ཀླུ་དབང་བསྟོད་པ་བཞུགས་སོ། །

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2017-11-10 20:40:20     རྩོམ་པ་པོ།   ཀུན་མཁྱེན་འཇམ་དབྱངས་བཞད་པ།    ཀློག་ཐེངས།  

157737254349650368.jpg

           མཐའ་ཡས་ནོར་རྒྱས་ལ་སོགས་ཀླུ་དབང་རྣམས། །ཡིད་བཞིན་རྒྱ་མཚོ་ཆེན་པོ་ཡངས་པ་ན། །ཡིད་འོང་རིན་ཆེན་སྣ་ཚོགས་ཀྱིས་བརྒྱན་པའི། །ཕོ་བྲང་འབྱོར་བ་ཆེན་པོའི་དབུས་ན་བཞུགས། །དབུ་ལ་སྦྲུལ་མགོ་གདེངས་ཀས་མཛེས་པའི་དབུས། །ཡིད་བཞིན་ནོར་བུས་བསམ་པ་རྫོགས་བྱེད་ཅིང༌། །བདག་གཞན་དོན་རྣམས་ཕུན་ཚོགས་འགྲུབ་པའི་གཏེར། །དབུལ་བའི་མུན་སེལ་འོད་འབར་རྣམས་ཀྱིས་བརྒྱན། །གདེངས་ཅན་འབྱོར་བའི་ཚོགས་རྣམས་ཐམས་ཅད་རྫོགས། །མཐུ་སྟོབས་རྫུ་འཕྲུལ་ཆེ་ལ་མངའ་བརྙེས་པའི། །ཀླུ་དབང་འཁོར་དང་བཅས་ལ་གུས་པས་འདུད། །ཀླུ་རྣམས་ལ་བསྟོད། བསྡུ་ན། གདེངས་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པ་མ་ལུས་སེལ་མཛད་ཅིང༌། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་བསྟོད་པར་བགྱི། །ཞེས་བསྟོད། ཡང་ན། གང་ཞིག་སྔོན་ནས་ཡོན་ཏན་ལེགས་སྦྱངས་པའི། །དུས་འདིར་དཔལ་འབྱོར་བསོད་ནམས་ཀྱིས་ཕྱུགས་ཤིང༌། །མཐུ་སྟོབས་རྫུ་འཕྲུལ་བསམ་གྱིས་མི་ཁྱབ་པ། །ཀླུ་ཆེན་བརྒྱད་པོ་འཁོར་དང་བཅས་ལ་བསྟོད། །ཀླུ་བརྒྱད་འཁོར་དང་བཅས་རྣམས་ཀྱིས། །ནས། ཡིད་ལ་འདོད་པ་ཀུན་འགྲུབ་ཤོག །ཅེས་འཕྲིན་ལས་བཅོལ། མཚོ་སྔོན་དྭངས་པའི་དབུས་སུ་ཆུ་སྐྱེས་དཀར། །རབ་ཡངས་དབུས་སུ་རི་བོང་འཛིན་གདན་སྟེང༌། །ཧཱུཾ་ཡིག་ལས་འཁྲུངས་བཻཊཱུར་མདོག་ལྡན་པའི། །བདག་གི་སྐྱབས་གཅིག་ཀླུ་དབང་ཁྱོད་ལ་བསྟོད། །འཁོར་གྱི་གཙོ་བོ་བྱང་སེམས་རྣམ་བཞི་དང༌། །གཡས་གཡོན་བྱང་སེམས་ཉན་ཐོས་དུ་མས་བསྐོར། །མདུན་དུ་ཀླུ་ཚོགས་ཡིད་བཞིན་ནོར་བུ་འབུལ། །འཁོར་དང་བཅས་ལ་གུས་པས་བསྟོད་པར་བགྱི། །ཞེས་བསྟོད། ཀླུ་ལ་མཆོད་པ་དང༌། གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པ་མ་ལུས་སེལ་མཛད་ཅིང༌། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་བསྟོད་པར་བགྱི། །གཟུངས་ལ་སྤེལ་ཚིག་བཏགས་པ་ལ་རྒྱུན་བྱ། །གཏོར་མ་བརླབས་ལ་བཅོམ་ལྡན་འདས་ལ་འབུལ། མཆོད་བསྟོད་དང་ཡིག་བརྒྱ་བཟླ། ཀླུ་ལ་གཏོར་མ་འབུལ། ཆོས་སྦྱིན་དང་འཕྲིན་ལས་བཅོལ། དཀར་གཏོར་བསྔོ།

 

                                                                                                                                 རྩོམ་སྒྲིག་པ། མང་ར་བ།

                  གསལ་འདེབས།

                             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                             དྲ་བའི་སྦྲེལ་ཐགhttp://www.tb1025.cn 


བརྒྱུད་འགོད།