མཚན་སྒྲོག་ཚོགས་པའི་མཁན་བརྒྱུད་རྣམས་ལ་མཚན་སྤེལ་གྱི་སྒོ་ནས་གསོལ་འདེབས།
ཨོཾ་སྭ་སྟི། ཚོགས་གཉིས་རིན་ཅེན་ཆུ་ཤེལ་ལས་འཁྲུངས་ཤིང་། །དཔལ་ལྡན་མཁྱེན་བརྩེའི་དཀྱིལ་འཁོར་རབ་ཏུ་རྒྱས། །སྐལ་བཟང་ཀུ་མུད་མཛེས་པའི་གཉེན་གཅིག་པུ། །སྨྲ་བའི་(༦༥ན)ཟླ་བ་མཆོག་ལ་གསོལ་བ་འདེབས། །དཔལ་ལྡན་བློ་གྲོས་ལུས་སྟོབས་རབ་ཏུ་རྒྱས། སྨྲ་བའི་སེང་གེ་རིགས་པའི་གད་རྒྱངས་ཅན། །གཞུང་ལུགས་རིན་ཅེན་རལ་པའི་ཁུར་གྱིས་བརྗིད། །དཔལ་ལྡན་བླ་མའི་ཞབས་ལ་གསོལ་བ་འདེབས། །དམ་པ་དུ་མའི་མགོན་གྱིས་ལེགས་པར་བཟུང་། །རིན་ཅེན་བྱང་ཆུབ་སེམས་གཉིས་ཐུགས་ལ་འཁྲུངས། །མཐའ་ཡས་གདུལ་བྱའི་འདྲེན་པ་བླ་ན་མེད། །བསྔགས་འོས་བཤེས་གཉེན་མཆོག་ལ་གསོལ་བ་འདེབས། །དཔལ་ལྡན་མཁས་པའི་ལེགས་བཤད་རིན་ཅེན་གྱིས། །གང་གི་རྣམ་དཔྱོད་མགྲིན་པ་རབ་ཏུ་མཛེས། །བློ་ཆེན་སྐྱེ་བོ་རྣམས་ཀྱིས་བལྟ་བའི་འོས། །དཔལ་ལྡན་བླ་མའི་ཞབས་ལ་གསོལ་བ་འདེབས། །གང་གི་མཁྱེན་པའི་ནམ་མཁའ་ཡངས་པ་ལ། །ཕུལ་བྱུང་ལུང་རིགས་ཉིན་མོའི་དབང་ཕྱུག་ནི། །དཔལ་ལྡན་འཕྲིན་ལས་བཟང་པོའི་འོད་སྟོང་ཅན། །བསྟན་པའི་ཉི་མ་མཆོག་ལ་གསོལ་བ་འདེབས། །འགྲོ་བ་ཀུན་ལ་དགའ་བདེའི་དཔལ་སྟེར་ཞིང་། །རྡོ་རྗེའི་ཐུགས་མངའ་བསླབ་གསུམ་རྒྱན་གྱིས་མཛེས། །གང་གི་ཡོན་ཏན་མཁས་པས་བསྔགས་འོས་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ལུང་རྟོགས་ནོར་བུས་ཡོངས་གང་ཕ་མཐའ་བྲལ། །ལེགས་བཤད་དབུ་བ་དཀར་པོའི་དོ་ཤལ་ཅན། །ཀུན་དགའི་རིན་ཅེན་མ་ལུས་འབྱུང་བའི་གནས། །བཤེས་གཉེན་རྒྱ་མཚོ་ཆེ་ལ་གསོལ་བ་འདེབས། །ལྷག་བསམ་རབ་དཀར་ཤཱཀྱའི་བསྟན་པ་ལ། །བཀའ་གདམས་(༦༥བ)ཆོས་ཀྱི་རྒྱལ་མཚན་མཐོན་པོར་འཛིན། །རྨད་བྱུང་གྲགས་པའི་བ་དན་གཡོ་བ་ཅན། །དཔལ་ལྡན་བླ་མའི་ཞབས་ལ་གསོལ་བ་འདེབས། །དཀོན་ཅོག་རིན་ཅེན་ཅོད་པན་སྤྱི་བོར་འཛིན། །རྨད་བྱུང་ཡོན་ཏན་རྒྱ་མཚོའི་ལྗིང་ན་གནས། །འཕྲིན་ལས་བཟང་པོའི་ནོར་བུའི་འོད་ཟེར་འབར། །བཤེས་གཉེན་ཀླུ་དབང་མཆོག་ལ་གསོལ་བ་འདེབས། །གཞུང་ལུགས་དུ་མའི་དོན་ལ་བློ་གྲོས་ནི། །ལོག་རྟོག་རླུང་གིས་མི་གཡོ་རབ་ཏུ་བརྟན། །མཁས་པའི་མདུན་སར་འདུག་ལ་དབང་བ་ཅན། །དཔལ་ལྡན་བླ་མའི་ཞབས་ལ་གསོལ་བ་འདེབས། །དམ་པ་དུ་མའི་ཆོས་ཀྱི་གདན་ཁྲི་ལ། །རྣམ་པར་བཀོད་པའི་གྲགས་པ་གསལ་བ་ཅན། །བསོད་ནམས་རྒྱ་མཚོའི་དཔལ་གྱིས་མངོན་པར་མཐོ། །བཟང་པོའི་སྐྱེས་བུ་ཁྱོད་ལ་གསོལ་བ་འདེབས། །ཞེས་མཚན་སྒྲོག་ཚོགས་པའི་མཁན་བརྒྱུད་རྣམས་ལ་མཚན་སྤེལ་གྱི་སྒོ་ནས་གསོལ་འདེབས་འདི་འདྲ་ཞིག་དགོས་སོ་ཞེས་གནས་བརྟན་སེང་གེ་བས་བསྐུལ་བའི་ངོར་ཆོས་སྨྲ་བ་དགེ་འདུན་རྒྱ་མཚོའི་དཔལ་གྱིས་ཤར་འོལ་ཁ་སྟག་རྩེའི་ཕོ་བྲང་ཆེན་པོའི་གཟིམས་ཁང་ཤམྦྷ་ལར་སྦྱར་བ་དགེ་ལེགས་སུ་གྱུར་ཅིག། །།
རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
