༈ ན་མཿསྭ་ར་སྭ་སྟྱཻ། སྟོབས་སོགས་ཡོན་ཏན་འབའ་ཞིག་ལས་གྲུབ་རྫོགས་སངས་རྒྱས། །བསམ་དང་གཉིས་སོགས་རྣམ་བྲལ་སྐྱོབ་པ་དམ་པའི་ཆོས། །མཁའ་རི་ཟླ་བའི་གྲངས་ལྡན་མཁྱེན་གཏེར་ཚོགས་ཀྱི་མཆོག །སྐྱབས་མཆོག་རིན་ཆེན་གསུམ་གྱིས་ཁྱོད་ལ་དུས་ཀུན་སྲུངས། །ཕན་བདེའི་དགེ་ལེགས་མ་ལུས་འབྱུང་བའི་གནས། །ཐུབ་བསྟན་རིན་ཆེན་ཕྱོགས་དུས་ཐམས་ཅད་དུ། །སྤེལ་ཞིང་དར་མཛད་དཀའ་ཆེན་བཅུ་སྨྲའི་བཤེས། །སྙིང་གི་དུམ་བུ་གང་དེའི་ཞབས་པད་ལ། །གང་དང་རིགས་རུས་སྙིང་རྣམས་མཉེས་གཤིན་པ། །སྙོམ་ལས་འཇམ་དབྱངས་བཞད་པས་མཆིད་ཞུ་བ། །གང་གི་ཐུབ་བསྟན་ནོར་འཛིན་ཟབ་རྒྱས་ཀྱི། །རིན་ཆེན་འབྱུང་གནས་སྐ་རགས་གཡོ་ལྡན་མ། །ཐུགས་སྟོབས་རུས་སྦལ་ཁུར་གྱིས་མི་ངལ་བར། །འདེགས་བཞིན་དབྱིངས་ནས་གསུང་ཤོག་གངྒཱའི་ཆབ། །སྙིང་རིང་ལྷ་ཆེན་རལ་བས་མ་བཟུང་བར། །བྱ་མ་རྟ་བ་བྷ་གཱི་ར་ཐས་འདིར། །ལེགས་པར་ཕེབས་པས་ཕྲན་བུའི་དགའ་བདེའི་རླབས། །ཉིན་མཚན་ཀུན་ཏུ་མཁའ་ལ་འཕྱོ་ཞིང་གཡོ། །དགེ་བར་སྒྲུབ་རློམ་བྱ་བཏང་རྒད་པོ་ཡང༌། །ལུས་ཀྱི་ལང་ཚོ་སྟོབས་རྣམས་མི་འཛིན་ཡང༌། །ཆོས་ཀྱི་འཁར་བར་བཏེགས་པའི་སེམས་ཀྱི་དར། །ཐུབ་བསྟན་པདྨོའི་གཉེན་དེར་བལྟ་ལ་བྲེལ། །མཁས་པའི་ལུགས་ཀྱི་དྲག་འགྲོས་བསྐྱོད་པ་འཛིན། །ཨེ་མ་ཐུབ་གསུང་མ་ལུས་ལྟ་ཅི་ཞིག །ཆ་ཙམ་རེས་ཀྱང་འཕྲལ་ཕུགས་འདོད་དགུ་སྩོལ། །མ་ལུས་རིན་ཆེན་བཞེངས་པའི་བསོད་ནམས་འདི། །ཀུན་མཁྱེན་རྒྱལ་བས་ཀྱང་ནི་ངོ་མཚར་བྱ། །དཔལ་ལྡན་རྒྱུད་རྒྱལ་དུས་འཁོར་རྩ་འགྲེལ་ལས། །བོད་སོག་ཡུལ་དང་ཡུལ་གཞན་དེ་དག་ན། །བཀའ་བསྡུ་བྱེད་པ་གཞན་དང་གཞན་དག་གིས། །བསྡུས་ཏེ་བྲིས་ཤིང་ཀླག་པར་འགྱུར་གསུངས་པའི། །ལུང་བསྟན་སྐལ་བ་བཟང་སྙམ་ཤིན་དགའ་རིགས། །ཁྱེད་ཅག་བཞེངས་མཁན་ལྟ་ཅི་བདག་ཅག་སོགས། །དགའ་བས་ཐལ་མོ་སྦྱར་བ་ཙམ་དག་ཀྱང༌། །འཛད་མེད་བསོད་ནམས་ཕུང་པོ་ལ་སྤྱོད་ཅེས། །བློ་གྲོས་དགའ་བདེ་ཡར་ངོའི་ཟླ་བཞིན་གྱུར། །དགའ་བ་ཀུན་གྱི་འབྱུང་གནས་དམ་ཆོས་ལ། །ཡང་ཡང་བསམ་པས་བསོད་ནམས་འཕེལ་བ་ཙམ། །འཇིག་རྟེན་མཁོ་དགུ་སྤེལ་མཁས་མེས་པོ་ཡིས། །བསྐལ་བའི་བར་དུ་ཆ་ཙམ་ག་ལ་ནུས། །

                                                                                                                རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn