དུས་གསུམ་རྒྱལ་བ་ཀུན་གྱི་དགོངས་པའི་མཛོད། །དཔལ་ལྡན་མཁས་པ་དུ་མའི་གཙུག་གི་རྒྱན། །ཉི་མའི་གཉེན་གྱི་རིང་ལུགས་ཤིང་རྟ་ཆེ། །མཁན་ཆེན་སངས་རྒྱས་དཔལ་ལ་ཕྱག་འཚལ་ལོ། །ཤཱཀྱའི་ཏོག་གི་ལུང་རྟོགས་གཞལ་མེད་ཁང་། །ལུང་དང་རིགས་པའི་རྒྱལ་མཚན་མཐོན་པོ་ཅན། །འཕྲིན་ལས་ཆེན་པོས་བསྟན་པ་གསལ་མཛད་པ། །རོང་སྟོན་སྨྲ་བའི་སེང་གེར་ཕྱག་བགྱིད་དོ། །དཔལ་ལྡན་རི་ཁྲོད་ཞབས་ཀྱིས་བྱིན་གྱིས་བརླབས། །ཡེ་ཤེས་སྤྱན་གྱིས་གནས་ལུགས་མངོན་སུམ་གཟིགས། །མཁས་ཤིང་གྲུབ་པ་བརྙེས་པའི་ཆོས་ཀྱི་རྗེ། །དཔལ་ལྡན་སེང་གེའི་ཞབས་ལ་ཕྱག་འཚལ་ལོ། །མཁྱེན་རབ་འཇམ་པའི་དབྱངས་དང་མི་གཉིས་པས། །ལེགས་པའི་ལམ་བཟང་འགྲོ་ལ་གསལ་མཛད་པ། །ཟབ་དང་རྒྱ་ཆེའི་ཆོས་ཀྱི་འབྱོར་པ་ཅན། །འཇམ་དབྱངས་བླ་མ་མཆོག་ལ་ཕྱག་འཚལ་ལོ། །པད་དཀར་ལྟེ་བར་ཉིན་མོའི་དབང་ཕྱུག་སྟེང་། །ཞབས་སེན་འོད་ཆགས་ཁྲོ་བོའི་དབང་པོ་ནི། །འབུམ་ཕྲག་ཉི་མའི་འོད་ཀྱི་གོས་གྱོན་པའི། །གངས་རིའི་དབང་པོ་དང་མཚུངས་ཁྱོད་ལ་འདུད། །ཕྱག་གཡས་ཤེས་རབ་རལ་གྲིས་བདུད་དཔུང་འཇོམས། །ཕྱག་གཡོན་ཞགས་པས་བགེགས་ཀྱི་ཚོགས་རྣམས་འཆིང་། །དྲན་པ་ཡིས་ཀྱང་མཐའ་དག་འགྲོ་(༦༨ན)འདི་ལ། །བློ་གྲོས་སྣང་བ་མཆོག་སྩོལ་ཁྱོད་ལ་འདུད། །ཀེ་ལ་ཤ་ཡི་ས་འཛིན་ལྟར་བརྗིད་སྐུ། །ཟབ་མོའི་རིག་སྔགས་འབྲུག་ལྟར་སྒྲོག་པའི་གསུང་། །མཁྱེན་བརྩེ་མཐར་ཕྱིན་ཟབ་གསལ་ཡེ་ཤེས་ཐུགས། །ལྷག་པའི་ལྷ་མཆོག་མི་གཡོ་མགོན་ལ་བསྟོད། །ཁྱོད་སྐུ་ཡིད་ལ་དྲན་པའི་ཏིང་འཛིན་དང་། །ཟབ་མོའི་རིག་སྔགས་བཟླས་བརྗོད་ལྷུར་ལེན་པ། །བདག་ལ་མཐའ་ཡས་ཕྱི་ནང་རིགས་གནས་ཀུན། །ཇི་བཞིན་གཟིགས་པའི་ཤེས་རབ་སྩལ་དུ་གསོལ། །ཕྱི་ནང་བདུད་སྡེའི་བར་ཆད་ཚོགས་རྣམས་དང་། །མཚན་མའི་རྣམ་རྟོག་རླུང་གིས་མི་གཡོ་བར། །སྨྲ་བསམ་བརྗོད་བྲལ་ལྷན་སྐྱེས་གདོད་མའི་གཤིས། །མངོན་དུ་གྱུར་པའི་ཡེ་ཤེས་བདག་ལ་སྩོལ། །ཞེས་པ་འདི་ནི་རིག་གནས་མཐའ་དག་གི་དབང་ཕྱུག་དཔལ་རྣམ་པར་གྲོལ་བའི་སྡེས་བསྐུལ་བའི་ངོར་དགེ་འདུན་རྒྱ་མཚོའི་དཔལ་གྱིས་དགའ་ལྡན་ཕོ་བྲང་དུ་སྨྲས་པའོ།། །།

                                                                                                                                                                                                                                                 རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
          གསལ་འདེབས།
     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
               དྲ་བའི་སྦྲེལ་ཐགhttp://www.tb1025.cn