༈ བསོད་ནམས་ཀྱི་དཔུང་པས་འཛམ་གླིང་ཡངས་པོ་ཆོས་བཞིན་སྐྱོངས་པའི་མིའི་དབང་པོ་སའི་ཚངས་པ་ཆེན་པོའི་ཞབས་དྲུང་དུ། ཞུ་བ། ཚོགས་གཉིས་ཀྱི་རྒྱ་མཚོ་ལས་བྱུང་བའི་ལེགས་བྱས་ཀྱི་སྐུའི་ལྷུན་པོ་ཉེར་འཚེས་གཡོ་བ་མེད་པར་བརྟན་ཅིང་ཆོས་ཁྲིམས་སྲོང་བཙན་སྒམ་པོ་བཞིན་དུ་སྐྱོངས། བསྟན་འགྲོའི་ཕུན་ཚོགས་བླ་ནས་བླར་འདེགས་བཞིན་པའི་དབྱིངས་ནས་འདིར་ཡང་དགོན་གསར་བསྐྲུན་གྱི་ཞལ་འདེབས་ཀྱི་སྐྱེས་དང་བཅས་ཕེབས་པས་ངོས་མཇལ་ལྟ་བུའི་དགའ་བ་ཟང་ཟིང་མིན་པ་རབ་དགའི་ས་ལ་འགྲན་པ་ཐོབ། འདིར་མང་ཐོས་དགེ་སྦྱོང་རྒན་པོའང་དགོན་གསར་འདེབས་ཀྱི་བྲེལ་བ་སོགས་ཀྱིས་རྣམ་གཡེང་དང་དགེ་སྦྱོར་ཕྲན་བུ་སྤེལ་མར་མཆིས། ཆེད་འབུལ། ལོ་སྔོན་མའི་བཀའ་ཤོག་དང་ད་ལོའི་ཡི་གེ་དང་ངག་བཀོད་རྣམས་རྣ་བར་བྱུང་ཞིང་སྟོབས་དང་མཁྱེན་རབ་ཕུན་སུམ་ཚོགས་པའི་ྋརྒྱལ་བ་ཡབ་སྲས་ཀྱི་འཕྲིན་ལས་དང་བསྟན་གཞུང་ལ་རྒྱ། ཐམས་ཅད་མཐུན་པའི་སྤྱི་སེམས་རྣམ་དག་རྣམས་བཟང་འདུག་ཅིང་འགྲོ་མང་བདེ་བ་དང༌། ཆེན་པོ་རྣམས་མཐུན་པ་ཤིན་ཏུ་ལེགས་ཤིང༌། ད་དུང་བསྟན་འགྲོའི་དོན་ལ་གང་ཕན་དང༌། གཙོ་བོར་སྐུ་རིམ་ཁྲོ་བཅུ་དང་ཤཱ་ས་ན་དང་ཡ་མཱ་ར་ཛའི་སྔགས་རྒྱུན་དང༌། སྔར་བཞིན་འཇིགས་བྱེད་ཞི་རྒྱས་ཀྱི་འཁྲུལ་འཁོར་རྩལ་འདོན། དགའ་ལྡན་དུ་ཞྭ་ལུ་པས་བཙུགས་པ་ལྟར་མང་ཇར་ཚོགས་ཐེབ་རེ་ལ་དྲུག་ཅུ་བ་རེ་བསྔོ་བ་དང༌། ཆོས་རྒྱལ་གྱི་བསྐང་གསོལ་གང་མང་ཚུགས་དང་བར་ཆད་བསྲུང་བར་ཁྱད་ཆེ། འདིར་ཡང་སྤྱིའི་དགོན་སྡེ་ཞིག་བྱེད་རྩིས་ཡིན་པས་གྲྭ་རྒྱུན་ཡང་གང་ལྕོགས་རེ་སོགས་དང་སྦྱིན་བདག་གི་གཙོ་བོ་དེ་ནས་གནང་དགོས་ཤིང༌། ཐུགས་ཀྱིས་དཔྱད་པའི་འདིར་དགོན་ལ་གང་ཕན་དང་དགོན་གནས་འདི་རྒྱས་ཐབས་སོགས་ཐུགས་ལ་འདོགས་པར་ཞུ་ཞུ། ལམ་རིམ་འགྲེལ་བ་བྲེལ་དྲག་པ་དང་ཡ་གི་ནས་རྣམ་འགྲེལ་དང་ཕར་ཕྱིན་བསྐུལ་བ་སོགས་ཀྱིས། ཆེ་བ་བཞིའི་ཐད་ཙམ་མོ། ཞིབ་པར་བང་ཆེན་གཉིས་ཀྱི་ངག་ནས་ཞུ། སླད་ནས་ཕེབས་འོས་འཚལ། ཞུ་ཡིག་གཟིགས་རྟེན་བཀྲ་ཤིས་པའི་ལྷ་རྫས་ཉིན་བདེ་ཆེ་ལེགས། རྗེ་རིན་པོ་ཆེའི་བྲི་ཐང་ལེགས་པ་གཅིག །མཛོད་གོས་སྐྱེར་ཁ་འབྲུག་རིས་ཅན་ལེགས་པ། དར་ཡུག་བཅས། ཟླ་༡༠ ཚེས་༡༩ ལ་དགའ་ལྡན་དམ་ཆོས་བཤད་སྒྲུབ་དར་རྒྱས་བཀྲ་ཤིས་འཁྱིལ་ནས་ཕུལ། །

                                                                                                                        རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                   དྲ་བའི་སྦྲེལ་ཐགhttp://www.tb1025.cn