བོད་སྐད་རིགས་རྣམ་འགྱུར་དང་། །
ཆ་ལུགས་སེར་སྐྱ་ཕོ་མོའི་བརྟུལ་ཞུགས་དང་། །
ཇ་མར་འཛོམ་དང་དཀོན་པའི་ཁྱད་པར་སོགས། །
ཉམས་སུ་མཚར་བའི་ལྟད་མོ་མང་མཐོང་ངམ། །
ཏཱ་དཀར་ཅོག་སྦིས་ཁུར་ནས་རང་གཅིག་པུར། །
ཐ་ན་བྲོ་ཆས་ཙམ་ཡང་མ་མཆིས་པར། །
ད་ལྟ་གློ་བུར་གཞན་ཡུལ་འཁྱམས་པ་འདིས། །
ནམ་ཡང་ཡིད་སྐྱོའི་ཆིག་ལབ་མ་ཤོར་རམ། །
པ་ཊ་ལྟ་བུར་འཁྱོག་པའི་སེམས་ལྡན་རྣམས། །
ཕ་རོལ་བསླུ་ཕྱིར་དྲང་བའི་ཚུལ་བཟུང་སྟེ། །
བཱ་ཁ་ཐམས་ཅད་ཉུལ་ནས་ཟས་དང་ནོར། །
མ་ལུས་རྐུ་བའི་ཁྱད་ཆོས་མཐོང་ངམ་ཅི། །
ཙ་ཏུར་མཆེ་གཙིགས་ཁྱི་དང་རྐུན་པོ་རྣམས། །
ཚ་ཟེར་ནུབ་རྗེས་རི་ཀླུང་ཀུན་འགྲིམས་ཏེ། །
ཛ་ཡའི་རྗེས་འབྲང་དག་གི་ཡོ་བྱད་རྣམས། །
ཝ་ལྟར་འཇབ་ནས་ལེན་པ་ཅིང་ཕོད་དམ། །
ཞྭ་གོས་བཟང་ལ་རིན་ཐང་ཆེ་བ་དང་། །
ཟ་འདོད་ཤ་མར་ཐུད་གསུམ་འཛོམ་པའམ། །
འ་འུན་གྲགས་པའི་མཚན་སྙན་ཅན་ཡིན་ཡང་། །
ཡ་མེད་སྡིག་པའི་མདུང་ལ་སུ་མི་སྐྲག །
རྭ་གདེངས་ཁྱུང་མིང་འཆང་བའི་ཡུལ་ལྗོངས་འདིར། །
ལ་ལུང་དབེན་པ་བསྟེན་པའི་ཀུན་སྤངས་རྣམས། །
ཤ་མར་ཕྱེ་རྩམ་སྲོག་འཚོ་ཙམ་བསྟེན་ནས། །
ས་ལམ་རིམ་གྱིས་བགྲོད་ལ་ཡི་རང་བྱོས། །
ཧ་ཧ་དོན་ཆུང་ཀུ་རེའི་ཚིག་ཕྲེང་འདི། །
ཨ་མདོའི་ཡུལ་གྱི་བླ་རྒན་ལྡོམ་བུ་པས། །
དཔྱོད་ལྡན་དགེ་ལེགས་ཡིད་ཀྱི་མཚོ་རྫིང་དུ། །
ངལ་སྐྱོའི་རྙོག་པ་དྭངས་ཕྱིར་སྤེལ་བ་དགེ །
ཞེས་འགྱངས་མིན་འདི་ཀར་འབོད་པའི་བྱ་མ་རྟའི་དོད་དུ་ཟླ་༥ཚེས་༢༥ལ་བུ་རམ་གྱི་རྟེན་བཅས་སྤྲིངས།
༼ གློག་རྡུལ་ཡི་གེ་གནང་ནས་མཚམས་སྦྱོར་མཁན། དྷཱིཿ ཚ། རྨོག་རུ་སངས་རྒྱས་རྒྱ་མཚོ། ༽
རྩོམ་སྒྲིག་པ།ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག
དྲ་བའི་སྦྲེལ་ཐགhttp://www.tb1025.cn