ས་སྐྱོང་ཆོས་ཀྱི་རྒྱལ་པོ་ལྷ་དབང་རྒྱ་མཚོ་ལ་བསྟོད་པ།
མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ལེགས་སྤྱད་འཛིན་མའི་ལྟོ་བར་ཚོགས་གཉིས་ཀྱི། །གྲུ་ཆར་བདུད་རྩིའི་ཐིགས་པས་བྲན་པ་ལས། །ཕུན་ཚོགས་ཡལ་འདབ་བྱམས་བརྩེའི་གྲིབ་བསིལ་ཅན། །རྒྱལ་སྲས་རྒྱལ་པོའི་གཟུགས་ཅན་རྟག་ཏུ་རྒྱལ། །རིགས་མཐོ་ཤར་གྱི་རི་བོའི་གཙུག་ཕུད་ལ། །འོད་དཀར་གཞོན་ནུའི་རོལ་རྩེད་ལྷུརལེན་པ། །ཡོན་ཏན་ཆ་ཤས་རྟག་ཏུ་ཡོངས་གང་བས། །སྐྱེངས་བྱས་ཟླ་བ་ནམ་མཁའི་ནགས་སུ་བྲོས། །མཁྱེན་པའི་སྤྱན་སྟོང་(༦༨བ)ཡངས་པའི་ལྷ་དབང་བཞིན། །བརྩེ་བའི་གཏིང་ཟབ་ཡིད་བཞིན་རྒྱ་མཚོ་བཞིན། །ཐུབ་བསྟན་གྱེན་དུ་འདེགས་པས་ནོར་འཛིན་བཞིན། །སློང་བ་ཀུན་གྱི་རེ་སྐོང་དཔག་བསམ་བཞིན། །གང་གི་སྙན་གྲགས་གུར་གུམ་ཡི་གེའི་ཕྲེང་། །ཉིན་བཞིན་ཕྱོགས་ཀྱི་བུ་མོའི་འགྲམ་པ་ལ། །གྲུབ་རིགས་དགའ་མའི་ལག་པད་དམར་བའི་རྡུལ། །འཕོས་པའི་སྨུག་རྩི་བཞིན་དུ་ཅི་ཡང་མཛེས། །ལུང་རིགས་འོད་ཆགས་མཁའ་ཡི་རྒྱུ་སྐར་ལ། །འཕྱ་བ་གསལ་བྱེད་སྡེ་སྣོད་མུ་ཏིག་ཕྲེང་། །རྨོངས་པའི་མུན་པ་འཕྲོག་སླད་མགོན་ཁྱོད་ཀྱི། །ལེགས་བཤད་གཏེར་གྱུར་མགྲིན་པ་ཅི་ཡང་མཛེས། །ཕྱི་རོལ་ཡན་ལག་བཞི་ཡི་དཔུང་པ་ཡིས། །དབྱིག་གི་བློ་གྲོས་མ་འདིའི་ཁུར་བླངས་ཀྱང་། །ནང་དུ་རིམ་གཉིས་པད་གཞོན་བདུད་རྩི་ལ། །སྦྲང་རྩི་སྤྱོད་པ་བཞིན་དུ་དགྱེས་དགུར་རོལ། །གདོང་ལྔའི་ཁྲི་ལ་ཞབས་བཀོད་ཀ་ལཱ་པར། །དང་པོའི་སངས་རྒྱས་བདུད་རྩིའི་སྤྲོ་བ་ཅན། །རིགས་ལྡན་ཟླ་བ་དེ་དག་ངེད་དུས་སུ། །བརྩེ་བའི་མགྱོགས་འགྲོས་ཕྱོགས་འདིར་འོངས་པ་བཞིན། །ཨིནྡྲནཱི་ལའི་གོས་འཆར་གཏུམ་པོ་ལྟར། །དྲེགས་ལྡན་དྲག་པོ་གསུམ་གྱི་མ་རུངས་ཡིད། །རྣམ་པར་གནོན་པ་ཁྱོད་ཀྱི་བཀའ་ཡི་ཕྲེང་། །དམ་ཅན་རྒྱ་མཚོའི་ཚོགས་ཀྱིའང་སྤྱི་བོར་འཛིན། །ལེགས་སྤྱད་འོད་ཟེར་བྱེ་བ་ཕྲག་བརྒྱ་ཡིས། །ཀུན་ནས་ཁ་ཕྱེ་རྙོག་པ་མེད་པའི་རྡུལ། །ཚངས་དབང་ཟུར་ཕུད་དད་པས་བསྟེན་འོས་པ། །དངོས་གྲུབ་སྦྲང་རྩིའི་གནས་དེར་ཕྱག་འཚལ་ལོ། །གང་ཐུགས་ཤར་རིའི་རྩེ་ལས་ནོར་འཛིན་མ། །ཕན་བདེའི་ཀུ་(༦༩ན)མུད་གོས་ཀྱིས་འགེབས་པ་བཞིན། །གསལ་བར་འོངས་སོ་རྒྱུ་སྐར་རྒྱལ་པོའི་དཔལ། །ནམ་ཡང་ཉམས་པ་མེད་དེར་ཕྱག་འཚལ་ལོ། །དེ་ལྟར་བསྟོད་པའི་དགེ་བས་ལུས་ཅན་ཀུན། །ཐེག་མཆོག་བཤེས་གཉེན་དེད་དཔོན་མགོན་དང་བཅས། །རྣམ་དག་ཐུན་མོང་ལམ་གྱིས་རྒྱུད་སྦྱངས་ནས། །ཟབ་ཡངས་རྒྱུད་སྡེའི་རྒྱ་མཚོར་འཇུག་པར་ཤོག །སྐུ་གསུམ་དངོས་སུ་གྲུབ་བྱེད་རྫོགས་རིམ་མཆོག །རྒྱུད་ལ་སྐྱེ་བའི་སྨིན་བྱེད་མཐར་ཐུག་པ། །ཐ་མལ་སྐྱེ་ཤི་བར་དོའི་སྣང་ཞེན་ཀུན། །སྦྱོང་བྱེད་བསྐྱེད་པའི་རིམ་པ་མཐར་ཕྱིན་ཤོག །ཉི་ཟླའི་བགྲོད་པ་སྒྲ་གཅན་གྱིས་བཅོམ་པས། །ཚ་ཟེར་རེག་པས་ཟླ་ཤེལ་བཞུ་བའི་རྒྱུན། །མུན་པའི་ལམ་ནས་བགྲོད་པའི་འགྲོ་ལྡོག་གི །བདེ་སྟོང་ལྷན་ཅིག་སྐྱེས་པ་འགྲུབ་པར་ཤོག །འཁོར་འདས་རྩ་བ་གཉུག་མའི་ལུས་དང་སེམས། །ཆོས་ཀྱི་འཁོར་ལོ་ཆུ་སྐྱེས་ལྟེ་བར་ནི། །རྒྱུ་འཕྲུལ་དྲ་བ་སྐུ་རུ་ཡོངས་རྫོགས་པས། །མ་དག་སྐྱེ་འཆིའི་འཕྲང་ལས་གྲོལ་བར་ཤོག །རྣམ་ཐར་གསུམ་གྱི་ངང་དུ་རོ་གཅིག་པ། །ཚད་མེད་བཞི་ཡི་ངོ་བོ་ལྷན་ཅིག་སྐྱེས། །ཡེ་ཤེས་ལྔ་ཡི་རང་བཞིན་གོམས་པ་ལས། །དྲུག་པ་རྡོ་རྗེ་འཆང་དབང་ཐོབ་པར་ཤོག །ཅེས་ས་སྐྱོང་ཆོས་ཀྱི་རྒྱལ་པོ་ལྷ་དབང་རྒྱ་མཚོ་ལ་བསྟོད་པའི་ཚིགས་སུ་བཅད་པ་འདི་ནི་དེ་ཉིད་ཀྱི་ཆོ་རིགས་དང་ཆོས་ཀྱི་དབོན་སྲས་དམ་པ། སའི་དབང་ཕྱུག་ཆོས་ཀྱི་རྗེ་ནོར་འཛིན་རྒྱལ་པོའི་བཀས་བསྐུལ་བའི་ངོར་ཆོས་སྨྲ་བའི་བཙུན་པ་སྙན་དངགས་མཁན་དགེ་འདུན་རྒྱ་མཚོ་དཔལ་བཟང་(༦༩ན)པོས་ཉེ་བར་སྦྱར་བའོ།། །།
རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
