རྒྱལ་ཀུན་མཁྱེན་བརྩེའི་ཕུང་པོ་ནི།།

ངུར་སྨྲིག་ཟློས་གར་ལྷུར་བླངས་ཏེ།།

སྐྱེ་དགུ་ཀུན་གྱི་མགོན་མཛད་པ།།

དཔལ་ལྡན་བླ་མས་བདག་སྐྱོང་ཤི །

བློ་གྲོས་རྟུལ་ཞིང་སྒྲུབ་ལ་གཡེལ།།

སྙིང་སྟོབས་དམན་ཞིང་སྲེད་པ་ཆེ།།

རྟག་ཏུ་འདུ་འཛིའི་མཚོར་བྱིང་བ།།

གང་དེས་གུས་པས་མཆིད་འདི་གསོལ།།

ཁྱོད་ནི་སྔོན་གྱི་ཐུགས་བསྐྱེད་བཞིན།།

སྐྱོན་བརྒྱས་མནར་བའི་དུས་མཐའ་འདིར།།

བསྟན་འགྲོས་ཕན་བདེ་སྤེལ་བའི་ཁུར།།

རང་ཉིད་གཅིག་པུས་བདག་གིར་མཛད།།

དེ་ཚེ་ཁྱོད་འདྲ་ཡོད་བཞིན་དུ།།

ཐུབ་པ་བདག་གིས་ཅི་བྱ་ཞེས།།

སྲས་དང་བཅས་པ་ཉི་མའི་གཉེན།།

ཞི་བའི་དབྱིངས་སུ་གཤེགས་སམ་སྙམ།།

ཤེས་བྱའི་རྒྱ་མཚོ་མ་ལུས་པ།།

མགོན་ཁྱོད་ཞལ་དུ་གསོལ་བ་ན།།

གངྒཱ་འཐུང་བའི་ཛ་ཧྣུ།།

བཞིན་རས་ཆུ་ཐིགས་ཕྲེང་བ་འཛིན།།

དྲི་མེད་ལུང་དང་རིགས་པ་ཡིས།།

རྒྱུ་དང་འབྲས་བུའི་ཐེག་པའི་དོན།།

མ་ལུས་ཇི་བཞིན་ཐུགས་ཆུད་དེ།།

གཞན་ལ་འདོམས་པས་ངལ་བ་མེད།།

ཐོས་དོན་སྒྲུབ་ལ་གཞོལ་བ་ཡིས།།

ཟབ་དང་རྒྱ་ཆེའི་དམིགས་པ་ལ།།

བསྐལ་བའི་རླུང་གིས་མི་བསྒུལ་བའི།།

ཏིང་འཛིན་བརྟན་པོ་ཁྱོད་ཀྱིས་བརྙེས།།

མཆོག་དམན་བར་མ་རྗེས་འཛིན་པའི།།

ཁྱོད་ཀྱི་རྨད་བྱུང་འཕྲིན་ལས་ནི།།

ནོར་འཛིན་བཞིན་རས་མ་ལུས་པ།།

གསལ་བར་བྱེད་པའི་ཉི་མ་བཞིན།།

རབ་དཀར་གྲགས་པའི་ངང་མོ་ནི།།

ཕྱོགས་བྲལ་མཚོ་ལ་ཅི་ཡང་འཁོར།།

ཉིན་བཞིན་འཕུར་ཞིང་ལྡིང་བ་ཡིས།།

སྙན་པའི་རྫ་རྔ་རྡུང་བར་བྱེད།།

བདག་ནི་ཐོག་མེད་དུས་ཉིད་ནས།།

མི་བཟད་སྐྱོན་ལ་གོམས་པ་ཡིས།།

སེམས་ཀྱི་སྦྲང་མ་འདོད་ཡོན་གྱི།།

མི་གཙང་དྲི་ལ་ཅི་ཡང་འཁོར།།

དེ་སླད་མཁྱེན་པའི་གཞུར་སྦྱར་ཏེ།།

ལེགས་བཤད་འཕྲུལ་གྱི་ཉག་ཕྲན་ནི།།

བརྩེ་བའི་སྟོབས་ཀྱིས་འཕངས་པ་གང་།།

བདག་སྙིང་འབེན་ལ་ཟུག་པར་གྱུར།།

འོན་ཀྱང་ལས་ཀྱིས་བྱིན་པ་ཡིས།།

འདོད་ལ་བརྐམ་པའི་དྲི་མ་ནི།།

རས་ལ་ཞུགས་པའི་སྣུམ་བཞིན་དུ།།

སུ་ཞིག་འཕྲལ་དུ་དབྱུང་བར་ནུས།།

ཤེས་རྒྱུད་རྐང་བའི་མཐིལ་ཟུག་པའི།།

སྐྱོན་གྱིས་ཚེར་མ་འབྱིན་པའི་སླད།།

ལེགས་བཤད་རྒྱ་ཁབ་སྩལ་པ་ནི།།

བཀའ་དྲིན་ཆེ་ཞེས་ཕྱག་འཚལ་ལོ།།

ཀྱེ་ཧུད་ཐུབ་པའི་བསྟན་པ་ནི།།

ལྟག་ཆུ་ཆད་པའི་རྫིང་བུ་བཞིན།།

ལོག་པར་སྤྱོད་པའི་ཚ་ཟེར་གྱིས།།

ཉིན་རེ་ཉིན་རེར་སྐེམ་པར་བྱེད།།

གཞུང་ལུགས་ཆེ་ལ་སྦྱངས་པ་ཕལ།།

སྒྲུབ་པའི་ཚུལ་ལ་སྐྱོན་དུ་ལྟ།།

རབ་བྱུང་མགོ་རེག་ཚོགས་རྣམས་ཀྱང་།།

ཁྱིམ་གྱི་བྱ་བས་ཡོངས་སུ་བྲེལ།།

བསམ་གཏན་མཁན་པོར་རློམས་པ་དག །

རྙེད་དང་བཀུར་སྟིར་ཅི་ཡང་སྲེད།།

ཆོས་དང་མཐུན་པ་འགའ་མཆིས་ཀྱང་།།

ཉིན་སྐར་བཞིན་དུ་སྣང་མི་ནུས།།

དེ་ལྟའི་དུས་ངན་འདི་འདྲ་ལ།།

ཡོན་ཏན་ནོར་གྱིས་དབུལ་བ་ཡིས།།

བདག་འདྲས་བསྟན་དང་འགྲོ་བའི་དོན།།

སྒྲུབ་པར་འདོད་པ་བཞད་གད་རྒྱུ།།

ཁྱེད་ནི་ཐོས་པའི་ཕ་རོལ་སོན།།

བསླབ་གསུམ་ཡོན་ཏན་ཚོགས་ཀྱིས་གཏམས།།

ཡོངས་རྫོགས་བསྟན་ལ་མངའ་བརྙེས་ཕྱིར།།

བསྟན་ལ་བྱི་དོར་མཛད་པར་རིགས།།

ཐུབ་བསྟན་འཛིན་སྐྱོང་སྤེལ་བ་ཡི།།

མཁྱེན་བརྩེ་ནུས་པ་ལྡན་བཞིན་དུ།།

རླབས་ཆེན་གཞན་དོན་ཡལ་བོར་ནས།།

རང་དོན་སྒྲུབ་ལ་ཇི་ལྟར་དགྱེས།།

བགྲང་ཡས་རྒྱས་སྲས་དཔའ་བོ་རྣམས།།

འཁོར་བའི་ཉེས་དམིགས་གཟིགས་བཞིན་དུ།།

སྙིང་རྗེའི་དབང་གིས་སྲིད་པར་ནི།།

བསྐལ་བར་གནས་པ་མ་ལགས་སམ།།

དེ་ཕྱིར་སྲིད་པའི་སྐྱོན་གཟིགས་ཀྱང་།།

སྲིད་ལ་སྐྱོ་བ་མི་མངའ་བར།།

ཐར་འདོད་བྱེ་བའི་དཔུང་གཉེན་དུ།།

ཞབས་ཟུང་མི་གཡོ་བརྟན་པར་བཞུགས།།

སྤྱི་གཙུག་ཉི་ཟླའི་གདན་སྟེང་དུ།།

མགོན་ཁྱོད་བསྒོམས་ཏེ་གསོལ་འདེབས་ན།།

ཐུགས་རྗེའི་སྤྲིན་ཕུང་གཡོས་པ་ལས།།

བྱིན་རླབས་ཆར་ཆེན་འབེབས་པར་མཛོད།།

རྨོངས་པའི་བྲན་དུ་གྱུར་པ་དག །

གནས་སྐབས་བར་ཆད་ལས་གྲོལ་ཞིང་།།

ཆོས་ལྡན་བསམ་པ་འགྲུབ་པ་ཡི།།

སྐྱབས་འཇུག་གཡེལ་བ་མེད་པ་མཁྱེན།།

ཁྱོད་ཞལ་མྱུར་དུ་མཇལ་བ་དང་།།

ཁྱོད་གསུང་བདུད་རྩིའི་དགའ་སྟོན་གྱིས།།

བདག་བློའི་རྐང་དྲུག་སྟོབས་རྒྱས་ཏེ།།

བདེ་ཆེན་བརྩེ་དགའ་བགྱིད་པར་སྨོན།།

ད་ེལྟའི་འཕྲིན་ཡིག་སྤྲིན་སྔོན་ནི།།

དོན་གཉེར་རླུང་གིས་བསྐྱོད་པ་ལས།།

སྙན་ཚིག་འབྲུག་སྒྲ་སྒྲོགས་བཞིན་དུ།།

བདེན་བྲལ་ཕྱོགས་སུ་གཡོ་ཞིང་ཐལ།།

ཞེས་གསོལ་བ་འདེགས་རྟེན་མཚོན་བྱེད་ཙམ་དུ་མཛོད་བཏགས་བཅས་ཕུལ།། 

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn