༈ དཔོན་སློབ་རིན་པོ་ཆེ་འཇམ་དབྱངས་བཞད་པའི་རྡོ་རྗེའི་ཞབས་དྲུང་དུ། ཕྲན་བུ་ཆབ་མདོ་བའི་གྲྭ་རྒྱུན་ཟུང་གིས་གསོལ་བ་འདེབས་པའི་སྙིང་པོར། རྒྱལ་བ་གཉིས་པ་རྗེ་བཙུན་ཙོང་ཁ་པ་ཆེན་པོའི་བསྟན་འཛིན་གྱི་སྐྱེས་ཆེན་དམ་པ་བློ་བཟང་འཕགས་པ་བསོད་ནམས་ལྷུན་གྲུབ་དགེ་ལེགས་དཔལ་བཟང་པོའམ། ཡོངས་སུ་གྲགས་པ་འཕགས་པ་རྒྱལ་བ་རྒྱ་མཚོ་འདི་ཉིད་ཀྱི་འཁྲུངས་རབས་གསོལ་འདེབས་སྐྱེས་རབས་བཅུ་དགུ་པར་གྲགས་པ་ཞིག་ལྷ་དབང་ཆོས་རྒྱལ་མཚན་པས་མཛད་འདུག་རུང༌། གོ་རིམས་ཁུངས་ཐུབ་ངེས་ཅན་འགལ་མེད་ཡིན་མིན་སོམ་ཉི་ཡོད་འདྲ་བས་འཚོགས་འདོན་སོགས་མ་དར་བས། རང་རེའི་བསྟན་འཛིན་གྱི་སྐྱེས་ཆེན་དམ་པ་འདི་ལྟ་བུ་ལ་ངེས་ཅན་གྱི་འཁྲུངས་རབས་གསོལ་འདེབས་སོགས་བསྟན་འགྲོ་ལ་གང་ཅིར་དགོས་འདུག་ནའང་སྙིགས་དུས་སུ་བཀའ་བསྟན་ལ་མ་རྨོངས་པའི་མཁས་པ་ཉིན་སྐར་ལྟར་དཀོན་ཞིང༌། ལྷག་ཏུ་ཁམས་ཕྱོགས་སུ་ལུང་རིགས་སྨྲ་ཞིང་དམ་པ་རྣམས་ཀྱི་རྣམ་ཐར་ལ་རྟོགས་དཔྱོད་ཙམ་མེད་པར་འཁྲུངས་རབས་གསོལ་འདེབས་རྩོམ་པའི་སྤོབས་པ་དང་བྲལ་བས། བོད་ནའང་མཆོག་སྤྲུལ་ཟུང་གི་སྐུ་ཞབས་ལ་རྨོངས་པ་བདག་འདྲ་རྣམས་ཀྱིས་ཞུ་མ་ནུས་ཕྱིན། མདོ་དང་བསྟན་བཅོས་དམ་པ་རྣམས་ཀྱི་རྣམ་ཐར་གཟིགས་རྟོགས་བཅས་ཤེས་བྱ་ཐམས་ཅད་ལ་མཁས་པ་ཆེན་པོ་ནི་རང་ཕྱོགས་ལ་ཉིད་མ་གཏོགས་མི་འདུག་པས། སྤྲེལ་ལོ་འདི་ཀར་རྗེ་འདི་ཉིད་ཀྱི་དགོངས་སྙིང་སྐུ་འཕྲེང་ཡིན་འདུག་པར། འཕྲལ་ཁམས་ཕྱོགས་ཀྱིས་འགྲུལ་པར་ཡི་གེ་སོགས་བྱེད་ཅིང༌། ཆབ་ཁུལ་གྱི་གྲྭ་ཚང་ཆེ་ཕྲར་ཚོགས་འདོན་དུ་ཚུགས་ཨེ་ཐུབ་རྩིས་ལགས་པས། བསྟན་པ་དང་འགྲོ་བར་དགོངས་པ་གཏད་ནས། དམ་པ་འདི་ཉིད་ཀྱི་འཁྲུངས་རབས་གསོལ་འདེབས་རབ་ན་རྒྱས་པ་རྨད་བྱུང་སྐལ་བ་མ་དང༌། བསྡུས་པ་ན་མེ་ཏོག་ཕྲེང་མཛེས་ལྟ་བུ་དང་བརྟན་བཞུགས་ཤིས་བརྗོད་དང་བཅས་པ་ཞིག་གནང་བ་ཅི་ནས་ཀྱང་མཁྱེན་མཁྱེན་ལགས། གཟིགས་རྟེན་ཙམ་ཁ་བཏག མཚལ་སྲང་སུམ་ཅུ་དང་བཅས་ཆབ་ཁུལ་གྲྭ་རྒྱུན་དོན་གྲུབ་རྒྱ་མཚོ། ངག་དབང་དོན་ཡོན། འཕགས་པ་དབང་པོ་རྣམས་ཀྱི་ཟླ་ཚེས་དགེ་བར་གཤགས་ཆུང་ནས་གུས་པ་ཆེན་པོས་ཐལ་མོ་སྦྱར་ནས་ཕུལ་བའི་ཞུ་ཡིག།

    ༈ ཧྲཱིཿརབ་འབྱམས་རྒྱལ་བའི་ངོ་བོ་བློ་བཟང་གྲགས། །དབྱེར་མེད་འཇམ་དཔལ་གཉིས་པ་སློབ་དཔོན་ཆེར། །གུས་པས་གསོལ་འདེབས་བྱང་ཆུབ་བར་དུ་ནི། །འབྲལ་མེད་རྗེས་བཟུང་ཐུགས་རྗེའི་སྤྱན་གྱིས་སྐྱོངས། །ཆེད་མངགས་དྲི་བ་རྒྱ་དར་ཟུང་འབྲེལ་དང༌། །ཟ་འོག་རི་བཀྲ་ཡུལ་བཅས་ཉམས་མེད་འབྱོར། །ཉེ་ལམ་སྔོན་དུས་ངོས་ཀྱིས་ཕྲད་པའི་སྐབས། །ལེགས་ཉེས་འབྱུང་འགྱུར་ཇི་བཞིན་སྨྲས་པ་ལ། །ཉམས་ལེན་མཛད་པས་ལེགས་པའི་ལམ་དུ་གྱུར། །ཕྱིས་ཀྱང་བསྟན་དང་འགྲོ་བའི་དོན་གྱི་ཕྱིར། །དགོན་གནས་གསར་བསྐྲུན་གྱིས་མཚོན་རྣམ་དཀར་གྱི། །བཞེད་དོན་ཇི་ལྟར་འདོད་རྣམས་ཚུལ་བཞིན་དུ། །འབད་པ་ལྷུར་ལེན་བགྱིས་ན་འགྲུབ་པ་ཡི། །འཕྲིན་ལས་གྲོགས་སུ་ཆོས་སྲུང་ཚོགས་སྤྱི་དང༌། །བྱེ་བྲག་གཟུགས་མེད་དྲེགས་པ་རྡོག་ཆུང་ངས། །སྔོན་ཚེ་ཇི་ལྟར་ཁས་བླངས་མ་ཡེངས་པས། །སློབ་དཔོན་དམིགས་ཡུལ་སྦྱིན་བདག་འཁོར་བཅས་ཀྱི། །འདི་ཕྱིའི་དོན་རྣམས་འབད་མེད་འགྲུབ་པ་ཡི། །ལས་བཞིའི་འཕྲིན་ལས་ཡེངས་མེད་བྱ་ར་བྱེད། །ཁྱད་པར་གེགས་སེལ་རྒྱལ་བའི་བཀའ་འགྱུར་ཐོན། །སྲུང་མའི་ཚོགས་ལ་བསྐང་བ་འཕྲིན་བཅོལ་དང༌། །སྡེ་བརྒྱད་ཀླུ་གཉན་མི་མིན་འབྱུང་པོ་དང༌། དམ་ལ་གནས་དང་མི་གནས་ལྷ་འདྲེ་ལ། །སོ་སོར་དགྱེས་པ་བསྐྱེད་པའི་མཆོད་གཏོར་བཤམས། །ཁྱད་པར་འཇམ་མགོན་ཆེན་པོ་ཙོང་ཁ་པའི། །སྙིང་པོ་དམིགས་བརྩེ་མ་དང་ཡིག་དྲུག་ལ། །འབད་པ་ཆེད་བསྒྲིལ་བགྱིས་ན་བཞེད་དོན་རྣམས། །མྱུར་འགྲུབ་བསྟན་འགྲོའི་ཕན་བདེའི་གསོས་སུའང་ཕན། །ཞེས་པ་རྒྱ་དར་རལ་གྲི་ཤུགས་ལྡན་བཅས། །དམར་ཆའི་ཚེས་སུ་དགའ་གདོངས་ལྕོག་ནས་བྲིས། ། བཀྲ་ཤིས།

                                                                                                                  རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn